31 March 2012

♥...♥

.
25 التعليقات




كعادتك
تبقى سر سعادتى الدائمه
بحُبك
وحنانك
وقُربك



readmore »»

24 March 2012

عن "جنونى" اتحدث !

.
30 التعليقات





هذا البوست ليس له اى علاقه بكاتبه باقى التدوينات الاخرى
حاكم انا لحظات جنانى بتبقى مالهاش اى علاقه بلحظات عقلى مطلقاً
اللى يحب يعرفنى وانا عاقله بس يبقى بلاش يقرأ البوست ده
واللى يحب يعرفنى وانا مجنونه يبقى عليه العوض ومنه العوض
وانا مش مسؤله عن اللى هيحصل انا قولت اهو




لما من 3 سنين كتبت البوست ده
انا متاكده ان فى ناس كتير افتكرونى يعنى انى احم احم مجنونه
هو انا اه مجنونه مش شرط "بيه" بس يعنى
بس مجنونه انا عارفه
كل ما حد بيسألنى فى الموضوع ده !!
لازم اقعد اشرح انا بحب "اسمع" فضل ليه؟
قولت اسمع اهو مش بحبه عشان مش اضرب ها ;)
القصه بدأت معايا من وانا فى اوله ثانوى
ماكنتش اصلا ليا مطرب معين شايفاه الاحسن عندى
بس شوفته مره فى برنامج كان مهتم اوووى يطلع كل الناس اللى بيساعدوه من اقل واحد لـ أهم واحد
وملفف ياعينى المذيع وراه عشان يجبله كل شخص ورا الكواليس
وده نادراً لما بيحصل
اهتميت انى اقرا عنه واسمعه
مش شرط ان الواحد يكون بيحب مطرب عشان صوته او اغانيه وبس
لكن الشخصيه بتفرق اوى
ما هو ماقتنعنيش ان مطرب اخلاقه زفت واغانيه حلوه الناس هتحبه ويمشوا على مبدأ هذه نقره وتلك اخرى
 
لما قال انه هيعتزل من 3 سنين وحدد انه فعلا بعد المده دى هيحج ويعتزل
انا صراحه مش توقعت
لان قليل جدااااا اللى عملوا كده وهما فى عز شهرتهم
وخصوصا بقى فى الزمن اللى احنا فيه ده
لما بطلت اشوف حماسه على المسرح
عملت مش واخده بالى
لما فجأه بقى يعمل اغانى دينيه لاول مره
 كمان مش توقعت
لما فجأه اتجه للسياسه وشارك فى المظاهرات الموجوده فى لبنان ضد بشار الاسد
بردو مش توقعت
ولحد ما شوفت بعينى لقائه على قناه الرحمه اللى بيقول فيه بلسانه انا اعتزلت
وانا بردو بحاول وبضغط على نفسى انى ماصدقش

بعد احتلالك المركز الاول لـ "أعجابى" و "جنانى" على مدار 11 سنه
ولانى كنت دايماً مبسوطه انك انت بالذات مطربى المفضل
عشان انت معروف باخلاقك واحساسك
مش بقصه شعرك الجديده ولا ببنطلونك اللى مش عارفه شكله ايه والا النيولوك اللى عامله فين  
ولانك كنت دايماً بتقول حاجه جوايا انا مش عارفه اقولها فى كل موقف بيعدى عليا
انا فخوره جدا انك انت كنت ومازلت مطربى المفضل برغم اعتزالك
اللّهم تقبل توبة فضل شاكر وثبته علي الحق حتي الممات
و إهدينا جميعاً

كام سؤال بقى على الهامش بيطرحوا نفسهم غصب عن عينى 
هى ليه سلسلتى اللى عليها اسمك واللى فى نفس يوم خبر اعتزالك تتقطع لاول مره من وقت ما لبستها من 10 سنين.. ده معناه ايه ؟!!؟
هو انا ممكن اغير اتجاهاتى وابطل اسمع اغانى واسمع اغانى دينيه بس زى ما انت هتغنى اغانى دينيه بس ؟
هو انا ليه دلوقتى بالذات كل ما اسمع اغنيه ليك بفتكر كل لحظات حياتى كأنها شريط بيعدى قدامى؟
 
وأخيراً ..
قال فضل شاكر على تويتر:
"نصيحة إلى الشباب: لا تحلم بأن تكون مثل المغني والمغنيه 
فقلوبهم مليئه بالأوجاع والهموم ويصطنع السعاده وهو حزين والسبب البعد عن الله."

****


ايه يعنى لما اكون مش بحب ايس كريم الشيكولاته ؟!!؟
بالرغم من ان عشقى الابدى هى الشيكولاته !!

  ****


وايه يعنى لما اقفل دولابى كله بأقفال عشان مش عايزه حد يفتح حاجتى !

 ****


سر الفوبيا اللى عندى من البحر واللى ماحدش يعرفه لدلوقتى
واللى كل الناس بتسألنى نفس السؤال ده
انتى اكيد حصلك موقف خلاكى تخافى من الميه كده
لا والله يا جدعان مش حصلى حاجه
اومال بتخافى منها لوحدك من غير سبب؟
اه ايه المشكله يعنى ؟!؟
هو اه مفيش سبب دى حقيقه
بس السبب جوايا انا مش موقف معين
الواحد لما بيكون فى البحر مش بيكون فى اى حاجه محوطاه
لو اتكعبل او وقع مش هيلاقى غير الميه فى وشه يروح طراااخ فيها
لو بيعرف يعوم يبقى تمام اوى
ولو مش بيعرف زى حالاتى يبقى بسم الله ونقرأ الفاتحه
البحر بالنسبه ليا معناه عدم الامان
مفيش حاجه فيه اقدر اعتمد عليها غيرى انا
وده اللى بيخلينى اول ما احط رجلى فى البحر ماقدرش اتنفس
عشان كده لا بقدر انزل البحر
ولا امشى على كوبرى تحته ميه
لان مفيش حاجه قدامى غير السما من فوقى والبحر من تحتى
انا بخاف اكون لوحدى في البحر
 بخاف لما اقع مالقاش حاجه امسك فيها

***


لما بوصل لاقصى حالات الاكتئاب
ببقى مش عايزه اخرج
احساسى باللى حواليا بيقل
بيكون الصمت هو الشئ الوحيد اللى بتفنن فى اتقانه وقتها
ولو كان اجبارى انى اخرج
مش بقدر البس غير اسود
مابقدرش احس ببهجه الالوان التانيه
وكأنه مش من حقى !!

****


انا اصلا شخصيه حساسه للاكتئاب جدااا
مش نكديه عشان ماحدش يفهمنى غلط
ولا بتلكك عشان ازعل والا اضايق
بس احساسى رهيف بقى انا اعمله ايه ^_^






readmore »»

20 March 2012

حين نتشح السواد !!

.
28 التعليقات




حين تتشح اجسادنا بالسواد
تتبدل ملامحنا كثيابنا
وتتبدل قلوبنا بأخرى
اكثر رقه
اكثر براءه
اكثر خشوع
و يبقى شئ واحد يربط بيننا قابع هناك لا يتبدل...
 !! دمعاتنا



readmore »»

14 March 2012

كلام والسلام ... كلاكيت 14 مره

.
27 التعليقات



لما بقابل اشخاص معينين فى طريقى
هما اخر اشخاص بتمنى اقابلهم
بيبقى نتيجه ده ان بطنى بتوجعنى اوى !!
زى ما بتوجعنى لما بكون راكبه عربيه 
ونازله من على كوبرى بسرعه اوى 
حاسه ده معناه ان الاشخاص دول 
بينزلوا من نظرى وقلبى بنفس السرعه .. واكتر !

**********

لما بقعد افكر وافكر لحد ما اتخنق وازهق
عشان اعرف اوصل أيه اللى وصلنا لكده
ومابوصلش !
بتأكد ان ده اللى كان المفروض يحصل
باختلاف الظروف والاوقات والاسباب
بس ده اللى ربنا كاتبه
وكان لازم يكون

**********

لما احسب الاشخاص اللى فى البيت
واللى محتاجه اجبلهم هدايا بسيطه نفسى اجبهالهم من غير ما يعرفوا
واحسبك معاهم !
يبقى انا وبعد كل الفتره دى 
لسه مش قادره استوعب بردو انك مابقتش موجود

**********

لما بنحط عنينا على حاجه 
عايزين نوصلها 
يمكن بنضحى بكتير اوى عشانها
بس للاسف مش بنقدر نفهم ان لو الحاجه دى اصلا من نصيبنا
كانت هتيجى بطرق تانيه كتير اوى يمكن اسهل مما نتخيل

**********

لما ابسط الحاجات تفرحك
وفى نفس الوقت ابسط الحاجات تحبطك وتضايقك
يبقى اكيد العيب فيك
مش فى اى حاجه تانيه حواليك

**********

لما بعد كل موقف يحصل يضايقنى او يحبطنى او يضيع فرحه عايشاها
ويكون اول كلام تقولهولى
كفايه اننا مع بعض ومش عايزين اى حاجه تانيه
و تحاول تحققلى كل اللى عايزاه
بتأكد ان ربنا بعتك ليا
عشان تكون جنبى فى الوقت ده بالذات من حياتى
لانى متأكده انى ماكنتش هاعرف اعدى الوقت ده من غيرك


readmore »»

01 March 2012

My Sweet Home ♥

.
34 التعليقات




السنادى مدونتى بقى عندها 5 سنين :))
اوى مره افكر انى احتفل بوجود المدونه وبدأيه كتابتى فيها
يمكن لانى مش كنت مبسوطه بوجودها اد ما انا مبسوطه بيه دلوقتى
مبسوطه  انها ادتنى فرصه انى اخرج حاجات كتير من جوايا
مبسوطه لانها كانت طريق عشان اقابل ناس 
بقى وجودهم مهم بالنسبه ليا

لما بشوف اول مواضيعى فى المدونه هنا
واشوف دلوقتى
بكتشف بجد الفرق
فى اختلاف جذرى فى كل حاجه
طريقه كتابتى الاول ماكنتش بقدر اكتب فى موضوع بطريقه كويسه او اقدر اوصل افكار كويس
انما دلوقتى بقدر بشكل احسن بكتير من الاول
حتى ارائى مختلفه
وافكارى مختلفه
وحياتى مختلفه

الاول كنت ببقى مكسوفه من اى حاجه بكتبها
انى اكتب كل حاجه بحسها من غير قيود
ده بالنسبه ليا شئ مش سهل

اول ما كتبت هنا
ماكنتش بقول لحد انى عامله مدونه اصلا
ولا كان حد بيشوف اللى بكتبه
ولا انا كنت بحب حد يقرألى
ويمكن ده كان سبب انى ابعد فتره عن المدونه
بس مع الوقت
بدأت ابقى مبسوطه جدا باللى بكتبه
وابقى مبسوطه اكتر لما الاقى حد بيشوف اللى بكتبه ده 
ويعلق عليه او يعجبه و يشجعنى

اكبر سبب للتغير ده
كانت حمله التدوين اللى حصلت فى شهر يونيو
غيرتنى وغيرت طريقتى وغيرت مدونتى نفسها
ادتنى ثقه ودفعه فى اى حاجه بكتبها حتى لو مش مهمه


بقيت فخوره اوى لما اقول لحد انى عندى مدونه
بيتى الصغيور اللى ماحدش ببيتكلم فيه غيرى
بيتى اللى ماحدش بيغير ترتيبه ويظبطه غيرى
بيتى اللى بشخبط على كل حيطه فيه من غير ما حد يقولى عيب كده
بيتى اللى بحب اقعد فيه وقت ما ابقى مبسوطه اوحزينه اومجنونه
بيتى اللى ماحدش يقدر يخرجنى منه
بيتى اللى انا جواه وهو حته منى

مبسوطه بكل الناس اللى بتعلق عندى 
لانهم بجد بيزيدوا حاجه فى  تفكيرى
مبسوطه بكل حد انا عرفت مدونته 
لانه بيزيد حاجه فى اهتماماتى وشخصيتى ونظرتى لكل شئ حواليا
مبسوطه بكل المدونات اللى عرفتها
واللى مهما اوصف انا كنت مبسوطه بيهم دا ايه مش هاعرف
وخايفه اقول اسم حد عشان مش انسى حد تانى
بس بجد كل حد عرفته عن طريق المدونه 
انا بعتز جدا بيه وبمعرفتى بيه 
حتى لو كانت عن طريق المدونات بتاعتنا بس

مبسوطه بقى اكتر ان اليوم ده
متوافق كمان مع نفس اليوم اللى كان فيه قرايه فاتحتى
دايماً الحاجات الجميله بتيجى مع بعضها

readmore »»
 

FaceBook Comments

wibiya widget