24 March 2012

عن "جنونى" اتحدث !

.





هذا البوست ليس له اى علاقه بكاتبه باقى التدوينات الاخرى
حاكم انا لحظات جنانى بتبقى مالهاش اى علاقه بلحظات عقلى مطلقاً
اللى يحب يعرفنى وانا عاقله بس يبقى بلاش يقرأ البوست ده
واللى يحب يعرفنى وانا مجنونه يبقى عليه العوض ومنه العوض
وانا مش مسؤله عن اللى هيحصل انا قولت اهو




لما من 3 سنين كتبت البوست ده
انا متاكده ان فى ناس كتير افتكرونى يعنى انى احم احم مجنونه
هو انا اه مجنونه مش شرط "بيه" بس يعنى
بس مجنونه انا عارفه
كل ما حد بيسألنى فى الموضوع ده !!
لازم اقعد اشرح انا بحب "اسمع" فضل ليه؟
قولت اسمع اهو مش بحبه عشان مش اضرب ها ;)
القصه بدأت معايا من وانا فى اوله ثانوى
ماكنتش اصلا ليا مطرب معين شايفاه الاحسن عندى
بس شوفته مره فى برنامج كان مهتم اوووى يطلع كل الناس اللى بيساعدوه من اقل واحد لـ أهم واحد
وملفف ياعينى المذيع وراه عشان يجبله كل شخص ورا الكواليس
وده نادراً لما بيحصل
اهتميت انى اقرا عنه واسمعه
مش شرط ان الواحد يكون بيحب مطرب عشان صوته او اغانيه وبس
لكن الشخصيه بتفرق اوى
ما هو ماقتنعنيش ان مطرب اخلاقه زفت واغانيه حلوه الناس هتحبه ويمشوا على مبدأ هذه نقره وتلك اخرى
 
لما قال انه هيعتزل من 3 سنين وحدد انه فعلا بعد المده دى هيحج ويعتزل
انا صراحه مش توقعت
لان قليل جدااااا اللى عملوا كده وهما فى عز شهرتهم
وخصوصا بقى فى الزمن اللى احنا فيه ده
لما بطلت اشوف حماسه على المسرح
عملت مش واخده بالى
لما فجأه بقى يعمل اغانى دينيه لاول مره
 كمان مش توقعت
لما فجأه اتجه للسياسه وشارك فى المظاهرات الموجوده فى لبنان ضد بشار الاسد
بردو مش توقعت
ولحد ما شوفت بعينى لقائه على قناه الرحمه اللى بيقول فيه بلسانه انا اعتزلت
وانا بردو بحاول وبضغط على نفسى انى ماصدقش

بعد احتلالك المركز الاول لـ "أعجابى" و "جنانى" على مدار 11 سنه
ولانى كنت دايماً مبسوطه انك انت بالذات مطربى المفضل
عشان انت معروف باخلاقك واحساسك
مش بقصه شعرك الجديده ولا ببنطلونك اللى مش عارفه شكله ايه والا النيولوك اللى عامله فين  
ولانك كنت دايماً بتقول حاجه جوايا انا مش عارفه اقولها فى كل موقف بيعدى عليا
انا فخوره جدا انك انت كنت ومازلت مطربى المفضل برغم اعتزالك
اللّهم تقبل توبة فضل شاكر وثبته علي الحق حتي الممات
و إهدينا جميعاً

كام سؤال بقى على الهامش بيطرحوا نفسهم غصب عن عينى 
هى ليه سلسلتى اللى عليها اسمك واللى فى نفس يوم خبر اعتزالك تتقطع لاول مره من وقت ما لبستها من 10 سنين.. ده معناه ايه ؟!!؟
هو انا ممكن اغير اتجاهاتى وابطل اسمع اغانى واسمع اغانى دينيه بس زى ما انت هتغنى اغانى دينيه بس ؟
هو انا ليه دلوقتى بالذات كل ما اسمع اغنيه ليك بفتكر كل لحظات حياتى كأنها شريط بيعدى قدامى؟
 
وأخيراً ..
قال فضل شاكر على تويتر:
"نصيحة إلى الشباب: لا تحلم بأن تكون مثل المغني والمغنيه 
فقلوبهم مليئه بالأوجاع والهموم ويصطنع السعاده وهو حزين والسبب البعد عن الله."

****


ايه يعنى لما اكون مش بحب ايس كريم الشيكولاته ؟!!؟
بالرغم من ان عشقى الابدى هى الشيكولاته !!

  ****


وايه يعنى لما اقفل دولابى كله بأقفال عشان مش عايزه حد يفتح حاجتى !

 ****


سر الفوبيا اللى عندى من البحر واللى ماحدش يعرفه لدلوقتى
واللى كل الناس بتسألنى نفس السؤال ده
انتى اكيد حصلك موقف خلاكى تخافى من الميه كده
لا والله يا جدعان مش حصلى حاجه
اومال بتخافى منها لوحدك من غير سبب؟
اه ايه المشكله يعنى ؟!؟
هو اه مفيش سبب دى حقيقه
بس السبب جوايا انا مش موقف معين
الواحد لما بيكون فى البحر مش بيكون فى اى حاجه محوطاه
لو اتكعبل او وقع مش هيلاقى غير الميه فى وشه يروح طراااخ فيها
لو بيعرف يعوم يبقى تمام اوى
ولو مش بيعرف زى حالاتى يبقى بسم الله ونقرأ الفاتحه
البحر بالنسبه ليا معناه عدم الامان
مفيش حاجه فيه اقدر اعتمد عليها غيرى انا
وده اللى بيخلينى اول ما احط رجلى فى البحر ماقدرش اتنفس
عشان كده لا بقدر انزل البحر
ولا امشى على كوبرى تحته ميه
لان مفيش حاجه قدامى غير السما من فوقى والبحر من تحتى
انا بخاف اكون لوحدى في البحر
 بخاف لما اقع مالقاش حاجه امسك فيها

***


لما بوصل لاقصى حالات الاكتئاب
ببقى مش عايزه اخرج
احساسى باللى حواليا بيقل
بيكون الصمت هو الشئ الوحيد اللى بتفنن فى اتقانه وقتها
ولو كان اجبارى انى اخرج
مش بقدر البس غير اسود
مابقدرش احس ببهجه الالوان التانيه
وكأنه مش من حقى !!

****


انا اصلا شخصيه حساسه للاكتئاب جدااا
مش نكديه عشان ماحدش يفهمنى غلط
ولا بتلكك عشان ازعل والا اضايق
بس احساسى رهيف بقى انا اعمله ايه ^_^






30 comments

مصطفى سيف الدين said...

بوست خاص جدا بيتكلم عنك اوي
ربنا يوفق فضل شاكر في حياته بعد الاعتزال
و مادام مش بتحبي ايس كريم الشيكولاتة ممكن اخده انا
ربنا يبعد عنك الاكتئاب و يكملك بجنانك قصدي بعقك :)
تحياتي

سواح في ملك اللــــــــــــــــــه- said...

اما حكاية المطرب دي فربنا يهديه

ويكرمه

اما الباقي

ايس كريم بالشيكولاته

وانك بتحبي تقفلي الدولاب

بيوضح انك انسانة خجولة وكتومة لاقصي الحدود

تحيتي

faroukfahmy58 said...

هذا ليس جنان والذى لا يحس بابحساسك المرهف هوه اللى مجنون
فضل شاكر فنان حتى التخاع وللاسف تخاعه نخع عليه وركبه زى ماركب فنانين كثيرين .......... الغناء مش حرام ايام الرسول (ص) استقبلوه عند دخول المدينه بالغناء

- الناس اذواق حتى فى تناول الطعام
- الفوبيا صفة تلازم بعض الناس من شدة حساسيتهم يعتى مش باردين ومش معقول واحده تحمل كل هذه الصفات تبقى نكدية
ارتاح الى ملامك قوى

Lady E said...

كل مرة بقرأ لك بوست بوح وحكي بفرح اننا شبه بعض كده :)

كنت مبحبش برضه أيس كريم الشوكولاته مع اني بعشق الشوكولاتة جدااااااا أحيانا دلوقتي باكل أيس كريم شوكولاته :)

بعشق البحر :P
برغم ان كلامك حقيقي عنه بس أنا بحسه بيحتويني مش بخاف منه على اد ما بحبه لكن لما أكون راكبة سفينة بقلق :)

اللون الأسود والاكتئاب ، بجد بتقولي اللي في وسط زحمة الحياة بنسى أقوله أو يمكن بتجاهله

دمتي مزقططة ومبدعة وحياتك بحلاوة الشوكولاته

Miss LoZa said...

أنا بجد فرحت جدا اصلا لما عرفت أن فضل اعتزل
بجد أنا بحترمه من زمان جدا .. بحسه مش مطرب سيكى ميكى كده لا راجل بجد
عقبال الباقى

أنا بموت فالشوكولاتة بكل أشكالها .. ماعدا بالقرفة .. ياااااااى

موضوع الألوان ده مش بهتم بيه أوى .. لأنى وأنا مكتئبة مش بكون مركزة فحاجة اصلا

أنا عندى حساسية ضد الاكتئاب اصلا .. بحاول أقاومه بكل ما أملك من قوة

البوست يعنى مش حلو أوى يا دينا :P :D

نهر الحب said...

:)
تعرفي انا اول ما سمعت خبر اعتزال فضل جيتي علي بالي وافتكرت المجونة هنا وصورة فضل اللي علي اليمين دي اللي ديما كنت بقولك اني بحبها وبتلفت نظري كنت عارفة ان اعتزاله حيفرق معاكي
انا فرحت بيه جدااا وكنت بحبه لدرجة بيتريقوا عليا في البيت اوي وانا بسمعه ووبشوفه بس تعرفي حاجة غريبة دلوقتي مش بقدر اشغله بخاف ياخد ذنب مني عشان بسمعه بس لسه بحب اسمعه وبحب صوته واحساسه بس هو بجد كان فنان رائع ومحترم وعمري ما شوفته بيعمل حاجة وحشه
...

البحر
لاااااااااا
ده بقي حبيبي وهو الامان والغدر والحب والكره كله كدة في نفس ذات الوقت
........




لما بوصل لاقصى حالات الاكتئاب
ببقى مش عايزه اخرج
احساسى باللى حواليا بيقل
بيكون الصمت هو الشئ الوحيد اللى بتفنن فى اتقانه وقتها
ولو كان اجبارى انى اخرج
مش بقدر البس غير اسود
مابقدرش احس ببهجه الالوان التانيه
وكأنه مش من حقى !!

دي بقي انا جدااااااااااا
:)

Angham Salah said...

ديناااا
بجد كلامك وجعني اوي
انا فعلا مكنتش متوقعه انه يعتزل
ومكنتش متوقعه انه يقول كل الكلام ده بعد اعتزاله

انا كمان كان بيبقي نفسي اقفل دواليبي وادراجي باقفال بس ماما كانت تولع فيا هههههههه
كلامك كله تحفففففه واحساسك رائع
وان جنانك عسل كده خليكي كده ع طول ^_^
تحياتي يا قممممره ف سماء التدوين

Nour said...

اول حاجة انا زيك بالظبط في موضوع فضل ده ... لما بسمع اغانيه بحس اني في عالم تاني واول مرة اعرف يعني ايه اغنية تأثر في حد لدرجة العياط مانت "انا اشتقتلك" بتاعته ولسه كنت بقول لصاحبتي اني مستنية اللبوم الجديد عشان طول اوي كده :(( ... بس ربنا يهديه ويثبته على اللي هو فيه :)

موضوع الايس كريم فانا برضه بحب الشيكولاتة بس مش بحبها في الايس كريم خالص :D

موضوع البحر ده غريب شوية :D .. انا مش بعرف اعوم ومش بحب انزل البحر عشان كده بس بحس ان النظر ليه بس بيبقى فيه راحة

الاكتئاب ده بحس انه حاجة خاصة بكل شخص ... كل واحد فينا بيبقى ليه زي بروتوكول كده في الاكتئاب ومفيش 2 زي بعض :(

reemaas said...

عجبتنى جدا حاجاتك ومحتاجاتك ده مش جنان دى دينا بحالاتها وعلى اللى يحبها يتقبلها

Bent Men ElZman Da !! said...

مصطفى سيف الدين

طب انا موافقه تاخد انت ايس كريم الشيكولاته وتدينى بداله شيكولاته كيت كات؟ هههههه
اذن معادله كويسه اهووو
ربنا يخليك يا مصطفى ويكملنى بجنانى كده دايماً ده انا من غيره ماعرفش اعيش :))

نورتنى بوجودك والله

Bent Men ElZman Da !! said...

سواح في ملك اللــــــــــــــــــه-

يارب يهديه ويثبته

بجد ده معناه انى خجوله؟
طب الحمدالله عشان حكايه الدولاب دى كانت محسسانى انى انانيه اووووى
طمنتنى على نفسى بجد يا خالد
لو حد كلمنى بعد كده هاقول خالد اللى قالى ده معناه انى خجوله بس ماليش دعوه بقى :))

نورت البوست بتعليقك :)

Bent Men ElZman Da !! said...

faroukfahmy58

هو تغيره المفاجئ هو اللى كان غريب شويه
لانه ظهر حماسه للاعتزال بطريقه ماكنش موجود بيها نفس الحماس ده فى اغانيه

فعلا وخاصه فى الاكل مش المثل بيقول كل اللى يعجبك :)

المشكله ان الفوبيا اوقات بتبقى ازمه فى مواقف الحياه المختلفه
وكتير حواليك مش بيقدروا يتقبلوا الفوبيا دى وهنا بتكون الازمه !

شكرا لحضرتك بجد انا اللى بحب وجودك هنا وكلامك :))
شرفتنى

Bent Men ElZman Da !! said...

Lady E

انا اللى ببقى مبسوطه اكتر على فكره :)

طب قوليلى أزاى حبيتى ايس كريم الشيكولاته يمكن اعرف احبه دلوقتى

ايوه شوفتى بقى قوليلى بالذمه بيبقى احساسك ايه وانتى فى سفينه ماشيه فى وسط الميه
بجد احساس مش سهل خالص

ياسلام لو الحياه تبقى بحلاوه الشيكولاته يبقى مفيش بعد كده بجد :)

مبسوطه بوجودك اوى يا أنوس :))

Bent Men ElZman Da !! said...

Miss LoZa

عيب عليكى يا ميهو انا هاحب مطرب سيكى ميكى بردو

صعبه اوى بالقرفه دى فعلا

هو مش بيبقى تركيز انى عايزه البس اسود
بس ايدى بتروح تلقائى عليه وما اكثره فى دولابى يعنى هههههههه

ايوه انا عايزه اقاوم بردو بس جنود المقاومه عندى بعافيه اليومين دول اوى

لا حلو باين فى عينيكى وزراير كيبوردك اهو :P :P

Bent Men ElZman Da !! said...

نهر الحب

شكلنا متفقين اوى فى حكايه فضل دى
انا لحد دلوقتى بيتيريقوا عليا لما عرفوا انه اعتزل مش عارفه بيشمتوا فيا ليه :(((((

الحب فعلا فيه كل المواصفات اللى قولتيها دى
ومع كل موقف بيمر عليكى فى حياتك بتشوفى البحر بلون الموقف ده وقتها

مبسوطه اننا شبه بعض فى حاجات كده :)

نورتينى يا حبيبتى :))

Bent Men ElZman Da !! said...

Angham Salah

انا بردو مستغربه كل اللى بيحصل منه الفتره دى اوى :((

لا اوعى تعمليها ادام فيها ماما ههههههه

انتى اللى تحفه وقمر خااااالص بقى على فكره

مبسوطه بوجودك اوى يا نغومه
ميرسى يا قمر :)

Bent Men ElZman Da !! said...

Nour

على اد فعلا ما الواحد هيبقى مفتقده جدا ومفتقد صوته :(( بس ربنا يوفقه ويثبته

ده موضوع ايس كريم الشيكولاته ده منتشر بقى
هو اصلا الايس كريم مش بيكون فيه طعم الشيكولاته اللى بجد عشان كده مش بنحبه تقريبا

النظر للبحر فعلا فيه راحه
بس من بعيد لبعيد ^_^

عجبتنى اوووى حكايه بروتكول للاكتئاب دى
صح اوووى

مبسوطه بوجودك يا جميله :)

Bent Men ElZman Da !! said...

reemaas

وانتى جميله بقى يا نور على فكره ^_^
ده كله من ذوقك بس
نورتينى جدا :))

Timo.. said...

وعشان نفس المبدا انا باحب ماجدة الرومي..
كا شخصية.. اكتر منها مطربة..
الاهتمام بالانسان اللي جوة الفنان بيضفي رونق على علاقتنا واحترامنا ليه.

..............
تقريبا انا كمان باعمل زيك في موضوع الاكتئاب والالوان..!!


صباحك مشرق :)

فراشة said...

:) فضل شاكر إحساسه كان جميل قوي
كنت بحب أسمعه أيام ما كنت بسمع اغاني
فرحت جدا انه اعتزل من الناس اللي تستاهل اننا نفرح عشانهم بجد

الايس كريم بالشيكولاته ... عايزة اقولك اني فضلت عمر بحاله محبش الأيس كريم لا الشيكولاته ولا الفانيليا
بس بقيت احب اللي بالشيكولاته قوي قوي دلوقتي
الفانيليا لسه برضه باكلها على مضض ^_^

وبرضه من زمان كان عندي درج بمفتاح فيه حاجاتي
وحاليا أوضتي لوحدي ممنوع الإقتراب أصلا


أما عن البحر انا بعشقه بحب أقف قدامه بالساعات
بس مش بعرف أعوم ومش بحب انزل البحر أصلا يدوب رجلي ييجي عليها ميه وبس
أما عن الفوبيا ^_^ اممممممم موش لازم تبقى من موقف حصل قبل كده
إنتي عقلك فكر ف البحر انه عدم امان فخاف من فكره انه كبير قوي وبس

وربنا ما يجيبلك إكتئاب ابدا يااارب

كريمة سندي said...

دا واقع كلنا بنعيشوا سواء بالاكتئاب أو بالأمل

تقبلي مروري وتحياتي الصادقة لك غاليتي

شمس النهار said...

قليل من الجنون يدفع لمزيد من العقل
ةبعدين احنا هنقي
:))
لازم نقبل بعض كده بعقلنا بجنونا
:))
فضل شاكر من الاصوات الحنونة نادرا مايبقا مغني رجل وصوته حنين مش نحنوح
اقفلي دولابك زي ماتحبي ناس كتير بتعمل كده
اما الايس كريم انا بحب المستيكه اكتر بس اي ايس كريم انا شغال مش بقول لأ
:))
صباح الفل

rona ali said...

موضوع فضل انا كنت بحب اغانى
بطلت احب اغانى دوقت بقيت اغنى اللى بفتكرة بس هههههههههههههههههه

الايس كريم ايه دة اللى كلتى معانا مكنش شيكولاته ول انا بحلم هههههههههه

بس انا بحب اللبن ومبحبش الفانيليا ولا الكريم شانتى ولما بكلهم بحس انى عايزة شيكولاته اضيع بيها الطعم

موضوع البحر عندى قصص فيه فمش هطول واقولك انا معنديش فوبيا من الميه بس عندى خوف من البحر رغم انى بحب انزله ومبعرفش اعوم لو اتعلمت العوم اعتقد مش هخاف هههههههههه

عندى مشكله زيك في الدولاب مش فكرة اقفله بمفتاح معندناش مفاتيح هنا بتفضل علي حالها بس مبحبش اشوفه مفتوح وباين كل حاجه هههههههه متسألنيش ليه
وبحب الادارج تكون متنظمه وكل جزء فيه كنت حاطه في مكانه :))))))))))

اخيراً الجو بتاع اليومين دوال كله يجيب حساسيه اكتئاب بس اعتقد افضل مسمى لحالتك انعزال


وبسات :)

Bent Men ElZman Da !! said...

Timo..

ايوه ماجده الرومى من نفس النظام
الفنان اللى يحترم قبل ما يتسمع

هو الاكتئاب كده
ليه توابع مش ظريفه خالص

مسائك وصباحك مليان آمل :)

Bent Men ElZman Da !! said...

فراشة

انا فرحانه عشانه فعلا
بس زعلانه انى مش هاسمعه تانى

قوليلى طيب حبتيه ازاى؟ :D

ايوه انا بحب جو ممنوع الاقتراب او التصوير ده
لازم الواحد يبقى ليه خصوصية كده ^_^

انا فعلا بشوف البحر بالنظره دى
رغم انى بحب اقعد قدامه كتييير

ربنا يبعد عنك الاكتئاب انتى كمان يا حبيبتى يارب
مبسوطه بوجودك اوى بجد :))

Bent Men ElZman Da !! said...

كريمة سندي

واقع بيمتزج فيه اللون الابيض مع الاسود
كلام حضرتك صح جدا
اسعدنى مرورك :)

Bent Men ElZman Da !! said...

شمس النهار

ايوه والله مع حضرتك حق
ده الواحد احلى ما فيه الجنان :))

ايوه ما هى حنيته دى اللى عامله ازمه معانا

ما انا بقفله رغم انف المعترضين والفضوليين بردو ^_^

انا جربت الايس كريم بالمستكه كان طعمه غريب اوى او يمكن عشان كانت اول مره ليا

البوست نور بوجودك :))

Bent Men ElZman Da !! said...

rona ali

ههههههههههه
حلوه بغنى اللى بفتكره بس
وابقى قابلينى ان افتكرتى حاجه كمان ههههههه

ياااه على الذاكره اللى بقت فى الضياع
اللى كلناه فانليا وكان عليه صوص شيكولاته
وانا غرقينى فى صوص الشيكولاته انما الايس كريم شيكولاته لا لا لا لا لا لا

يعنى الازمه معاكى فى العوم؟ انتى مشكلتك حلها تدريب اسبوع فى اى حمام سباحه وتبقى فى التمام ان شاء الله هههههههههههه

انا بردو بحب حكايه الادراج دى
كل ركن يبقى فيه حاجه معينه كده احسن

ومش بسات بس على فكره بقى ^_^

نيللى said...

وحشني جداالبوست رائع حتي في جنونك تلقائية.

Bent Men ElZman Da !! said...

نيللى

وحشتينى اوووووى
حمدالله على سلامتك وعلى سلامه اللاب :))

:a: :b: :c: :d: :e: :f: :g: :h: :i: :j: :k: :l: :m: :n:

Post a Comment

 

FaceBook Comments

wibiya widget