19 May 2012

جارى تحميل رئيس .......

.

 
- اموت واعرف ليه عمرو موسى البوستر الوحيد اللى كان حطه عندنا فى المنطقه
مكتوب فيه هنوفر الامن الغذائى ووراه فدادين من القمح
هو شايف ان منطقتنا فيها مجاعه مثلا؟ والا فيها مفاجيع؟
 مش فاهمه انا !

 
- برنامج مصر تنتخب الرئيس على السى بى سى
من وجهه نظرى الشخصيه هو افضل البرامج الحواريه للانتخابات
وده لانه مش بس بيوضح برنامج كل مرشح وبيسأله ويستفسر منه
لكن لان انا كمان بقدر اوصل منه لبعض الصفات اللى فى كل مرشح
زى الغرور مثلاً .. البلاغه فى الرد ..او عدم تقبل النقض
والحاجات اللى بتبقى مستخبيه فى وسط الكلام دى

 
- الواحد وبعد المهزله اللى كنا بنشوفها فى التقديم لانتخابات الرئاسه
كنت متوقعه ان الموضوع هيصفى فى الاخر على الكام شخص اللى احنا اصلا عارفنهم
واللى يمكن ناس مننا مقرره اصلا هينتخب مين فيهم
وده اللى حصل فعلا


- انا ضد مقاطعه الانتخابات نهائى او حتى ابطال الصوت
رغم انى من نصار الفكره دى فى بعض الانتخابات
انما هنا لا مفر
هاحس لو مش روحت انتخبت انى بجد قصرت اوى فى حق بلدى

 
- بتعجبنى جدا حكايه ترجمه حوارات مرشحى الرئاسه لـلغه الاشاره
حاسه ان فى امل فى تكافئ الفرص
على الاقل فى الحاجات البسيطه اللى زى دى


- انا شاكه ان ماكنتش متأكده ان الرئيس القادم
اكيد الحاجه والدته كانت داعيه عليه
اصل الحمل اللى هيشيله فوق دماغه ده مش سهل نهائى 
لو كسبوا اللى كانوا فى نيتى يبقى ربنا معاهم
ولو كسب اللى كان فى بالى يبقى ربنا يستر 
وساعتها هنضحك ضحك للصبح


- الواحد مش متخيل ان جه اليوم علينا اللى بقينا محتارين  فيه
وكل واحد بيفكر وبيدرس برنامج كل مرشح عشان يشوف هيختار مين
اخيراً بقينا مخيرين وغير مُـصيرين


- انا مش بحب لما اكون ضد مرشح اشتم فيه
بس الامانه بتحتم عليا أسال سؤال مهم جداً
هما الاخوان دول دماغهم رايحه شمال  ليه؟
والا هما بيصطنعوا الغباء وعاملين مش واخدين بالهم؟؟!!؟
بالنسبه لـمحمد مرسى هو ايه النظام بقى ؟ ها؟ 
ايه اللزقه دى نفسى اعرف؟؟
على رأى خطيبى اول مره اشوف مرشح داخل ببرنامج واحد صاحبه !


- بالمناسبه فى سؤال على الهامش خالص بقى
هى فين بثينه كامل اليومين دول؟؟؟


- قرارى النهائى 
ان شاء الله هارشح ابو الفتوح
بس مرحبه جداً بـ حمدين صباحى


14 comments

ابراهيم رزق said...

هههههههههه
بس انتى معاكى حق
فى مرشحين لازم يتشتموا
بالنسبة لى لو مقاطعتش

سانتخب حمدين و ارحب جدا بخالد على او ابو الفتوح او بسطاويس
يمكن علشان بعرف حمدين كويس او قربت منه شوية على المستوى الشخصى
او يمكن عشان فكرى اللى بيميل لليسار و الاشتراكية و الناس الغلابة
هى حاجة جوايا بتخلينى افضل حمدين

تحياتى

سواح في ملك اللــــــــــــــــــه- said...

انا مبسوط من تفكيرك جدا يادينا

تحيتي

كريمة سندي said...

عجبني كلامك أوي وتعليقك وأنا معاك في ان مقاطعة الانتخابات لا يأتي بحل للموضوع

وأيضا أفضل أبو الفتوح على عمرو موسى الخيبان تحياتي

Unknown said...

فعلاً !!! مصر تنتخب الرثيس مصنوع بحرفية و حيادية رائعة ... بيركزوا في الأسئلة على البرنامج الإنتخابي و النظرة المستقبلية لكل مرشح ... و المزيعين دائماً ملتزمين بالحيادية مع الكل ... و حتى الجمهور مختار من أنصار المرشح لعدم حددوث أي موقف غير مسئول من أي معارض للمرشح ... و حتى أستوديو التحليل مجرد بيقوموا بتحليل تصريحات المرشح دون إبداء أي آراء شخصية ... بحيث انهم بيعرضوا كل مرشح على المشاهد دون التأثير سلباً أو إيجاباً تاركين لنا حرية الأختيار

rona ali said...

هههههههههههههههه
هههههههههههههههه
لزقه اوى فعلا استبن بقي يابنتى والاستبن دايما تلقي لازم ورا ههههههههه

يلا علي كلا اهو ربنا كان ضده وخلى عربيات حملته تدهس طفل واهو بيتمرمط مرمطه التنين في معركه ضد الديناصور :))

وانا مع المقاطعه في حاله ان في ناس كتير متعرفش ومبتسمعش لحد فمتروحش ترشح الاخوان او شفيق او موسي علي سبيل انهم معروفين وعلي الساحه اكتر الناس دى اتمنى اقطع رجليها قبل ما تخطى اللجنه :))

وانا شكلى هرشح حمدين
ويا هلا وسهلا بابو الفتوح وخالد على والعوا
والبسطاويسي لاء :))

مصطفى سيف الدين said...

مليون لايك
بالنسبة لعمرو موسى شفتله بوسترين عندنا كبار غير الصور الصغيرة
يمكن علشان هياخد اصوات كتير اوي من عندنا
اعتقد بلدنا الاول ابو الفتوح و التاني موسى
والتالت حمدين
البوسترين اللي عندنا واحد منهم اللي قلتي عليه و التاني بتاع فرص العمل
و انا زيك ان شاء الله اخترت ابو الفتوح

مامة مازن said...

السلام عليكم ورحمة الله وبركاته
ازيك يا دينا
عجبنى جدا كلامك قوى صادق وصريح


اشجعك تصوتى لحمدين صباحى

لو ربنا اراد انه يكون رئيس ما اعتقدش ابدا هنندم على انتخابنا له

لكى كل الاحترام والتقدير

Bent Men ElZman Da !! said...

ابراهيم رزق

فعلا حمدين يستحق
وعشان كده انا مرحبه بيه جدا هو والمرشحين اللى حضرتك قولت عليهم
من وجهه نظرى هما الافضل والانقى حتى الان

وربنا يقدم اللى فيه الخير
نورتنى بوجودك :))

Bent Men ElZman Da !! said...

سواح في ملك اللــــــــــــــــــه-


وانا مبسوطه بوجودك جدا يا خالد
نورتنى :))

Bent Men ElZman Da !! said...

كريمة سندي

انا كنت بعد الثوره فى دماغى عمرو موسى
بس دلوقتى استحاله اختاره
كله مع الوقت بيبان

سعيده بوجود حضرتك وتعليقك :))

Bent Men ElZman Da !! said...

Angie

صح انا حسيت بنفس النظره للاستوديو التحليلى
مش متحيزين لحد ولا ضد حد
بيتكلموا عن الموضوع بوجه عام
ده من رأيى سبب متابعه معظم الناس للبرنامج ده تحديداً

شكرا ليكى على ردك
وسعيده بمرورك واتمنى يتكرر تانى :)

Bent Men ElZman Da !! said...

rona ali

ايوه انا ضد اووووى حكايه الناس عشان ماتعرفش حد ومفيش غير اسم عمرو موسى بس اللى يعرفوه من زمان فـ بيقولولك لما نختاره بقى
دول مش لازم يقاطعوا
دول محتاجين يسمعوا ويفهموا الاول صح
عشان يقدروا يقرروا صح

Bent Men ElZman Da !! said...

مصطفى سيف الدين

مش عارفه ليه قلبى منشكح كده وحاسس ان ابو الفتوح اللى هيكسب
ربنا يقدم اللى فيه الخير بقى

نورتنى يا دكتور

Bent Men ElZman Da !! said...

مامة مازن

وعليكم السلام ورحمه الله وبركاته
اهلا بيكى
ونورتينى

انا مشجعه جدا حمدين
بس مقتنعه بابو الفتوح زياده اكتر عنه
بس مرحبه بيه جدا لو كسب
اتمنى فى جميع الاحوال اننا مش نندم ايا كان مين اللى هيكسب
فى النهايه كله لمصلحتنا

سعيده جدا بوجودك وتعليقك
اللى اتمنى انه يتكرر تانى :)

:a: :b: :c: :d: :e: :f: :g: :h: :i: :j: :k: :l: :m: :n:

Post a Comment