27 June 2012

فكر بره الصندوق

.
36 التعليقات




فكر بره الصندوق
جُمله كتير بنسمعها
عشان نوسع تفكيرنا ومداركنا شويه
ونخرج بره صندوق عقلنا اللى بيحكمنا كتير فى تصرفاتنا
بس انا الحقيقه شايفه ان الجُمله دى مش صح فى احيان كتير
افكارنا دى هى صندوق من اختيارنا
لما بنفكر فى حاجه بتبقى عن اقتناع مننا
يعنى الصندوق ده بكل كراكيبه بيعبر عننا واحنا اللى عملناه
ممكن نطور فيه ونخلى اللى جواه افضل
وارد ندخل فيه حاجات جديده
ووارد جدا نخرج منه حاجات مش بقت مناسبه مع الوقت اللى احنا عايشينه
بس مش هينفع نخرج بره منه خالص
والا ساعتها مش هنبقى احنا اصلاً !!

readmore »»

26 June 2012

فتاه اخرى ... !

.
38 التعليقات



وقفت تنظر  الى تلك الفتاه الواقفه امامها فى صمت
نظرت اليها..الى تلك الابتسامه المرتسمه على شفاتها
ابتسامه بلا معنى تعلمه هى ذاتها
ربما ذلك يعنى انها سعيده
ولكنها تعلم جيداً ان السعاده لم تعرف الطريق الي قلبها يوماً
وكأن تلك الفتاه هناك سمعتها
لتختفى الابتسامه من على ملامحها فجأه
ولتحتل بدلاً منها نظره حزن ايضاً لا معنى لها
لم تتبدل نظرتها ولا ابتسامتها فحسب
ولكن تبدلت ملامحها جميعها فى اقل من الثانيه
وكأن ملامحها دائما ما كانت تتأقلم مع ملامح قلبها
ملامح سعادتها وملامح حزنها
لتصبح عيونها تلتمع ببريق الدموع
وتحتل هالات سوداء ملونه بلون البؤس اسفل عينيها
وتصيب ملامحها الجميله الضمور
واُصيب صوتها بـ بحه ممزوجه بـالآلم
فـ حدثت نفسها
كم غريبه هى تلك الفتاه وغريبه ملامحها و طباعها
تترك الحزن ليسيطر عليها دون استئذان متى أراد هكذا !
ولكن حين يأتى الفرح تقيم له مقصله الأعدام
وتكيل له من الاتهامات ما يرهقه فـ يرحل عنها
كم انتى مرهقه ومتعبه لذاتك قبل ان تكونى متعبه للاخرين من حولك
فلتتركينى وترحلى
لم اعد اطيق تقلباتك المزاجيه اكثر من ذلك
لماذا لا اجد منكِ سوى الصمت؟ ولماذا لا ترحلى؟
اذن انا من سيرحل عنكِ !!

وتركت مرآتها التى اعتادت ان تقف امامها كل يوم
لتبحث عن مرآه اخرى ربما تختلف فيها ملامحها

readmore »»

25 June 2012

عن الاحلام وعمايلها

.
50 التعليقات

اوعوا تكونوا فاكرين من العنوان انا قصدى الاحلام اللى هى واحنا نايمين دى
لالالا ابسلوتلى
انا قصدى احلام الطفوله البريئه المتعلقه بالمستقبل المجهول
الحمدلله يعنى انا متعوده من صغيرى على حاجه واحده
احلم زى ما انا عايزه
المهم ان فى النهايه الاحلام دى عمرها ما بتتحقق الحمدلله
اول احلامى دى مثلا او السؤال المعتاد من وانا صغيره
نفسك تطلعى ايه يا حلوه؟ انا مش نفسى اطلع حاجه محدده
ولا مٌدرسه زى ما الاطفال الطبيعين بيقولوا
بس لسه ماكنتش شايفه نفسى فى مكان محدد لانى ماكنتش اعرف قدراتى
اه عمليه انا من صغرى

المهم يعنى ان الناس دايماً كانوا شايفين انى شكله بيدى على دكتور
مش عارفه شكل الدكاتره مميز بأيه بالظبط عشان يقولوا كده
بس واضح ان نضارتى حبيبتى كانت عامله شغل عالى اوى

لما وصلت لـ اخر ابتدائى كده كنت خلاص انا قررت عايزه اطلع ايه
بس ياريت ماحدش يضحك
احم احم
كان نفسى اطلع ظابط
انا قولت ماحدش يضحك
قصص رجل المستحيل كانت عامله شغلها معايا انا ذنبى ايه يعنى
يمين شمال كله يقنع فيا انه ماينفعش يا حبيبتى ماينفعش يا ماما
وانا ابداً على نغمه واحده شرطه يعنى شرطه
 
المهم وصلت لاعدادى
كان بدأ بقى ملف المستقبل وتخيلاته تعمل شغلها معايا
واتحولت اتجاهاتى الى كليه العلوم قسم ميكروبيلوجى
لا ومحدده القسم كمان
والله انا بنت مميزه ومختلفه من يومى :D
وفعلا كان ده اهم احلامى الواقعيه 
اللى ممكن بشويه مجهود زياده اقدر احققها
لحد ما دخلت اوله ثانوى واتفاجئت بالصدمه
اللى هى الفيزياء واللى عرفت من اول طله ليها كده
اننا عمرنا ما هنعرف نتفق مع بعض ولا يجمعنا كتاب واحد ابداً
فـ كان قرارى بتحويل اتجاهاتى مره اخرى
وده ظهر مع اول مقابله ليا مع كتاب الفلسفه الجميل ده
و كان حلمى التالى .. كليه الاداب قسم فلسفه
وده كمان كان حلم واقعى تماماً
الا ان اللى ما يتسمى التنسيق خلاه من التخيلات الغير محققه
فكانت نهايتى كليه الحقوق
وحسبى الله ونعم الوكيل فى اللى كان السبب
انا مش عارفه مين السبب
بس انا قولتها من قلبى اهو وربنا شاهد

السؤال اللى بيطرح نفسه بقى جوايا بقاله كتير
هو ياترى انا لو كنت دخلت اداب قسم فلسفه فعلا زى ما انا بحلم
كان ياترى حياتى و واقعى دلوقتى هيختلف فى ايه؟؟


readmore »»

24 June 2012

فكرة X صورة

.
39 التعليقات


احنا صراحه بلد متخصصه اشاعات
النهارده على حظى الجميل كالعاده
وانا بقالى اصلا يجى اسبوع مش خرجت
لما افكر اخرج اروح مدينه نصر
وال ايه بتوع شفيق مايفكروش ينزلوا يتظاهروا الا فى مدينه نصر
والبنت اللى معايا تقولى ده الدنيا مقفوله وناس كتير اوى عند المنصه
وانا اقولها لا ما انا هاخد حاجه تطلع كوبرى 6 اكتوبر
تقولى لا ماهما قفلوه.. قفلوا الكوبرى؟؟!!؟ والله ماكنت اعرف
اتحبست انا كده وحاصرونى فى مدينه نصر يعنى !!
نفضتلها بردو وركبنا مينى باص والجو كان لذيذ والطريق ماشى عادى
الاقى فى رمسيس يقولوا ده ظابط اضرب بالنار
والظباط رايحين يضربوا اللى ضربوه بالنار
حد فاهم حاجه؟!!؟
المشكله ان الناس تلاقيها بتجرى هنا وهنا 
من غير ما يعرفوا اصلا ايه اللى بيحصل
اهو اى هيصه وخلاص
بعيداً بقى عن اليوم الفظيع اللى مريت بيه النهارده
 الا انى عامله البوست ده عشان حاجه تانيه خاااالص
عشان الصوره دى



الصوره دى من مينى باص اللى هما لونهم اخضر دول
باسكت للزباله متعلق فى وش الباب 
يعنى يراه كل من نظره ضعيف لا قدر الله والا حاجه
الفكره عبقريه من وجهه نظرى وكنت نفسى اسأل مين اللى عملها
بيستفزنى جدااااااااااا ان اى حد يرمى اى ورقه والا حاجه فى الشارع
دايماً عامله كيس فى شنطتى احط فيه الحاجات اللى مش عايزاها
لما اروح البيت او لو قابلت اى باسكت ارميها
تخيلوا بقى لما حد بيرمى حاجه من عربيه ماشيه والا اتوبيس
بيبقى هاين عليا اقوم اجيبه من تى شيرته
وبالتالى الفكره دى بالنسبالى كانت حل تحفه
فى مكان واضح لكل الناس يمنع بقى ان حد يقول اصلى مش شفتها
وفعلا كان الناس بتقوم من مكانها وترمى فيه اى حاجه مش عايزنها
وده كان راجع بالايجاب على المينى باص 
انه فعلا كان نضيف ودى قليل لما بشوفها 
وخصوصا فى نص اليوم او اخره
بعد ما بيكون خد لفته وركبه ناس كتييير
وكله رمى فيه اللى مش عايزه
ياريت لو تبقى الفكره دى موجوده فى اماكن كتير
 زى الاتوبيسات والمينى باصات او حتى فى اى تاكسى
اكيد بالتصرفات البسيطه اللى زى دى
احنا احتمال كبير نبقى افضل


readmore »»

23 June 2012

كـابـوس

.
56 التعليقات




كانت ما تزال نائمه منذ ساعات قليله على حسب ما ظنته
ولكن نومها ذلك لم يكن يتعدى ساعه واحده على حسب عقارب الزمن
حين تناهى الى مسامعها صوتهم
والدها ووالدتها يتشاجرا كعادتهم
ولكن تلك المشاجره كانت مختلفه تماماً
فـ من وسط غيوم نومها
رأت والدها يصفع والدتها على وجنتيها

لا تعلم ما السبب ولم يكن يهمها !
فى حين سمعت بكاء والدتها كأنه صوت مشوش غير واضح
ورأتها تسقط مغشى عليها
ليخرج والدها من الغرفه ويتركها هكذا دون حتى ان يهتم
لم تقم هى من سريرها لتتفقد والدتها كما يستعدى الامر
ولكنها اغلقت عينيها مره اخرى وعادت الى نومها
متمنيه من الله ان تكن تلك احدى كوابيسها ليس ألا !!

 

readmore »»

22 June 2012

كلام والسلام ... كلاكيت 16 مره

.
40 التعليقات




اوقات قله الاكل فى ايام الدايت
بتعملى حاله من اتنين
ياما بتيجى بأكتئاب وصمت تااام واحيانا نوم
ياما بتيجى بكتر كلام
العيب فى الاكل اكيد مش فيا

***********

اوقات بتجيلى افكار كتييييير ببقى عايزه اكتب عنها
ومن كترها
بتضيع منى كلها وقت ما فعلا بقرر أكتب
انا لازم الزق ورقه وقلم فى ايدى
الموبيل مابقاش بيجازى خالص

***********

اوقات فى وسط ده بقى
من كتر ما انا فى دماغى اكتبلك حاجات كتير
فجأه كله بيختفى
واحس ان فى عاصفه من الكلام فى دماغى داخله فى بعضها
لان حبى ليك اكبر من الكلام :))

***********

اوقات بكون مكسوفه اكتبلك حاجه هنا
لانى مش متعوده اصرح باللى جوايا علنى كده
بس اللى بيخلينى دائما اكتبلك هنا من غير ما اخاف
لما بشوف الابتسامه اللى بتظهر على وشك اول ما تقرأ الكلام اللى بكتبهولك
وتقولى ده بجد؟!؟ :)))
 
***********

اوقات او فترات معينه بيجى فيها احساس غريب كده
مش عارفه اوصفه ازاى
بس هو ماينفعش يتسمى غير
"فتره التـتـنـيح الغير مبرر"
(طبعا مبرر دى مالهاش اى علاقه بشفيق خالص على فكره)

***********

اوقات بشك انى مجنونه
واوقات بتأكد جدا من ده
 

readmore »»

21 June 2012

يمكن ... !

.
41 التعليقات




يمكن بحب الشمس عشان بتنور الكون
 
زى ما انت بتنور حياتى

يمكن بحب الهوا عشان بيحينى
زى ما حبك ليا حياه

يمكن بحب الربيع عشان بيلون الدنيا
زى ما انت بتلون ايامى

يمكن بحب البحر عشان بيسمعنى
زى ما انت دايماً بتسمعنى

يمكن بحب الورد عشان فيه ريحه حلوه منك
زى ما انت فيك ريحه حلوه منه

يمكن بحب الصبح عشان بدايه ليوم جديد
زى ما انت بدايه جديده لعمرى الجاى

 

بس الاكيد
انى بحبك  انت اكتر من كل ده ♥

readmore »»

20 June 2012

♥ عن "قصاصاتى" اتحدث

.
64 التعليقات


من فتره قريبه كنت كتبت عن موقف حصلى
فى العادى والطبيعى لو حصلى الموقف ده فى اى وقت 
كنت هفقد الامل وهضايق وهتخنق
بس لما فكرت وعرفت انى اقدر احاول مره واتنين وعشره
حسيت ان فى امل فى بكره
وبكره جاى بحاجات كتير اجمل
وفعلا حصل


ده كان حلم كبير اوووى بقالى كتير بتمنى احققه 
رغم ان كان جوايا حته سودا كده بتقولى مش هتقدرى
بس الحمدالله قدرت

اول ما فكرت ابدأ فى الكتاب
كان بعد المرحله التانيه من مشروع النشر لمن يستحق
بعد الامل اللى خدته من كتب المرحله التانيه 
وتحديدا كتاب بنكهه مصر لـ د/ شيرين سامى 
اللى كان من اول الكتب اللى فى ايدى على طول وكان فارق معايا اوى
وكتاب ضوء اسود لـ د/ مصطفى سيف 
اللى كنت كل ما أقراه اقول هو ازاى بيكتب افكار حلوه اوى كده 
الاول حطيت فكره محدده للكتاب وكانت هى الاساس عشان أبدا عليه
القصص من حياتنا بنعيشها وبنقابلها كل يوم قدامنا

منهم قصص شفتها فى حياتى ومنهم اللى شخصيه يعنى حته منى انا
 

الكتاب ده قبل ما يكون مجرد كلمات و شوية ورق
هو حته منى وحته من ناس كتير اوى
يمكن قابلناهم
ويمكن لسه هنقابلهم
ويمكن اصلا مانعرفش عنهم اى حاجه

الكتاب مش رومانسى زى ما يبان من اسمه هو اجتماعى اكتر
يمكن لانى مش كنت بكتب هنا قصص قصيره او خواطر كتير
كانت فكره انى اعمل كتاب دى غريبه شويه

مع كل موقف بيحبطنى ويخلينى ماقدرش اكمل
يجى بعده امل واحساس انى اقدر و ده بيجبرنى انى اكمل من تانى
لحد ما خلصته وكنت بردو فاقده الامل انه يتقبل
بس الغريبه انه اتقبل وفى وقت قياسى بالنسبه للفتره اللى كنت مقدمه فيها اصلا
بعيداً يعنى عن انى كنت هاموت من الفرحه وبتنطط فى البيت وشويه وكان هيغمى عليا.. بس كنت مبسوطه اووووووووى

أما السبب فى وجود الكتاب هو انـت
مع اول مره قولتلك انا نفسى اعمل كتاب 
وانت قولتلى انا موافق ومعاكى عرفت انى ممكن اعمل حاجه
مع كل مره كنت بقولك فيها انا مفيش حاجه فى دماغى 
وانت تقولى فكرى وانا عارف انك هتجيلك فكره وانا عرفت انى ممكن اعمل حاجه
لما فقدت الامل وبقيت بكتب لنفسى 
وعشان انت بس تقرأ وتقولى لا ده كويس او ده محتاج يتعدل 
بقيت بردو حاسه انى ممكن اعمل حاجه
لما قولتلى سيبك من اى حاجه وابعتى كتابك 
وقتها بس عرفت انى اصلا مش كان هيجيلى الشجاعه دى الا بيك
لما شوفت غلاف كتابى قدامى والكتاب بيتحضر خلاص
بقيت متأكده ان اصلا ماكنش هيبقى للكتاب ده وجود الا بتشجيعك ليا

مبسوطه اوى ان الكتاب ده بقى جزء منى 
زى ما المدونه دى جزء منى وانتوا اهم جزء منها
الكتاب ده بقى موجود عشان انتم كنتم بتدخلوا هنا
عارفه ان وجود المدونه فى حياتى كان فارق اووى
بس ماكنتش متخيله انه هيفرق للدرجه دى
زى ما كنتم سبب فى ان المدونه دى بقت جميله اوى كده بيكم
الكتاب بالنسبالى حاجه جميله اوى عشان كان مجرد فكره بدأت منكم
فى انتظاره عشان نفسى اوى اسمع تعليقتكم عليه بالسلب قبل الايجاب  
وعارفه انى لو حاولت اشكركم على وجودكم هنا وفى حياتى
مش هاعرف :)))


صفحه الكتاب من هــنــا

readmore »»

19 June 2012

حمله التدوين اليومى لشهر يونيو 2012

.
10 التعليقات




فى حمله التدوين السنه اللى فاتت
مش كنت متخيله ابداً انها هتفرق معايا اوى كده
كنت دخلاها تحدى لنفسى مش اكتر
بس فى اخر الشهر
لاقيت حاجه تانيه خالص
انا كتبت كتير
وبقى فى ناس بتقرأ لى وبتعلق على كلامى سواء بالسلب او بالايجاب
وده كان يوم عن يوم بيزيدنى طاقه انى اكتب اكتر
واتعرفت وقرأت لناس اكتر
وده زادنى خبره عن الاول سواء فى الكتابه او فى النقاش او حتى فى الافكار
او فى رؤيتى لحاجات كتير حواليا
ولذلك
احب ابلغكم عن حمله التدوين السنادى كمان
وهى من 20 / 6 لــ 20 / 7 
ونظراً لظروف الامتحانات وناس كتير طلبت انها تتأجل
عشان كده بدأت من يوم 20 فى الشهر مش من يوم 1 زى السنه اللى فاتت
ياريت بجد كلنا نشترك فيها زى السنه اللى فاتت
كانت عامله حاله نشاط غير عاديه
اتمنى تكون موجوده ليا وليكم كمان الشهر ده



بدايه الدعوه للحمله دى كانت من شيرين سامى صاحبه مدونه حدوته مصريه
الايفينت من هــنـــا


readmore »»

02 June 2012

نــأســف !!!!

.
25 التعليقات




الى الشهداء ..... نــأســـف
القتله أبــريــاء !!!

readmore »»
 

FaceBook Comments

wibiya widget