20 June 2012

♥ عن "قصاصاتى" اتحدث

.


من فتره قريبه كنت كتبت عن موقف حصلى
فى العادى والطبيعى لو حصلى الموقف ده فى اى وقت 
كنت هفقد الامل وهضايق وهتخنق
بس لما فكرت وعرفت انى اقدر احاول مره واتنين وعشره
حسيت ان فى امل فى بكره
وبكره جاى بحاجات كتير اجمل
وفعلا حصل


ده كان حلم كبير اوووى بقالى كتير بتمنى احققه 
رغم ان كان جوايا حته سودا كده بتقولى مش هتقدرى
بس الحمدالله قدرت

اول ما فكرت ابدأ فى الكتاب
كان بعد المرحله التانيه من مشروع النشر لمن يستحق
بعد الامل اللى خدته من كتب المرحله التانيه 
وتحديدا كتاب بنكهه مصر لـ د/ شيرين سامى 
اللى كان من اول الكتب اللى فى ايدى على طول وكان فارق معايا اوى
وكتاب ضوء اسود لـ د/ مصطفى سيف 
اللى كنت كل ما أقراه اقول هو ازاى بيكتب افكار حلوه اوى كده 
الاول حطيت فكره محدده للكتاب وكانت هى الاساس عشان أبدا عليه
القصص من حياتنا بنعيشها وبنقابلها كل يوم قدامنا

منهم قصص شفتها فى حياتى ومنهم اللى شخصيه يعنى حته منى انا
 

الكتاب ده قبل ما يكون مجرد كلمات و شوية ورق
هو حته منى وحته من ناس كتير اوى
يمكن قابلناهم
ويمكن لسه هنقابلهم
ويمكن اصلا مانعرفش عنهم اى حاجه

الكتاب مش رومانسى زى ما يبان من اسمه هو اجتماعى اكتر
يمكن لانى مش كنت بكتب هنا قصص قصيره او خواطر كتير
كانت فكره انى اعمل كتاب دى غريبه شويه

مع كل موقف بيحبطنى ويخلينى ماقدرش اكمل
يجى بعده امل واحساس انى اقدر و ده بيجبرنى انى اكمل من تانى
لحد ما خلصته وكنت بردو فاقده الامل انه يتقبل
بس الغريبه انه اتقبل وفى وقت قياسى بالنسبه للفتره اللى كنت مقدمه فيها اصلا
بعيداً يعنى عن انى كنت هاموت من الفرحه وبتنطط فى البيت وشويه وكان هيغمى عليا.. بس كنت مبسوطه اووووووووى

أما السبب فى وجود الكتاب هو انـت
مع اول مره قولتلك انا نفسى اعمل كتاب 
وانت قولتلى انا موافق ومعاكى عرفت انى ممكن اعمل حاجه
مع كل مره كنت بقولك فيها انا مفيش حاجه فى دماغى 
وانت تقولى فكرى وانا عارف انك هتجيلك فكره وانا عرفت انى ممكن اعمل حاجه
لما فقدت الامل وبقيت بكتب لنفسى 
وعشان انت بس تقرأ وتقولى لا ده كويس او ده محتاج يتعدل 
بقيت بردو حاسه انى ممكن اعمل حاجه
لما قولتلى سيبك من اى حاجه وابعتى كتابك 
وقتها بس عرفت انى اصلا مش كان هيجيلى الشجاعه دى الا بيك
لما شوفت غلاف كتابى قدامى والكتاب بيتحضر خلاص
بقيت متأكده ان اصلا ماكنش هيبقى للكتاب ده وجود الا بتشجيعك ليا

مبسوطه اوى ان الكتاب ده بقى جزء منى 
زى ما المدونه دى جزء منى وانتوا اهم جزء منها
الكتاب ده بقى موجود عشان انتم كنتم بتدخلوا هنا
عارفه ان وجود المدونه فى حياتى كان فارق اووى
بس ماكنتش متخيله انه هيفرق للدرجه دى
زى ما كنتم سبب فى ان المدونه دى بقت جميله اوى كده بيكم
الكتاب بالنسبالى حاجه جميله اوى عشان كان مجرد فكره بدأت منكم
فى انتظاره عشان نفسى اوى اسمع تعليقتكم عليه بالسلب قبل الايجاب  
وعارفه انى لو حاولت اشكركم على وجودكم هنا وفى حياتى
مش هاعرف :)))


صفحه الكتاب من هــنــا

64 comments

Angham Salah said...

مبرووووووووووووووووووك يا دينا فرحانه اوي انك فرحانه عقبال الكتاب التاني والتالت
عقبال ما تحققي كل احلامك
بجد مبسوطه منك اوي
شدي حيلك وهتبقي احسن واحسن واكيد ان شاء الله ف يوم هتبقي اشهر حد فالدنيا لجمال كتابتك واسلوبك :)

Bent Men ElZman Da !! said...

Angham Salah

الله يبارك فيكى يا نغومه
ربنا يخليكى يا حبيبه قلبى ويارب يفرح قلبك دايماً زى ما فرحتينى بكلامك ده <3

Afnan m7md said...

مبروك ياجميل الكتاب اللى هو جزء منك وذلك يبين مدى اصرارك وقوتك لتظهرى هذا اللمولود على وجه الارض ....... تسلم ايديك
:l:

Bent Men ElZman Da !! said...

Afnan m7md

الله يبارك فيكى يا جميله
شكرا ليكى على ذوقك وتعليقك
اسعدنى وجودك :))

NoNa AnGeL said...

ان شاء الله هيبقى من اجمل الكتب يا دودو .. وبتمنالك التوفيق من قلبي ياارب :h:

rona ali said...

عارفه لما تحسي بالكلام وهو بيرقص من السعاده انا حاسه كده من كلامك مش هقولك ملاحظات كتير لحظتها عيلكى فتره قبول الكتاب
وفي فتره عدت كده عليكى كانت مشاعرك متناقضه والدنيا مكنتش وردى بس انتى قدها انا عارفه ^_^

مبروك الكتاب انا مستنياه اوى يا دندن موتونى من الشوق ربنا يسمحكم كلكم هضيعوا فلوسي هههههههه

واهم من انى اباركلك علي وجود كتاب بين ايدينا لدينا مبروك لدينا نفسها اللى كانت قد التحدى افرحى بيجد من قلبك انتى تستحقي الفرح بغض النظر عن اى شئ :)

Bent Men ElZman Da !! said...

NoNa AnGeL

ربنا يخليكى يا حنون
وربنا يوفقك انتى كمان يا حبيبتى دايماً يااارب :))

Bent Men ElZman Da !! said...

rona ali

عارفه انتى بقى لما كلامك ده يرسم ضحكه على قلبى كده قبل وشى
اكيد عارفه :)
وجودكم بجد كان بيقوينى وقعدتنا وكلامنا عن الكتب كان بيفرق معايا اوووى بجد

سيبك انتى فلوس ايه وكتب ايه
انتى نسختك محجوزه انتى فاهمه يعنى
بس انا شرطى لن اتنازل عنه يا رنا
هديتك محجوزه بس فى 5 نسخ تشتريهم توزعيهم انتى هدايا بقى ^_^
تهادوا تحابوا يابنتى هههههههههههههه

انا فعلا استحق افرح
عشان عرفت ناس زيكم :))

mena moon said...

انتي تستهلي أصلا انه يبقى جمبك ويشجعك وتستهلى يتعملك كتاب عشان انتى بجد موهبه كل كتاباتك حلوة وتستهلي اننا نحبك عشان انتى تتحبي وبتدخلى القلب بسرعه ومن غير أستاذن

فتــافيت said...

مبروووووك يا أحلى دندون :)

MEROOooOOoo said...

مبرووووووووووك ويارب يسعدك دايما وتحققى كل أحلامك

مصطفى سيف الدين said...

الف مبروك ليكي انتي تستاهلي كل خير
حاجة تفرحني جدا اني اكون احد اسباب خروج كتابك للنور
ربنا يوفقك يا رب

ابراهيم رزق said...

الف الف مبروك

فعلا خبر سعيد على الصبح

عقبال الكتاب رقم الف
فعلا الكتاب مولودك الصغير
هومش هيكبر معاكى لكن هيكبر عند الاخرين

تحياتى

haneen nidal said...

مبرووووووووك الكتاب و بالتوفيق

وجع البنفسج said...

ألف مبارك يا دينا

بتستاهلي كل خير

وفي انتظار صدور الكتاب ان شاء الله

Sara said...

ألف ألف مبروك يا دندن :)

و عقبال الطبعة المية :)

مستنية الكتاب بفارغ الصبر :)

سندباد said...

بالتوفيق دايما ان شاء الله وباذن الله من نجاح الي نجاح وفي انتظار المزيد
تحياتي

زينة زيدان said...

مسرورة بتواجدي هنا
و أشكر زيارتك لمدونتي
حقيقة وجدت في مدونتك راحة نفسية
وصدق وحب

ألف مبرووك ظهور حلمك للنور وبالتوفيق دوما
كل والود عزيزتي لكِ
ولكل الأصدقاء

كريمة سندي said...

والله مفجأة جميلة ورائعة مبارك عليك هذا الجهد الطيب

وعقبال المائة كتاب

Mohamed Amer said...

الف مليون مبروك
وان شاء الله نباركلك علي الكتاب رقم 1000
دومت بخير وسعاده
تحياتي

eng_semsem said...

الف مبروك على اصدار اول كتاب ليك
وان شاء الله تستمر المسيره ونشوف عدة اصدارات ليكي
وتبقى العزيمه وقوة الاراده سبب كبير في النجاح
تحياتي

آلاء شمردل said...

مبروك يا دينا ... المدونه كلها كمان رائعه

Śђąžล ฬąђ٤єĐ ♥ said...

مبروك يا دودو
وان شاء الله يبقا في بعد كده كتب كتير وكلهم يكونوا احلى من بعض :)

Nour said...

مليون مبروووك .. حلو اوي لما الحلم يتحول لحقيقة
ربنا يكرمك ويسعدك دايما ويلا بقى عايزين نفرح بحاجة تانية كمان قريب ;)

zeze said...

الف الف مبرووك يا حبيبتي
انا فرحانة اووي
وربنا يخليكوا لبعض

شمس النهار said...

ماشاء الله

بجد فرحانه ليكي جداااااا

بفرح بيكم وخصوصا انكم من بلوجر اللي جمعنا

بلوجر جميل بيكم وبكتابتكم
ربنا يكرمك وعقبال الكتاب المية :)

شيرين سامي said...

عارفه يا دينا حاسه إني شاركت في الكتب ده و متسألينيش إزاي :)
عارفه لما أختك تجيب بيبي و تحسي إنه كمان يخصك و تبقي مشتاقه تمسكيه و تبوسيه ده نفس إحساسي بكتابك و بإذن الله هكون أول واحده تجيبه و يمكن نعمل حفلة توقيع سوى :)

فرحانه ليكي ربنا يسعدك دائماً و يخليلك الناس اللي بيحبوكي و يشجعوكي
:)

Radwa Ashraf said...

ألف مبروك تانى يا دينا .. انتى بجد تستاهلى كده و أكتر
و فرحانة أنك مستسلمتيش عشان تطلعلينا بالكتاب الجميل ده :)
بجد مستنياه و مستنية الكتب الللى هتيجى بعده إن شاء الله :)

موناليزا said...

بالتوفيق يا دينا يا حبيبتى :)

نهر الحب said...

مبروك الكتاب اوي
تعرفي ان دي احد امنياتي اوي اوي اوي
:)

وكمان احساس حلو ان اللي بيحبك يشجعك علي تحقيق حلم بتحلمي بيه
ربنا يسعدك ديما
:)

وعقبالنا يارب

إيمي said...

حلوة مدونتك و اسلوبك عموما مش في التدوينة بس

انا كمان فكرت من فترة اكتب كتاب بس لسة متشجعتش انشره
مبروك الكتاب و اكيد هقراه

سلامي

ذ محمد أبو عز الدين said...

مبروك اختي
بالامل والجد نحقق المستحيل
من يحاول يجعل المستحيل ممكنا

Deyaa Ezzat said...

بالتوفيق إن شاء الله
وألف مبروووووووك وعقبال ما تحتفلي بنجاحه

Bent Men ElZman Da !! said...

mena moon

والله يا منه لسانى عجز قدام كلامك
مش عارفه اقولك ايه بجد
ربنا يخليك ليا يا حبيبتى
ومش يحرمنى منكم ابدا
وانا بحبك اوى على فكره بقى :*

Bent Men ElZman Da !! said...

فتــافيت

الله يبارك فيكى يا احلى رحاب فى الدنيا كلها
ربنا يخليكى يااارب :))

reemaas said...

بباركلك تانى يا دينا بجد والله فرحتلك جدا

Bent Men ElZman Da !! said...

MEROOooOOoo

الله يبارك فيكى يا جميله
ويسعدك يارب دايماً :))

Bent Men ElZman Da !! said...

مصطفى سيف الدين

الله يبارك فيك يا مصطفى
دى حاجه بتفرحنى انا انى أقرا لانسان مبدع زيك بجد
ميرسى ليك اوى على ذوقك ربنا يخليك :))

Bent Men ElZman Da !! said...

ابراهيم رزق

الله يبارك في حضرتك يااارب
ربنا يخليك وسعيده جدا ان خبرى كان حلو ليك على الصبح كده :))

Bent Men ElZman Da !! said...

haneen nidal

الله يبارك فيكى ميرسى ليكى اوى :)

Bent Men ElZman Da !! said...

وجع البنفسج

الله يبارك فيكى يا امتياز ويوفقك انتى كمان يارب
عشان انتى تستاهلى :)

Bent Men ElZman Da !! said...

Sara

الله يبارك فيكى يا ساره
ميرسى ليكى اوى يا جميله :))

Bent Men ElZman Da !! said...

سندباد

ميرسى ليك اوى على ذوقك
وبالتوفيق ليك دايماً يارب :)

Bent Men ElZman Da !! said...

زينة زيدان

الله يبارك فيكى ياجميله
انا اسعدنى وجودك ومرورك بمدونتى
ورأيك فيها ده شرف ليا :)
سعيده بوجودك

Bent Men ElZman Da !! said...

كريمة سندي

شكرا لحضرتك ويارب تكون مفاجأه حلوه ليكى
اسعدنى تعليقك وشكرا ليكي جدا :))

Bent Men ElZman Da !! said...

Mohamed Amer

الله يبارك فيك
شكرا ليك يا محمد على كلامك ..سعيده بوجودك :))

Bent Men ElZman Da !! said...

eng_semsem

الله يبارك فيك ميرسى ليك اوووى
وربنا يسمع منك ياارب
شكرا ليك على ذوقك :)

Bent Men ElZman Da !! said...

آلاء شمردل

الله يبارك فيكى يا آلاء
مش تتخيلى انا سعيده بوجودك هنا اد ايه
نورتينى يا جميله :)))

Bent Men ElZman Da !! said...

Śђąžล ฬąђ٤єĐ ♥

الله يبارك فيكى يا حبيبتى
ربنا يخليكى ليا ياااارب

Bent Men ElZman Da !! said...

Nour

الله يبارك فيكى يا نور
ربنا يخليكى يا حبيبه قلبى
ان شاء الله الحاجه التانيه قريب
انا بحب اجبلكم الحاجات الحلوه مع بعضها ههههههههههههههه

Bent Men ElZman Da !! said...

zeze

الله يبارك فيكى يا حبيبتى
ربنا يخليكى يا جميله :))

Bent Men ElZman Da !! said...

شمس النهار

بلوجر ده اصلا مفجر الاحلام بجد
انا بقيت حاسه كده
انا سعيده جدا بفرحتك دى
ربنا يخليكى ياااارب :))

Bent Men ElZman Da !! said...

شيرين سامي

ده مش مجرد احساس يا شيرين دى حقيقه :)
من اول ما قريت كتابك وهو كان بجد فارق معايا اووووى
السهل الممتنع زى ما بيقولوا
من كتر ما هو بسيط و من كتر ما فيه احساس
كان قريب من قلبى اوووى
واول ما كنت بقراها بقول انا ليه مش يجيلى الشجاعه اعمل كده
ليه مش اكتب
وكان فعلا كتابك امل ليا حقيقى بجد

مش تتخيلى انا مبسوطه بكلامك ده وفرح قلبى اد ايه
وحفله توقيعك ده شرف ليا انى احضرها بس مش كمان اعمل معاكى حفله :))

بحبك وبحب وجودك :)

Bent Men ElZman Da !! said...

Radwa Ashraf

الله يبارك فيكى يا رودى
ربنا يخليكى يا حبيبه قلبى تسلميلى يااارب :)

Bent Men ElZman Da !! said...

موناليزا

الله يبارك فيكى يا حبيبتى
بالتوفيق ليكى انتى كمان يااارب :)

سواح في ملك اللــــــــــــــــــه- said...

مبروك يادينا وأسف للتأخير

Bent Men ElZman Da !! said...

نهر الحب

الله يبارك فيكى يا جميله
عقبالك يااااااارب وتحققى كل اللى بتحلمى بيه
ربنا يخليكى يا حبيبتى :)

Bent Men ElZman Da !! said...

إيمي

ميرسى ليكى يا جميله على مرورك
واتمنى تحققى حلمك فى يوم من الايام
واتشجعى متخافيش من حاجه
الخوف ده والله اللى بيخلينا نتنازل عن احلام كتير ممكن اوى نحققها

اسعدنى مرورك واتمنى يتكرر تانى :))

Bent Men ElZman Da !! said...

ذ محمد أبو عز الدين

الله يبارك فيك
فعلا بالامل نقدر نحقق المستحيل
اسعدنى مرورك :))

Bent Men ElZman Da !! said...

Deyaa Ezzat

الله يبارك فيك
ميرسى ليك اوى على ذوقك :))

Bent Men ElZman Da !! said...

reemaas

الله يبارك فيكى يا نور
ربنا يخليكى يا حبيبتى :))

Bent Men ElZman Da !! said...

سواح في ملك اللــــــــــــــــــه-

الله يبارك فيك يا خالد
ولا يهمك اتعودت انك اول كومنت :))
يارب تكون فى احسن حال

nona elsha3nona said...

مبروك ياقمرايه وعقبال الكتاب الالف

Bent Men ElZman Da !! said...

nona elsha3nona

الله يبارك فيكى يا جميله
ربنا يخليكى يارب :))

:a: :b: :c: :d: :e: :f: :g: :h: :i: :j: :k: :l: :m: :n:

Post a Comment

 

FaceBook Comments

wibiya widget