24 June 2012

فكرة X صورة

.


احنا صراحه بلد متخصصه اشاعات
النهارده على حظى الجميل كالعاده
وانا بقالى اصلا يجى اسبوع مش خرجت
لما افكر اخرج اروح مدينه نصر
وال ايه بتوع شفيق مايفكروش ينزلوا يتظاهروا الا فى مدينه نصر
والبنت اللى معايا تقولى ده الدنيا مقفوله وناس كتير اوى عند المنصه
وانا اقولها لا ما انا هاخد حاجه تطلع كوبرى 6 اكتوبر
تقولى لا ماهما قفلوه.. قفلوا الكوبرى؟؟!!؟ والله ماكنت اعرف
اتحبست انا كده وحاصرونى فى مدينه نصر يعنى !!
نفضتلها بردو وركبنا مينى باص والجو كان لذيذ والطريق ماشى عادى
الاقى فى رمسيس يقولوا ده ظابط اضرب بالنار
والظباط رايحين يضربوا اللى ضربوه بالنار
حد فاهم حاجه؟!!؟
المشكله ان الناس تلاقيها بتجرى هنا وهنا 
من غير ما يعرفوا اصلا ايه اللى بيحصل
اهو اى هيصه وخلاص
بعيداً بقى عن اليوم الفظيع اللى مريت بيه النهارده
 الا انى عامله البوست ده عشان حاجه تانيه خاااالص
عشان الصوره دى



الصوره دى من مينى باص اللى هما لونهم اخضر دول
باسكت للزباله متعلق فى وش الباب 
يعنى يراه كل من نظره ضعيف لا قدر الله والا حاجه
الفكره عبقريه من وجهه نظرى وكنت نفسى اسأل مين اللى عملها
بيستفزنى جدااااااااااا ان اى حد يرمى اى ورقه والا حاجه فى الشارع
دايماً عامله كيس فى شنطتى احط فيه الحاجات اللى مش عايزاها
لما اروح البيت او لو قابلت اى باسكت ارميها
تخيلوا بقى لما حد بيرمى حاجه من عربيه ماشيه والا اتوبيس
بيبقى هاين عليا اقوم اجيبه من تى شيرته
وبالتالى الفكره دى بالنسبالى كانت حل تحفه
فى مكان واضح لكل الناس يمنع بقى ان حد يقول اصلى مش شفتها
وفعلا كان الناس بتقوم من مكانها وترمى فيه اى حاجه مش عايزنها
وده كان راجع بالايجاب على المينى باص 
انه فعلا كان نضيف ودى قليل لما بشوفها 
وخصوصا فى نص اليوم او اخره
بعد ما بيكون خد لفته وركبه ناس كتييير
وكله رمى فيه اللى مش عايزه
ياريت لو تبقى الفكره دى موجوده فى اماكن كتير
 زى الاتوبيسات والمينى باصات او حتى فى اى تاكسى
اكيد بالتصرفات البسيطه اللى زى دى
احنا احتمال كبير نبقى افضل


39 comments

ابراهيم رزق said...

ههههههههههههههه

تصدقى الفكرة جميلة جدا

و جمالها فى بساطتها

تحياتى

Bent Men ElZman Da !! said...

ابراهيم رزق

ده عبقريتها فى بساطتها اصلا

نورتنى بوجودك الجميل ده :))

Unknown said...

و انا كمان زيك ببقا مضايقة اوووي لو رميت حاجة فى الشارع بس ساعات بكون مضطرة لدة ومافيش اي باسكت خالص و شنطتي عادةً بتكون صغيرة يادوبك واخدة حاجتي بالعافية :(
تموضوعك جميل اوووي :)
ومدونتك كلها جميله جدااا

حنين محمد said...

صباح الغاردينيا دينا
طيب الحمدلله بعد ماتعكننتي بجماعة شفيق في مدينة نصر
تلاقي حاجة جميلة زي الباسكت دا بجد في حاجات بسيطة
لو الجميع بيتعاون عليها حتبقى بلدنا حلوة اوي
ماتقوليش بلدكم ايه ياريمو مصر كمان ام الدنيا وبلدي التانية :)"
؛؛؛
لروحك عبق الغاردينيا
كانت هنا
Reemaas

Radwa Ashraf said...

معليش .. حظم مكنش حلو النهاردة :(
بس الفكرة بتاعة الباسكت حلوة أوى
لو يكرروها فى كل الأوتوبيسات و يزودوها فى الشوارع و كده .. الزبالة مش هتبقى كتيرة كده!

مصطفى سيف الدين said...

تفتكري يعني اللي في اول العربية و بعيد عن الباسكيت هيفكر يقوم و يمشي المشوار ده علشان يحط اللي عايز يرميه في الباسكيت و لا يستسهل و يرميه من الشباك
احنا شعب نعشق الاستسهال يا صديقتي
تحياتي ليكي

Nour said...

انا عايزة اقولك ان موضوع النتيجية ده عاملي قلق من يوم الخميس
كل ما اجي انزل الكلية او انزل عموما يقولوا النتيجية النهاردة ومرة قالوا حظر تجول ومرة قالوا محدش ينزل وكل مرة تبقى اليوم اللي بعده ويطلع كله اشاعات برضه

انا بقالي فترة مش بنزل يوم الجمعة لأني حصلت معايا مرتين اني كنت بره وحصل مظاهرات عند وزارة الدفاع ورجعت بسببها الساعة 12 بليل :D

انا كمان زيك في موضوع رمي الحاجة في الشارع ده حتى لو كانت ورقة ليانة بيستفزني جدا لما اشوف حد بيرمي حاجة وهو يقدر يشيلها معاه ويرميها بعدين .. بس دي للأسف بتبقى ثقافات

rona ali said...

ههههههههههه فين اللي يقدرو
سبنى من جزئيه الاشاعات ومدينه نظر وكوبري اكتوبر اللى اخر كريم عليا 5 ساعات بحالهم
احم يلا

نيجى لزباله انا كمان بتنقط والغريب ان حد تعرفي كمان يعملها ولما نزلت حمله في رابعه لتوعيه وتنضيف الكليه بتاعتنا قابلت استغفر الله عظيم بشر معندهمش ثقافه اصلا وبالاسم في جامعه
بس كنت بتنقط علي رمى الزباله ولزق دعايا علي الحيطان
فكرة المينى باص دة حلو وبسيطه وعبقريه فعلا :)

تسلم ايدك

مروه زهران said...

موضوع جميل والفكرة جميلة وبسيطة
فى انتظار جديدك

Unknown said...

تصدقى انا كمان ديما بكون حاطها كيس كده في شنطتى وتيجي ماما ولا اختى يلعبو في الشنطه ويفتكروا بقى يما هنا يما هناك ليقوها كياس فاضيه على شويت مناديل ههههههههههه

بس بجد الفكرة حلوه اوى ويراها اى كفيف |^_^

زينة زيدان said...

فكرة رقيها بهدفها
و عبقريتها في عمليتها
بسيطة لكن تعالج مسألة معقدة


أشكر فكرتك الهادفة

AHMED SAMIR said...

كلامك صحيح مية في المية
كتير جدا بنبقى محتاجين نرمي حاجة في البسكت و نبص حوالينا نلتقي مفيش و لا باسكت في المكان..!!!!!!!
تحية للراجل تللي حط الباسكت

Unknown said...

فعلا فكرة جميلة

نيسآان said...

فكره نظيفه جدا...يا ريت الكل يطبقها

Śђąžล ฬąђ٤єĐ ♥ said...

الفكره أكيد جميله جدا وعبقريه
بس المهم ثقافة الناس تتغير
الناس بتبقا شايفه الباسكت قدام عنيها وبتسيبه وترمي جمبه

الناس يا دينا
الناااااااس لازم تنضف قبل الشوارع
ولازم تتغير عشان حياتنا كلها تتغير

رؤى عليوة said...

الفكرة جميلة والاجمل انها تنتشر حتى لو من البوست ده

هى فعلا حاجة بتنرفز بس هى كمان عدوى عدوى نظافة او عكسها

لو مشيتى فى شارع نضيف تلاقى الناس حريصة انها مترميش فيه حاجة والعكس

بلدنا ان شاء الله هتكون احلىىى

ربنا يستر كلها ساعات ونعرف النتيجة


دمت بخير

Imane Belâbbes said...

انا على طول شنطتي كلها أزبال
و يقولولي ارمي في الشارع بس بحسه احساس متخلف من ناس مثقفة يعني

سلامي :)

Habiba said...

فكرة أكثر من رائعة..نحو الأفضل بإذن الله

نهر الحب said...

الفكرة حلوة اوي فعلا
انا كمان بيستفزني اي حد بيرمي اي حاجة في الشارع وبرمي في شنظتي لحد ما اروح
:))

سيبك بقي اهو شفشق خسر بقي

Bent Men ElZman Da !! said...

Yasmina Saied

وجودك هو الاجمل يا قمر
نورتينى واسعدتنى زيارتك :))

Bent Men ElZman Da !! said...

ريـــمـــاس

لا ما هو للاسف حكايه الباسكت دى كانت قبل مااتحبس فى مدينه نصر هههههه
بحب فيكى روحك الجميله دى يا ريمو
نورتينى يا حبيبتى

Bent Men ElZman Da !! said...

Radwa Ashraf

انا حاسه ان بجد ممكن يكون فى امل الوضع يختلف ساعتها

نورتينى يا حبيبتى :)

Bent Men ElZman Da !! said...

مصطفى سيف الدين

لا هو من ناحيه الاستستهال فـ احنا اصلا ممكن ناخد جوايز فيه
بس يمكن يبقى فى امل لو الموضوع زاد شويه
يعنى باسكت فى اول الاتوبيس وباسكت فى اخره
او تبقى فكره احلى وتبقى باسكت صغير كده تحت شباك كل كرسى
والله هتفرق كتير

اسعدنى وجودك ورأيك :)

Bent Men ElZman Da !! said...

Nour

والله يا نور نفس اللى حصلى امبارح
انا كنت خلاص قرربت اقتنع انى مش هاعرف اروح بيتنا
بس وصلت قبل 12 الحمدالله :D

الموضوع مستفز فعلا ومانكرش ان الثقافات بتفرق
بس اكيد بنتمنى ده يتغير للاحسن

نورتينى بوجودك :))

سندباد said...

لسه في حاجات كتير فينا عايز تتغير زي ما قدرنا نغير جبروت نظام احنا سنة اولي في كل حاجة حتي في طباعنا وسلوكياتنا
بوست جميل
احسنتي

Bent Men ElZman Da !! said...

rona ali

ههههههههههههههههه
لا مالوش حق الكوبرى يأخر كريم كل ده

حكايه الحملات دى بتبقى صعبه
لان كتير مننا مش بيحب حد يوجهه اصلا
ولا يقوله ماتعملش كده بشكل مباشر
انما لو حطيتله باسكت مثلا بين كل متر ومتر
ممكن يقتنع انه يستنى المتر الجاى عشان يرمى فى الباسكت اللى هو عايزه

مبسوطه انا بوجودك بقى :)))

Bent Men ElZman Da !! said...

MEROOooOOoo

ميرسى ليكى يا جميله
نورتينى بوجودك :)

Bent Men ElZman Da !! said...

mena moon

ههههههههههههههههههههه
انا بردو كده
اول ما اجى البيت اقعد افضى الفضايح بقى ههههه

نورتينى يا حبيبتى

Bent Men ElZman Da !! said...

زينة زيدان

فعلا رقيها فى بساطتها
وبرغم بساطتها دى الا ان الاهتمام بيها هيصنع فارق كبيييير فعلا

اسعدنى وجودك وتعليقك :))

Bent Men ElZman Da !! said...

AHMED SAMIR

اه والله كان نفسى اعرف مين هو عشان هو محتاج تحيه فعلا

اسعدنى وجودك

Bent Men ElZman Da !! said...

Mohamed Amer

شكرا ليك واسعدنى وجودك :)

Bent Men ElZman Da !! said...

نيسآان

ياريت والله

اسعدنى وجودك :)

Bent Men ElZman Da !! said...

Śђąžล ฬąђ٤єĐ ♥

الاهم اكيييد الناس انا معاكى فى ده
بس ممكن يكون الموضوع ده عدوى
ونقدر مع الوقت الناس تتغير
ساعتها هتفرق كتير

نورتينى بوجودك وتعليقك يا شذى :)))

Bent Men ElZman Da !! said...

رؤى عليوة

ايوه يا رؤى هى فعلا عدى
لو ماشيه فى شارع نضيف الواحد هيصعب عليه يرمى حاجه فيه
وهيقول اشمعنا انا يعنى اللى ارمى
وبالتالى ممكن حركه زى حركه الباسكت دى
تخلى الناس تاخد بالها من الموضوع ده

نورتينى يا جميله واسعدنى تعليقك

Bent Men ElZman Da !! said...

إيمي

هى افضل حركه
وعلى الاقل تغيير من نفسك قبل ما يكون تغير من الاخر

نورتينى يا جميله بوجودك :))

Bent Men ElZman Da !! said...

habiba

اكيد نحو الافضل
نورتينى يا جميله :))

Bent Men ElZman Da !! said...

نهر الحب

هههههههههههههههههه
اهم حاجه فى الموضوع ان شفيق خسر
كده فى امل فى الباسكت هههههههه
نورتينى يا جميله :))

Bent Men ElZman Da !! said...

سندباد

اكيد لسه قدامنا كتييير وحاجات اكتر محتاجه تتغير
بس ادينا بنبدأ من الابسط

اسعدنى وجودك وتعليقك :))

Hanan w Haneen said...

هههههههههههه
فكرة تحفة والله :D

:a: :b: :c: :d: :e: :f: :g: :h: :i: :j: :k: :l: :m: :n:

Post a Comment