29 July 2012

صباح السعادة :)

.
34 التعليقات




صباح بنكهه السعادة
ملون بلون البهجة
صباح يحتوى طيفك
فـ يحتوينى ....




الصوره تحتوى على بطاقات الربيع العربى
وكتاب رشق الغزال
هديه من الرائعه سوزان عليوان
التى صنعت سعادتى اليوم :)



28/7/2012


readmore »»

25 July 2012

من رمضان اللى فات :)

.
26 التعليقات



السنه اللى فاتت زى دلوقتى
كان فى حمله للتدوين اليومى فى رمضان
وكان مفيش بينها وبين حمله التدوين اليومى بتاعه شهر يونيو كتير
بس كنت فى دماغى فكره نفسى اعملها والحمدالله عملتها

كنت بنزل سلسله اسمها رمضان مابين زمان ودلوقتى
وبقول فيها من وجهه نظرى ايه اللى اختلف ما بين رمضان زمان ودلوقتى
وبعدها نزلت سلسله تانيه اسمها احلى ما فى رمضان
وفيها كنت بقول الحاجات اللى دايماً بتحلى رمضان وبتحسسنا بيه

كنت مبسوطه جدا بالفكرتين دول
واللى خلانى مبسوطه اكتر
لما لاقيت مُعده ومذيعه برامج راديو 
بعتتلى رساله على صفحه المدونه على الفيس
انها عايزه تستخدم تدويناتى دى
فى البرنامج بتاعها اللى بتحضره لـرمضان
كنت مبسوطه جداااا ان فكره زى دى 
لفتت نظر حد وأهتم أنه يقدمها فى برنامجه
وعشان انا بعتز جدا بالفتره دى من رمضان اللى فات
وبالافكار دى
حبيت اشارككم بيها رمضان السنادى كمان


سلسله رمضان بين زمان ودلوقتى










سلسله أحلى ما فى رمضان








ودول موضوعين بعيداً عن السلستين اللى فاتوا






readmore »»

19 July 2012

كل حمله وانتم طيبين :)

.
41 التعليقات




مش عارفه اوصف شعورى بالحمله دى ازاى
بس مبدأيا انا اتفاجئت اول ما شيرين سامى اعلنت عن الحمله
اتفاجئت عشان مش صدقت ان عدى سنه كامله على الحمله اللى فاتت
واللى كانت سبب فى انى اعرفكم
وسبب فى انى اعرف نفسى ومدونتى اكتر

لما بدأت الحمله دى ماكنتش محضره لأى حاجه ولا اى تدوينه اكتب عنها
 زى الحمله اللى قبل كده
بس كنت حاطه فى نيتى اكتب 30 تدوينه
مش عشان حاجه
بس كان تحدى لنفسى مش اكتر زى ما عملت السنه اللى فاتت
ولسبب ظروف ما وقع منى كام يوم فى الحمله
بس مبسوطه جداً بالتدوينات بتاعه الشهر ده
مبسوطه اكتر بالمدونات اللى عرفتها
والمدونات اللى كنت عرفاهم واستمتعت بيهم فى الحمله اكتر
مبسوطه بقى اوى ان نفس المدونات اللى عرفتها السنه اللى فاتت من خلال الحمله
كنت بردو بتابعهم السنادى وكأن الزمن بيعيد نفسه وبنفس الجمال تانى ويمكن اكتر

حسيت السنادى ان تدويناتى اختلفت خالص عن الحمله بتاعه السنه اللى فاتت
يمكن لان السنه اللى فاتت كانت كل تدويناتى اجتماعيه جداً
والسنادى كانت قليله جدا التدوينات اللى من النوع ده
بس انا كنت براعى انى مش اكتب تدوينات كبيره 
لضغط الحمله والتدوينات الكتير اللى فيها
لكن سعيده جدا بيكم وبنفسى وبكل المدونات اللى عرفتها السنادى
نفسى نكون على نفس التواصل طول السنه
ونفسى اوى اوى السنه الجايه ان شاء الله
نتقابل فى نفس الحمله على خير :)

 

readmore »»

18 July 2012

۩ فى انتظارك ۩

.
29 التعليقات




رمضان السنادى مستنياه بشوق غريب
 
لحاجات كتير اوووى حلوه فيه

مستنيه شهر كل ايامه الواحد بيكون حاسس فيها بـ حاله تصالح 
مع كل حاجه حواليه وبتبقى كل حاجه جميله اوى

مستنيه أختم القرآن وان شاء الله اكتر من السنه اللى فاتت

مستنيه اعيد كل الحاجات اللى كنت بعملها السنه اللى فاتت
واللى قبلها والى قبلها واتمنى من كل قلبى فى كل مره ان ربنا يتقبل منى

مستنيه اوى اتجمع انا وانتم فى حاجه جميله اوى بدأناها مع بعض 
وهنكملها فى رمضان كمان ان شاء الله ..رحله الى الله

مستنيه وقت السحور لما ادخل انا واختى المطبخ عشان نحضره
ونقعد نرخم على بعض على اى حاجه

مستنيه قبل الفطار لما نبقى بنحضر الترابيزه وبنحضر المشروبات عليها
واحنا بردو بنفس الرخامه سبحان الله

مستنيه أول ما الأذان يأذن واقعد أدعلنا 
عشان عارفه ان ربنا بيتقبل دعوه الصائم وقت افطاره

مستنيه اول ما ابدأ افطر وانا ببعتلك رساله ادعيلك 
واتمنى فيها ان ربنا يتقبل صيامنا

مستنيه بعد الفطار لما اسيبهم كلهم 
واعتكف لوحدى كده فى الاوضه اقرأ القرآن 
وهما فاكرنى اصلا نايمه

مستنيه اوى صلاه التراويح وصوت المأذن 
وزحمه المسجد اللى بتخلى قلبى فرحان اوى

مستنيه يوم ما بتيجى بعد العِشَاء 
ونقعد نقرأ فى المصحف سوا

مستنيه لما كل يوم تسألنى وصلتى للجزء الكام وانا اسالك نفس السؤال
وتخلينى اطير من الفرحه بيك لما تقولى انك الحمدالله ختمت القرآن

مستنيه فانوسى ابو شمعه
اللى مش بحس ولا بتبسط بأى فانوس غيره اصلا 

مستنيه رمضان ده لأنه للأسف هيكون اخر رمضان ليا فى بيتنا
ورمضان اللى بعده ان شاء الله اكون فى عش الزوجيه بقى ^_^

نفسى اعيش كل الحاجات دى من غير ما اقصر فى اى حاجه ولا اقصر مع اى حد  بحجه انى مشغوله فى تجهيز شقتى

واضح كمان ان رمضان ده جاى ومعاه حاجات حلوه كتير
لانى غير انى هاكون بحقق حلمى 
فى انى اكمل حياتى مع الانسان اللى ربنا رزقنى بيه 
وبحمده عليه كتير اوى
بس مستنيه كمان فى رمضان ده حاجه مهمه اوووى
كتابى ان شاء الله هينزل فى معرض الكتاب اللى هيكون فى فيصل 
من 26-7 لــ 10-8 بإذن الله
مش قادره لحد دلوقتى اتخيل احساسى لما اشوفه قدام عينى كده
ونفسى اووى اعرف رأيكم فيه 
وبتمنى من ربنا انه يكون عند حسن ظنكم
ومستنيه تقولولى اذا كان يستحق والا حتى انه وحش
المهم انى اعرف رأيكم عشان أكون احسن

 
كل سنه وانتم طيبين
وكل سنه واحنا يارب دايماً متجمعين
ويعود عليكم بالخير ياااارب
۩ رمضان كريم ۩



readmore »»

17 July 2012

انا ... منك ♥

.
28 التعليقات




ممتلئه انا بك
تمتلى نبضاتى بـ دقاتك
تمتلى ملامحى بحنانك
تمتلى عيناى بنظراتك
ويمتلى صوتى بهمساتك
فـ داخلى لا يسع سواك

♥♥

عاشقه انا منك
اعشق لحظاتى جوارك
اعشق حماقاتى أمامك
اعشق ضحكاتى لمزحاتك
فـ ايامى لا تمر الا معك

♥♥

ممتنه انا لك
ممتنه انا لقدر جمعنى بك
ممتنه انا لقدر كنت انت اجمل لوحاته المعلقه على جدار عمرى


readmore »»

16 July 2012

الرسائل المخفيه ..!

.
29 التعليقات




أحبته منذ وعيت عينيها على دنيا كان هو بطلها
وحلم كان هو فارسه
لم ترى سواه
ولم تحلم ألا به
لتمنحه قلباً قد خُلق فقط لـ حبه
وتمنحه اياماً كانت تحياها لـ أجله
كان هو مثلها الاعلى
فـ تبدأ خطواتها متتبعه خطاه   
لا تعشق سوى ما يحبه
ولا تنفر سوى مما يمقته
ليأتى يوم قرر القدر أن يوقظها من أحلامها
وكان سبيل أيقاظها .. رسائله المخفيه بعيداً عن عينيها
لتكن أولى رسائله هى اعتراف بعشق أنثى سواها
أما الثانيه فقد كانت تاكيداً للأولى فى محتواها

اما الثالثه فكانت وعد اهداها اياه فى ليله عشق جمعتهما
ليهديه لأخرى فى نفس ذات الليله
لتصبح تقتسمه مع انثى غيرها 

قد اهداها هى الاخرى وعد بالزواج !



readmore »»

15 July 2012

مِـن حَـقـيّ

.
26 التعليقات



من حقى انى اقول ارائى السياسيه بحريه مهما كان اختلافها

  
من حقى احلم واسعى لتحقيق احلامى دى

من حقى اكون مبسوطه

من حقى اشتغل زيى زى اى رجل لان البنت زى الولد مش بس كماله عدد

من حقى تحترمنى زى ما انا بحترمك

من حقى اقول  "لا" على اى حاجه مش عاجبانى

من حقى اتعلم تعليم كويس احبه

من حقى اعيش بمبدأ أن الانسان اغلى شئ على وجه الارض

من حقى اعيش فى بلد فيها عيش حريه عداله اجتماعيه

من حقى احافظ على كرامتى مهما كانت الخساير

من حقى ابص لسعادتى قبل ما ابص لسعاده غيرى

من حقى اعمل رجيم وقت ما انا عايزه وابطله وقت ما انا عايزه

من حقى اخلى اسرارى لنفسى وماحدش يعرفها

من حقى  الناس تحترم اسرارى دى وماتحاولش تدور فيها

من حقى لما اضايق وازعل اعبر عن ده بجميع الطرق اللى تريحنى

من حقى انى ماسبش حقى مهما كانت الاسباب والخساير
 

من حقى أحلم .. أنا أنثى .. أنا انسان



فكره البوست مقتبسه من فكره بيدج مِـن حَـقـيّ






readmore »»

14 July 2012

كلام والسلام ... كلاكيت 19 مره

.
23 التعليقات




ازاى بعد ما كنت انا وانتى بنقعد بالساعات نتكلم
ولما نسيب بعض نفتكر ان بردو لسه فى حاجات مش قولناها
ودلوقتى لما اتقابلنا مابقتش عارفه اتكلم معاكى فى ايه !
ومكالمتنا مش بتتعدى دقيقتين
اوقات لما بتتكسر وتموت حاجات بينا وجوانا
مش بنقدر نصلحها ابداً
مهما حاولنا !

********

فى اوقات كده بتبقى حياتنا محتاجه ترتيب
مش عشان متلغبطه ولا عشان نرجع بالزمن لورا  لا لا
قصدى بنبقى عايزين نرتب اشخاص معينين فى اماكن معينه
وصدف معينه بنلاقيهم بتليق على اشخاص مختلفين
وبعض الكلام اللى بنقوله لو غيرنا ترتيبه 
هنلاقيه بيقول حاجات احلى كتير
تخيلوا كده لو حياتنا عامله زى البازل
هتبقى مختلفه تماماً
يمكن كنا نقدر نخليها احسن 
لو عيدنا ترتيب الاشخاص والظروف والاماكن والاحداث و الكلام
ما اجمل الحياه فى شكل البازل !!


********

فى حاجات كده صغيره
وارد تكون مش بتهم اى حد فى الدنيا
بس بتفرح قلبى انا
يمكن لانها بتفكرنى باوقات كنت مبسوطه فيها اوى
ويمكن لانها بتفكرنى بحاجات مابقتش موجوده دلوقتى
بس الاهم انى ببقى مبسوطه بفرحه قلبى دى


********

اختلاف حالتنا النفسيه بتبقى حسب قابليتنا احنا للاختلاف
يعنى لو عندنا استعداد نفرح
اقل وابسط حاجه بتفرحنا
ولو عندنا استعداد نكتئب
بنبقى بنتلكك على اى حاجه تضايقنا
احنا من جوانا اللى بنحدد عايزين نكون حاسين بأيه


********

على فكره انا طيبه اوى
واقل حاجه بتسعدنى
بس للاسف فى نفس ذات الوقت شريره جدا
واقل حاجه بتضايقنى !!

readmore »»

13 July 2012

الـسـيــرك

.
26 التعليقات





تقضى يومها فى التشبث بهذا الحبل 
والتعلق بالآخر ..لتصل لهذا الثالث القابع هناك
كم تمنت أن يختطفها القدر من هنا
أو حتى يستبدلها بأى انثى غيرها
غير مباليه بما يحدث لها
كم تمنت كثيراً ان تخرج لـترى النور بعيداً عن هذا السيرك
الذى لا تملك فيه من نفسها شئ
وحين منحها القدر ما تمنته
وظنت وقتها أن أُمنياتها جميعها تحققت معاً
عادت لتتمنى من جديد ان تعود لما كانت فيه
فـ حبال السيرك كانت ارق وأهون عليها كثيراً
فى عثراتها وتقلباتها وجروحها وحتى موتها
من الحياه خارجه ...
فعادت كما كانت
شاعره وقتها بقيمه ما منحها هذا السيرك اياه !!



readmore »»

12 July 2012

غابات الدَش الكتيره !!

.
22 التعليقات



بالرغم من ان احنا من الدول الناميه وبيقولوا علينا العالم التالت
وده معناه تاخرنا فى كل حاجه والأهم اقتصادياً
الا ان فعلا فى حاجات كتيره غير ضروريه يوم عن يوم بتزيد
وبتبقى من اساسيات حياتنا
واكتر حاجه لافته نظرى بقى حكايه الدَش دى


ممكن تلاقى بيت خلاص اصلا هيقع من كتر ما هو قديم
ساكنين فيه ناس بيقضوا يومهم بالعافيه
ومع ذلك تلاقى البيت ده فوقه يجى 10 اطباق دش
كل شقه فيها واحد ده على الاقل يعنى
زمان كان اللى عنده دَش ده يبقى غنى
انما دلوقتى ده ما بقاش مقياس خالص
لانه بقى من الكمليات اللى اصبحت ضروريات
ممكن حد يقولى ده اصلا الدَش والرسيفر بقت حاجات رخيصه 
والصين غرقت البلد بيهم
بس الفكره فى ان اولياتنا اصلا اختلفت
انا متاكده ان السبب فى كل كده
التلفزيون المصرى
اللى زَهق الناس منه وخلاهم يروحوا للتركى و توفيق عكاشه
على الاقل دول اهون شويه منه


readmore »»

11 July 2012

Final Cut ..!

.
32 التعليقات



فى دماغى النهارده اتكلم عن فكره معينه شوفتها فى  فيلم المؤلف
"Final Cut "
الفيلم ده بيحكى عن برنامج ظهر فى عصر التطور التكنولوجى
 اللى تعدى المرحله اللى وصلنا ليها دلوقتى
البرنامج ده عباره عن شريحه بتتركب فى المخ
وبتصور حياتك لحظه بلحظه لانها بتشتغل من خلال عينك
اللى انت بتشوفه بيتسجل فى البرنامج ده على شريحه 
زى ميمورى الموبيل كده
ولما بتموت فى شخص اسمه المؤلف
بياخد الشريحه دى
وبيختار افضل لقطات حياتك واقربها لقلبك حسب اهلك واصحابك
ويعمل من اللقطات دى فيلم يتعرض فى جنازه صاحب الشريحه دى
كذكرى ليه يعنى

الفيلم لفت نظرى فكرته اوى
هو ممكن التطور التكنولوجى يوصل بينا لكده؟
ممكن اصلا حد يفكر يخترع حاجه زى دى ؟!؟
طب حتى لو حد اخترعها
فى حد اصلا ممكن يشتريها
ويخلى حياته عرضه كده ان حد يشوف جميع تفاصيلها
كل واحد فينا عنده اسرار
اوقات فى حياته مواقف مش يحب ابداً ان حد يشوفها
واوقات اصلا بيبقى فى مواقف لما بتمر بينا بندعى انها مش تكرر تانى
ولا حتى فى ذكرياتنا
انما دى هتبقى فيلم بيتعاد يعنى كل موقف وجعنا هيفضل وجعه ده يأثر فينا
كل مواقف فرحنا هنعيش الفرح ده كل مره بنشوف فيها الفيلم ده
معقول فى حد هيتنازل عن خصوصيته اوى كده
وتبقى حياته شريط فيلم طوووويل اى انسان غريب عنه يقدر يشوفه كده
ازاى حياتنا تبقى مشاع للناس كده
واحنا اللى اوقات بندارى منها عشان مانعشهاش !


readmore »»

10 July 2012

بعضاً منى ومنك ..♥

.
33 التعليقات



لما حد يقولى ده اتغير اوى من ساعه ما خطبك
استفسر : اتغير ازاى؟
يكون الرد : بقى اهدى واحسن الحمدالله
وخصوصا لما يكون الحد ده اقرب الناس ليك..مامتك
ببقى طايره من الفرحه بيك

انت: انا حسيت بقيمتك اوى دلوقتى
انا: هو لازم كان كل ده يحصل عشان تحس بقيمتى؟
انت: لا بس دلوقتى بقيت حاسس بيها زياده اكتر عن الاول
 

لما استنا يوم واحد فى الشهر تخلص شغلك
عشان اسالك انت قبضت النهارده؟
تقولى اه يا حبيبى الحمدالله
ارد انا بــ كل شهر وانت طيب يارب
وقبل ما اسمع ردك اسمع ضحكه قلبك

بحب يبقى لينا عادات مش اى حد غيرنا بيعملها
حتى لو كانت بسيطه اوى زى دى



انت: طيب انا عندى فكره تانيه حلوه 
انا: ايه هى؟
انت: بلاش كل ده وساعتها نبقى نسافر نعمل عُمره ايه رأيك؟
انا: (بعد ذهول كتير) وبردو فى الاخر ماعرفتش ارد عليك الرد المناسب
اصل فكره ان احنا نروح نزور الرسول عليه الصلاه والسلام 
دى كبيره اوى
تخيل لما تكون انت كمان مَحرِم ليا
بيتهيألى مش هاكون عايزه اى حاجه من الدنيا تانى



بحب اوى لحظات جنانك 
ولما الاقيك فجأه فى لمح البصر بتحضر لحاجات كتير حلوه تجمعنا
وهتفضل ذكرى جميله اوى فى حياتنا الجايه
بتأكد ان انت اللى بتصنع بوجودك حياتى


انت: ايه اللى انتى عملتيه ده .. هو فى يا مجنونه حد يعيط ويعمل كده
انا : اه فى ...انا
انت: بس بردو بتبقى
طفله اوى وعسل كده وانتى بتعيطى
 

ماكنتش حاسه بحكايه ان الولد ينزل على رجله
عشان يطلب ايد اللى بيحبها وانها تبقى ام اولاده
او عشان يلبسها الدبله وانها تبقى على اسمه
بس معاك دايماً بتحسسنى بحاجات حلوه ومختلفه :)
وبعدين انا اصلاً بحب اسمك
فـ طبيعى انى اوافق اتسمى بيه
 

 انت : تقبلى تاخدى بأيدى عشان تقربينى من ربنا اكتر
ونكون مع بعض فى الجنه
انا : (بعد شويه ذهول و صمت) اكيد ان شاء الله
شويه الذهول والصمت دول
عشان انت خطفت قلبى و عقلى بـ الجنه اللى هتجمعنا
قبل ما تخطف الاجابه من على لسانى

 

اوقات لما بقعد مع نفسى
وارجع بشريط حياتى لورا
وافتكر تفاصيل كتير اوووى كنت احب انها ماتبقاش موجوده فى حياتى
واوصل فى الاخر
ان ربنا كان كاتب اعيش التفاصيل دى كلها وكميه الصدف دى
عشان بس اقابلك فى النهايه
بقول الحمدالله يارب على حكمتك فى اللى دايماً بتكتبهولى

وبحمد ربنا عليك ♥


readmore »»

09 July 2012

ذات الـخُـف

.
28 التعليقات




منذ ان كانت صغيره
اعتادت ان تتجول داخل ارجاء منزلها حافيه القدمين
ولكنها و منذ نضجت
اصبحت لا تسطيع الاستغاء عنه مطلقاً
ربما تحب مظهره
وربما تحب عاداتها الصغيره تلك
وذات يوم حاولت ان تُجرب السير بدونه
و استوعبت جيداً لما احبته دائماً
فـ حين سارت دونه اصبحت تسمع دقات اقدامها على ارضيه منزلها
وكأنها تَرَتَد داخل جدران قلبها
ولانها ومنذ نضجت ونضج قلبها قررت ان تتخلى عنه الى الابد
علها لا تشعر ابداً به او بـ ألمه
ولم يشعرها الان بوجوده الا دقات اقدامها
فقررت ألا تتخلى  مطلقاً عن خُفها مره اخرى

readmore »»

08 July 2012

كلام والسلام ... كلاكيت 18 مره

.
24 التعليقات




مش بحب التكلف ابدااااا
بحب العفويه والكلام اللى بيطلع من القلب
عشان كده الكلام اللى بيجى فى دماغى بكتبه هنا
وقت جنانى وقت عقلى وقت حزنى ووقت فرحى
ماينفعش ادى للمدونه شكل يقيدنى
وهى اصلا بيتى الصغير اللى بقدر اتكلم فيه من غير ما حد يحاسبنى
لو مش قولت اللى فى قلبى هنا
اومال هاقوله فين !!
بقول كلام من القلب وبتمنى انه يوصل للقلب
مهما واقعى اتغير
هتفضل مدونتى دى هى المكان الوحيد 
اللى بحكى فيه كل اللى فى قلبى
من غير تكلف
من غير تغيير
من غير رتوش

*******

اكتشفت حاجه مهمه اوووى فيا
انا مابعرفش اعمل حاجه صح الا لما بلاقى منافسه قدامى
مابعرفش اكون احسن الا لما احس انى لازم اكون احسن
من الاخر لازم الاقى دافع قوى يشجعنى دايماً على اللى بعمله
مش بعرف اعمل حاجه من نفسى
ودى احيانا حاجه كويسه
واحيانا حاجه وحشه جدا

*******

بيبقى فى بعض الاشخاص
نعرفهم بس عمرنا ما قبلناهم
وبالرغم من اختلاف شخصيتهم واخلاقهم 
وحتى طريقه كلامهم تمام الاختلاف
الا ان دايماً جوايا احساس
اننا لو قابلناهم هيكونوا شبه بعض فى الشكل اوى
مش عارفه ليه !

*******

هو ازاى اوقات بيكون العقل مُسير كده ؟
يعنى لما نكون متعودين او فى شكل معين لحياتنا الحاليه او المستقبليه
ويحصل اى موقف جذرى هيغيرها
بيفضل عقلنا يتخيل المستقبل بنفس الطريقه اللى كان متوقع انها هتكون
ده بيكون رفض للواقع وعدم القدره على استيعاب الموقف اللى حصل

*******

 فى بجد اشخاص نفسيتهم مرضيه
مايعرفوش غير انهم يحقدوا على غيرهم 
ويوقعوا بين الناس وبعضها ويكدبوا
ومع ذلك يرجعوا يشوفوا نفسهم هما اللى صح 
ومش بيحسوا بأى ذنب !!
قلبهم مايعرفش غير الطريقه دى للتعامل
دايماً عايشين والغرور بياكل فيهم
مش قادرين ياخدوا بالهم
 ان الشخصيه الكويسه مش بكميه ثقافتها او كلامها او تعبيراتها
الشخصيه الكويسه بالنفسيه الكويسه فى طريقه التعامل
و اللى تتمنى الخير لغيرها

*******

هو ازاى ممكن الواحد وهو بيلف فى المدونات كده
يقابل مدونه مكتوب فيها موقف حصله بكل وادق حذافيره ؟
وكأن اللى كاتب التدوينه دى شخص خفى قاعد جنبى فى مسرحيه حياتى
معقول يكون فى توارد احاسيس وافكار ومواقف للدرجه دى !!!!!

*******

فعلا فى اوقات بتمر على الواحد
مش بيلاقى افضل من كلمه
حسبى الله ونعم الوكيل
وكفى

readmore »»

07 July 2012

♥ حته ملونه

.
27 التعليقات



مهما كانت الحياه مضلمه 

♥ لسه بردو فيها حته ملونه



readmore »»

06 July 2012

....

.
30 التعليقات




جرحك ليا صحانى
على دمعه هزت احلامى
ولسه...
جوايا ليك حنين
بيصحى  فيا الانين
و بيرَجَع اللى فات من السنين
لكن...
انا اتهزمت وانت بين ايديا
احساسى بيك كان صعب اوى عليا



10 / 6 / 2010

readmore »»

05 July 2012

دبــلــه

.
34 التعليقات




ظلت تنظر الى ذلك الاثر المتبقى بيديها طويلاً
لم تكن تعلم انها ستفتقدها هكذا
ولم تكن تعلم انها ستترك اثر لجرح غائر بـ يديها
كالجرح الغائر القابع داخل قلبها
انها دبلته.....

 التى قررت ان تتخلى عنها وعنه
لتبقى وحدها تتحمل أثر ما مرت به
اثر دبلته التى اقتلعتها من اصابعها
واثر حبه الذى اقتلعها هى من جذور حياتها
واثر قسوته التى اقتلعت قلبها

لتتجرع المراره رغماَ عنها ...




27/6/2012


 

readmore »»

04 July 2012

21 Grams..!!

.
24 التعليقات




من فتره كنت قريت كتاب مصر ليست امى
اتكلم فيه عن فيلم اسمه 21 جرام
وبيقول فيه أن الانسان بيفقد 21 جرام من وزنه اول ما بيموت 
ودى حقيقه علميه
وبيسأل ياترى دول وزن الحب فى حياتنا اللى بنفقده بالموت؟

الفكره بالرغم انها تثير التأمل
الا انها كمان مؤلمه
لما سمعت الجُمله دى كانت اول حاجه جت فى دماغى
معقول يكون الحب واخد من وزننا قليل اوى كده؟
معقول يكون كل كيانا الداخلى واحاسيسنا ومشاعرنا
وقلبنا اللى بيعيش ويموت جواه ناس كتير اووى طول مراحل عمرنا
و وجعنا اللى بنمر بيه فى مواقف كتير اوى
وفرحنا اللى بيعيشنا اجمل لحظات حياتنا
كل ده 21 جرام وبس !!
والا يمكن يكون اللى واخد الوزن ده ..رُوحَنا ؟؟ 

وبالرغم من ان الشخص اللى بيموت ده
بتموت معاه كل ذكرياته وكل مشاعره واحاسيسه دى معاه
الا انها بتفضل عايشه جوه ناس كتير اووى بيفضلوا فاكرينه

طيب هو لو الـ 21 جرام دول بعد ما نموت راحوا لحد من اللى بنحبهم
ممكن يبقى مين؟




بسم الله الرحمن الرحيم

 {وَيَسْأَلُونَكَ عَنِ الرُّوحِ قُلِ الرُّوحُ مِنْ أَمْرِ رَبِّي 
وَمَا أُوتِيتُم مِّن الْعِلْمِ إِلاَّ قَلِيلاً}

صدق الله العظيم


readmore »»

03 July 2012

شروع فى قتل ..!!

.
30 التعليقات




كَمّ كَرِهت أن اُغـلَف حُـبَـى لَكَ
بـ كَفَن الْوَدَاع الْمَصبُوغ بـ كُحل عَينَاى
الدامَعه
واُلقيه فى تَابوت النسيَان
لم استَطِع أن اترُكْ قَلْبَى لـ تَنخُر فَيه دِيدَانِ فُرَاقك
فَـحُبَك كَان رُوَحًا أَبَت أن تَرحَل عَنى الى دُنْيَا الآخِرَةِ


واَنت ...
كَيف اسْتَطَعَت أن تَغَرُّس سَكِينك فى جَسَد طَفَلنَا الصَّغِير هَكذا !
الم يَكُنّ حُبّنَا هُوَ طَفَلنَا الْوَلِيد بِين ثَنَايا قُلُوبنَا

والْأَنّ تُطَالبنى أن اكْوُنْ جَلِيسَته دَاخِل عَنَايَته المُرَكَزه
عَلَه يستَخلصُ الحياه مَنَى
وكُنَت تَعَلُّم جَيِدَا انه سَيَفْعَل !!




29/6/2012


readmore »»

02 July 2012

كلام والسلام ... كلاكيت 17 مره

.
32 التعليقات



حاسه ان جوايا صوتين بيحكوا مع بعض
وانا قاعده فى النص
يا اسمع ده يا اسمع ده
ماينفعش اقول رأى وسط ما بينهم
لانهم الاتنين مش هيتجمعوا مع بعض اصلا

*******

بتخنق اووى من القرارت اللى ذو حدين زى ما بيقولوا
يمين هيبقى فيها خساره
وشمال فيها خساره
هو ليه ماينفعش الواحد يطلع كسبان فى الحالات اللى زى دى؟!!؟

*******

بستغبى اوى الناس اللى بتقول دموع الرجل ضعف
انهى غبى اللى طلع النظريه دى
من وجهه نظرى بقى
ده هى دى عز قوه الرجل
الرجل فى الاول وفى الاخر انسان جواه مشاعر محتاج يخرجها
وعشان يخرجها بدموعه ده بيحتاج قوه كبيره منه

*******

ازاى فى ناس قادرين يدخلوا فى حياه غيرهم ويفسدوها بالطريقه دى !!!

*******

بتيجى اوقات على الواحد
من كتر الوجع اللى جواه
بيبقى عايز يقف فى مكان فااااضى مفيش فيه حد غيره
ويصرخ بأااااعلى ما عنده
بس اللى مابيعرفش يصرخ واللى مش عنده مكان فاضى
يعمل ايه فى نفسه؟؟
ينتحر؟؟

*******

اكيد ربنا بيبقى ليه حكمه فى كل حاجه بتحصل فى حياتنا
نفسى ياربى تقولى الحكمه من ده كانت ايه

*******

عمر ما فى حد يقدر يخلينى اعمل حاجه انا مش عايزه اعملها
يوم عن يوم بتأكد من ده ..انى دماغى جزمه

*******

تأثير بعض الاشخاص فى حياتك
مش بيكون بمدى قربهم جسدياً ليك
بس بمدى قرب روحهم وقلبهم لروحك

readmore »»