08 July 2012

كلام والسلام ... كلاكيت 18 مره

.




مش بحب التكلف ابدااااا
بحب العفويه والكلام اللى بيطلع من القلب
عشان كده الكلام اللى بيجى فى دماغى بكتبه هنا
وقت جنانى وقت عقلى وقت حزنى ووقت فرحى
ماينفعش ادى للمدونه شكل يقيدنى
وهى اصلا بيتى الصغير اللى بقدر اتكلم فيه من غير ما حد يحاسبنى
لو مش قولت اللى فى قلبى هنا
اومال هاقوله فين !!
بقول كلام من القلب وبتمنى انه يوصل للقلب
مهما واقعى اتغير
هتفضل مدونتى دى هى المكان الوحيد 
اللى بحكى فيه كل اللى فى قلبى
من غير تكلف
من غير تغيير
من غير رتوش

*******

اكتشفت حاجه مهمه اوووى فيا
انا مابعرفش اعمل حاجه صح الا لما بلاقى منافسه قدامى
مابعرفش اكون احسن الا لما احس انى لازم اكون احسن
من الاخر لازم الاقى دافع قوى يشجعنى دايماً على اللى بعمله
مش بعرف اعمل حاجه من نفسى
ودى احيانا حاجه كويسه
واحيانا حاجه وحشه جدا

*******

بيبقى فى بعض الاشخاص
نعرفهم بس عمرنا ما قبلناهم
وبالرغم من اختلاف شخصيتهم واخلاقهم 
وحتى طريقه كلامهم تمام الاختلاف
الا ان دايماً جوايا احساس
اننا لو قابلناهم هيكونوا شبه بعض فى الشكل اوى
مش عارفه ليه !

*******

هو ازاى اوقات بيكون العقل مُسير كده ؟
يعنى لما نكون متعودين او فى شكل معين لحياتنا الحاليه او المستقبليه
ويحصل اى موقف جذرى هيغيرها
بيفضل عقلنا يتخيل المستقبل بنفس الطريقه اللى كان متوقع انها هتكون
ده بيكون رفض للواقع وعدم القدره على استيعاب الموقف اللى حصل

*******

 فى بجد اشخاص نفسيتهم مرضيه
مايعرفوش غير انهم يحقدوا على غيرهم 
ويوقعوا بين الناس وبعضها ويكدبوا
ومع ذلك يرجعوا يشوفوا نفسهم هما اللى صح 
ومش بيحسوا بأى ذنب !!
قلبهم مايعرفش غير الطريقه دى للتعامل
دايماً عايشين والغرور بياكل فيهم
مش قادرين ياخدوا بالهم
 ان الشخصيه الكويسه مش بكميه ثقافتها او كلامها او تعبيراتها
الشخصيه الكويسه بالنفسيه الكويسه فى طريقه التعامل
و اللى تتمنى الخير لغيرها

*******

هو ازاى ممكن الواحد وهو بيلف فى المدونات كده
يقابل مدونه مكتوب فيها موقف حصله بكل وادق حذافيره ؟
وكأن اللى كاتب التدوينه دى شخص خفى قاعد جنبى فى مسرحيه حياتى
معقول يكون فى توارد احاسيس وافكار ومواقف للدرجه دى !!!!!

*******

فعلا فى اوقات بتمر على الواحد
مش بيلاقى افضل من كلمه
حسبى الله ونعم الوكيل
وكفى

24 comments

m.hallawa said...

صباح الخير دينا

ونعمة بالله

اكيد ها تقبلي افكار متشابة كثيرة

والحياة خبرة
تحياتي

سواح في ملك اللــــــــــــــــــه- said...

صباح الفل يادينا

فعلا يادينا

انا بحس ان المدونة بالنسبة للبنوتات الجميلات

والاخوات الرائعات مثلكن تعتبر

هي صديق صدوق لكم

ومرأة تعكس

تفاصيل من الحياة

واكيد ليها اثر كبير في حياتكم

وده شئ جميل

تحيتي دينا

Deyaa Ezzat said...

فكرة الكلاكيتات دي عجباني جدا

احتفظي بعفويتك
^_^

مصطفى سيف الدين said...

العفوية و التلقائية اجمل حاجة في الدنيا
قلتلك اني بحب كلامك و السلام بيبقى صريح وواضح و كله خلاصة تجارب
فعلا في حاجات كتير علاجها الوحيد حسبي الله و نعم الوكيل

richardCatheart said...

جمممممممممميل انا بحب اوى الوستات اللى بنتكلم فيها مع نفسنا بصوت عالى لدرجة ان الكل سااااااااااااامع بتخلينا نعرف احنا بنفكر ازاى والدنيا ماشية مع الناس ازاى

انتى كمان اسلوبك جميل سلسل ومن القلب وبيدخل القلب رشق وشششششش :)

اه شكرا انك حاطة اغنية لفيروزة اووووووووى

كريمة سندي said...

ما أرقى العفوية في حياتنا فهي تجعلنا طبيعين جدا وأما مسرحية الحياة فقد تتبادل الأدوار فيها ولا ندرك ذلك

ريـــمـــاس said...

مساء الغاردينيا دينا
قلت لك زمان بحب كلام والسلام عشان بشوف دينا على طبيعتها وعفويتها اكتر والعفوية جميلة اوي فيكي "
؛؛
؛
لروحك عبق الغاردينيا
كانت هنا
Reemaas

هبة فاروق said...

حلوه بوستاتك عفويه وبسيطه وطالعه من القلب وبتوصل للقلب بسرعه
جميله يا دينا

rona ali said...

هو ازاى اوقات بيكون العقل مُسير كده ؟
يعنى لما نكون متعودين او فى شكل معين لحياتنا الحاليه او المستقبليه
ويحصل اى موقف جذرى هيغيرها
بيفضل عقلنا يتخيل المستقبل بنفس الطريقه اللى كان متوقع انها هتكون
ده بيكون رفض للواقع وعدم القدره على استيعاب الموقف اللى حصل


انتى اصلا كلامك والسلام دة توحفه بيجد
انتى بتعملى جمله فطريه وتلقائيه وعفويه فظيعه بجد
وخالصه من تجارب بنمر بيها كلنا

كنت اتمنى اعلق علي جزء جزء بس هرغي كتييير:)

zeze said...

جميلة يا دينا زي عادتك
وفي كل حاجة حسبي الله ونعم الوكيل

سندباد said...

الفضفضة بتريح حتي ولو كانت مع نفسنا احنا بس
عجبني اوي فكرة البوستات اللي من النوع ده
تقبلي مروري

reemaas said...

بوستى المفضل :)

اه ممكن جدا تقرى كلام عند حد وتقولى ده حصلى

انا بقت لبانة ف ى بقى كلمة الناس بقت سيكو خلاااااااص

حسبى الله ونعم الوكيل

Bent Men ElZman Da !! said...

m.hallawa

صباح النور :)
احنا مش بناخد من الحياه الا الخبره اصلا
سعيده بوجود حضرتك جدا :))

Bent Men ElZman Da !! said...

سواح في ملك اللــــــــــــــــــه-

صباح النور يا خالد :)
اصل احنا البنات يعنى عموما مشاعرنا رهيفه واحاسيسنا زياده شويه ^_^
فـ بنحب يبقى لينا مكان بتاعنا كده نكتب فيه كل اللى بيجى فى بالنا
ودى حاجه بتريحنا نفسياً كتييير

مبسوطه دايماً بوجودك :)

Bent Men ElZman Da !! said...

Deyaa Ezzat

تابعنى ان شاء الله هتلاقى منها كل شويه ^_^

ميرسى ليك اوى يا ضياء على متابعتك :))

Bent Men ElZman Da !! said...

مصطفى سيف الدين

التكلف بيقيد الواحد اوووى ومع الوقت بيخنقه

انا بحب رأيك ده فى كلام والسلام :)

ربنا وكيلنا فى الاول والاخر

نورتنى بوجودك وتعليقك الجميل يا مصطفى :))

Bent Men ElZman Da !! said...

richardCatheart

ما هى البوستات دى يعنى العفويه كلها اصلا :)

مبسوطه بجد ان اسلوبى عجبك كده انتى اللى قلبك جميل بس :))

واضح ان فيروز بقت علامه مميزه للمدونه اصلا ههههههه

سعيده جدااا بزيارتك اللى نورتينى بيها دى :))

Bent Men ElZman Da !! said...

كريمة سندي

العفويه هى اللى بتخلينا نحس بالحياه

الحياه ليست الا مسرحيه كبيره لا نعلم نهايتها بعد

اسعدنى وجودك :))

Bent Men ElZman Da !! said...

ريـــمـــاس

انتى اللى جميله اوووى يا ريمو وعنيكى بتشوف كل حاجه جميله ♥

نورتينى يا حبيبتى بوجودك :))

Bent Men ElZman Da !! said...

هبة فاروق

ربنا يخليكى يا هبه
مبسوطه ان عفويتى وصلتلك فعلا

اسعدتينى بمرورك بمدونتى :))

Bent Men ElZman Da !! said...

rona ali

انتى اصلا بقى اللى تحفه
وانا بحب ردودك اووووى
كنت عايزاك بقى تعليقى على كل جزء براحتك وترررغى
انا اصلا بحب رغيك ^_^

Bent Men ElZman Da !! said...

zeze

انتى اجمل يا زيزى
نورتينى يا جميله بوجودك :))

Bent Men ElZman Da !! said...

سندباد

الفضفضه بتخرج جزء من الطاقه السلبيه اللى جوانا
اكيد مش كلها
بس جزء كبير منها

مبسوطه اوى ان البوست ده عجبك
نورتنى بوجودك :))

Bent Men ElZman Da !! said...

reemaas

والله يا نور ببقى منزله البوست ده وانتى فى دماغى
عشان عارفه انك بتحبيه
انا كمان بحب اوى تدويناتك اللى بتتكلمى فيها عن مواقف حصلتلك واحاسيس جواكى
بحب عفويتك :))

:a: :b: :c: :d: :e: :f: :g: :h: :i: :j: :k: :l: :m: :n:

Post a Comment

 

FaceBook Comments

wibiya widget