18 July 2012

۩ فى انتظارك ۩

.




رمضان السنادى مستنياه بشوق غريب
 
لحاجات كتير اوووى حلوه فيه

مستنيه شهر كل ايامه الواحد بيكون حاسس فيها بـ حاله تصالح 
مع كل حاجه حواليه وبتبقى كل حاجه جميله اوى

مستنيه أختم القرآن وان شاء الله اكتر من السنه اللى فاتت

مستنيه اعيد كل الحاجات اللى كنت بعملها السنه اللى فاتت
واللى قبلها والى قبلها واتمنى من كل قلبى فى كل مره ان ربنا يتقبل منى

مستنيه اوى اتجمع انا وانتم فى حاجه جميله اوى بدأناها مع بعض 
وهنكملها فى رمضان كمان ان شاء الله ..رحله الى الله

مستنيه وقت السحور لما ادخل انا واختى المطبخ عشان نحضره
ونقعد نرخم على بعض على اى حاجه

مستنيه قبل الفطار لما نبقى بنحضر الترابيزه وبنحضر المشروبات عليها
واحنا بردو بنفس الرخامه سبحان الله

مستنيه أول ما الأذان يأذن واقعد أدعلنا 
عشان عارفه ان ربنا بيتقبل دعوه الصائم وقت افطاره

مستنيه اول ما ابدأ افطر وانا ببعتلك رساله ادعيلك 
واتمنى فيها ان ربنا يتقبل صيامنا

مستنيه بعد الفطار لما اسيبهم كلهم 
واعتكف لوحدى كده فى الاوضه اقرأ القرآن 
وهما فاكرنى اصلا نايمه

مستنيه اوى صلاه التراويح وصوت المأذن 
وزحمه المسجد اللى بتخلى قلبى فرحان اوى

مستنيه يوم ما بتيجى بعد العِشَاء 
ونقعد نقرأ فى المصحف سوا

مستنيه لما كل يوم تسألنى وصلتى للجزء الكام وانا اسالك نفس السؤال
وتخلينى اطير من الفرحه بيك لما تقولى انك الحمدالله ختمت القرآن

مستنيه فانوسى ابو شمعه
اللى مش بحس ولا بتبسط بأى فانوس غيره اصلا 

مستنيه رمضان ده لأنه للأسف هيكون اخر رمضان ليا فى بيتنا
ورمضان اللى بعده ان شاء الله اكون فى عش الزوجيه بقى ^_^

نفسى اعيش كل الحاجات دى من غير ما اقصر فى اى حاجه ولا اقصر مع اى حد  بحجه انى مشغوله فى تجهيز شقتى

واضح كمان ان رمضان ده جاى ومعاه حاجات حلوه كتير
لانى غير انى هاكون بحقق حلمى 
فى انى اكمل حياتى مع الانسان اللى ربنا رزقنى بيه 
وبحمده عليه كتير اوى
بس مستنيه كمان فى رمضان ده حاجه مهمه اوووى
كتابى ان شاء الله هينزل فى معرض الكتاب اللى هيكون فى فيصل 
من 26-7 لــ 10-8 بإذن الله
مش قادره لحد دلوقتى اتخيل احساسى لما اشوفه قدام عينى كده
ونفسى اووى اعرف رأيكم فيه 
وبتمنى من ربنا انه يكون عند حسن ظنكم
ومستنيه تقولولى اذا كان يستحق والا حتى انه وحش
المهم انى اعرف رأيكم عشان أكون احسن

 
كل سنه وانتم طيبين
وكل سنه واحنا يارب دايماً متجمعين
ويعود عليكم بالخير ياااارب
۩ رمضان كريم ۩



29 comments

مروه زهران said...

وانتى بألف خير وصحة وسعادة
ربنا يوفقك يارب فى حياتك الجديدة فى المستقبل
ومبرووووووك على الكتاب

حنين محمد said...

صباح الغاردينيا دينا
بجد أبتسمت ربنا يبغلك رمضان وأنتي بخير وبفرح وسعادة ولايحرمك قرب حبيبك يارب والسنة الجاية بإذن الله تكتبي لنا عن تحضير الفطار مع البيبي الي جاي في السكة هههههههههه ربنا يسعد قلبك وأيامك وكل سنة وأنتي طيبة
رمضان كريم "
؛؛
؛
لروحك عبق الغاردينيا
كانت هنا
reemaas

مصطفى سيف الدين said...

الف مبروك صدور كتابك و ربنا يوفقك دايما
كل سنة و انتي طيبة و ربنا يعيد عليكي الايام بخير

محمد جمال said...

كل سنه وانتى طيبه يا دينا
اللهم بلغنا رمضان واعنا فيه على الصيام والقيام وقراءة القرآن اللهم امين
احب اهنيكى اولا على فرحك وتبقى السنه الجايه ان شاء الله مع زوجك باذن الله متجمعين على طاعته فى رمضان وثانيا على كتابك اللى ان شاء الله يكون جميل ورائع
تقبلى تحياتى

زينة زيدان said...

كل عام وأنتِ بألف خير

كلنا مستنين رمضان بلهفة

ربنا يقدرنا على أفعال الخير

Unknown said...

رائع جدا يادينا بجد وان شاء الله ربنا يبلغنا رمضان ونحقق كل اللى بنتمنى كلنا وان ربنا يعتق رقابنا من النار

reemaas said...

الف مبروك على الكتاب ويارب الاقيه فى المنصورة حبيبتى


ينعاد علينا بالخير يارب وكل سنة وانتى بالف خير

ضياء عزت said...

كل سنةوانتي طيبة

ويارب تعملي كل اللي نفسك فيه وأكتر

وإن شاء الله يبقى رمضان جميل عليكي وعلى كل حبايبك

نيللي علي said...

حقيقي أنا كمان سعيدة لأني أول رمضان وفي ((رحلة مع الله)) هتنافس مع ناس بحبهم بجد من كل قلبي ومشتاقة لتنافسنا وحماسنا مع بعض بجد أنا سعيدة معكم وبيكم..

وآسفة يادينا تقصيري عن متابعتي ليك بس أنتي عارفة المعركة اللي كنت فيها..

ويارب يجي اليوم واحضر فرحك وتوقيع كتابك يارب آمين

rona ali said...

يا احساسك العالى والله شوقتينى لكل الحاجات دى اوى
وفكرتينى اة :))

بحبك اوى يا دندن بيجد يعنى
وهحاول بيجد انزل اجيب الكتاب ربنا يقدرنى واعرف الطريق طيب ما تبقي تاخدينى :)

Anonymous said...

مساء الورد دينا

رمضان يحمل بين طياته صبغة خاصة من روحانية

وحب وراحة ومصالحة مع النفس ومع الله نجد كل ما

قلتي ونستقبله بفرحة فهو عيد يمتد ل 30 يوم

يتقارب فيها الناس وتكثر فيها العبادات واسأل

الله العظيم أن يحقق لك مافيه خيره وسعادتك و

تختمي القرآن ويغفر لك كل ذنوبك ويجعلك

من عتقائه من النار ...

كل عام وانتِ بخير

تحياتي وإحترامي

Habiba said...

وانت طيبة وإلى الله أقرب..
رمضان كريم :))

سندباد said...

ربنا سبحانه وتعالي يتقبل منا صالح الاعمال
وان شاء الله رمضان يبقي خير علينا كلنا
ربنا يحققلك كل اللي تتمنيه
تحياتي

رحيق الورد said...

مساء الخير ..
رمضان كريم يارب .. وكل عام وانت بالف خير
سرنى التواجد هنا
تحياتى لك
yasmin

Bent Men ElZman Da !! said...

MEROOooOOoo

ربنا يخليكِ يا ميرو ويبارك فيكِ يا حبيبتى
ويوفقك فى حياتك دايماً ياااارب :))

Bent Men ElZman Da !! said...

ريـــمـــاس

مسائك ورد يا ريمو
مبسوطه ان البوست كان سبب لابتسامه على وشك الجميل :)
ربنا يبلغنا كلنا رمضان على خير يارب
تصدقى بقى انتى اللى رسمتى على وشى ابتسامه كبيره اااد كده بكلمتك دى هههههههه
بس وعد منى فى بوست اكيد فى الموقف ده
اصلى مش متخيلاه خالص فـ ساعتها اكيد هاعمل توثيق للحظه المهمه دى بقى هههههههههه
ربنا يخليكى يا حبيبتى ورمضان كريم عليكى ان شاء الله :)

Bent Men ElZman Da !! said...

مصطفى سيف الدين

الله يبارك فيك يا مصطفى ويوفقك دايماً يارب
وكل سنه وانت طيب ويعود عليك الايام بالخير والبركه والسعاده ان شاء الله :))

Bent Men ElZman Da !! said...

mohamed

كل سنه وانت بألف خير يا محمد
اللهم آمين ويتقبل مننا صالح الاعمال يااارب

الله يبارك فيك يارب ربنا يخليك على زوقك
اسعدنى تعليقك جدا :)

Bent Men ElZman Da !! said...

زينة زيدان

وانتِ بألف خير ياااارب
فعلا رمضان ده اكتر شهر الواحد بيستناه من السنه للسنه
ربنا يتقبل منا صالح الاعمال بأذنه تعالى :)

Bent Men ElZman Da !! said...

shreif elsaftty

اللهم آمين
ربنا يتقبل مننا يااااارب
اسعدنى تعليقك جدا :)

Bent Men ElZman Da !! said...

reemaas

الله يبارك فيكِ يا حبيبتى
ان شاء الله يكون فى المنصوره
وحتى لو مش موجود انا اجبهولك لحد عندك اصلا :))

كل سنه وانتِ طيبه ويعود عليكِ بالخير ياااارب :)

Bent Men ElZman Da !! said...

Deyaa Ezzat

ربنا يخليك يا ضياء على ذوقك
ربنا كريم عليك ويعود عليك الايام بالخير والسعاده ياارب دايماً :))

Bent Men ElZman Da !! said...

نيللى

انا كمان سعيده جدااا يا نيللى
وحاسه ان رمضان ده هيكون احلى واجمل بوجودكم معايا
وبرحلتنا الجميله دى ان شاء الله

مش تتأسفى انا عارفه ظروفك وربنا يكون فى عونك وتخلص معركتك دى على خير:)

اصلا بقى فرحتى مش بتكمل الا بيكم ♥

Bent Men ElZman Da !! said...

rona ali

اه شوفتينى وانا حساسه كده ^_^ ههههههههههه
وانا بحبك جدا ااااد كده بقى على فكره
تعالى نروح مع بعض
انا اصلا ماعرفش الطريق هههههههه
بس فهمت على الوصف يعنى وحتى لو تهنا مش مشكله اهو ادينا هنعرف اماكن جديده ايه رأيك فى النظريه دى :DD

Bent Men ElZman Da !! said...

ريبال بيهس

مساء النور فارس
فعلا رمضان بيصبغ حياتنا وقلوبنا طول ايامه بأحساس جميل اووى
ياااريت كل السنه تبقى رمضان
حياتنا كانت هتبقى افضل والله لو كنا بنفس الشكل طول السنه

شكرا ليك جدا
واتمنى ليك ينعاد ايام الشهر الكريم عليك بالخير والسعاده وراحه البال
وربنا يتقبل منك صالح الاعمال اللهم آمين

كل عام وانت بألف خير يارب :)

Bent Men ElZman Da !! said...

habiba

الله اكرم
وانتى بألف خير يا جميله :))

Bent Men ElZman Da !! said...

سندباد

اللهم آمين
اتمنالك بالمثل يا امجد
وتعود عليك الايام بالخير والسعاده يارب :)

Bent Men ElZman Da !! said...

رحيق الورد

الله اكرم
كل سنه وانتى طيبه يا جميله ويعود عليكى بالخير يارب
اسعدنى وجودك :)

Wohnungsräumung said...

شكرا على الموضوع

:a: :b: :c: :d: :e: :f: :g: :h: :i: :j: :k: :l: :m: :n:

Post a Comment