31 August 2012

لعبه القدر !!

.
42 التعليقات



كم يشعر المرء بالسخريه والهزل
حين يبدأ غيره من حيث انتهى هو !
كم تود حينها لو أستطعت ان تصرخ بأعلى صوتك
أحذروا ..لقد انتهى بى المطاف حيث النهايه
لن تجدوا اكثر مما وجدته انا
ولكن دائمًا ما يُخبى القدر  ما تعلمته انت لكى يتعلمه غيرك
وبنفس الألم !!

readmore »»

21 August 2012

انت عيدى ♥

.
36 التعليقات




عارف يعنى ايه انت عيدى؟
يعنى بالرغم من ان اول يوم عيد يمر من غير اى اختلاف عن اى يوم
الا انى افضل مستنياك تيجى
عشان عارفه انك بوجودك هـ تحلى يومى

عارف يعنى ايه انت عيدى؟
يعنى اول ما تيجى واشوف نظره عينيك وابتسامتك اللى بحبها
 وانت بتقولى كل سنه وانتِ طيبه يا حبيبى
اعرف فعلا ان العيد النهارده

عارف يعنى ايه انت عيدى؟
يعنى ابقى مش حاسه بالعيد اصلا الا وانا معاك


عارف يعنى ايه انت عيدى؟
يعنى الاقيك بتعملى كل واقل حاجه تفرحنى بيها 

عارف يعنى ايه انت عيدى؟
يعنى اول يوم من كل عيد استناك تيجى تدينى العيديه
لانى بستنى كلامك الجميل زيك اللى بتكتبه ليا عليها
ولحد دلوقتى مش قادره انسا العيديه اللى ادتها ليا من قبل حتى ما نرتبط
وكتبتلى عليها يارب اشيل اولادك
ومش كنت لا انا ولا انت نتخيل 

ان ولادى دول ان شاء الله هيكونوا حته منك

عارف يعنى ايه انت عيدى؟
يعنى تبقى فاكر حاجه نفسى فيها قولتهالك بقالى كتير
وانا نفسى اصلاً مش فاكراها... وتحققهالى

عارف يعنى ايه انت عيدى؟
يعنى تحسسنى انى طفلتك الصغيره
لما تهادينى بأكبر عروسه شوفتها فى حياتى لحد دلوقتى
واللى قربت اصلا تبقى طولى

عارف يعنى ايه انت عيدى؟
يعنى اكون مشتاقه اوى لـ صلاه عيد
تاخدنى فيها من ايدى عشان نروح الجامع نصلى مع بعض

عارف يعنى ايه انت عيدى؟
يعنى ابقى مستنيه العيد الجاى بفارغ الصبر
عشان هيكون اول عيد يجمعنا فيه بيت واحـ♥ـد



readmore »»

17 August 2012

فرحه العيد

.
37 التعليقات




من قبل نهايه رمضان باسبوع او اكتر
بتبدا الناس تعمل فى الكحك
بتبقى فى روح حلوه فى البيوت اللى اتعودا يعملوا كحك دايماً
ومش بيحبوا انهم يتخلوا عن الجو ده
وخصوصا لمه الاطفال واستمتاعهم بمشاركه اهلهم فى نقش الكحك

فى بيوت للاسف مش متعودين على العاده دى
ويمكن بيتنا  منهم
فـ مش بنقدر نحس بفرحه عمايل الكحك بالشكل اللى ناس تانيه بتحس بيه

الكحك الجاهز غطى الى حد كبير على الكحك اللى بيتعمل فى البيت
وفى ناس كتير بتشوفها من ناحيه ان كفايه تعب ودوشه
ونجيب الجاهز احسن واريح

وعشان كده
عاده عمايل الكحك فى العيد
من العادات اللى بتختفى مع الوقت



احنا نفسنا مابقناش نحس بفرحه العيد فى حد ذاتها زى قبل كده
زمان كنت فاكره انى بستنى العيد ده بفارغ الصبر
واصحى من بدرى والبس لبس العيد واخرج اقف فى الشارع
حتى لو مش هاخرج فى حته او مش معايا اصحابى
بس اخرج وخلاص
لان ده عيد وماينفعش اقعد فى البيت
بس دلوقتى الموضوع مش بقى كده
العيد زيه زى اى يوم تانى
ممكن اخرج وممكن مش اخرج
انا اه ببقى ساعتها بحقد على الناس اللى بتخرج وانا قاعده فى البيت
بس مش بتبقى مشكله بردو

هى المشكله فى الايام نفسها اللى اختلفت والزمن؟
والا المشكله ان كل ما الواحد يكبر الحاجات الصغيره اللى كانت بتفرحه
بيبقى احساسها عادى؟؟

الاهم من كل ده بقى
كل سنه وانتم طيبين
وان شاء الله يكون عيد سعيد علينا كلنا :)




readmore »»

08 August 2012

كلام والسلام ... كلاكيت 20 مره

.
22 التعليقات




لما بنتوقع حاجه من اشخاص معينين ومش بتحصل
العيب مش بيكون فينا
يمكن يكون فى سقف توقعاتنا اللى وارد يكون عالى
لكن الاكيد ان العيب بيكون فى الاشخاص اللى كانوا اقل من توقعاتنا دى

******

اتعودت طول سنين حياتى ان الحاجه اللى انا عايزاها 
ماحدش هيعرف يعملها صح غيرى
عشان كده ولحد دلوقتى لما حد بيعمل حاجه تخصنى ببقى خايفه
خايفه انها مش تكون زى ما انا عايزه وبتمنى
وبفضل أسال كتير على الحاجه دى..مش لعدم ثقتى فى اللى هيعملها
لكنى اتعودت ان نادراً لما حد بيكون اد الثقه دى

******

احيانا لما بنتعود على حاجه وبنستناها من وقت للتانى
بنكون مستنينها تحصل بنفس الجمال او اكتر
لكن عمرها ما تقل ابداً
وعشان كده لما بتقل
بتبقى أسوء بكتير من عدم وجودها والتعود عليها من الاصل !

******

عندى دايماً معيارين للذوق فى كل حاجه
فى فرق بين ان الحاجه تبقى حلوه 
وانها تكون واااو وتخطف عينى اول ما تشوفها
وفى فرق بين ان الحاجه تبقى عاجبه الناس 
وانها تبقى اللى انا بحلم بيها وبتمناها
وعشان كده لا انا ذوقى بيعجب كل الناس 
ولا كمان ذوق كل الناس بيعجبنى

******

اسوء شعور بيسيطر علينا طول حياتنا هو الخوف
الخوف من زوال متع الدنيا من بين ايدينا وده اللى بيخلينا نعصى ربنا
الخوف من الماضى والذكريات اللى بيخلينا اوقات نفكر فى حاجات بتوجعنا
الخوف من بكره واللى بيخلينا نفضل طول حياتنا نخططله
الخوف من فقد شئ مهم فى حياتنا 
وده اللى بيخلينا نحافظ عليه -احياناً- لدرجه الخنقه
بس اسوء انواع الخوف
هو الخوف اللى بيخليك ماتعرفش تكون سعيد 
بحاجه المفروض انها تفرحك اوى

اللهم امحى من قلوبنا الخوف الا الخوف منك يارب



readmore »»
 

FaceBook Comments

wibiya widget