08 August 2012

كلام والسلام ... كلاكيت 20 مره

.




لما بنتوقع حاجه من اشخاص معينين ومش بتحصل
العيب مش بيكون فينا
يمكن يكون فى سقف توقعاتنا اللى وارد يكون عالى
لكن الاكيد ان العيب بيكون فى الاشخاص اللى كانوا اقل من توقعاتنا دى

******

اتعودت طول سنين حياتى ان الحاجه اللى انا عايزاها 
ماحدش هيعرف يعملها صح غيرى
عشان كده ولحد دلوقتى لما حد بيعمل حاجه تخصنى ببقى خايفه
خايفه انها مش تكون زى ما انا عايزه وبتمنى
وبفضل أسال كتير على الحاجه دى..مش لعدم ثقتى فى اللى هيعملها
لكنى اتعودت ان نادراً لما حد بيكون اد الثقه دى

******

احيانا لما بنتعود على حاجه وبنستناها من وقت للتانى
بنكون مستنينها تحصل بنفس الجمال او اكتر
لكن عمرها ما تقل ابداً
وعشان كده لما بتقل
بتبقى أسوء بكتير من عدم وجودها والتعود عليها من الاصل !

******

عندى دايماً معيارين للذوق فى كل حاجه
فى فرق بين ان الحاجه تبقى حلوه 
وانها تكون واااو وتخطف عينى اول ما تشوفها
وفى فرق بين ان الحاجه تبقى عاجبه الناس 
وانها تبقى اللى انا بحلم بيها وبتمناها
وعشان كده لا انا ذوقى بيعجب كل الناس 
ولا كمان ذوق كل الناس بيعجبنى

******

اسوء شعور بيسيطر علينا طول حياتنا هو الخوف
الخوف من زوال متع الدنيا من بين ايدينا وده اللى بيخلينا نعصى ربنا
الخوف من الماضى والذكريات اللى بيخلينا اوقات نفكر فى حاجات بتوجعنا
الخوف من بكره واللى بيخلينا نفضل طول حياتنا نخططله
الخوف من فقد شئ مهم فى حياتنا 
وده اللى بيخلينا نحافظ عليه -احياناً- لدرجه الخنقه
بس اسوء انواع الخوف
هو الخوف اللى بيخليك ماتعرفش تكون سعيد 
بحاجه المفروض انها تفرحك اوى

اللهم امحى من قلوبنا الخوف الا الخوف منك يارب



22 comments

m.hallawa said...

صباح الخير دينا

موضوعك ممتاز وشيق وهادف تسمحيلي أضيف شئ !!!

الخوف والحزن
يؤكد علماء البرمجة اللغوية العصبية أن أهم شيء في قوة الشخصية هو عدم الخوف، أو ما يعبّر عنه بالثقة بالنفس. ولكن كيف يمكن الحصول على شخصية لا تخاف؟ يعتبر العلماء أن أفضل طريقة للقضاء على الخوف أن تواجه ما تخاف منه. فلا يمكن لإنسان أن يكون قوياً ما لم يعالج ظاهرة الخوف عنده. والمشكلة أن المواجهة تتطلب شيئاً من القوة، إذن العملية عكسية.
كذلك يؤكد العلماء على ضرورة أن يظهر الإنسان بمظهر الإنسان الواثق من نفسه فلا يُظهر أية أحزان أو هموم أو ضعف. لأن الظهور بمظهر الإنسان الحزين يعطي انطباعاً بالضعف لدى الآخرين. إذن هنالك تأكيد من قبل العلماء على ضرورة عدم الخوف وعدم الحزن لتكسب الشخصية القوية.
هذا ما يقوله العلماء، ولكنني كمؤمن أعود دائماً إلى كتاب الله تعالى. فكثيرة هي الآيات التي تتحدث عن الخوف ونجد تأكيداً من الله تعالى على أن المؤمن لا يخاف أبداً إلا من خالقه عز وجل. يقول تعالى: (أَلَا إِنَّ أَوْلِيَاءَ اللَّهِ لَا خَوْفٌ عَلَيْهِمْ وَلَا هُمْ يَحْزَنُونَ *الَّذِينَ آَمَنُوا وَكَانُوا يَتَّقُونَ *لَهُمُ الْبُشْرَى فِي الْحَيَاةِ الدُّنْيَا وَفِي الْآَخِرَةِ لَا تَبْدِيلَ لِكَلِمَاتِ اللَّهِ ذَلِكَ هُوَ الْفَوْزُ الْعَظِيمُ) [يونس: 62-64].
والسؤال: لماذا تحدث الله عن الخوف بصيغة الاسم (لَا خَوْفٌ عَلَيْهِمْ)، بينما تحدث عن الحزن بصيغة الفعل (وَلَا هُمْ يَحْزَنُونَ)؟ لنتأمل هذه الأشياء:
- الخوف هو رد فعل لا شعوري وبالتالي ليس في تحكم الإنسان، فجميع الكائنات الحية تخاف فلذلك جاء بصيغة المصدر (خوف). بينما الحزن هو تصرف شعوري وإرادي، ويمكن لإنسان أن يحزن وآخر ألا يحزن عند نفس الظروف ولذلك جاء بصيغة الفعل (يحزنون).
- الآثار والنتائج التي يسببها الخوف أكبر من تلك التي يسببها الحزن، ولذلك قدَّم الله ذكر الخوف على ذكر الحزن في الآية الكريمة.
- الخوف يأتي من مصدر خارجي، لذلك جاءت كلمة (عليهم) لتعبر عن المحيط الخارجي الذي يحيط بالإنسان. بينما الحزن يأتي من مصدر داخل الإنسان ولذلك سبق هذا الفعل بكلمة (هم).
- لا خوف ...... عليهم : الخوف أولاً ثم (عليهم). للدلالة على سرعة الشعور بالخوف، وهو أجزاء من الثانية. أي أن الخوف هو عمل فجائي مباغت، وهذا ما يقوله العلم.
- ولا هم....... يحزنون : (هم) ثم الحزن. للدلالة على أن الإنسان هو الذي يقوم بالحزن وهذا يستغرق زمناً قد يمتد لساعات، أي أن الحزن لا يكون فجائياً.
- الخوف يكون من المستقبل بينما الحزن يكون على شيء مضى أو يعيشه في نفس اللحظة، والمستقبل مجهول بينما الماضي معلوم والإنسان يهتم بمعرفة المستقبل أكثر من الماضي لذلك جاء ذكر الخوف أولاً ليطمئن المؤمن على مستقبله، ثم جاء ذكر الحزن ليطمئن المؤمن على ماضيه وحاضره وبالتالي شمل جميع الأزمنة!
ولذلك أينما ذكر الخوف والحزن في القرآن نجد الخوف يتقدم على الحزن لهذه الأسباب. حتى إن (الخوف) في القرآن قد تكرر أكثر من (الحزن)، فسبحان الذي أحصى كل شيء عدداً.

مع خالص تحياتي وأحترامي

سواح في ملك اللــــــــــــــــــه- said...

انتي شخصية جميلة يادينا

تتقن عملها وواقعية

ولاتحب ان تكون عبئا علي احد

وبتيجي علي نفسك كتير عشان متتعبيش حد

Israa' A. Youssuf said...

لأ مش كلام والسلام.. :)

أول وآخر فقرة وجعوني أوي..

يسلم قلمك :)

habiba said...

اللهم آمين :)
حاجات كتيرة من اللى قولتيها بحس بيها فعلاً
وكويس انى مش لوحدى بقى :)

P A S H A said...

هايلة والله ، كلهم جامدين بجد
تسلم الأيادي
:)

faroukfahmy58 said...

(اللهم امحى من قلوبنا الخوف الا الخوف منك االله عليكى يا دينا وبتقولى ده كلام والسلام ده كلام بستحق نعظيم الف سلام وسلام والواضح انك نرجسية ولا يعجبك الا العمل الصادر من ذاتك
تحياتى لقلمك الرشيق الجذاب

شمس النهار said...

اصعب شئ انك تكوني متوقعة من حد قريب منك فعل او رد فعل ومايحصلش
بيبقا فعلا سوء تقدير مننا ليهم في المقام الاول

Deyaa Ezzat said...

جميلة تدوينتك يا دينا

دايما الواحد بيتطلع للكمال والإجادة وطبعا ده لحد ما بيكون مستحيل

فيه مقولة جميلة جدا معبرة بتقول .. ماحك جلدك مثل ظفرك

الخوف إحساس فطري غريزي نولد به ويكبر معنا

بالتوفيق دايما

ريبال بيهس said...

اللهم آمين

ابدأ بالخوف وهذا الشعور للأسف يحمله الجميع بلا استثناء بداخله وكل شخص له مخاوف من شيء معين ولكن البعض يتأقلم سريعاً ويحاول تجاوز حوفه وآخرين يعشش الخوف في قلبهم حتى يحيل حياتهم لجحيم ...

أتفق معك لا أحد يتقن شيء أقوم أنا بالعادة بعمله إلا أنا وهذي طبيعة نفس وليس تقليل من مجهود الغير فالمثل العربي يقول ما حك جلدك مثل ضفرك ...

من الأفضل دائماً أن نكون متزنين في توقاعاتنا تجاه الأخرين فإذا لم تحدث عندها لا نُصدم وعندما تحدث يكون وقعها على النفس كبير ...

تحياتي وإحترامي

باسنت خطاب said...

انا خايفة :))
بس هخليها على ربنا :))

حلوة :)

Bent Men ElZman Da !! said...

m.hallawa

صباح النور
مش عارفه اقول ايه لحضرتك على المعلومات اللى ضفتها
واللى اثرت الموضوع بجد
شكرا لحضرتك جدا
وبيسعدنى دايماً وجودك :)

Bent Men ElZman Da !! said...

سواح في ملك اللــــــــــــــــــه-

الجميل هو وجودك يا خالد والله
انا فعلا واقعيه لحد كبير
هو مش حكايه متعبش حد على اد ما انا بحسها تنظيم للحاجات اللى عايزاها مش اكتر
شوفت انا صريحه ازاى هههههههه

بتنورنى دايماً بوجودك والله :)

Bent Men ElZman Da !! said...

Israa' A. Youssuf

اسفه بجد ان حاجه من اللى كتباها وجعتك
بس يمكن لانها واقعيه اوى
نورتينى يا جميله :))

Bent Men ElZman Da !! said...

habiba

لا ماتقلقيش مش لوحدك خااالص
نورتينى يا جميله :)

Bent Men ElZman Da !! said...

P A S H A

مبسوطه انهم عجبوك
ميرسى ليك اوى
نورتنى :)

Bent Men ElZman Da !! said...

faroukfahmy58

كلام حضرتك بجد على اى بوست بيفرق معايا اوى
بتسعدنى دايماً بوجودك
وكفايه عندى ان البوست عجبك والله :))

Bent Men ElZman Da !! said...

شمس النهار

فعلا
سوء تقدير مننا
او ممكن نقول كمان عشم زياده عن اللزوم دايماً مش بيطلع فى محله للاسف
نورتينى بوجودك :))

Bent Men ElZman Da !! said...

Deyaa Ezzat

الاجمل وجودك يا ضياء
انا اول مره بصراحه اسمع المقوله دى
بس فى محلها جدا
اسعدتنى بوجودك :))

Bent Men ElZman Da !! said...

ريبال بيهس

كلنا بنحس بالخوف مهما كانت شخصيتنا قويه او بتعدى الصعاب .. احساس غريزى جوانا من اول ما بنتولد لحد ما بنموت مع اختلاف اسباب خوفنا فى كل وقت
الازمه فى الناس اللى الخوف بيحول حياتهم لجحيم فعلا .. دى مأساه

فعلا .. ماحدش اصلا هيفهم اللى انت عايزه بالظبط مهما حاولت

الاتزان مش بيجى بسهوله فى التوقعات خصوصا اذا كانت التوقعات دى بتتعلق بناس قريبين مننا اوى والمفروض ان توقعاتنا ليهم تبقى بنفس قربهم

اسعدتنى جدا بوجودك ومناقشتك :)

Bent Men ElZman Da !! said...


باسنت خطاب

لازم نخليها على ربنا مش عندنا غير كده :)
انتى احلى يا باسنت :))

نيللى said...

مش عارفة هتصدقيني و لا لأ..البوست ده عجبني لدرجة..أني كنت يقره ع النت ف البيت وكنت لازم آقوم عشان كنت خارجة..واول لما ركبت العربية كملت..بجد استمتعت جدا وخاصة اول حاجتين ان ساعات بنتوقع حاجات من الناس لما مش بيعملوها بيكسروا قلبنا لدرجة اننا في الاخر بنهمله..مبدعة يادندون بجد

Bent Men ElZman Da !! said...

نيللى

اكيد يعنى هصدقك :)
مبسوطه بطريقه مش هتصدقيها ان البوست عجبك كده
الابداع يتلخص فيكِ يا نينو :))

:a: :b: :c: :d: :e: :f: :g: :h: :i: :j: :k: :l: :m: :n:

Post a Comment

 

FaceBook Comments

wibiya widget