29 September 2012

أُمـنـيـة !!

.
10 التعليقات




كم أشتاق لـ لحظه كـ تلك تجمعنى بك
كم كنت أتمنى أن تبقى
ولكن...!
ليس كل ما يتمناه المرء يدركه


readmore »»

25 September 2012

نساء فى حياتى

.
17 التعليقات



البوست ده لـ 3 نساء أثروا فى حياتى بشكل كبير جداً
وحقهم عليا أنى اكتبلهم البوست ده





أولهن .. جدتى أم ماما
أرتباطى بيها من صغرى كان غريب
كان كل اللى يشوفنا يفتكر أن هى أمى مش جدتى
والشبه فى الشكل بينا جدًا كان مساعد على ده
فاكره لحد دلوقتى أول يوم مدرسه 
لما أصريت أبات معاها عشان هى اللى تلبسنى وتخرجنى للباص
فاكره أوى لما قعدت هى على الارض عشان تلبسنى شوز المدرسه الجديد
اللى هى أصلاً جايبهولى واللى لحد دلوقتى فاكره شكله بالظبط
فاكره كل ما كانت بتسافر وانا اعيط
مش عشان حاجه
بس لانى لما كنت بخاف كانت هى اللى بتطمنى
وساعتها كانت مكالماتها ليا كأنها الأكسجين اللى بيرجعنى للحياه
بتحس بيا من صوتى ومهما حاولت اخبى عليها فيا ايه مش بعرف
بحب اسمع تفاصيل حياتها اللى تعبت فيها أوى وخبرتها فى الحياه
بحب قوتها اللى بتبان حتى فى عز بكاها
طلباتى بالنسبه ليها مفيش فيها نقاش لازم تتحقق
حاسه انى بعد ما اتجوز هافتقد وجودها اوى معايا فى نفس الاوضه
واسرارها اللى كانت مش بتقولها لحد غيرى

ثانيهن .. ماما
هو بعيداً يعنى عن ان اى حد بيشوفك مش بيقتنع ابداً انك ماما
لانك بالكتير تبقى اختى
بس انا ببقى مبسوطه بـ ده
فرق السن اللى بينا اللى مش كبير
بيحسسنى انك فهمانى ومستوعبه مشاكلى فى كل مرحله من حياتى
كل ما بكتشف صفه جديده فيا
بلاقيها بالظبط فيكى وبتأكد يوم عن يوم أنى شبهك اوى فى كل صفاتك
بقف قدامك عاجزه عن اى كلام لما بحس انك عايزه تجبيلى حته من السماء
عشان تحققيلى كل اللى بتمناه وابقى احسن حد فى الدنيا
برغم قوتك اللى بحبها الا انك قدامى انا واختى بتبقى اضعف حد فى الدنيا
وخصوصا لانك عايزه تسعدينا
من صغرنا وانتى شايله همنا وبتحاولى تكونى لينا الأم والأب
وده زاد بعد وفاه بابا اكتر كمان
لما حجزت بالصدفه فرحى يوم عيد ميلادك
حسيت ان ربنا خلى ده يحصل عشان تكون دى هديتى ليكى
انى اريحك من همى شويه
مش اوى يعنى لانى كام يوم واجيلك انا وهو ما انا مش هسيبك لوحدك :)
كل ما بتخيل فى يوم من الايام حياتى تبقى من غيرك
بحس انى هضيع اوى وابقى ضعيفه اوى وبنكسر اوى اوى

أما ثالثهن .. خالتى الكبيرة
بالرغم من بعد المسافات الدايم بينا
وبالرغم من ان المده اللى بشوفك فيها كل سنه مش بتتعدى شهرين تلاته
ألا ان روحك دايما لمسانى وبتحسى بيا من غير حتى ما اتكلم
بسببك عرفت يعنى ايه حد يبقى بعيد اوى عنك
لكن قلبه قريب اوى منك
معاكى عرفت يعنى ايه الحب والاهتمام مش بالقرب الجسدى
لكن بقرب الارواح لبعضها
بحس بـ دة اكتر
لما ابقى فى وسط مشكله و مش عارفه احلها
وانتى بمكالمه منك بتحلى حاجات كتير
بحس بـ ده لما ابقى مضايقه وحابسه دموعى وبعمل نفسى قوية
واول ما انتى تكلمينى وتقوليلى مال صوتك
ماعرفش امسك دموعى اكتر من كده
دايماً بحس ان فى حاجه قويه اوى جوايا بتربطنى بيكى
وعارفه ان نفس الحاجه دى جواكى
نفسى اوى ابقى فى قوتك وقدرتك الجباره على التسامح والعطاء
ولانى مستخسره بصراحه ان وجودك فى حياتى يبقى تحت مسمى انك خالتى وبس
فـ انا بعتبرك دايما امى التالته




عارفه ان البوست دى مدى اوى على جو عيد الأم وده مش وقته خالص
بس كان لازم اقولكم الكلام ده دلوقتى
عشان عارفه انى بعدى حاجات كتير فى حياتى بسببكم
و لانى خلاص المفروض هابطل ابقى البنوته  بتاعتكم
وهابقى كبيرة واعتمد على نفسى بعيد عنكم
ده المفروض يعنى  :D
 ولان كمان من حقكم عليا انى أشكركم اوى على كل حاجه عملتوها عشانى ♥



readmore »»

16 September 2012

كلام والسلام ... كلاكيت 21 مره

.
36 التعليقات




لما بنغلط وماحدش بيعرف غلطتنا دى غيرنا
وبتتغير بعض تصرفات اللى حوالينا معانا للاسواء
بنفتكر ان ده نتيجه انهم عرفوا غلطتنا
لاننا بنكون خايفين حد يعرف غلطنا ده
الغلط بيخلينا اضعف وبيفقدنا ثقتنا فى نفسنا
ادام كنت اد انك ترتكب الغلط ده
خليك كمان اد انك تتحمل نتيجته

*****

كل ما بفكر ان فى الوقت ده بالذات
كنت محتجالك تكونى معايا وجنبى فيه
برجع افتكر ان حتى وجودك دلوقتى ماكنش هيفرق كتير
لانك ببساطه مش هتكونى فضيالى اصلاً  !

  ولان ببساطه اكتر انا كده مرتاحه

 *****
 
سنين البعد بينا وبين ناس كانوا من أقرب الناس لينا 
بتتعد بـضِعف سنين القُرب .. واكتر
كل ما كانوا الاشخاص أقرب لينا 
كل ما بيكون الفراق أقسى وأقوى
عشان كده لما بنحسب سنين الفراق بينا وبينهم مش بنحسبها بالأيام 
لكن بنحسبها بكل لحظه اتوجعنا فيها منهم !
وعلى اد وجعنا ده على اد ما بنرفض ان يبقى فى حاجه تجمعنا بيهم تانى


*****
 
بالرغم من انى اتعودت دايما على وجودك
وفكره انى اكون من غيرك دى اصلاً مش سهله
لانك اساسا جزء مهم عندى
بس لما لاقيتك حتتين كده فى ايدى
اول حاجه قولتها
نضاااااااااااااااارتى :((((((
حسيت انا اد ايه ماقدرش استغنى عنك
نضارتى العزيزه ..شكراً
وربنا يخليلنا اللينسيز :D


*****
 
بنحاول نكون مثاليين جداً لما المواقف بتتعلق بالماديات
بس اول ما الماديات دى بتقف قدام حاجه انت بتتمناها
وقتها بتتنازل تمامًا عن فكره المثاليه دى !!






readmore »»

13 September 2012

♥...♥

.
19 التعليقات




اشتاق لـ صلاة .. لم تأت بعد
تكن أنت إِمَامِى فيها ♥

readmore »»

08 September 2012

I'm Yours ♥

.
54 التعليقات


"أمنيتي أن أتسمّى ( بك) و أصبح أمّـاً لـ أبنائك
  تهديني دبلة .. و أهديك عُمراً لم يكُن إلا لك"
 (ايمان بكرى)                                                    



4 / 9 / 2012
وتحققت أولى أمنياتى فى التسمى بك 

ايوه اخيرا دلوقتى بقيت زوجتك رسمياً 
لكن مع ايقاف التنفيذ لمده شهر بس ^_^
حاجات كتير كده حسيت بيها فى الايام اللى عدت
خوف وقلق وتوتر ومشغوله فى حاجات كتير مش عارفه اصلاً ايه هى!
الحاجات الغريبه دى استوعبتها لما بنت عمتى بتقولى شوفى جوزك
هو انت فعلا بقيت زوج ليا؟؟؟
وانا بجد خلاص اتسميت بأسمك؟؟؟
حاسه ان ده كان من الاحلام البعيده واللى بقى قريب مننا اوى 
لحد ما مسكناه بأيدينا

على اد ما انا خايفه من الحياه المختلفه اللى جايه
على اد ما بطمن اوى كل ما بتقولى تخافى ازاى وانتِ معايا

على ما اد ما انا بردو مش مستوعبه
على اد ما انا مبسوطه بيك اوى
ومبسوطه ان اولادى ان شاء الله هيتسموا بأسمك
ودلوقتى كل ما ببصلك بحس ان عينى بتشوفك بطريقه تانيه غير قبل كده
عينى بتشوف فيك حياتى الجايه 
اللى بتمنى من ربنا انها تبقى خير لينا احنا الاتنين

و مش عارفه لحد دلوقتى اوصفلك ازاى احساسى بيك
اول ما خلصنا كتب الكتاب 
وانت سبت الناس والدوشه اللى حوالينا دى كلها
ولاقيتك فى اخر الجامع بتصلى ركعتين لينا وبتدعيلنا
كان نفسى اجرى اقف وراك ونصلى اول صلاه مع بعض
وقتها عرفت ان ربنا اختارلى صح الحمدالله
ربنا يكملنا على خير ياااارب ♥


readmore »»
 

FaceBook Comments

wibiya widget