16 September 2012

كلام والسلام ... كلاكيت 21 مره

.




لما بنغلط وماحدش بيعرف غلطتنا دى غيرنا
وبتتغير بعض تصرفات اللى حوالينا معانا للاسواء
بنفتكر ان ده نتيجه انهم عرفوا غلطتنا
لاننا بنكون خايفين حد يعرف غلطنا ده
الغلط بيخلينا اضعف وبيفقدنا ثقتنا فى نفسنا
ادام كنت اد انك ترتكب الغلط ده
خليك كمان اد انك تتحمل نتيجته

*****

كل ما بفكر ان فى الوقت ده بالذات
كنت محتجالك تكونى معايا وجنبى فيه
برجع افتكر ان حتى وجودك دلوقتى ماكنش هيفرق كتير
لانك ببساطه مش هتكونى فضيالى اصلاً  !

  ولان ببساطه اكتر انا كده مرتاحه

 *****
 
سنين البعد بينا وبين ناس كانوا من أقرب الناس لينا 
بتتعد بـضِعف سنين القُرب .. واكتر
كل ما كانوا الاشخاص أقرب لينا 
كل ما بيكون الفراق أقسى وأقوى
عشان كده لما بنحسب سنين الفراق بينا وبينهم مش بنحسبها بالأيام 
لكن بنحسبها بكل لحظه اتوجعنا فيها منهم !
وعلى اد وجعنا ده على اد ما بنرفض ان يبقى فى حاجه تجمعنا بيهم تانى


*****
 
بالرغم من انى اتعودت دايما على وجودك
وفكره انى اكون من غيرك دى اصلاً مش سهله
لانك اساسا جزء مهم عندى
بس لما لاقيتك حتتين كده فى ايدى
اول حاجه قولتها
نضاااااااااااااااارتى :((((((
حسيت انا اد ايه ماقدرش استغنى عنك
نضارتى العزيزه ..شكراً
وربنا يخليلنا اللينسيز :D


*****
 
بنحاول نكون مثاليين جداً لما المواقف بتتعلق بالماديات
بس اول ما الماديات دى بتقف قدام حاجه انت بتتمناها
وقتها بتتنازل تمامًا عن فكره المثاليه دى !!






36 comments

موناليزا said...

جميلة كلمتك وعجبنى أوى رأيك فى سنين البعد واللى بتعمله

شمس النهار said...

خواطرك
دايما جميلة عفوية

ابراهيم رزق said...

خواطر مغلفة بالشجن

تحياتى

ريـــمـــاس said...

صباح الغاردينيا دينا
كل سطر هنا كان تعبير عن فكر وآحساس
عشان كدا دايماً بحب كلاكيت منك "
؛؛
؛
لروحك عبق الغاردينيا
كانت هنا
reemaas

habiba said...

السلام عليكم
كلامك عن الفراق وسنينه.....مؤلم وحقيقى بجد :(
أما موضوع النضارة ربنا يخليهالى بقى :)
مع تحياتى ^_^

reemaas said...

صباحك سكر جيت انا هوا اول مالقيت اسم البوست

لفت نظرى اول واحدة مش بس مع الناس ده كل ما بيحصلنا حاجة وحشة بنفتكر ان ده عقاب ربنا لينا مع ان ربنا ارحم من كده بكتيييييييييييييييييييييير

بدليل انه سترنا

ريبال بيهس said...

مساء الورد

فكرة وإحساس رسمتيها هنا نتاج فكرة

عبثت بداخلك فما بين المثالية والحاجة

إذا صح التعبير للأسف دوماً تسقط تلك المثاليات

وبين شخص عزيز قد يكون قريب وقد يكون

بعيد ولكن في كلا الحالتين وجوده لا يحدث فارق

لأنه منشغل بما يهمه لا بنا ..

مبدعة

تحياتي وإحترامي

رؤى عليوة said...

الكلام ده بعده تفكيييير وحاجة تتحس والسلام يجى بعد كده

:)

عارفه من اكتر التدوينات اللى بتكون قريبه من قلوبنا هى الطريقة دى لانها عفوية جدا وبنكنش عايزين رأى حد اكتر من انها بتريحنا


دمت بخير

βent Pasha said...

لأ بجد تسلم الأيادي ع الإبداع ده

:-))
خواطرك جميلة حقيقي

محمد جمال said...

خواطر عفويه جميلة تكتنفها الابتسامة لحظه ويحفها الحزن لحظات
واكتر جمله حسيتها اوى هو الحديث عن الماديات
دمتى مبدعه يا دينا
تحياتى

Bent Men ElZman Da !! said...


موناليزا

وجودك هو الاجمل يا منى
نورتينى :)

Bent Men ElZman Da !! said...


شمس النهار

مبسوطه ان الكلام الملغبط ده حضرتك شايفاه جميل :))
نورتينى

Bent Men ElZman Da !! said...



ابراهيم رزق

احياناً الكلمات الصغيره بيبقى وراها كلام اكبر :)
اسعدنى وجودك :))

Bent Men ElZman Da !! said...


ريـــمـــاس

صباحك معطر
انا بحب كلاكيت لما ببيخليكى تيجى بروحك الجميله دى هنا :))

Bent Men ElZman Da !! said...


habiba

وعليكم السلامه ورحمه الله وبركاته
فكره الفراق فى حد ذاتها اصلا مؤلمه جداً
النظاره دى حبيبتى ^_^
نورتينى يا جميله :))

Bent Men ElZman Da !! said...


reemaas

صباحك ورد
انا اصلا كل ما اجى انزل البوست ده افتكرك على طوووول
ربنا ارحم علينا حتى من نفسنا
لاننا بنغلط كتير فى حقنا وربنا رحيم لانه حتى بيغفرلنا ويسامحنا وبيستر علينا
نورتينى يا حبيبتى :))

Bent Men ElZman Da !! said...


ريبال بيهس

مساء الياسمين
الفكره دى من جوايا وجوه ناس بقابلهم حواليا
ده مش كلام عنى لوحدى

احنا للاسف بنتصنع المثاليه فى اوقات كتير جدا

وفى اشخاص تانين بيبقوا مشغولين جدا بردو بس احنا لينا محيط مهم فى حياتهم
الموضوع بيتوقف على انت عايز تبقى قريب والا لا

اسعدنى وجودك وتعليقك :)

Bent Men ElZman Da !! said...


رؤى عليوة

السلام ده عشان يختم الكلام بعد كده :))

اجمل حاجه الكلام اللى بيطلع من القلب لانه اكيد بيوصل للقلب :)

نورتينى يا حبيبتى :))

Bent Men ElZman Da !! said...

βent Pasha

ميرسى يا قمر
انتِ اجمل :))

Bent Men ElZman Da !! said...


محمد جمال

الخواطر دى جزء من حياتنا
عشان كده فى كل جزء بيكون فى حاله معينه الواحد بيعشها او بيقابلها فى اللى حواليه
دمت بخير يا محمد :))

rona ali said...

انا مش هقول حاجه اعتقد انتى عارفها :)))))))))))))))))))

momken said...

....

المره دى مش كلام والسلام خالص
الكلام المره دى مؤلم اوى
وبيحرك حجات كنا بنتصور انها لن تتحرك ابداً

تستطيعين بجرأه الوصول لمناطق كنا نظن ان لا احد يستطيع الوصول اليها

تحياتى

مصطفى سيف الدين said...

المثالية دي برضه وهم زي شمس عالية خلاص مستحيل توصلها لأنك هتتحرق في طريقها
بس لازم تمشي ناحيتها و الا هتقع في الضلمة
تحياتي

Timo.. said...

ده مش كلاكيت واحد
ده كلاكيتات كتييير
متفق معك تماما في كلاكيت 3
:)

نهر الحب said...

دينا
انتي عارفى قد ايه بحب كلام والسلام هنا اوي

وجعني الجزء التالت اوي

عشان كده لما بنحسب سنين الفراق بينا وبينهم مش بنحسبها بالأيام
لكن بنحسبها بكل لحظه اتوجعنا فيها منهم !

بصي هي مش بتبقي كدة اوي
انا شايفة اننا لما بنحب حد مش بنعرف حتي نفتكرله الوجع ومظنش بنبقي مش عاوزين حاجة تجمعنا بيهم
لا بحسها حاجتين جوانا عكس بعض يمكن يكونوا القلب والعقل
حاجة مخلية احساسنا يا ربت تجمعنا بيهم ولو لحظة وحاجة تانية رافضة ده يمكن ليها علاقة بالكرامة والوجع

.......
ربنا يبعد عنك اي حزن يااارب
:)
فين شوكولاتة كتب الكتاب بقي؟

نيللى said...

سنين البعد بينا وبين ناس كانوا من أقرب الناس لينا
بتتعد بـضِعف سنين القُرب .. واكتر
كل ما كانوا الاشخاص أقرب لينا
كل ما بيكون الفراق أقسى وأقوى
عشان كده لما بنحسب سنين الفراق بينا وبينهم مش بنحسبها بالأيام
لكن بنحسبها بكل لحظه اتوجعنا فيها منهم !
وعلى اد وجعنا ده على اد ما بنرفض ان يبقى فى حاجه تجمعنا بيهم تانى

الحته دي بالداااااااااات عجبتني جداً..

وكل كلامك يادينا في الصميم..وحسه بي أوي كمان:)

Deyaa Ezzat said...

ارتباطك بنضارتك.. نوع من العشرة بينك وبينها حتى لو جماد.. كنت كتبت قصة مرة عن حاجة زي كدة

في موضوع الماديات.. بيقولو دايما الإنسا بيتعرف حقيقته بعد اختباره في حاجتين.. الحرية والفلوس

بالتوفيق دايما

Bent Men ElZman Da !! said...

rona ali

لا انا عايزه اعرفها تانى ^_^

Bent Men ElZman Da !! said...


momken

كلام واقعى وبالتالى مؤلم
الالم فى واقعيته
اسعدنى جدا تعليقك ومبسوطه ان الموضوع عجبك كده
نورتنى :))

Bent Men ElZman Da !! said...


مصطفى سيف الدين

احنا كلنا بنطمح للمثاليه وبنحاول نرسمها على ملامحنا وشخصيتنا
لكن فى النهايه كله بيختفى مع او اختبار ليها
نورتنى بوجودك يا مصطفى :)

Bent Men ElZman Da !! said...



Timo..

دى كلاكيات من حياتنا :)
سعيده جدااا بوجودك اللى نورتنى بيه :)

Bent Men ElZman Da !! said...



نهر الحب

وانتى عارفه انا بحب وجودك بقى اد ايه
احنا بنفتكر الوجع لسبب واحد بس
اننا مش بنبقى متخيلين ان اقرب الاشخاص لقلبنا هما اللى بيوجعوه بالشكل ده !
الحب والوجع دايماً هيكونوا طرفين متباعدين متنافرين
لما الاتنين بيبقوا جوانا احنا بنضايق من نفسنا لاننا مش عارفين نوصل لحل صح بسببهم

انا نفسى اشوفك اصلا عشان اديكى شيكولاته :))

Bent Men ElZman Da !! said...


نيللى

ايوه انا ملاحظه ان الحته دى فى الصميم كده عندنا كلنا
مبسوطه انه عجبك كده يا نينو :))

Bent Men ElZman Da !! said...


Deyaa Ezzat

ايوه نضارتى دى حبيبتى ^_^

طيب انا عايزه اقرا القصه دى بقى :)

الانسان اصلا بيتعرف من اختيارته
وخصوصا الاختيارات الصعبه زى المواقف دى

ميرسى ليك يا ضياء
بتنورنى دايماً :))

حسن ارابيسك said...

الحقيقة تدوينات كلام والسلام حاجه كده جميلة معجونة بشوية حب على خوف على شوية خواطر هادئة
وهناك تدوينات أخرى بهم من الفلسفة والرمانسية قرأت منها
لعبة القدر
انت عيدي

ملحوظة رائع جداً انتقاء الخلفية الموسيقية لفيروز لقد تربيت عليا اذني منذ الصغر لقد أوجعتني قلبي ذكرتيني بوالدتي رحمها الله كانت عاشقة لفيروز رحمها الله كان لديها كل البومات فيروز
تحياتي
حسن أرابيسك

العاب النادي said...

يعطيك العافية

:a: :b: :c: :d: :e: :f: :g: :h: :i: :j: :k: :l: :m: :n:

Post a Comment

 

FaceBook Comments

wibiya widget