30 December 2012

عن 2012 ♥

.



السنادى مش كان ينفع تخلص من غير ما اكتب عنها حاجات حلوة كتير
بس مهما حاولت اكتب
مش هيبقى زى الحاجات الحلوة اللى حصلتلى فيها
بالرغم من أن الجو المحيط بينا كلنا مش كان مناسب خالص لحاجات حلوة
بس جوة حياة اى واحد فينا فى حاجات حلوة 
بتخلية يعدى كل اللى حوالية ده
والسنادى بيتهيألى كانت من أحلى سنين حياتى
أن مش كانت أحلاهم على الاطلاق
بداية من اول يوم فيها لحد اخرها
مروراً بحاجات جميلة اوى
زى فرحى وبيتى وصدور كتابى 
وكتاب صندوق ورق اللى شاركت فية مع ناس من أجمل الناس اللى قابلتهم



السنة اللى فاتت لما عملت قائمة بالامنيات اللى نفسى اعملها وربنا يحققهالى
فى منها اللى قدرت احققة 
زى انى اقوى علاقتى بناس كتير وابقى اجتماعية اكتر الى حد ما
و اقابل ناس جميلة اوى عرفتهم من البلوج
واقرأ 30 كتاب والحمد الله قريت 80 تقريباً
واروح اماكن جديدة
واخرج خروجة حلوة انا واختى وصاحبتها من اللى كنا بنخرجها زمان
وافرش شقتى انا ومحمد زى ما كنا بتمنى
وكتحدى ليا قدرت اكتب اكتر من 50 بوست فى المدونه

وفى منها اللى حاولت ووصلت بس كنت مقصرة 
ومش زى ما بتمنى
زى انى اقرب من ربنا اكتر وهافضل احاول اكتر 
زعلت ماما ومحمد السنادى
 يمكن توتر كتير كان بيحصلنا مش خلانى قدرت اعملهم زى ما نفسى
كان نفسى اشترى لكل حد فى البيت هدية وده مش قدرت اعملة ليهم كلهم
حاولت تبقى علاقتى احسن بالناس اللى حواليا 
ومع ذلك مازلت مقصرة جداااا وخصوصا فى الفترة الاخيرة
اما بالنسبة للدايت اللى مشيت علية فترة وخسيت ده 
فـ انا مش عارفه ارجعلة تانى :(
وبالنسبة لفرحى اللى كان نفسى يبقى فى 12\12\2012 
فـ انا بحمد ربنا انى مش عملته فى الوقت ده
والا كنت هتحول لـ لوح تلج نظراً للصحراء اللى انا عايشة فيها :D

اما الحاجات اللى ماقدرتش اصلا احققها
فـ هى انى اخد كورس انجليزى 
وده اساسا انا كنت عارفة من ساعه ما كتبتة انه منحوس ومش هتحقق
للاسف مش قدرت ازور حد من اهلى بقالى كتير مش زورتة 
لحاجات كتير شغلتنى
واسوء حاجة
انى ماعرفتش بردو ابطل عصبية
وكأنها بقت صفه مميزة فيا وصعب تتغير
واخيراً فيلم تيتانك ثرى دى 
واللى اكتشفت انه اختراع فاشل جدا الحقيقة :D

قائمة الأمنيات دى كانت الوحيدة اللى كتبتها فى حياتى
دايماً بكتفى ان ربنا يحس اللى فى قلبى ولو راضى عنى هيحققهولى
السنادى حسيت ان ربنا راضى عنى كتير حتى لو كنت مقصرة
وحسيت انى هابقى طماعه اوى لو طلبت حاجة تانى
وعشان كده انا قررت السنه الجديدة مش هاعمل قائمة أمنيات
لأنى راضية أن شاء الله بكل اللى ربنا هيجبهولى
مش بتمنى غير أنها تكون سنة جميلة اوى زى اللى قبلها
وده عندى كفاية :)



كل سنة وأنتم بخير
وربنا يجعل أيامكم كلها سعيدة :)


22 comments

Sara said...

:)
كل سنة و انتي طيبة و أحلى و أحلى :*

محمد جمال said...

كل عام وانت بخير دينا
جميله روح التفاؤل فى تدوينتك
دايما ربنا بيعملنا الخير لكن للاسف دايما برضه بنبص تحت رجلينا وبنفتكر ان اللى حصل ده مش خير علشان كده ما تزعليش على اى حاجه ما قدرتيش تحققيها فى حياتك فى سنه فاتت واعرفى ان تاخيرها لحكمه لا يعلمها الا الله وهو خير برده

تحياتى لك ولزوجك ولكل اسرتك وعام سعيد على الجميع

Unknown said...

كل سنة و إنتي طيبة و جميله و سعيده يا دندون
يا رب كل أيامك فرح
:)

سواح في ملك اللــــــــــــــــــه- said...

كل سنةوانتي طيبة يادينا انتي واسرتك الكبيرة واسرتك الصغيرة وانشاء الله في العامالقادم ندعوا ربنا يحققلككل امنياتك وزوجك الكريم

mahasen saber said...

حاجه تفرح القلب وتسعد الروح لما نلاقى حد مبسوط انه حقق امانى اتمناها وان السنه مرت عليه سعيده
مبروك جوازك ومبروك الكتاب ودايما من نجاح لنجاح ودايما ايامك احلى واسعد

~ISLAM~ said...

كل سنه وانتى طيبة يا دينا

ربنا يجعلها سنة سعيدة عليكى وعلى بلدنا

ومن اجمل لاجمل يارب

شهرزاد المصرية said...

كل سنة و انتى طيبة
و يا رب يحقق كل امنياتك

شمس النهار said...

كل سنه وانتي بالف خير وسعادة

:)

Tamer Moghazy said...

كل سنة وانت بكل الخير
ويارب السنة الجديدة تكون عليك سعيدة

نهر الحب said...

كل سنة وانتي طيبة ومحققة كل اللي تتمنيه ديما

Bent Men ElZman Da !! said...

Sara

كل سنة وأنتِ أجمل يا سو :) :*

Bent Men ElZman Da !! said...

محمد جمال

فعلا الانسان بطبعه طماع مهما ربنا ادالة حاجات حلوة بيفضل باصص على الحاجات اللى مش وصلها
بس الحمدالله السنادى مش كنت كده
ويارب كل سنة نكون راضيين باللى ربنا بيكتبة لينا
شكراً ليك يا محمد على ذوقك
وليك منى كل تحية ولأسرتك الجميلة
ويارب تبقى سنة سعيدة عليكم أن شاء الله :))

Bent Men ElZman Da !! said...

شيرين سامى

كل سنة وأنتِ جميلة اوووووى كده يا شيرى
ويارب تكون سنة سعيدة عليكِ وكلها فرح ونجاح أن شاء الله :*

Bent Men ElZman Da !! said...

سواح في ملك اللــــــــــــــــــه-

شكراً ليك اووووى يا خالد على ذوقك
ربنا يسعدك ويارب تكون سنة جميلة عليك أن شاء الله :)

Bent Men ElZman Da !! said...

mahasen saber

ربنا يخليكِ يارب
وسعيدة جدااا بوجودك وزيارتك فى تدوينة فرحت قلبك ومش كانت حاجه نكد والا حاجه :))
اتمنالك سنة أسعد يارب وربنا يوفقك فى حياتك أن شاء الله :)

Bent Men ElZman Da !! said...

~ISLAM~

ميرسى ليك يا أسلام
ويارب تكون سنة سعيدة عليك أنت كمان أن شاء الله
وتحقق كل اللى بتتمناه :)

Bent Men ElZman Da !! said...

شهرزاد المصرية

كل سنة وحضرتك بألف خير
ويارب تكون سعيدة عليكِ ومليئة بالنجاحات :)

Bent Men ElZman Da !! said...

شمس النهار

كل سنة وحضرتك بألف خير يارب :)

Bent Men ElZman Da !! said...

منجي بـــــــــــــاكير

شكراً ليك جداً :)

Bent Men ElZman Da !! said...

Timo..

كل سنة وأنت أسعد يا تامر ويارب تكون سنة جميلة عليك أن شاء الله :)

Bent Men ElZman Da !! said...

نهر الحب

كل سنة وأنتِ جميلة يا سهاد زى ما أنتِ
يارب تكون السنادى أسعد وتحققى فيها كل اللى بتتمنية يارب ان شاء الله :*

faroukfahmy said...

خواطر اكثر من ممتازه وان كان قد شدتنى الاخيرة
اسوء احساس ان تجبر على التعامل مع هحد لا تريده
وماذا نعمل اذا كان ما يتم غلى غير هوانا قال ايش رماك على المر ...............

:a: :b: :c: :d: :e: :f: :g: :h: :i: :j: :k: :l: :m: :n:

Post a Comment