28 December 2012

عن إحنا واللى فات ...

.


اتفاجئت وانا واقفة بشترى حاجه ... بعدد لمجلة إحنا
"اللى مايعرفهاش هى مجلة شبابية بتتكلم فى كل حاجه بالعامية و
- صوت جيل بحالة-"
وللاسف جداً كان العدد الاخير !
زعلت أوى
بس زعلى الاكثر كان لما قريت مقالات لكل العاملين فيها
واللى بجد لمس حتة مستخبية جوايا



إحنا دى خلتنى أفكر فى حاجات مش كانت فى دماغى أصلاً
إحنا جرأتنى وخلتنى اكتب مقالات ومواضيع منها اللى نشرتة 
ومنها اللى فضلت محتفظة بيها لنفسى
إحنا خلتنى انقل منها تقريباً 20 صفحىة "ودى حاجه مملة بالنسبالى" فى منتدى لموضوع  علامات القيامة والخلفاء الراشدين 
عشان كانوا اسلوبهم مختلف و "مش مكلكع" وحبيت غيرى يشوفهم
إحنا دى المجلة اللى كان نفسى اوى أنشر حاجه فيها
إحنا عرفتنى يعنى اية تفتح شباك جواك يدخل منة النور
إحنا فى كلام الكُتَاب بتوعها عنها
فكرتنى يعنى اية تبقى متعلق بحاجة وفجأة تروح بكل لحظاتها الحلوة
إحنا فكرتنى بجزء جميل اوى من حياتى اختفى



فكرتنى بمنتدى كنت مشتركة فية لـ 5 سنين
واللى منة طلعت بأصحاب عمرهم ما هيتكرروا
واللى كان سبيل انى اعرف اجمل انسان فى حياتى
واللى غيّر تفكيرى وخلانى اشوف كل حاجه حواليا بنظرة فيها تفكير
واللى خلانى ابص للناس واتعامل معاهم بطريقة مختلفة واجتماعية اكتر
واللى خلانى احس انى اقدر اعمل اللى انا عايزاه ادام بحاول
واللى خلانى كل يوم فى ابتسامة ولو صغيرة بتترسم على وشى 
وحاجات كتير اوى حلوة فى قلبى

فاكرة لما كنا بنتجمع سوا فى مقابلات سواء فى الحقيقة او على النت 
عشان نفكر فى افكار جديدة نطورة بيها ونكون كلنا احسن
فاكرة لما كنا كلنا بنفكر وبنسهر مع بعض من غير اى مقابل 
غير بس حاجة بنحبها واننا بنحب بعض
فاكرة لما عرفت ان فى اقتراح انه يتقفل 
وكنت بعيط ان حاجة جميلة زى دى بتجمعنا هتروح
وعارفه ان مهما اتوعدنا اننا نفضل اصحاب حياة كل واحد فينا هتخطفة
..وانا منهم !
كتير اعتبروة فترة فى حياتهم وعدت
لكن انا كنت دايماً بعتبرة مرحلة فاصلة بالنسبالى فى حاجات كتير اوى

المنتدى قفل من فترة 
وماحدش فكر يكتب هو اد اية فرق فى حياه كل واحد دخلة
بس لما شوفت حاجة عاصرتها فى نفس الفترة 
ويمكن بنفس القوة إلى حد ما و بتنتهى
كل الاحاسيس دى رجعت جوايا من تانى 
وماكنش ينفع مش أكتب عنها وعن احساسى انا بيها :)


6 comments

سواح في ملك اللــــــــــــــــــه- said...

حبيت اسلم علي اختنا دينا

ازي حضرتك وازي زوجك الطيب

تحيتي دينا

Bent Men ElZman Da !! said...

سواح في ملك اللــــــــــــــــــه-

الله يسلمك يا خالد
كلة تمام تسلم على سؤالك :)
ازيك انت؟؟
المدونة مفتقدة وجودك وتعليقاتك
يارب تكون بخير :)

ريـــمـــاس said...

مساء الغاردينيا دينا
دايماً في حاجات في حياتنا مش بتتنسي
وتفضل جوانا وبنفتكرها ونحزن عليها ولما حاجة ترجع ذكراها نرجع نكتب بنفس الحنين والدموع
انا كمان اول ظهور ليا على النت كان في منتدى عمري مانسيته ولانسيت احلى اصحاب فيه "
؛؛
؛
كل سنة وانتي طيبة وعام حب وسعادة يارب
لروحك عبق الغاردينيا
كانت هنا
Reemaas

نيللى said...

جميل أن حاجة كانت فارقة في حياتك تفكرك بردوا بحاجة فرقة في حياتك.. ومهما الحاجة تنتهي بتفصل جوانا بس الصعب أننا بنتمني رجوعها تاااني من فرحتنا بيها ولكن مش بترجع وبتفصل ذكري حلوة نتنفس بيها في جميع أوقاتنا..جميلة دينا

Bent Men ElZman Da !! said...

ريـــمـــاس

واضح ان كذا حد من المدونين اصلا كان بدايتة فى منتديات
وده بيخلى الحنين دايما لاول حاجه مش سهل

كل سنة وأنتِ بألف خير يا حبيبتى
وربنا يجعلهالك سنة سعيدة وكلها حب يارب ♥

Bent Men ElZman Da !! said...

نيللى

احنا اصلا بنحس ان اجمل حاجه فى حياتنا الذكريات
مهما كانت مؤلمة
ومهما كان فى غيرها حاليا حاجات كتير احلى

كل سنة وانتى جميلة يا نينو ♥

:a: :b: :c: :d: :e: :f: :g: :h: :i: :j: :k: :l: :m: :n:

Post a Comment

 

FaceBook Comments

wibiya widget