06 December 2012

معقول ده ؟!!؟

.




اللى يضايق فى كل اللى بيحصل دلوقتى
مش أن ربنا رزقنا برئيس مايختلفش كتير عن اللى قبلة
ولا أن فى ناس كتير بتموت وبتتصاب
لأن أحنا فى السنتين اللى فاتوا اتعودنا على الموت 
وبقينا بنتوجع شويتين تلاته وبعدين عادى وننتظر استقبال خبر الموت اللى جاى
بداية من 25 يناير مرورًا بـ 28 يناير و موقعه الجمل ومحمد محمود 
والالتراس و جنود الحدود وأطفال أسيوط 
وحاجات كتير كده لحد الأتحادية
لكن اللى يضايق بجد
أننا بنواجه أكتر فترة من وقت الثورة الشعب منقسم فيها
وأصبح الشعب ذات نفسة هو اللى بيموت نفسة
يعنى ما شاء الله هننقرض بأكتفاء ذاتى من غير أى تدخل
ولا حد محتاج يقول يد خفية ولا طرف تالت ولا الجو ده خالص



بستغرب بجد من الناس اللى متمسكين بتفكير الاخوان ومتفقين معاهم جداً
بيضايقنى أنى اشوف ناس اعرفهم كويس متبنين نفس فكرهم ونفس طريقة كلامهم
لما ببقى خلاص هفكر جدياً فى قطع كلامى نهائى معاهم
أرجع واقول المفروض أكون أعقل من كده
ما هو لازم كل واحد يعبر عن رأية حتى لو كان بالغباء ده بردو
معقول ماحدش فاهم مين الصح ومين الغلط للدرجة دى !
معقول فى ناس قادره تعمل غسيل مخ لناس تانية بالمنظر ده !
معقول تكون كمية المسئولين دول كلهم بـ كم الغباء الفظيع ده ؟!؟
معقول يكون فى رئيس بيعانى من الصمم للدرجة اللى تخلية مش قادر يسمع شعبة 
لكن قادر يسمع الآوامر وبس؟!!؟
 معقول بعد ما نعيش طول عمرنا مهمشين
ويوم ما يطلعلنا صوت ونقدر نغير نظام بحالة
نجيب نظام بدالة يتفنن فى أزاى يرجعنا مهمشين تانى !!!!!!




8 comments

ظلالي البيضاء said...

أختي دينا ..
من استراتيجية حياتي أن أبتعد عن مواطن الخلاف فقد تعلمنا أن "الخروج من الخلاف سنة الأحناف"
لكن الشارع المصري منذ البداية منقسم كما كل شعوب العالم ..
لكن في العالم الحر الجميع يعمل لإعمار البلاد حتى إذا جاء وقت الانتخابات الرئاسية خرج طرف ودخل الآخر وهكذا ..
أما ما يحصل في مصر فأحد الطرفين إن لم أقل كلاهما يحاول إلغاء الطرف الآخر ..
والخاسر الأكبر هو مصر وشعبها ..
نسأل الله السلامة والحفظ لمصر وشعبها ..
مع التقدير والتحية والاحترام ..

محمد جمال said...

عارف ان كلامى ده ممكن يزعل ناس كتير منى وكل مره اقول لنفسى بلاش كلام فى السياسه اللى موديانى فى داهيه ومخليه الناس تزعل منى بس هعمل ايه مبقدرش لكن بقى هتكلم وربنا يسترها معايا :

وتعليقا منى على ما كتبتيه يا دينا

انا لست مع الاخوان نهائيا فيما يفعلون ولكنى لست معك ايضا فيما كتبتيه بالاعلى

- ليس الرئيس الحالى كالرئيس السابق بأى شكل من الاشكال ( مع تحفظى على قرارات د. مرسى )

- الشعب لن ينقسم ابدا على نفسه - بل انقسمت الكتله الحرجه على نفسها - اما الشعب فاما فاهم و واع لكل ما يحدث ( وهم قله ) واما متأثر بما يسمعه من وسائل الاعلام المنحطه ( اسف فى اللفظ ) فتارة معهم وتارة عليهم ( وهم جموع من المتعلمين ) - واما لا يلقى بالا بما يحدث ( وهم الاغلبيه التى تسعى وراء استقرار )
اما الكتلة الحرجه فهى التى انقسمت , والله اعلم من وراء القصد والنيه لكلا الطرفين ولكنها فى كل الاحوال ليست فى مصلحة الوطن , فالبعض يسعى للمصلحة الشخصية والمجد الزائف على حساب ارواح بشر والبعض الاخر يفكر ان ما يفعله هو الصواب وان الاخرين ما هم الا مخربين .

- اما الامر الاخير وهو معقولية فهم الصحيح من الخطأ فى المشهد الراهن . ارد عليك بأنه معقول جدا وطبيعى جدا الا يفهم الصحيح من الخطأ الان وفى هذه الفترات التى تلى الثورات يحدث الا يفهم الكثير ماذا يحدث وهل هو صواب او خطأ وكيف يلعب الساسه من وراء الكواليس وكيف يخرج علينا الاعلام بين لحظة واخرى بكلام اهبل ( اعتذر مرة اخرى عن اللفظ ) لاناس لا يعون ما يقولون وكل همهم اما تصفية حسابات , أو فكر مضمحل يريدون تطبيقه وفى كلا الحالتين تحدث حالة من الشتات بين المجتمع بين مؤيد ومعارض .

حاولت ان اعرض جزء من رأيى عن الموقف الراهن واتمنى الا يكون قد ازعجكم ولو تركت لنفسى العنان هنا فلن استطيع ان اوقفها .

اسف للاطاله - تقبلى تحياتى

فقاعات أفكارى said...

انا كل يوميا بتعرض للناس دى .. مش عارفة ازاى الاخوان اقنعهوهم بيهم ويمكن دة علشان مبيتفرجوش غير على قناة مصر25 و الاولى المصرية ,, يخرجوا من دة و يدخلوا فى دة يروحوا يصلوا ولا يخرجوا يلاقيهم فى وشه .. هيسمعوا وجهة النظر التانية فين ربنا يرحمنا و يهديهم .. و يوصل مصر للطريق الصح

حنين محمد said...

صباح الغاردينيا دينا
مش هقول غير ربنا يحفظ مصر وشعبها وآمنها وآمانها ويقيها شر الفتن يارب "
؛؛
؛
لروحك عبق الغاردينيا
كانت هنا
Reemaas

Bent Men ElZman Da !! said...

ظلالى البيضاء

هو الحقيقة أنا حاليا بتعب نهج البعد عن الخلاف تماماً ومش بحاول اتناقش مع حد أصلاً
الفكرة أن كل طرف بيحاول يتهم الطرف الاخر
والحياة مش هتمشى الا بالطرفين

اسعدنى وجودك :)

Bent Men ElZman Da !! said...

محمد جمال

هو لو بعدنا شوية عن الاعلام واختلاف الاراء
هنشوف حاجة واحدة
ان بردو فى ناس ماتت
وحالنا ماتغيرش
وبنتعامل مع الل بيموتوا كانه لا اول ولا اخر واحد هيموت
ماتوا قبلة كتير
ومتقبلين تماما انه يموت بعده كتير
فـ انا اختلافى دلوقتى
ان فى ناس بتموت وماحدش اصلا مهتم
والسفن تمشى كما تشتهى رياحهم والحياة عادى
ده قصدى يا محمد
سعيدة بمناقشتك دى جدا على فكره :)

Bent Men ElZman Da !! said...

فقاعات أفكارى

هى قناة مصر 25 دى
مش عارفه طلعت امتا
ومين الناس الغريبة اللى بيتكلموا فيها دول
انا مش بحب الاعلام المنحاز لاتجاه واحد
انا عايزه اشوف حد محايد

Bent Men ElZman Da !! said...

ريـــمـــاس

اللهم تقبل دعائك يا حبيبتى
ربنا يخليكِ :)))

:a: :b: :c: :d: :e: :f: :g: :h: :i: :j: :k: :l: :m: :n:

Post a Comment