13 December 2012

My passion

.


مش كنت حابة الاسبوع ده يعدى من غير ما اكتب حاجه
و بعيداً يعنى عن حكاية الدستور و الاستفتاء و نعم وألا لا دى
والواحد أصلاً مش عايز يتكلم فى السياسة كفاية كدة بقى أوى
فـ أنا قررت أن النهاردة يبقى البوست ترفيهى
هاتكلم عن حاجه بحبها ...وهى القراءة



من و أنا صغيرة كنت مختلفة عن كل أصحابي فى حكاية القراءة دى
لان مش كان حد فيهم بيحب القراءة أصلاً غيرى 
وده أستمر معايا لحد لحد فترة مش بعيدة

فاكرة كويس اووووى لحد دلوقتى أول يوم أشتريت فية قصة
ولما حوشت تمنها اللى كان مش يزيد اساساً عن 35 قرش
فاكرة لما خدت الفلوس وروحت المكتبة واشتريت القصة وكأنت بالنسبة ليا كأنها كنز
أول قصة كنت أقراها كانت قصة سيدنا قابيل وهابيل من سلسلة قصص الأنبياء
وبعدها بدأت اجمع فى السلسة دى وكان صاحب المكتبة عرفنى وبدأ يحتفظ بالنسخ ليا عشان أكمل المجموعة كلها

بعدها بدأ معايا بقى موضوع رجل المستحيل واللى كان مستحوذ عليا لفترة طويلة
وبعدين صرخة الرعب و ملف المستقبل و ما وراء الطبيعة واللى مستمرة معايا لحد دلوقتى كل ما بلاقى فرصة أنى اجبها

فاكرة أوى وانا صغيرة كل يوم احوش اتنين جنية ونص و بعد الغداء اروح اشترى قصة
وبردو الراجل حفظنى وبقى كل ما اروحلة يطلعلى كل الاعداد الجديدة اللى كان بيجبهالى مخصوص
اخد القصة واقعد فى البلكونة أفضل اقرأ فيها لحد ما أخلصها
واروح أقول لماما أنا عايزه أجيب قصة تانى
طبعاً مامتى حبيبتى كان ردها جميل عليا
أنتى هتستهبلى دة أنتى كده عايزالك مرتب لوحدك للقصص دى :D
مشجعة الحقيقة يعنى :D
بس بصراحة كنت بصعب عليها 
وكانت بتجبلى قصص لما بتلاقينى قاعدة مش عارفة أعمل حاجة

كل ما كنت بكبر كل ما كنت بحس أن القصص دى مش كفاية بالنسبة ليا
وكان أول كتاب أقراه بعيداً عن النطاق ده
هو كتاب احسان عبد القدوس " يا أبنتى لا تحيرينى معك" 
وده السبب فى قرأتى لية ماما لانه كان عاجبها وشجعتنى اقراه
 وبعدها انقطعت عن القراءة لفترة مع المذاكرة واللعب وحاجات كتير
وبعدين رجعت تانى مع كتاب كان بالصدفة مع صاحبتى بتاع انيس منصور اسمه "قالوا"
كان عاجبنى اسلوبة جداً وفكرة الكتاب اللى عبارة عن فقرات مش متصلة لكن مرتبطة بموضوع واحد إلى حد ما
بعدها بردو بدأت قراءتى تقل و مش كل الكتب بحب أقراها
ممكن كسل منى وكمان النت كان واخد حيز كبير اوى

اما اخر السنة اللى فاتت والسنادى بقى بالنسبة ليا كان الموضوع مختلف تماماً
شغفى للقراءة رجع من تانى وبشكل أكبر
مابقاش ليا نوع كتب معين بحب أقراه
أى كتاب بيقع قدامى بحب أقراه
و مع كل كتاب جديد بخلصة بحس أنى مستمتعه أكتر
كنت حاطه هدف ليا مع بداية السنادى أنى اخلص 30 كتاب
بس الحمدالله قربت أوصل للـكتاب الـ 80
وقدرت أخلص المجموعة الشعرية لـ سوزان عليوان فاضلى منها كتابين أن شاء الله اخلصهم قبل السنة ما تخلص
وبقيت حاطه قائمة بالكتب اللى نفسى أقراها
 وأشتركت فى حملة أسترجل واقرأ 10 كتب فى الشهر اللى اتعملت لمدة شهرين على الفيس بوك
والحمدالله كنت من الاوائل فيها وكان ليا جوايز كمان

القراءة مش بس شغف وحب للمعرفة
أنما بتخلى أسلوبك فى حاجات كتير أوى يتغير
بيخلى طريقتك فى الكلام وطريقتك فى الكتابة تتغير وتكون افضل
ده طبعا غير المعلومات اللى بتضاف ليك
وفى مقولة بتقول
أنت لا تستطيع أن تفتح كتاباً من الكتب دون أن تتعلم منة شيئاً
ونفسى أستمر على كده ومفيش اى حاجه تشغلنى عن القراءة تانى

لما سألت ماما هو أنا اية اللى حببنى فى القراءة كدة 
رغم أن مفيش أى جو مشجع حواليا ليها
قالتلى أن وأنا بيبى كانت بتقعد تقرألى قصص
وقريت فى علم النفس
أن ده بيشجع الأطفال من صغرهم على القراءة وبيخليها حاسة أكتر منها هواية عندهم
ولذلك أنا أن شاء الله لما أجيب بيبى هاقعد أقرالة بصوت عالى
عشان يطلع بيحب القراءة أكتر منى :)
 
 

10 comments

نهر الحب said...

انا كمان بحب القراءة اوووي
بس عارفة انا مبعرفش اقرأ الا وذهني فاضي عشان بحب اقرأ بعمق
انا بابا كان بيجيب لنا زمان قصص مكتبة الاسرة وكنت بحبها اوي ولو تفتكري المكتبة الخضراء دي بجد نفسي اجيبها لولادي ان شاء الله

:)
وحشاني يا دودو

فقاعات أفكارى said...

برغم ان القراءة بتوسع الافاق اكتر و بتزود الثقافة و بالنسبالى شايفة ان العلم مش بالتعليم فى المدارس انما بالثقافة اللى مبتجيش غير من القراءة الا ان انا مبحبش القراية خالص :) و كل ما احاول اقرا مكملش بس بحاول

Bent Men ElZman Da !! said...

نهر الحب

تعرفى انا عكسك يا سهاد
بحس ان القراءة هى اللى بتصفى ذهنى اكتر
الكتاب بياخدك من حاجات كتير حواليكِ
ده لو كتاب حلو بجد

عارفه طبعا المكتبة الخضراء
لسة كنت بدور عليها فى معرض الكتاب اللى فات
ربنا يرزقك بأطفال عساسيل كده تجبيلهم قصص حلوه كتير
وأنتِ وحشانى أكتر على فكرة :))

Bent Men ElZman Da !! said...

فقاعات أفكارى

هو ده اوقات بيعود لنوعية الكتب نفسها
بس المهم ان الواحد ياخد المعرفة اللى محتاجها من اى اتجاه :))

موناليزا said...

موفقة يا دينا :)
أنا كمان كنت كده :)

نيللي علي said...

من غير القراءة الواحد بيحس أنه مخه فاضي لابيفكر في حاجه ولا في افكار بتجيلوه..جميل يادينا ويارب توصلي لل١٠٠ كتاب يارب

حنين محمد said...

مساء الغاردينيا دينا
:)
بجد القراءة احساس تاني عارفة انا كنت لما انجح في ابتدائي ويقولي بابا نفسي في ايه هديه كنت اقوله اروح المكتبه ههههه كانت بالنسبه ليا مدينة الملاهي لاني كنت بخرج منها مبسوطه وانا شايله القصص الي بحبها
ياااااارب اشوفك ماما قريب وتقرأي لابنك قصة حلوة :) "
؛؛
؛
لروحك عبق الغاردينيا
كانت هنا
Reemaas

Bent Men ElZman Da !! said...

موناليزا

طيب ودلوقتى يا منى؟

Bent Men ElZman Da !! said...

نيللى

هى الافكار اصلا بتيجى للواحد من القراءة أكثر من الواقع حتى
ربنا يخليكى يا نينو :))

Bent Men ElZman Da !! said...

ريـــمـــاس

يابختك يا ريمو
احنا بالنسبة لينا زمان لو لاقينا مكتبة يبقى انجاز
بس انا اصلا مش كنت بحب المكتبات العامة زمان بتبقى كئيبة ومش فيها كتب مشجعه

ربنا يخليكِ يا حبيبة قلبى ويارب اجيب بنوتة تحب المكتبات زيك كده ^_^

:a: :b: :c: :d: :e: :f: :g: :h: :i: :j: :k: :l: :m: :n:

Post a Comment