04 January 2013

كلام والسلام .. كلاكيت 23 مرة

.


 
لما بنبدأ اى فكره جديده فى دماغنا
فكره خاصه بمستقبلنا او طموحنا او حاجه بنحلم بيها
بنبدأها بحماس اوى
بس اول ما بناخد خطوات ملموسه فى تحقيق الحلم ده
بيبطل حماسنا يبقى زى الاول
او على اقل تقدير بيقل
يمكن وقتها بنكون اطمنا ان حلمنا ده ممكن يكون فى ايدينا
ومش مستحيل اوى زى ما كنا حاسين فى الاول

*****

فى كل مشكله بمر بيها بكتشف حاجه جديده فى نفسى
اهم حاجه عارفاها فيا انى مابعرفش اسامح
وغير وارد استمالتى بأى شكل من الاشكال
لا بكلام ولا بذكريات ولا حتى بهديه
لما بقرر انى مش اسامح ده معناه انى فعلا من جوايا مفيش مجال للتسامح ابداً
يمكن يكون قلبى اسود او شريره
بس للاسف مابعرفش انسا القسوه
ولا اى حاجه وحشه اى حد بيسمح لنفسه انه يعملها فيا

*****
 
لما بتتوقف عن ممارسه اى عمل وبترجعله بعد فتره تانى
بتكون فى حاله من اتنين
ياما بتكون فى حاله فقدان لبريقك فى العمل ده
او فى حاله لمعانك وازدهارك فيه
حاول دايما تكون فى الحاله التانيه
او على أقل تقدير تكون فى نفس بريقك الاولانى


*****
 
كل ما بشوف اسمك قلبى بيتخطف
مش عشان هو اسمك وبس
لكن عشان كان نفسى احبه فى وجودك اكتر من كده


*****
 
بعض ردود افعالنا مش بتكون فعلاً من جوانا
بس اوقات بتكون عشان اللى حوالينا منتظرين مننا رد فعل معين
وعشان الموقف اللى بتتحط فيه بيحتم عليك يكون ليك رد فعل
فـ بالتالى عقلك بيترجم أنك لازم تعمل حاجه
حتى لو أنت فعلاً مش عايز


*****
 
كان نفسى اوى اوى تكون معايا الفتره دى
كان نفسى تشوفنى بفستان فرحى وانت اللى تدينى بأيدك لمحمد
اللى انا واثقه انك كنت هتحبه جدا لانكم شبه بعض
كان نفسى اوى تشوف كتابى اللى اسمك جنب اسمى عليه
واللى بردو متاكده انك كنت هتحبه حتى لو كان اسوء كتاب فى الدنيا

*****
 
اسوء احساس انك تكون مجبر تتعامل مع حد
انت مش حابب تتعامل معاه
القدر والزمن اوقات بيجبرنا نعمل حاجات بايخه اوى



21 comments

سواح في ملك اللــــــــــــــــــه- said...

مافهمته يادينا

انك انسانة لاتتنازلين ابدا عن مبدأ اعتقدتيته

واجمل مايميزك بعدك عن النفاق والمجاملة

تحيتي للاخت الراقية دينا

مروه زهران said...

بحب تأملاتك أووى يا دينا ، بس اللانسان اللى مش بيسامح مش بيكون قلبه أسود .. هو بيكون اتجرح أووى من ناس بيحبهم .. وبياخد وقت لحد ما جرحه يشفى .. وصدقينى مع الوقت هتلاقى نفسك اتغيرتى .. وبدأتى تتقبلى عيوب أخطاء غيرك لأننا بشر زيهم .. بنغلط .. وفى ناس بتتحملنا بردوا وبتسامحنا

Nour said...

اسوأ حاجة لما تتعامل مع شخص انت مش حابب تتعامل معاه ... عارفة اني مستحيل اعمل كده ولو استحملت ساعة مش بستحمل التانية !

حاسة بقالي كتير مكنتش جيت هنا بس الحمد لله عود احمد :D

givara said...

تأملات غايه فى الجمال
ووصف دقيق لكل حاله
احسنتى فعلا

AbEeR said...

صبآح الخير يآ دنيا ،،

لما نبدا بفكره يديده نحلم فيها قبل ما نطبقها .. الحلم دايماً أحلى من الواقع لأنه نرسمه بالطريقه اللي احنا نبيها .. ولما نشوف ان بدينا نحقق الحلم يقل الحماس يمكن من الكسل اللي داخلنا ويمكن لانه احنا ندري ان قادرين نحققه بأي وقت ثاني ...

لما نرجع حق شي كنا مسوينه من قبل لانه احنا اشتقناله واشتقنا حق روحنا فيه .. و اتمنى مثل ما قلتي نرجع له بالحاله الثانيه ( :


لما ما نسامح غيرنا على شي غلط سووه بحقنا مو معناته ان احنا قاسين لي الدرجه اللي ما نقدر نغفر لهم أخطائهم .. هذا يعني ان اللي الخطأ كبير و الجرح اللي بداخلنا منهم عميق .. و انه ما كنا نتوقع هالجرح منهم بالذات .. و هذا اللي يخلينا ما نقدر نسامحهم

مهما حاولنا ننسى اللي سكن بقلبنا .. مجرد ما ينذكر اسمه نشتاقله حيييييل ( أوي أوي ) .. ونتمنى لو كان موجود معانا كل ما فقدناه

لما نكون مضطرين نتعامل مع شخص ما ودنا نتعامل معاه الأفضل نتعامل معاه على انه شخص غريب


كتاباتج حلوووه وعجبتني واااايد .. حاولت أعطي كتاباتج حقها من خلال تعليقي وأدري مهما أكتب راح أكون مقصره عند ابداعج

تسلم إيدج


...
عبير الكويت

شمس النهار said...

طبعا البوست جميل كالعادة
بس انا هتكلم في نقطه خطيره فيه
التسامح
بنت جاتني تقولي ليه انا مش عارفه اسمح حد اساء ليه
قلت لها ده نص الطريق انك عارفه انك مش عارفه تسامحي وعايزة تحلي ده
قلت لها اتمرني علي التسامح :)
يعني اغصبي نفسك تسامحي اي حد عملك شئ بايخ
هتلاقي الدنيا اتغيرت خلص
وافتكر ان ربنا قال للي مش بيعرفوا يغفروا للناس الاتحبون ان يغفر لكم
الايه لها معاني كتير
ومن اهم معانيها ان اغفروا للناس ربنا يغفر لكم وهستأذنك ابقا اكتب بوست اشرح فيه الواقعه دي بالتفصيل :)

موجة said...

كلام جميل أوي..
رقيق ومعبر..
خالص تحياتي :)

reemaas said...

وحشتنى الكلاكيتاااااااااااااااااااات دى جداااااااااااا

محمد جمال said...

بجد رائع هذا الكلام اللى مش كلام والسلام ده كلام لمن يعقل الكلام
تحياتى يا دينا

Deyaa Ezzat said...

في الأول
كل سنة وانتي طيبة ويارب تبقى سنة حلوة عليكي

في موضوع الحماس دة بيفرق من واحد للتاني وعلشان كدة فيه ناس بتنجح وناس تانية لاء.. ناس بتوصل لأهدافها اسرع من ناس وناس تانية مابتوصلش

بالنسبة للسماح متهيالي بيتغير مع الوقت.. يعني ممكن الواحد يتغير ويقدر يسامح بعد وقت معين

بالتوفيق دايما

Bent Men ElZman Da !! said...

سواح في ملك اللــــــــــــــــــه-

أشكرك جداً على رأيك بى يا خالد
كلة من ذوقك
اسعدنى وجودك :)

Bent Men ElZman Da !! said...

مروه زهران

الازمة فى اية يا مروة
ان الواحد بياخد بالة اوى من عيوب غيرة
بس مش بيقدر يشوف عيوب نفسة كويس

نورتينى بوجودك يا جميلة <3

Bent Men ElZman Da !! said...

Nour

انا كنت زيك بالظبط كده يا نور
بس صدقينى مع الوقت وظروف الحياة المختلفة
هتكونِ مجبرة تعملى كده

نورتنى البلوج جدااا واوعى تغيبى تانى كده بقى <3

Bent Men ElZman Da !! said...

givara

شكراً ليك جداً
واسعدنى وجودك ورأيك :)

Bent Men ElZman Da !! said...

AbEeR

مساءك ورد يا عبير

فعلاً لما بنلاقى بداية حلمنا بدأت تتحقق بنحس شوية بالكسل لحد ما تيجى حاجه تانى تنشطنا من تانى

وممكن يكون اللى مش قادرين نسامحة أخطأ فى حقنا كتير اوى لدرجة اننا خلاص مش بقينا قادرين نتحمل أكتر من كده

مش عارفة أقولك انا سعيدة بوجودك وتعليقك الجميل زيك ده اد اية
نورتينى يا جميلة واتمنى انها مش تكون اخر مرة <3

Bent Men ElZman Da !! said...

شمس النهار

انا مع حضرتك جداااا فى كلامك
بس الفكرة فى القدرة نفسها
أن الواحد يقدر يعدى كل حاجه وكأنها مش حصلت ده صعب
وكمان ممكن أعدى ومش افكر فى الموضوع اه
بس ان الواحد يتعامل بنفس الطريقه كأن شئ لم يكن
صعبة دى مش سهله

أكيد مستنية من حضرتك البوست فى أقرب وقت :)

Bent Men ElZman Da !! said...

موجة

شكراً ليك جداً
سعيدة أن البوست عجبك
ونورتنى بوجودك

مدونة صحة نت said...

كلمات جميلة نتشرف بزيارتكم لمدونة صحة نت وبالتوفيق في المدونة الرائعة

Bent Men ElZman Da !! said...

reemaas

وحشنى وجودك فى البلوج عموما
وفى البوست ده خصوصاً :)

Bent Men ElZman Da !! said...

محمد جمال

وجودك هو الأروع يا محمد
مبسوطة أن البوست عجبك
منورنى دايماً :)

Bent Men ElZman Da !! said...

Deyaa Ezzat

هو الحماس اللى بينجح اوى لا
الواحد لو راجع مواقف فى حياته وحسب لو حماسة كان اقل وقتها
بيتهيألى هيلاقى انه ماكنش هينجح بنفس المقدار

ممكن وممكن لا بردو

نورتنى يا ضياء بوجودك الجميل ده :)

:a: :b: :c: :d: :e: :f: :g: :h: :i: :j: :k: :l: :m: :n:

Post a Comment

 

FaceBook Comments

wibiya widget