10 February 2013

الحمدلله ♥

.


وقد فعلها النت ولعب معايا الدنيئة وخلانى أتاخر فى البوست دة :D



بيتهيألى الحمدلله دى أكتر كلمة كنت بقولها الفترة اللى فاتت دى
معرض الكتاب السنادى كان مختلف بالنسبالي جداً
مش عشان كتابى وكتاب صندوق ورق فية وبس
لكن عشان كان فرصة إنى أقابل ناس كان تأثيرهم عليا كبير اوى
من غير حتى ما اشوفهم قبل كدة
زى أ.إبراهيم رزق اللى كنت مبسوطة جداً إنى قابلتة وساليناز القمر
وماما زيزى اللى كل ما بفتكر كلامى معاها بقول 
اية الشخصية الجميلة اوى دى ؟
و رؤي عليوة اللى كنت نفسي أوى اشوفها
وزملاء مشروع النشر لمن يستحق
زى ياسين أحمد ومحمد صلاح ومحمد الزحاف و أمل زيادة
اللى أسعدنى وأتشرفت بوجودى معاهم 
ووجود كتابى مع ناس جميلة وموهوبة اوى زيهم

كنت مبسوطة أوى إنى كل يومين بروح عشان حفلات إصحابى 
اللى كنت سعيدة بيهم وليهم جداً
وفاطمة ماضى اللى كانت رفيقة كفاح المعرض وكل يومين نتقابل هناك
واللى كنت مبسوطة ليها اوى عشان الكتابين بتوعها



وكنت فرحانة لما ببقى واقفة وإلاقى حد لا يعرفنى ولا أعرفة 
ورايح يشترى الكتاب
أو حد أشترى الكتاب قبل كدة 
ولما يعرف إنه بتاعى يكلمنى عنة ويقولى إنه عجبهم اوى
وكنت مذهولة لما و إحنا كلنا واقفين
وفجأة لاقينا د.نبيل فاروق داخل الدار
بعد شوية التتنيح اللى تنحناهم
قدرنا نستوعب ونسلم علية ونتصور معاه
ونديلة نسخ من الكتب بتاعتنا كمان
وبعدها بيومين لما روحت حفلة د.أحمد خالد توفيق
وقدرت إديلة نسخة من كتابى
يعنى قابلت أهم كاتبين بالنسبالى اللى صنعوا طفولتى
وكدة تبقى لقاء ثلاثية العمالقة كَمِل بعد لقاء سوزان عليوان
ماعتقدش إنى ممكن أتمنى أى حاجة أكتر من كده
وإلا هابقى طماعة أوى     




فرحتى دى كلها بقى كانت أضعاف 
 يوم حفلة توقيع كتابى وكتاب صندوق ورق
بداية من اول اليوم لما روحت وقابلت أختى والمصايب ولاد خالى
اللى خلونى مش عارفة أبطل ضحك طول اليوم
ولما بدأت حفلة صندوق ورق وشوفت الناس اللى كنت مبسوطة اوى ان الكتاب بيجمعنى بيهم من غير حتى ما اشوفهم 
زى رحاب صالح ونهى الماجد ورامى يوسف وشروق الهامى ورضوى أشرف وخالد ناجى صاحب صندوقنا الجميل
واللى بحبهم ولما بشوفهم بحس أنى مبسوطة جدا
شيرين سامى وباسنت خطاب وغادة محسن
والجميلة رباب اللى شاركتنا فرحتنا هى ورضوى طارق ورانيا محسن
خايفة أكون نسيت حد
وأصحابى وأصحاب محمد اللى كانوا موجودين من محافظات تانية عشان الحفلة
زى عمرو وتيد ونورا ومصطفى كردى ومحمد حزين
وأصحابى اللى ماينفعش فرحتى تكمل إلا بيهم
ندى وداليا وأحمد لطفى
وبنت خالى ومامتى حبيبتى لما جت 
واللى كل ما أعرف حد عليها بيتنح شوية ويقولى
هى دى مامتك بجد؟ وكالعادة ماحدش بيصدق بردو




أجمل مفاجأه بالنسبالى لما لاقيت محمد جة ومعاه بوكية ورد كبير
وأنا كالعادة المفاجأه بتخلينى أتنح أو أضحك
ووقتها أنا عملت الأتنين وبقيت واقفة بالبوكية مش عارفة أروح فين



 لما حفلة كتابى بدأت كنت خايفة لانى كنت لوحدى 
وللأسف الكاتبة سماح المزين مش جت
ولأنى عرفت إن النسخ اللى فاضلة من كتابى 25 تقريباً
  لأن باقى اللى كان موجود إتباع الحمدلله
بس الموضوع اتغير خالص اول ما الحفلة بدأت 
وماما كانت واقفة جنبى وأختى وكل أصحابى
ولما فجأه لأقيت زحمة لدرجة أنى مش عارفة أوقع لمين
وأنا أصلاً فى الزحمة بتوتر وبتخض ومش بعرف أتصرف ^_^

ولما لأقيت ولد جاى يعرفنى بنفسه إنه متابعنى على الجودريدز والفيس 
وإنه جاب الكتاب وخلصة فى يوم عشان يجى الحفلة وعجبة أوى 
وكلمنى عن كذا قصة فية
ولما لاقيت بنوتة جميلة بعد ما وقعتلها 
كانت مهتمة أوى ازاى تتواصل معايا
ولما النسخ خلصت وكان فى بنت عايزة تاخد توقيعى 
فـ جابت صندوق ورق عشان أوقعلها عليه
ولما شوفت سارة حسين اللى أتبسطت جداً إنها قدرت تيجى اليوم ده
ولما القطة الجميلة ساليناز فضلت واقفة جنبى 
وأدتنى من الشيبسى بتاعها كمان ^^
وبعدين ضحكتها أصلاً بتخلينى اضحك واتصورت معاها كتيير
والحمدالله قدرت اجيب أ.إبراهيم رزق اتصور معاه
وشيرين سامى اللى بقولها إنى بحبك جدا 
وكتابك كان البذرة الأولى عشان أفكر فى كتابي أصلاً
ده بجد مش مجاملة




وأجمل حاجه لما كنت فى كل مرة أبص لـ محمد
والأقية بيضحكلى ويقولى أنا مبسوط بيكى أوى
بيتهيألى دى كانت أجمل فرحة بالنسبالى

ناس كتير أوى جت وأتبسطت جداً بوجودهم 
ولازم وحقهم أشكرهم جداً جداً
لأنهم كملوا فرحتى بيهم
وفى ناس مش جت وده زعلنى 
وزعلنى كمان إن فى ناس سألوا عن الكتاب وكان خلص
بس فى كل ثانية مش كان على لسانى غير الحمدلله
حسيت إن ربنا بيحبنى عشان خلانى أعيش يوم زى دة
وقبلة أسبوع أصلاً حلو

الحمدلله :)

26 comments

ابراهيم رزق said...

الف الف مبروك

كانت حغلة جميلة

و قلت لماما زيزى شوفى شبرا بتعمل ايه

سعدت جدا بلقائك

تحياتى

SHARKawi said...

الحمد لله .
يارب تكوني في سعادة دايما . ويكون النجاح طريقك

لكي تقديري وكامل احترامي . لكي تحياتي . تشكراتي

رحاب صالح said...

مبرووووووووك يا دندن
وانا قابلتك وحضنتك وبوستك كمان واتصورت معاكي وقلت لك ابعتيلي الصورة نسيتني ليييييييية ههههه
كمان كنت اشتريت كتابك قبل حفلة صندوق ورق كتابنا وجيت لك حفلته ووقعتيلي علي قصاصات انثوية وصندوق ورق
كلنا ملخبطين من الفرحة وربنا يزيد فرحتنا كمان وكمان
بحبك اوووي

أسماء فتحي said...

الف مبرررررررررررررررروك وان شاء الله من نجاح لنجاح

ربنا يفرحك دايما

تحياتي

Asmaa Fathy

Sara said...

عارفة لو كنتِ نسيتي اسمي كنت هعمل فيكِ ايه :D ?!

ربنا يوفقك و يفرحك دايمـًا يا دندن

تستاهلي كل خير :*

بالتوفيق

yo ta said...

الف مبروك يا قمر
يارب تكونى سعيده كده علي طول
وتنجحى اكتر واكتر
فرحتك ظاهرة من كل كلمة قولتيها
واكيد انتى تستاهلي كل اللي انتى فيه
:h
مع تحياتى :
هـــيـــامـــ ســـالـــمـــ

reemaas said...

فرحنالك جدا جدا ونفسى الكتاب ينزل عندنا بقى

سواح في ملك اللــــــــــــــــــه- said...

الف مليون مبروك يادينا

faroukfahmy said...

تصويرك لحفل التوقيع رائع
حقيقة فات آل الفاروق الكثير ولكن الدنيا اعذار لانملك الا ان نقول لك جميعا الف مبروك

Bent Men ElZman Da !! said...

ابراهيم رزق

ايوة شبرا بتصنع المعجزات ههههههه
أنا اللى سعدت جداااا بوجود حضرتك وساليناز العسل دى
وسعيدة بجد إنى قابلتك
يارب مش تكون أخر مرة ^_^

Bent Men ElZman Da !! said...

SHARKawi

شكراً جدا على ذوقك
أتمنالك التوفيق أنت كمان
وأسعدتنى زيارتك يارب مش تكون الأخيرة :)

Bent Men ElZman Da !! said...

re7ab.sale7

مبسوطة اوووووووووى أنى قابلتك يا رحاب واتصورت معاكِ بس مش وقعتِ ليا على صندوق ورق :(
رغم أنك مسكتِ الكتاب وكنتِ بتوقعِ بس مش عارفة حصل اية ههههههههههههه

ياااارب نعرض نتقابل قريب تانى بقى ^_^
وربنا يفرحنا أكتر يااارب وأنا كمان بحبك على فكرة بقى <3

Bent Men ElZman Da !! said...

asmaa fathy

الله يبارك فيكِ يا جميلة ويفرح قلبك يارب
ربنا يخليكِ
ونورتينى بوجودك :)))

Bent Men ElZman Da !! said...

Sara

ده انا لو نسيت أسمك كنت هازعل من نفسى أوى وأعمل انا حاجات كتير هههههههه
ربنا يخليكِ يا حبيبتى ويفرح قلبك يارب أنتِ كمان :*

رؤى عليوة said...

عسل يا دندون
جميل البوست
وانا كمان كنت فرحانه جدااا انى شفتك
الحمد لله رغم انى نزلت يوم واحد بس كويس انى اشوف عدد من اصدقاء اول مرة بقابلهم واعرفهم من غير ما حد يقولى هو مين


يارب عقبال كتب كتير تجمعنا على خير

دمت بخير

Bent Men ElZman Da !! said...

hayam hakam

الله يبارك فيكِ يا جميلة أنتِ
ربنا يسعدك يارب ويفرح قلبك
ربنا يخليكِ
مبسوطة أوى بزيارتك لمدونتى ويارب مش تكون الأخيرة
نورتينى ^_^

Bent Men ElZman Da !! said...

reemaas

ربنا يخليكِ ليا يا حبيبتى
أنا اللى نفسى يبقى عندكم عشان تقرأية و أعرف رأيك بقى ^_^
إن شاء الله هيكون فى محافظات كتير على شهر مارس كده

Bent Men ElZman Da !! said...

سواح في ملك اللــــــــــــــــــه-

خالد الله يبارك فيك
بجد زعلت أنك مش كنت موجود
بس إن شاء الله تتعوض :)

Bent Men ElZman Da !! said...

faroukfahmy58

أنا اللى حقيقى فاتنى كتييييير بعد وجودكم
وفقدت شرف أنى اشوف حضرتك
يارب تكون بخير
ونعوضها قريب إن شاء الله :))

Bent Men ElZman Da !! said...

رؤى عليوة

حبيبتى
أنا كنت مبسوطة جداااا أنى شوفتك لأنى فعلاً كنت نفسى أشوفك أوى من اول ما اتعرفت عليكِ
وعقبال مقابلات جاية كتيييير على خير إن شاء الله ^_^

maioya said...

لسه بتكلم مع احمد عليكي
انا فرحنالك جدا يادودو من قلبي
:)

Bent Men ElZman Da !! said...

maioya

ربنا يخليكِ ليا يا ميويا <3
أنتِ قلبك جميل أوى زيك أصلاً ^_^

Unknown said...

دينا :)
أخيراً
قريتها من إمبارح و كل ما أدخل عشان أعلق النت يتوقف عن العمل :(
يا دينا عايزه أقولك إني بحس بجد إنك أختي الصغيره قريبه للقلب إنتي :) أنا كنت سعيييييده بيكي و بحفلة التوقيع المميزه بالورد و الحُب ربنا يديمه عليكي يا حبيبتي من كل الناس.
و كل ما بتقولي إني كنت أحد أسباب تشجيعك على النشر بكون مبسوطه بشكل :) لأني بتمنى فعلاً إن كل الناس تحاول و تعافر مع أحلامها مابلالك الناس اللي بحبهم :)
ربنا يكرمك يا رب و تكوني سعيده و ناجحه دائماً
بحبك يا دندونه

شمس النهار said...

يارب دايما من نجاح لنجاح

ومانكسلش بقا ونعمل كتاب تاني وتالت ورابع :))

Bent Men ElZman Da !! said...

شيرين سامى

النت ده وحش اوى بيعمل فينا حركات مش ولابد :(

انا اللى كنت سعيدة أنك موجودة
حفلة التوقيع مش كنت هاحس بيها إلا واأنتِ معايا
ولا هتنازل عن فكرة أننا نعمل حفلة توقيع مع بعض ^_^
ربنا يخليكِ ليا ياااارب وتبقى سبب تشجيعي كده على طووووول
أنا بحبك أكتر بقى على فكرة :))))

Bent Men ElZman Da !! said...

شمس النهار

ربنا يخلي حضرتك ياااارب
كنت أتمنى وجودك :)

إن شاء الله مفيش كسل طول ما أنتم بتشجعونى كده :)))

:a: :b: :c: :d: :e: :f: :g: :h: :i: :j: :k: :l: :m: :n:

Post a Comment