25 March 2013

كلام والسلام .. كلاكيت 25 مرة

.




من ساعه ما اتجوزت مش بكتب كتير
مش قادر أتاقلم على جو الكتابة فى بيتى 
مع أنه أهدى بكتير ويساعد فعلا على الكتابة
بس لما يروح عند ماما أو بكون فى المواصلات بتبدأ الأفكار تجيلى
بقالى فتره بتدور على السبب اللى بيخلينى مش عارفه اكتب 
بس مش لاقيه غير ده !

*****

أنا بعمل حركة رخمة أوى لما بقرأ كتاب
لازم كل ما اجى عند أخر صفحة من القصه و ألا الرواية 
عينى تجرى على أخر سطر فيها بدون إرادة
وأوقات كل فكرة القصه بتبقى فى أخر كلمتين دول
بحس أنى بحرق على نفسى جزء مهم من القصه
بس فعلا عينى مش بتقدر تقاوم

 
***** 
 
كنت مبسوطة جدا يوم لقاء القناه التانية
لأنى قبل ما أظهر كانوا بيعرضوا اغنيه نص الدنيا لأنغام
ودى الأغنية الوحيدة اللى أنا حاسه أنها بتعبر عن كتابى جداً

*****

المفروض أنى كنت مشتركة فى مسابقه فى مكتبة إسكندرية 
بقصه قصيرة جداً من الكتاب
والحمدالله كسبت ورايحة بكرة إسكندرية أكتر مكان بحبه 
عشان أستلم الجايزة
فى جوايا حته مبسوطة أوى بالمسابقة دى 
لأنها معنوية بالنسبة ليا أكتر من إنها مادية
حاسة إنها رسالة مرافقه لأراء الناس فى الكتاب اللى بتقولى الكتاب فية حاجات جميلة ويستحق أنه يبقى موجود

*****
 
 كل رسالة جاتلى أو كومنت أو صورة من أصحابى 
عشان يطمنوا عليا ويقولولى ماتزعليش
أحب أقولكم كلامكم ووجودكم فرق معايا أوى على فكرة
 بحب وجودكم معايا دايماً
 
*****

فى الأسبوع اللى أعرف فية إنى كسبت فى مسابقة إسكندرية 
وأبقى طايرة من الفرحة
هو بردو نفس الأسبوع اللى أخسر فيه أهم حاجه أى أنثى بتتمناها
مانكرش أنى فقدت أملى للحظات وحسيت بيأس مش طبيعى وصعب يتوصف
بس قدرت بردو أقول الحمدالله اللى بقيت حاسه إنها الكلمة اللى مش بقت تفارقنى أبداً الفترة دى من حياتى
إنما البكاء ده حاجه مش بأيدى
أنا خسرت حته منى...من حقى أزعل !!


26 comments

Nelly Aly said...

أهو كل الكلام اللي أنتي كاتبه مكمل لبعضه..ربنا يخد حاجة ويديكي حاجات اجمل..حتي الحاجة دي اللي اتخدت تأكدي أنه مش خير ليكي..

وربنا يعوضك بأحلي وأحلي وأحلي الحاجات اللي بتتمنيه واللي عمري ماخطرتلك ع بال اللي لو حصلت تفرحك اكتر واكتر:)

m.hallawa said...

مساء اخفير دينا

أولا: مبروك علي الزواج الف مبروك بالتوفيق أن شاء الله
ثانيا: الكتابة أو التدوين أصبح جزء من حيتنا وبقيتا زي السمك ميقدرش يعيش خارج المياة

ونحن أيضا من غير كتابة مش هنقدر نعيش صح
تحياتي وأحترامي

شمس النهار said...

موضوع الكتابه في بيتك ده عادي خالص
انا ماكنتش بنام الالمااروح بيت بابااول ماادخل من الباب الاقي نفسي رايحه في عاشر نومه
وكانوايتريقوا عليا (ماعندكوش سراير)
والف مبروك علي الجايزة
وربنا يعوض عليكي في اللي راح وعلي فكره ده عادي خالص في الاول علشان بيبقا شئ جديد ان شاء الله المره الجايه هتخدي بالك ومش هيحصل حاجه
ربنا يوفقك ويكرمك ويعوضك خير

مصطفى سيف الدين said...

الف مبروك الجايزة
و على فكرة انتي مخسرتيش احلى حاجة الست بتفقدها لأن ربنا هيعوضك ان شاء الله خير

asmaa fathy said...

اولا احساسك بانك مش عارفه تكتبي حاجه بعد الجواز
انا كنت كده سيبت مدونتى الاولى واقعدت اكتر من سنة ونص بعد الجواز ممسكتش قلم ولا فتحت المدونة لحد مانسيت الباس وورد بتاعها والميل بتاعها اتسرق وجات واحده صحبتى عملتلي التانيه وفضلت تزن علشان ارجع اكتب

بالنسبة للجايزة الف مبروك ويارب دايما من نجاح لنجاح

بالنسبه للحته اللي فقدتيها فمعلش ربنا ان شاء الله هيعوض عليكي
وهتفرحي وتيجي تفرحينا معاكي

تحيـــــــــــــــــــــــاتي
كانت هنا ورحلت
Asmaa Fathy

افكار مبعثرة said...

ومن حقك تزعلي و تعيطي بس هتلاقي ربنا رحيم اوي و حنين و بيعوض في حاجات تانية كتير و هيرزقك بالفرحة اللي بتتمنيها وزيادة :)
تحياتي

faroukfahmy58 said...

مبروك خالص على الزواج
ثانيا مبروك على فوزك فى المسابقه
اللهم اجعله خير كنت اسمع من المرحومه والدتى انها تقلق من الفرح لان بعد الفرح حزن وتفرح بالحزن لان الفرح يليه
لا الحزن دائم ولا الفرح مقيم

ابراهيم رزق said...

الف الف مبروك على فوز قصتك

معلش بكره الايام قدامنا كتير و احنا لسه فى الاول و بكره ربنا يعوضك و تلاقى بيتك مليان بالعيال لحد متزهقى و تقولى انا اللى جبت ده كله لنفسى

و ارجع و اقول لسه الطيور بتفن
والنحليات بتطن
والطفل ضحكه يرن مع ان مش كل البشر فرحانين

تحياتى

eng_semsem said...

الف مبروك على الجايزه وربنا يعوضك كل خير
وربنا يملى حياتك سعاده
تحياتي

Anonymous said...

حبيبتي يادودو
وحشاني جدا والله
ربنا يعوضك خير عن خسارتك ياحبيبتي
ويرزقك دايما الاحسن اللهم امين
وكله خير ان شاءالله ومبروك علي الجايزه
وان شاءالله ربنا يكرمك بالحلو دايما :*

mai :)

Deyaa Ezzat said...

ألف مبروك المسابقة يا دينا.. وربنا يعوض عليكي في اللي ضاع منك بأحسن منه

كتاب متأكد إنه هيبقى جميل جدا ولما أروح القاهرة هاجيبه إن شاء الله

بالتوفيق دايما

Bent Men ElZman Da !! said...

Nelly Aly

ما هى حياتنا أصلاً مكملة لبعضها
لما بنحزن بنتأكد إن ربنا بعدها كاتبلنا حاجة تفرحنا
تسلميلى يا نينو :)

Bent Men ElZman Da !! said...

m.hallawa

الله يبارك فى حضرتك
شكراً جداً
أكيد إحنا الوقت اللى بنتنفس فية بجد وقت ما بنكتب :)

Bent Men ElZman Da !! said...

شمس النهار

يعنى أطمن إنى بعد كده هاعرف أكتب فى البيت أصل دى بقت مشكلة أوى بالنسبالى

ربنا يخليكى يارب على كلامك اللى يطمن القلب يا شمس القلوب

تسلميلى يارب :)

Bent Men ElZman Da !! said...

مصطفى سيف الدين

الله يبارك فيك يا مصطفى
أكيد أنا ماخسرتش لأن ربنا معاكى فى جميع الأحوال :)
شكراً ليك جداً

Bent Men ElZman Da !! said...

asmaa fathy

ده شكل الموضوع ده حالة عامة بقى مش أنا لوحدى

الله يبارك فيكى يا جميلة تسلميلى
وربنا يعوضنا كلنا خير عن إى حاجه فقدناها

نورتينى يا جميلة :)

Bent Men ElZman Da !! said...

افكار مبعثرة

هو ده بالظبط الكلام اللى جوايا دلوقتى
ميرسى ليكى أوى يا جميلة
أسعدتينى بوجودك :)))

نهر الحب said...

اولا وحشاني اوي وانا بقالي كتير مجتش هنا غصب عني

ولا كتبت ولا قريت برضه بقالي كتير

........
زعلانة انك جيتي اسكندرية ومشوفتكيش بصيت علي تاريخ البسوت لقيته بعيد
معلش ان شاء الله تتعوض

ممممممممممم
وربنا يعوضك عن اللي فقدتيه بالاحسن محدش يعرف الخير فين بس ليكي حق تزعلي
ربنا يصبرك
:)

سندباد said...

اولا مبروك علي الجواز ثانيا اسف علي عدم المتابعة ثالثا الكلام ياتي ولا يؤتي يعني الكلام هو اللي هايجلينا لما يحس انه عايزنا نكتب
تحياتي وتقبلي مروري

Bent Men ElZman Da !! said...

faroukfahmy58

الله يبارك فى عمرك ياااارب
أكيد دوام الحال من المحال
ربنا لما بيجبلنا حزن أكيد بعدها بيعوضنا
الحمدالله طبعا :)
سعيدة جداً بوجود حضرتك :))

Bent Men ElZman Da !! said...

ابراهيم رزق

الخال العزيز اللى كلامة بيطيب القلب :)
ربنا يبارك فى عمرك آمين
تسلم ياااارب :)))

Bent Men ElZman Da !! said...

eng_semsem

الله يبارك فيك
ميرسى كتييير على ذوقك
نورتنى بوجودك :))

Bent Men ElZman Da !! said...

mai

انتى فيييييييييييين
حبيبتى وحشانى كتيييييير وقلقانة عليكى اوى اوى
يارب تكونى بخير طمنينى عليكى لو دخلتى تانى بليز

تسلميلى وربنا يخليكى ليا ويبارك فيكى ياااارب :*

Bent Men ElZman Da !! said...

Deyaa Ezzat

الله يبارك فيك يا ضياء
ربنا يخليك وانا مستنية رأيك فى الكتاب طبعا :)))

Bent Men ElZman Da !! said...

نهر الحب

حبيبتى انتى كان وحشانى جدااا
معلش انا بردو مش بدخل بلوج ولا بكتب ولا بتابع بقالى فترة
مش عارفة حصلنا اية :((

بالنسبة لسفرية إسكندرية حقيقى أنا مش حسيت بيها اصلاً
روحت على الحفلة بتاعه المسابقة استلمت الجايزة ومشيت
حسيت إنى روحت الشارع اللى ورانا مش إسكندرية خالص :(

إن شاء الله نعوضها قريب

تسلميلى يا حبيبتى ربنا يخليكى :*

Bent Men ElZman Da !! said...

سندباد

الله يبارك فيك يارب :)
ولا يهمك كلنا مش بقينا نتابع للأسف مش عارفة لية !

ما هو المشكلة إن لما الواحد بيقعد وقت مش يكتب بيحس إن فى حاجة نقصاه
اصل الكتابة دى فضفضة قبل أى حاجة :)

سعيدة بوجودك :)

:a: :b: :c: :d: :e: :f: :g: :h: :i: :j: :k: :l: :m: :n:

Post a Comment

 

FaceBook Comments

wibiya widget