19 September 2013

عنك ♥

.



التدوينة دي كانت المفروض اكتبها من أول الأسبوع ده تحديداً
لأنه بيتكلم عن الشخصيات اللي أثرت في حياتي
وأنت من أهم الشخصيات اللي أثرت وشقلبت حياتي للأحسن
 الكلام ده مش من اول ما حبينا بعض ولا لما اتخطبنا ولا لما اتجوزنا
ده من زمااان اوي



فاكره أول مرة كلمتك خالص
لما كان بيجمعنا منتدي واحد واللي عن طريقه عرفتك
كنت بتكلمني عشان تقولي إني هاكون مشرفه علي قسم في المنتدي ده
و لما أختارت قسم صغير وشغله بسيط
قولتلي لا إنتِ شغلك أحسن من كده بكتير
و أختارت أنت قسم تاني أكبر وشغلة أكتر و أنا وافقت من غير ما اقولك حاجة
وبعدها القسم ده بقي من أهم و أكبر الأقسام في المنتدي 
وللأخر فضل الوحيد تقريباً اللي شغال
وانا كنت بحبه حب مش طبيعي 
وكأنه القوقعة بتاعتي اللي لما بدخل علي النت بفضل قاعدة فيها ومستمتعه
ده كان تأثير مهم أوي عندي كان خلي شكل حياتي وقتها ممتع أكتر
بس ماكنتش مركزة إنك سبب في التأثير ده

فاكره لما كلمتك بعد كده
وأكتشفنا إننا في كلية واحدة وفي نفس السنة
وأنت طلبت مني أجي أحضر دروس معاك لأنها هتفيدني
رغم إني وقتها ماكنتش مقتنعه خالص بحكاية الدروس في الكلية
بس قولت لما أجرب
وبيتهيألي الدروس دي كانت من أهم الأسباب 
اللي خلتني أعدي سنين الكلية اللي كانت باقية
و بردو وقتها ماكنتش لسة مستوعبة إنك بتأثر في حياتي

فاكره لما قابلتك أنا وولاد خالتي
و طلبت بنت خالتي منك تذكرة مترو 
عشان لما ترجع بلدها تفتكر أي حاجة في مصر
و انت فعلاً جبتلها واحدة وكتبتلها عليها كمان
وقتها عرفت إنك مش بتأثر فيا أنا بس 
لكن كمان بتأثر في اللي حواليا

فاكره لما بدأت مكالماتك وسؤالك عليا في التليفون يزيد
وقتها كنت بتأثر في يومي وشكل حياتي اللي بدأت تقلبها خالص
من هنا بدأت أخد بالي أنت اد اية بتأثر فيا

لما جيت واتقدمتلي و اتخطبنا و بدأنا نجهز شقتنا ولما اتجوزنا
كل دي كانت تأثيرات بتمر عليا لأول مرة
وبتحسسني بفرحة ماكنتش حسيتها ولا حتي فكرت فيها قبل كده

لما قولتلك عايزة أنزل كتاب وقولتلي طبعاً موافق وأنا معاكِ
من هنا بدأت تأثر في حلمي
وكل اللي عملته ليا بعد كده 
كان عشان تخليني أقدر أوصل لكل اللي بحلم بيه
وكأنك ماسك بوصلة احلامي وبتوجهها لمكانها الصح

ربنا كان كاتبلنا كل حاجة من غير ما ناخد بالنا إننا في الأخر لبعض

13 comments

reemaas said...

عارفة التدوينة خلت قلبى يزقزق كده .. انا عاوزة نم ده يا حزمبل

ربنا يسعدكم يارب

أسماء فتحي said...

الله ايه الجمال ده
ربنا يخليكم لبعض وتفضلوا تأثروا في بعض على طووووووووول بالسعادة والتفاهم
تدوينك جميلة ووصلت بسهولة وحسيت صدقها لانها طالعة من قلبك فكان لازم توصل لقلوبنا
دمتى بخير
تحياتي

Unknown said...

ربنا يخليكوا لبعض يا دينا
إنتي جميلة و تستاهلي كل خير
و كل سعادة :)
ربنا يحفظكم دايماً

الصدق يا دينا
الصدق هو اللي بيخلي الحب كده
:)

كريمة سندي said...

ألف مليون مبروك ما أحلى التعبير عن المشاعر الجياشة التي تنم عن قلوبا مفطورة على الفطرة

نيللي علي said...

ربنا يحفظكم لبعض يارب يادينا

ابراهيم رزق said...

ايه يا دينا ده انا جيت اعلق لقيت البوست اتشال
بتلاعبينا يا دينا

على العموم البوست ده ميتعلقش عليه غير بابتسامة كبيرة جدا
و تنهيدة كبيرة من البنانيت

ربنا يخليكوا لبعض

تحياتى

Bent Men ElZman Da !! said...

reemaas

يارب قلبك مزقطط علي طول ^^
ربنا يرزقك بأحسن من ده كمااان يا نور
ربنا يخليكِ يا حبيبتي :)

Bent Men ElZman Da !! said...

asmaa fathy

حبيبتي ربنا يخليكِ تسلمي <3

Bent Men ElZman Da !! said...

Shereen Samy

ربنا يخليكِ يا شيرين
إنتِ اللي عيونك جميلة <3
الصدق بيفرق في كل حاجة في حياتنا
بيخليها دايماً احلي :))

Bent Men ElZman Da !! said...

كريمة سندي

الله يبارك في حضرتك
ربنا يخليكِ يااارب :)

Bent Men ElZman Da !! said...

Nelly Aly

نينو ربنا يخليكِ ليا يااارب <3

Bent Men ElZman Da !! said...

ابراهيم رزق

الخااال بذات نفسه :D
لا البوست موجودة أهو مش شلت حاجة
أكيد المدونة راكبها جوست هههههه
ربنا يخليك يااارب ^_^

ياسمين خليفة said...

أنا اول مرة أدخل المدونة بتاعتك وعجبتني التدوينة جدا ربنا يخليكم لبعض

:a: :b: :c: :d: :e: :f: :g: :h: :i: :j: :k: :l: :m: :n:

Post a Comment