29 September 2013

كتاب "كلام والسلام" .. كلاكيت كل مرة

.


 
أول مرة نزلت كلام والسلام كان شخصي اوي
بتكلم عن مواقف من حياتي وبس
لكن مع الوقت كلام والسلام بالنسبة ليا بقي مختلف تماماً
بقيت بتكلم عن أحاسيس كتير بتمر جوايا في مواقف بعينها
بقيت بشوف احساس ناس كتير مش بعرف اطلعه غير في كلام والسلام
وممكن و أنا قاعدة في وسط ناس كتييير وحصل موقف يخلق ف دماغي فكرة لكلام والسلام
بتناسي اللي حواليا ولازم أكتب الجُملة اللي جت في دماغي
واللي فاجئني إني مع كل تدوينة لكلام والسلام
كنت بلاقيكم بتقولولي إن نفس الكلام حصل معاكم أو مريتوا بالأحساس ده مثلاً
أو إن ده الطبيعي واللي كلنا واجب نحسه علي مدار حياتنا أصلاً

جه في دماغي ..ليه مش أجمع كلام والسلام في كتاب ؟
وخصوصاً بعد ما لاقيت ناس كتير بتاخده علي الفيس من غير اسم
وفي نفس الوقت اللي كنت بفكر فيه
لاقيت كومنت من رنا "مش ناوية تنزلي كلام والسلام في كتاب"
قولتلها وكأنك بتفكري نفس تفكيري :)
وكمان بعدها الاقي بنوته بعتالي إنها مهتمة جداً بكلام والسلام تحديداً
ونفسها أكتب عن احساسها في تدوينة منهم
ومن وقتها و أنا الموضوع في دماغي
بس لما فكرت لاقيت إن ماينفعش الكتاب يكون ورقي
لأنه أولاً بالعامية و أنا ماعنديش أستعداد أطبع كتاب بالعامية
وثانياً لأن حجمة صغير 
و أقرب للقلب من إنه يكون مطبوع وبعيد عن أي حد يحب يقرأه
فـ كان القرار إنه ينزل إلكتروني
 

كنت كسولة شوية عقبال ما خلصته
و تعب محمد معايا و زنه عليا إنه أعمله
وتعب الصديق مصطفي الكردي 
اللي ساعدني في إن الكتاب يكون بالشكل ده :)
و أول حاجة بقي تشجيعكم إنتم وتعليقاتك علي تدوينة كلام والسلام تحديداً
و مانساش نور لما كانت بتقولي أنا بستني التدوينة دي بالذات
بشكركم علي دعمكم ليا 
اللي في أحيان كتير بتعملوه من غير ما تحسوا :)
وشكراً لـ أي شخص قابلته وكان بينا موقف خلق جوايا فكرة كتبتها في كلام والسلام

اتمني تقرأوا الكتاب وأعرف رأيكم فيه
لأن رأيكم دايماً بيهمني :)


تقدروا تحملوا الكتاب من هنا



8 comments

ابراهيم رزق said...

مبرووووووووووووووووك

و عقبال الكتاب القادم

Unknown said...

مبروووووك فكرة هايلة :)
أكيد هنقراه طبعاَ
معلش أنا مبدخلش الفيس بوك كتير
بس هدور على اللينك و أحمله و أقولك رأيي
على فكرة بدأت أقرى كتابك
معلش متأخر
بس الدنيا كانت ملخبطه جداً

بالتوفيق دايماً يا دندونة :)

Bent Men ElZman Da !! said...

إبراهيم رزق

الله يبارك فيك ويخليك ياااارب ^_^

Bent Men ElZman Da !! said...

shereen samy

الله يبارك فيكِ يا شيرين :)
ولا يهمك و ربنا معاكِ :) و أنا حاطة اللينك الكتاب في أخر التدوينة لو تحبِ تنزلية
وهستني رأيك في قصاصات أنثوية بما إنك ملهمة الكتاب ده اصلًا ^_^

تسلميلي يا أجمل شيرين :)

reemaas said...

واااااااااااااااااااااااااو احلى مفجأة والله واضمنلك انه هيكسر الدنيا :)

الف الف مبروك عقبالى انا كمان

اكيد هجيبه واديكى راى اللى انتى عارفاه مقدما

انا اسمى مكتووووووووووووووووووووب

Bent Men ElZman Da !! said...

نووور

الله يبارك فيكِ يا جميلة ربنا يخليكِ
إنتِ من الناس اللي كان تعليقها فعلاً علي التدوينة دي بيفرق معايا :)
هستني تحمليه وتقوليلي رأيك أكييييييد .. وأتمني يعجبك ^_^

سواح في ملك اللــــــــــــــــــه- said...

مبروك يادينا

فكلامك ايتها الاخت الراقية ليس ككل الكلام فهو مدونة جميلة تحمل ابداع

كاتبة راقية

تحيتي

Bent Men ElZman Da !! said...

خالد

الله يبارك فيك يا خالد ربنا يخليك ميرسي علي ذوقك و كلامك :)

:a: :b: :c: :d: :e: :f: :g: :h: :i: :j: :k: :l: :m: :n:

Post a Comment