04 December 2014

رسالة إليه..♥

.
4 التعليقات


حاجات كتير هاكتبها كانت المفروض تتكتب من فترة وكانت لازم تتكتب قبل السنادي ماتخلص
وأخيرًا لاقيت فرصة بعد ما نيمتك إني أكتب :)

من اول ما عرفت إنك موجود وأنا كنت كل مرة المفروض أشوف فيها ملامحك اللي مابين الأبيض والأسود والرمادي
بكون مرعوبة وخايفة تكون زي اخواتك قبل كدة وتمشي وتسبني بردو فاضية منك
كل زيارة كنت بعيط وبخاف وبدعي كتيييير إنك تكون لسه موجود
كل زيارة كان بابا بيحاول يطمني وبيحاول يهيأني نفسيًا إنه حتي لو أنت روحت فـ ربنا هو اللي عايز كدة
بس مع كل مرة كنت بتكون موجود وبتقولي إطمني أنا هنا مش همشي تاني خلاص
ودي أصلًا كانت حاجة بتخالف توقعاتي وبتفاجئني وبتفاجئ الدكتورة معانا لأنها أصلًا مش مصدقة لحد دلوقتي أنت أستمريت وجيت إزاي غير إن ربنا كان كاتبلك الوقت ده تحديدًَا



كنت واحشني جدًا ونفسي أشوفك حتي من قبل ما تيجي 
وأعتقد ده اللي كان بيخليني أنا الوحيدة اللي أفهم لوغاريتمات السونار اللي مش مبينه منك حاجة وأقدر أشوف رأسك ورجلك وجسمك وقلبك الصغنن اللي بيدق ووشك اللي دايمًا كنت مخبيه وكأنك عايز تخلي حضورك مفاجأة حتي اللحظة الأخيرة!
ومع ذلك أول ما جيت وأنا كنت مش فاهمة حاجة لسه من البنج إلا إن أول حاجة جت في بالي "هو ده اللي كان جوه؟!!!؟"

برغم كل الحاجات الغريبة اللي حصلتلي من بعد ماأنت جيت وتعبي اللي كان غريب جدااا وتعبك أنت
وضياع مني فرصة إنك تكون أقرب ليا عن كدة ونصيبك يكون ببرونة ممكن أى حد غيري يطوع يديهالك!!
وبرغم إن كل الحاجات اللي حصلت كانت بتخليني أتجه لأكتئاب ما بعد الحمل بخطوات ثابتة وده اللي كان بيخليني أعيط أوي وأتعصب علي أقل وأتفه حاجة وأكون خايفة عليك لدرجة مستفزة أحيانًا
إلا إن وجودك كان دايمًا بيقولي هو إنتِ إزاي تفكري تكتئبي أصلًا؟ 
إزاى ماتحمديش ربنا إن بعد التعب اللي فات والتعب الحالي هو بردو كويس ومش مشكلة تيجي فيكِ إنتِ

كل يوم كنت بتكبر شوية وملامحك بتبدأ توضح وتفاصيلك بتبقي مبهجة أكثر وكمان بتبدأ تضحك!
دى كلها حاجات بتصبر علي التعب اللي بيكون اوقات بس زيادة شوية

عيد ميلادي اللي كان من يومين.. فكرني جدًا بعيد ميلادي اللي فات في 2013
واللي كان بالظبط في نفس اليوم اللي أكتشفت إن حملي اللي فات مش هيكمل بردو ولازم ينزل!!
ولما بصيت علي عيد ميلادي السنادي.. لاقيتك جنبي وإحنا التلاته بنحتفل بيه
حسيت أد أيه ربنا كريم وكبير أوي
زي ما مرة زعلت زى ما المرة اللي بعدها ربنا كأفئني
وبالرغم من إن السنادي هديتي كانت كتابي الجديد اللي هينزل بعد كام شهر
بس بيتهيألي أنت أحلي هدية لينا السنادي أصلًا

كل سنة وعيدي بيحلي وإحنا التلاته مع بعض ♥

readmore »»

01 October 2014

سادية الحلم

.
2 التعليقات




من بين زوايا الحلم أقتحم خلوتي
يد تطرق بأرقام هاتفك فوق أزرار الذكري
فأستيقظ عازمة النية علي الأتصال بكل ما هو سواك
أحاول جاهدة تناسي رقم هاتفك فأنسي كل شيء ماعداه..
ليل يحمل ملامح وجعك.. يليه صباح مبهم الملامح.. فاقد لكل ما هو مبهج
حتي القهوة أعلنت أعتراضها وأصبحت برغم سكرها مرة المذاق.. جدًا
دون وعي أدركني المساء سريعًا ليوم عادي بلا روح.. ممل التفاصيل
ركضت نحو سريري ربما يتخلي الحلم عن ساديته 
ويمنحني شيء مبهج بعيدًا عن ملامح ذكراك المغلفة بالقسوة


مشاركة في حملة صورةٌ تَحكي

readmore »»

28 September 2014

تفاصيل

.
8 التعليقات




برغم كل الواقع وكل الآلم اللي مر
إلا إن تفاصيلك لسه ماتتصدقش
لسه نظرتي ليك فيها ذهول
تفاصيلك الصغيرة دي اللي بقعد كل يوم أحقق فيها كويس
وملامحك اللي لحد دلوقتي بنختلف أنت واخد ايه من كل واحد فينا
والحقايق الكتير اللي بتقولي لا صدقي الحلم بقي حقيقة
إلا إني بردو لسه بشوفك بنظرة الحلم اللي لسه حتي ماتحققش
لسة بشوفك بعيد رغم إني لمساك وحضناك
وصوتك بيخليني أضحك لأن حتي عياطك انا بستمتع بيه
أنت الحلم اللي مش عارفة أصدق إنه خلاص بقي حقيقة


وتُختصر احلامي في لحظة ميلادك
9/9/2014
10:55 am




مشاركة في حملة  صورةٌ تَحكي

readmore »»

08 September 2014

عد تنازلي...

.
8 التعليقات


لم أعرف بعد ذوقك في الألوان
ولكني سمحت لنفسي الآن أن أختار لك حقيبة ملابسك الأولي وما تحتويه

تُثير شغفي تلك الجوارب الصغيرة التي ستحتوي أقدامك الدافئة بعد بضع ساعات
ترتسم إبتسامتي كلما رأيت ملابسك الصغيرة التي تحتويها أصابع يدي الواحدة
تُثار ملامح أمومتي كلما شممتُ أغراض أستحمامك التي تفوح منها رائحة الطفولة والبراءة

بقدر ما أحاول سباق الساعات لرؤية ملامحك التي أشتقت لها منذ علمت بوجودك
بل أعتقد منذ خُلقت أنا
بقدر ما يتشبع الخوف من كياني ويأكل القلق قلبي


اللهم حسن خلقه وخُلقه
وسهل حمله ومخرجه
وأجعله قرة عين لي ولوالده


مشاركة في حملة صورةٌ تَحكي

readmore »»

07 September 2014

رسالة أمل

.
6 التعليقات




توقف فجأة الهواء المنبعث من المروحة المُسلطة علي وجهي
ففتحت عيني بالتزامن مع توقفها وأنا أردد مستغفرة
أستيقظ هو الأخر.. نظر إلي مبتسمًا وطبع قُبلة حنون فوق بطني المتكور
وأكمل نومه في براءة وكأنه خرج من حلم إلي حلم..

نهضت من سريري وأرتديت فستانًا مقلمًا بلونين
البرتقالي الذي يتوافق ولون الشمس التي يتسرب ضوئها الآن من بين زوايا النافذة
والأبيض الذي يشبه روح نقية تنمو بداخلي منذ شهور..

تمشيت مرهقة من الآم جسدي المتفرقة حتي وصلت إلي البلكونة
المكان الوحيد الذي يمنحني بعض الهواء في ظل موت المروحة الكهربائي
جلست شاردة.. أفكر في لا شيء وكل شيء
وضعت يدي فوق بطني المتضخم.. فشعرت بحركة قطعة منا تنمو بجوار نبضاتي
زادت حركته فأكتفيت بالمراقبة والأبتسام
وكأنه يحاول أن يوصل إليّ رسالة 
إنه جاء ليسلي روحي قبل أن يزرع الألم في جسدي
فتواصل إبتسامتي أتساعها فوق شفاهي وقلبي..



مشاركة في حملة صورةٌ تَحكي

readmore »»

09 August 2014

أفرح بضمير :)

.
4 التعليقات




مع كل فرحة جديدة بتعدي في حياتنا
وعلي أد ما الفرحة دي بتكون كافية إننا نكون مبسوطين جدًا
إلا إننا دايمًا بنكون عايزين نحس بفرحتنا دي وسط لمة وناس بنحبهم
والأهم يكونوا بيحبونا

الغريب واللي بقيت أخد بالي منه أوي
إن مطالب مننا نخبي فرحتنا دي عن اللي حوالينا
سواء بقي خوفًا من الغيرة أو الحسد
أو عشان اراعي مشاعر الناس لأي سبب من الأسباب
ساعتها وفجأة هتلاقي نفسك حاجات كتير حلوة بتمر عليك
ومش بتديها حق فرحتها الصح

مثلًا..
في عيد الأم مش مطلوب مننا إننا نجاهر بحبنا لأمهاتنا لأن في ناس محرومة من الأم
في عيد الحب مش المفروض إننا نجاهر بحبنا لأن ده مش من طبيعة مجتمعنا.. بعيدًا عن الحرام والحلال
لو نجحت ماينفعش تعمل هيصة وفرحة عشان المفروض تراعي ناس تانين ربنا مش كرمهم زيك
وينطبق علي ده أمثال كتيييييير
بس لو فكرنا كدة..
ليه أنا ماديش أمي حقها من الحب قبل لا قدر الله ما اتحرم منها زي غيري؟!!؟
وساعتها هقول يارتني مافكرت في أى حد وحسيت بوجود أمي معايا
ليه مافرحش بالحاجة اللي ربنا رزقني بيها أيًا كان أيه الحاجة دي
لان لما يعدي وقتها هاقول أنا ماحستش بفرحتها زي ما كنت متوقعة!
ولا أستغليت إن ربنا كرمني بفرحة عشان قلبي يضحك!

مش عيب إننا نعمل حساب لمشاعر الناس حوالينا
بس مش المفروض إن ده يجي علي حساب احساسنا إحنا بالفرحة

لما ربنا يبعتلك حاجة تفرحك..
وقتها أفرح بضمير ومن قلبك وأنسى أي حاجة تانية لان الفرحة قليلة

readmore »»

14 July 2014

تكمل لمتنا..

.
0 التعليقات


السنادي رمضان فيه حاجات كتير أوي ناقصة
وكأن كل سنة فيه حاجات بتختفي أكتر من الأول
ده بالنسبة للجو العام اللي كنا بنحسه زمان في رمضان

المسلسلات بقت بكمية مش طبيعية وبطريقة تخنق فعلًا
وكأن السنة كلها خلصت ومفيش فيها ألا الشهر ده عشان يعرضوا كل المسلسلات
اللي نصهم تقريبا مش بيتشاف والناس بتأجله لبعد رمضان بردو

الأعلانات سخيفة أكتر بكتير من أى سنة فاتت
حتي فكرة كوكاكولا من كتر ما كترت من كتر مابقت تخنق بالنسبة لي أكتر
أما بقي أعلان بيبسي..
فـ هنا لازم أعمل نقطة ومن أول السطر
لأن ده السبب اللي خلاني أكتب البوست ده أصلًا


السنة اللي فاتت مفيش حد شاف أعلان بيبسي ألا وحس بحاجة بتتخطف جواه
ولحظات خلت سنين من حياتنا تمر قدام عنينا
السنادي هما لعبوا علي نفس الوتر بما إنه نجح جدا قبل كده

الآعلان المرة دي مش بيكلمك بس عن ذكريات طفولتنا
اللي جيلنا كله مشترك فيها زي قبل كدة.. لا
دول لعبوا كمان علي حاجة مهمة أوووي
ذكرياتنا إحنا كأشخاص حتي لو هما مش يعرفوا أى حد فينا أصلًا
بس مين لما شاف الأعلان السنادي مافكرش في ذكريات كتير من حياته
وصور محتاج يعيدها تاني..
وأشخاص نفسنا نتصور معاهم تاني برغم رحيلهم لأي سبب كان
ودي كانت أكتر حاجة وجعتني في فكرة الأعلان كله
وبحاول حاليًا مش أتفرج عليه تاني لأني مش بفكر ألا في النقطة دي
أول ما شوفته مافتكرتش إلا صورة نفسي أكررها
صورة بتجمعني أنا وماما وبابا وأختي
بس أفتكرت إن بابا مش موجود! هو إزاي ممكن أنسى حاجة زي دي؟!؟
ومن وقتها وكل الصور اللي محتاجة أكررها أتلغت من دماغي
وكأني رفضت الفكرة خلاص

أنا عندي أرتباط بشع بالصور.. الصور بتخلق جوايا حياة
ولذلك جزء كبير من رمضان بالنسبة لي مابقاش موجود
لأن رمضان مش بيتلخص بس في أحساس..
ده بيتلخص في صور محتاجين نكررها عشان نحس بيه
وإحنا بطلنا نكررها من كتييير للأسف!!

readmore »»

28 June 2014

رمضان كريم :)

.
2 التعليقات




برغم إني مش عارفة أدخل بأستمرار هنا
بس ماكنش ينفع يجي رمضان من غير ما أقولكم كل سنة وأنتم طيبين
وربنا يتقبل منا صالح الأعمال اللهم آمين
رمضان كريم :)





readmore »»

19 May 2014

الرزق مش بس فلوس

.
4 التعليقات




الصورة دي وقفت قدامها شوية وفكرت في حاجات كتير أوي
وفي نفس اليوم جات لي رسالة علي الموبيل فيها نفس المعني بالظبط
وعشان كدة قررت أكتب عن الموضوع ده أول ما الوقت يسمح لي
 
في ناس أوقات بتبص لحياتها من جوه أوي ومن منظور واحد بس
ووقتها بيشوفوا كل حاجة سطحية
أية المشكلة إن أهلي موجودين طيب ما أنا ماليش أصحاب مثلًا
أية المشكلة إن عندي أصحاب ما أنا ماليش أخوات مثلًا 
وحاجات كتير تانية علي نفس الشكل ده
بس اللي تشوفه من جوه كده فكر تبص عليه من فوق بقي
وتشوف حياتك من بره عاملة إزاي
عندك أهلك دول كفاية لأن غيرك أتحرم من أهله بأي شكل من الأشكال
عندك أصحاب أحمد ربنا إن في لسه أصحاب يستاهلوا..غيرك مش عنده
عندك أخوات دول كفاية لأن غيرك نفسه في أخ أو أخت
ولو مش عندك أى حاجة من دول كمثال
دور هتلاقي ربنا شال رزقك من هنا وحطه هنا
أصل كل واحد بياخد رزقه 24 قيراط
متقسمين في مختلف مجالات حياتنا
ما بين أشخاص وفلوس ونجاح وشغل وحب ووووو
لو ربنا أداك في حاجة 2 قيراط هيديك في غيرها 10
الأنسان بس اللي عينيه دايمًا بتيجي علي الحاجات الناقصة
عشان غاوي يظهر نفسه محبط ومظلوم وماخدش حقة من الدنيا
رغم إننا عارفين إن ربنا ماخلقش حد عشان يتظلم.. لأن ربنا هو "العدل" 

بص علي رزقك اللي ربنا قسمه في كل حاجة ليك
 بص علي إن زي ما في أشخاص بيخلوا حياتك أسوء بأقصي ما عندهم
في أشخاص بيحاولوا علي أد ما يقدروا ينوروا حياتك 
ويرسموا الأبتسامة علي ملامحك
وزي ما مريت بلحظات حزن كتير بص شوية هتلاقي الفرح زيه أو أكتر
وزي ما خسرت شخص كسبت قصادة أشخاص كتير
وزي ما في وقت أفتكرت إن الحياة وقفت عند موقف معين 
أنت قدرت بعدها تعدي وتكون أحسن
وزي ما ربنا رزق غيرك بحاجات أنت بتبص لها 
ربنا بردو رزقك بحاجات غيرك بيبص عليها
أحمد ربنا علي رزقك وأكتفي بيه
حياتك كل لحظاتها رزق الحلو منها والوحش
لأن مش بس الفلوس هي اللي رزق


readmore »»

04 May 2014

عن وجع الفقد!!

.
4 التعليقات




في كل مرة بنفارق حد فيها بنضايق أوي وبنزعل
مش بس علي المرة دي من الفراق
لكن علي كل مرة قلبنا بيتوجع فيها لما حد بيخرج من حياتنا
خصوصًا لو كان خروجه ده بالموت مثلًا
لأن وقتها مش بنقدر نفتكر له إلا كل حاجة  كويسة حصلت
وساعتها مش بس بتتوجع عشان خاطر الشخص ده تحديدًا
لكن بتتوجع عشان أفتكرت تقريبًا كل الأشخاص اللي خسرتهم في حياتك
واللي وارد جدااا يكون الوقت والظروف وحتي أنت نفسك مش سمحتلك تودعهم.
وقتها غير إنك بتتوجع من الفراق
لكن كمان بتحس بالذنب
وبتفكر كتير.. ياتري ممكن حد يروح مني تاني من غير ما أقدر أودعه؟!
لو بكيت ساعتها مش بيكون عشان الموقف المحدد اللي أنت فيه
لكن عشان أحساسك إن وارد جدًا الزمن مش يسمحلك تودع ناس مهمة في حياتك
وفجاة تلاقيهم مابقوش موجودين
وقتها بس لا بكاك بيريح ولا وجعك بيروح!!


"العين أحيانًا بتتعود علي الفُراق.. وبالتالي بـ تبطل تبكي
لكن القلب لازم كل مرة فيه حته تتوجع
!"
-كلام والسلام-



readmore »»
 

FaceBook Comments

wibiya widget