28 November 2015

حفل توقيع (مشاهد خاصة)

.
2 التعليقات

ولأن مينفعش أفرح إلا وكل حاجة وحد هنا معايا
كان لازم أقولها وأعلن :D
عن حفل توقيع (مشاهد خاصة)
اللي هيكون يوم الخميس الجاي 3 ديسمبر
في مكتبة البلد بشارع محمد محمود
لكل اللي يعدي من هنا... أتمنى وجودكم والحفلة هتكون أحلى جدًا بيكم علي فكرة ♥



readmore »»

22 October 2015

مشاهد خاصة

.
2 التعليقات


لأن هنا كانت بداية كل حاجة حلوة
مهما الوقت والظروف بتاخدني عن بيتي الصغير ده
دايمًا برجع أكتب عن كل حاجة خصوصًا الحلوة هنا
لأني بحس إن مينفعش حاجة تعدي من غير ما تتوثق في أكتر مكان برتاح فيه

ولان بعد سنه من التعب وسنه بعدها من الأنتظار
ظهر كتابي التاني (مشاهد خاصة) للنور
الكتاب ده بالنسبالي مختلف عن الأول
الأول فرحته محفوظة ومش هتتكرر
لكن ده حاسة إني أنا نفسي فيه مختلفه بكتير عن الأول
الشيء المشترك إن لسه حته من روحي جواه زي القصاصات بالظبط
وده اللي بتمنى يكون الشيء المشترك في أى كتاب ليا إن شاء الله



مبسوطة وخايفة أكتر من الأول
وبستنى كل رأي في الكتاب علي نار
لكن مع كل لحظة بقول الحمدالله
يارب كمل دايمًا الفرح علي خير
ومتخلنيش أنسى أبدًا أحمدك في كل أوقاتي


readmore »»

12 September 2015

أول سنة ♥

.
2 التعليقات




سبتمبر بالنسبة لي كان شهر عادي جدًا فيه أعياد ميلاد كتير في العيلة لكنه بردو عادي
لكن أول ما أنت وصلت غيرت كل ده كعادة كل حاجة غيرت بوجودك تفاصيلها للأحسن

البوست ده كان المفروض يكون من 3 أيام
عشان كان المفروض هنا يكون أول مكان أقولك فيه كل سنة وأنت منور حياتنا ومخليها أجمل
كل سنة وأنت مالي علينا دنيتنا
لازم أقولك هنا عشان كل ما تكبر تدخل تشوف أنا كنت بكتبلك ايه وتفضل حاجة تفتكرني بيها

من وقت وجودك وأنا بقيت بحب الأطفال بزيادة وقلبي بيوجعني عليهم في أي موقف أوي

طب أنت عرفت منين إن طريقة التعبير عن الفرحة بالضحك كدة؟
طيب أنت عارف ضحكتك الحلوة دي بتعمل فينا أية؟
ضحكتك بتعوض عن أي حاجة تضايق أو حتي مجرد فكرة رخمة

عارفة إني بخاف عليك أحيانًا لدرجة رخمة بس مش عارفة أقلل من ده

شكل حياتي أتغير بسببك وبعترف إني بقيت اقصر في حاجات عشانك
 
نفسي لما تكبر تكون حنين زي ما أنت دلوقتي 
ويمكن ربنا يكرم وتتغير وتبقي هادي :D
بتمنى ربنا يجعلك بار بينا والحاجة الحلوة اللي تفضل مننا
 ونكون علي أد مسئولية تربيتك

سنة من السعادة بوجودك  ♥
ربنا يباركلنا فيك ♥

9\9\2014
9\9\2015

readmore »»

19 August 2015

هم ♥

.
0 التعليقات


يخبرني أن صوتي لم يعد واضحًا
روحي هادئة.. صامتة
حتي قلبي كف عن ترتيل كلمات العشق فيه

أخبره أن حواسي تستكين بوجوده وقلبي يستظل بروحه
فأشعر وكأن الكلمات مبتذلة في حضرته

♥♥♥♥♥

يخبرني في صمت أن ضحكته تسع الكون
أن حضنه بعرض وحنان السماء
أن قلبه بالرغم من صغره يُطمئن روحي


أخبره في ذات الصمت أن وجوده يكفيني لأتنفس.. وأعيش  


readmore »»

01 March 2015

وجع الفقد!

.
12 التعليقات




ترتد بداخلي أصوات أوجاع العالم مجتمعة
تحاول خَلايَاكم الأنسلاخ من جدران جسدي
يشتد الألم ولا تكفي الدموع
فتصرخ روحي في صمت وجعًا
يلفظ جسدي مرغمًا ماتبقي منكما بكل مكان حولي
وكأن لذكري وجودكما وجوب الأنتشار هنا وهناك
فتذرف عيني دمع أكبر بكثير من عمركما وبقاء روحكما داخلي
ولكنه لا يكفي آلم فراقكما..!


readmore »»

19 February 2015

عن أسباب الوجع!!

.
6 التعليقات


في دايمًا فترات في حياتي بتكون حلوة أوي
بس من عادتي إني بشوف اللي بعد الحلو ده أيه
ولأني عارفة إن كل فترة حلوة بيبقي بعدها فترة وحشة
زي ما بعد الوحش بيكون بردو في الحلو
الفترة اللي فاتت كانت حلوة بأيام معرض الكتاب اللي كنت مستمتعة بيها جدًا
وأصحابي اللي بشوفهم كل فين وفين والصور اللي جمعتنا
وخصوصًا نزول مازن معايا يوم المعرض وإستغرابه ونظرته بما إنها أول مرة ننزل لوحدنا وفي زحمة كدة

قبل المعرض أستقبلت خبر ماكنتش عارفة أفرح بيه وألا أخاف منه
عرفت إننا في إنتظار بيبي جديد يؤنس مازن ويرخم عليه شوية
كنت عايشة الفترة دي بفكر في حياتنا بعد كدة إحنا الأربعة 
فبالتالي كانت الفترة دي كلها بكل أحداثها بالنسبة ليا مهمة
وخصوصًا كمان وجود كتابي بطريقة برايل في المعرض وخبر جديد كمان عن كتابي هيظهر قريب إن شاء الله
وإن كتابي الجديد اللي بحضرله من سنة وشوية بدأ الشغل فيه للنشر


بعد كل الكلام ده كنت خايفة من الحاجة اللي دايمًا تيجي بعد الحلو ده كله وتضايقني
لكن المفاجأة إن ربنا زود فرحتي بإن البيبي كان توأم ودي حاجة كانت أبعد حتي مما أتخيل
تنحت.. عيطت.. فرحت.. وخوفت
كل حاجة ممكن الواحد يحس بيها أنا حسيتها
هو ربنا كريم أوي معايا كدة؟ يمكن بيعوضني عن المرتين اللي البيبي راح مني فيهم؟!
بس مع كلام إن ممكن يكون التوأم دول فيهم مشكلة رجع الخوف سيطر علي قلبي تاني
كل ده وأنا في جميع الأوقات مبتسمة وراضية وبكتفي جدًا بنظرة مازن وضحكتة علي أى حاجة تزعلني
لحد اليوم اللي عرفنا فيه إن التوأم اللي كنت فرحانة بيهم لازم أتخلي عنهم بكااامل إرادتي!
لأنهم كعادة الحالات النادرة اللي بعيشها في حياتي فـ هما كمان حالة نادرة لإنهم توأم ملتصق وقلبهم مشترك ومش هيعيشوا!
الكلمة دي تحديدًا لما سمعتها قلبي وجعني أوي.. وخوفت أوى أوى.. وحاولت بأقصي إحتمال عندي إن دموعي ماتنزلش
وفضلت أردد من جوايا الحمدالله عشان أهدى

مش عارفة كنت مستنية بعدها حد يواسيني والا حد يقولي إن في أمل إنهم يكونوا كويسين والا حد يقولي إن ده حلم
أنا مش عارفة كنت مستنية أيه بالظبط.. بس أنا كنت مستنية حاجة تمنعني أكتئب
أول ما دخلت البيت قابلنا مازن بضحكته اللي دايمًا بحس إن ربنا بيخليه يضحكها ليا لسبب
وبيتهيألي السبب وقتها إني أعرف إن هو عندي كفاية ويقويني علي اللي بمر بيه
كل ما كنت بحس إني هأكتئب أو أزعل كنت بلعب مع مازن وهو كان بيتلكك عشان يضحك لي أصلًا

كل الكلام ده عن كذا حاجة
عن إني المفروض حاليًا في إنتظار حجز المستشفي للتحضير لنزولهم
عن إني بحاول أتأخر عن الموقف ده عشان أفرح بوجودهم شوية كمان
عن إني بعد اول يوم من معرفتي بالخبر بدأت أحس بحركتهم جوايا وكأنهم بيزودوا عليا الوجع أكتر وأكتر
عن إني كل دموع بنزلها بتكون متحوشة من أول لحظة عرفت فيها الخبر ولكل الأسباب اللي جت بعدها
عن إني راضية ومش معترضة علي قضاء ربنا.. بس موجوعة!!
عن إني بحمد ربنا جدًا جدًا إنه كرمنا بمازن لأنه مهون عليا وبيخليني أتخطي الأنهيار اللي ممكن يحصلي
عن إني لو كنت بخاف علي مازن قبل كدة قيراط دلوقتي بخاف عليه 24
عن إن البوست ده فضفضة ومحاولة مستميتة للخروج من بداية طريق الأكتئاب 


readmore »»