25 February 2016

كلام والسلام.. كلاكيت من أول وجديد

.




بقالي كتير مبحاولش أكتب تفاصيل هنا
وكل ما أفتح بوست أفكر.. هو أنا هاكتب كل الرغي ده هنا ليه؟!
وأقفل وماكتبش
رغم إن ده تحديدًا اللي كنت بعمله زمان هنا! وكان الأساس لهنا أصلًا!
في دماغي من فترة إني أدخل أفضفض تاني
يمكن يبقي كلام والسلام من جديد.. يمكن تبقي عودة
يمكن تبقي راحة.. يمكن أي حاجة تخلي الواحد يكتب تاني

*****

اليومين دول بالظبط يبقى عدى سنة علي دفن ولادنا اللي مالحقناش نتهنى بيهم
هو أنا قولتلك إني لحد دلوقتي بفكر فيهم؟
طب قولتلك إن فكرة إنهم كانوا ممكن يبقوا بنتين بتغريني أوي لسة؟
طيب الأهم قولتلك إني لسة بحس بحركيتهم جوايا!
ولسة نفسي أشوفهم؟!! ولسة فاكرة ملامحهم اللي مش باينة وإحنا ماسكينهم في إيدينا!
أنا لسة حاسة بكل ده للأسف!!
بس مابحبش أقولك عشان عارفة إنك موجوع زيي بس بنقول الحمدالله

*****

متأكدة مليون في المية إن ولادنا لو كانوا لسة موجودين مع مازن اللي مجنني
أنا اساسي كنت هتنفي :D

*****

أنا عندي هوس بخط القلم اللي بكتب بيه
لما كنت بذاكر أو في الأمتحانات أو لما بكتب قصة أو لما بوقع على أي نسخة من كتبي
بدور على خط قلم ارتاح وأنا بكتب بيه
مواصفات بعينها بخط معين بضايق جدًا لو مالقتوش
ولو لاقيت اللي عايزاه بجيب منه كذا واحد واحتفظ بيهم
مش عارفة اية السر بس خط القلم بيفرق أوي معايا وبيغير مزاجي للأحسن وأنا بكتب بيه

*****

عندي حالة صمت عن الكتابة الفترة دي
كل قصة بكتبها مبكملهاش رغم إن النهاية بتكون واضحة في دماغي
بس الحروف بتهرب مني
زهقت من الحالة دي جدًا
ومش عارفة اتخلص منها إزاي

*****

معرض الكتاب السنادي كان مش قريب لقلبي زي كل السنين اللي فاتت
رغم إني كتابي الجديد موجود فيه وقابلت اصحابي الحلوين
وحضرت حفلات توقيع حلوة أوي
بس من جوايا كان في حاجة مش عجباني فيه وكنت بمشي كتير لوحدي هناك ومبدورش علي حد
ومجبتش كل الكتب اللي نفسي فيها
بس الأهم إني عرفت أن اولوياتي اتغيرت لما أول يوم نزلت وخلصت نص الفلوس في حاجات لمازن :D

*****

(مشاهد خاصة) بالنسبالي خطوة مهمة أوي وقريب لقلبي أوي أوي
ومع ذلك أنا مقصرة جدًاااااا معاه للأسف!!

0 comments

:a: :b: :c: :d: :e: :f: :g: :h: :i: :j: :k: :l: :m: :n:

Post a Comment