غابات الدَش الكتيره !!

بالرغم من ان احنا من الدول الناميه وبيقولوا علينا العالم التالت
وده معناه تاخرنا فى كل حاجه والأهم اقتصادياً
الا ان فعلا فى حاجات كتيره غير ضروريه يوم عن يوم بتزيد
وبتبقى من اساسيات حياتنا
واكتر حاجه لافته نظرى بقى حكايه الدَش دى

ممكن تلاقى بيت خلاص اصلا هيقع من كتر ما هو قديم
ساكنين فيه ناس بيقضوا يومهم بالعافيه
ومع ذلك تلاقى البيت ده فوقه يجى 10 اطباق دش
كل شقه فيها واحد ده على الاقل يعنى
زمان كان اللى عنده دَش ده يبقى غنى
انما دلوقتى ده ما بقاش مقياس خالص
لانه بقى من الكمليات اللى اصبحت ضروريات
ممكن حد يقولى ده اصلا الدَش والرسيفر بقت حاجات رخيصه 

والصين غرقت البلد بيهم
بس الفكره فى ان اولياتنا اصلا اختلفت
انا متاكده ان السبب فى كل كده
التلفزيون المصرى
اللى زَهق الناس منه وخلاهم يروحوا للتركى و توفيق عكاشه
على الاقل دول اهون شويه منه

readmore »»

تسييس الامتحانات !!

مين الفظيع اللى جاتله الفكره الجهنميه دى
مين اللى دخل الامتحانات فى السياسه او الاحداث اللى بتحصل
ماحدش اكيد يقدر ينكر ان الثوره وتوابعها

اُثرت ودخلت فى كل واقل حاجه بتحصل فى البلد
بس يعنى ايه طالب تطلب منه انه يكتب برقيه شكر للمجلس العسكرى؟!؟
لا والسؤال يبقى اجبارى

يعنى لا مفر !
وايه اللى دخل التعليم فى المجلس العسكرى
حسسونى بالظبط زى من سنه فاتت كده
كأنهم بيطلبوا من الطلبه يكتبوا كلمه شكر للرئيس (المخلوع) محمد حسنى مبارك

على جهوده المبذوله فى تطفيشنا قصدى فى قرفنا
يووووه قصدى فى اى نيله وخلاص
هو هو الاسلوب بالظبط مفيش اى فرق بين الاتنين
افرض فى طالب سيس و مش متابع اصلا المجلس العسكرى ده بتاع ايه
هيكتب شكر على اايه بقى؟
والا افرض انه كان طالب ناصح وفاهم وعارف اللى بيحصل 

وراح رازع فى وشك فى الورقه
يسقط يسقط حكم العسكر
هيبقى موقفكم ايه دلوقتى؟

لا بقى والا السؤال الخطير كمان
بتاع اكتب برقيه تهنئه لحزب الحريه والعداله بما انه الفائز الاول فى الانتخابات !!
ماتحبش الطالب كمان يبعت لرئيس الحزب بوكيه ورد عشان التهنئه تكمل؟!!؟
افرض بردو ان الطالب ده جاهل ومالوش فى السياسه والا الانتخابات خالص
ومايعرفش مين حزب الحريه والعداله دول اصلا
هيكتبلك ايه؟؟

الاهم من كل الهبل ده
هى الامتحانات دى بتتعمل ليه اصلا؟
عشان يحددوا مستوى الطالب 

وقدرته على استيعاب المواد الدراسيه المنصوص عليها فى الكتب المدرسيه 

المقرره من وزاره التربيه والتعليم
هو فى درس عن المجلس العسكرى وانجازاته نزل فى الكتب وانا ماعرفش؟
والا فى درس نزل عن حزب الحريه والعداله ونسبه نجاحه فى الانتخابات وانا ماعنديش علم؟
زى ما انت عايز من الطالب انه يكون حافظ الكتاب المدرسى صم
ماتجيش تجبله انت بقى حاجه من المجتمع اللى حواليه وتسأله فيها 

بحجه انك عايز توسع مداركه
لانك لو عايز توسع مداركه وتفهمه مجتمعه واللى بيحصل فيه اكتر
كنت بدأت من الاساس وعملت ده فى الكتب من الاول
لما الثوره تكتمل وينزل موضوع عنها فى كتب التاريخ
وقتها يبقى من حقكم تسألوا فيها زى ما تحبوا

اللى يشل بقى
ان مساعد وزير التربيه والتعليم
يقولك المُدرسه اللى حطت السؤال لم توفق 

ومش من المفروض انها تدخل السياسه فى الامتحانات
هو حضرتك ساعتها كنت نايم والا بتشتى فى اسوان مثلا؟؟

بيتهيألى كان فى سؤال مهم لازم يتحط
اختار مما يأتى
ايه اللى غيرته الثوره فى التعليم؟؟
1- مفيش
2- ولا حاجه
3- ماتغيرش
4- جميع ما سبق

readmore »»

مطلوب عروسه ... مطلوب عريس

فى ظاهره فى جتمعنا العربى كله
ظهرت بشده اوووى من كام سنه
مصر تقريبا من اول الدول اللى فيهم الظاهره دى
و فى جميع الدول العربيه
وهى مكاتب الزواج

فى سؤال دايماً وابداً فيه اختلافات على اجابته
وهو .. تتجوز عن حب والا جواز صالونات؟
ناس تقول لا الحب طبعاً
لازم يبقى حد اعرفه او انسانه بحبها
ومتفاهمين ونقدر نعيش فى سعاده مع بعض
وناس تقول جواز صالونات طبعاً
على الاقل يبقى حد محترم وداخل البيت من بابه
او تكون بنت محترمه ومؤدبه وقطه مغمضه

وكان ومايزال السؤال ده فيه اعتراضات اواتفاقات من ناس كتير
لاختلاف وجهات النظر ما بين اللى موافق على حاجه ومعترض ع التانيه
بس فى النهايه كله بيصب فى حاجه واحده
ان كل شاب او بنت عايزين نصهم التانى يبقوا واثقين فيه
ويقدروا يعيشوا حياه سعيده من غير اى مشاكل
يعنى كلهم بيدورو على حاجه واحده
باختلاف الاراء والاتجاهات

لما يظهر قدامهم فكره مكاتب الزواج ده بقى
الموضوع غريب جدا الحقيقه
وانا مش قادره استوعبه
طول ما احنا ماشيين بنلاقى اعلانات على الحيطه فى الشارع بكده
او حتى ورق بيتوزع بنفس الاعلانات

السؤال المهم
ايه اللى يخلى بنت يوصل بيها الحال انها تفكر تروح مكتب زى ده
معقول فى بنات ملهوفه على الجواز بالطريقه اللى توصلها لكده
طب ازاى فى بنت تأمن على نفسها انها تروح مكتب من دول؟
وايه اللى يضمنلها ان المكاتب دى تبقى محترمه زى ما بيقولوا
لو فى شاب فكر يروح مكتب من دول على امل انه يلاقى بنت يحبها
هو فعلا الشاب هيقتنع ببنت رايحه تدور على عريس فى مكتب زى ده؟
يعنى هو هيبقى واثق فيها؟

وبعدين ايه اللى يثبت اصلا ان المكاتب دى محترمه
فى نوع من المكاتب دى بياخد الشكل الاسلامى
اللى يكون الرجاله اللى فيه كلهم بدقن
والبنات محجبات ان ماكنوش منقبات
وده عشان يدى شكل من اشكال الطمأنينه للى رايحين المكتب ده
بس وارد ان ده بيكون مجرد ستار لحاجات كتير ورا كل ده

ايه فايده المكاتب دى وهو اصلا ماحدش سمع ابدا
عن اى اتنين اتجوزا عن طريق اى مكتب من المكاتب دى
ومفيش اى مكتب من دول بيتعامل بطريقه معلنه تماماً قدام كل الناس
كل اعلاناته بتبقى فى الخباثه كده على حيطه فى اى شارع
والا فى ورق بيتوزع
وبسهوله اوى اماكن المكاتب دى بتتغير

فى صحفى قبل كده فى اليوم السابع
عمل موضوع عن حكايه المكاتب دى لما لفت نظره اعلان من دول
ولما مشى ورا الموضوع هو وصحفيه تانيه
اكتشفوا ان الحكايه كلها نصب فى نصب رغم انهم مش كملوا للاخر
يعنى الموضوع فى الاخر بيصب فى اتجاهين
ياما نصب
ياما شئ معيب اخلاقياً
يعنى فى الاخر الولد والا البنت مش بيكسبوا حاجه
بالعكس هما اللى بيخسروا

اللى نفسى اعرفه
ليه مفيش رقابه على الموضوع ده؟
ليه اى مكتب بيعمل اعلانات زى دى
مش يتحقق معاهم ويشوفوا طبيعه عملهم ايه
وهل ياترى هما اصلا بيشتغلوا بتصريحات والا لا
ولو بتصريحات بتبقى التصريحات دى فى مجال ايه اصلا؟

readmore »»

شويه كلام

لما من فتره قريبه شوفت اعلانات وزاره الاسكان 

اللى بيقولوا فيها انهم هيبنوا وحدات سكنيه 

بمعدل 25000 وحده كل سنه
واللى يحب يقدم يبقى عن طريق البريد ويبعت جوابات لوزاره الاسكان
والجواب المسجل بعلم الوصول بيكون رسومه 7 جنيه
الكلام ده فكرنى بالظبط بعد الثوره لما كله قدم على طلبات شغل
عن طريق البريد بردو لوزاره الاسكان
والحمدالله ماحدش اشتغل لدلوقتى

البلد بتتغير
و الوزارات بتتغير
والسبعه جنيه زى ما هما
اكيد العيب فى السبعه جنيه على فكره !!

most shocking
ده برنامج بيجى على ام بى سى اكشن
بيجى فيه حوادث بتحصل فى امريكا من جميع الولايات
جابوا فى البرنامج ده
ان الامريكان هناك عملوا مظاهره ضد الحكومه 

عشان كانوا رافضين حاجه معينه
مش فاكره كانت ايه للاسف
بس اللى فاكراه اوى
منظر الشوارع وهى مولعه ومتكسره 

وكل المحلات فى الشارع ده والشوارع اللى جنبه متكسره
والناس متبهدله واللى واقع على الارض واللى مصاب
لما كل ده بيحصل عندهم
اومال مش بنشوفه ومش بيتكلموا عنه ليه؟؟
ولما احنا بيحصل ده عندنا فى مصر
بيبقى فضيحه وحاجه عمرها ما حصلت ليه يعنى ؟!؟

المنحوس منحوس ولوعلقوا فى انتخاباته فانوس :D
اشمعنا انتخابات الدايره بتاعتنا الوحيده من ضمن المرحله الاولى كلها
اللى تتلغى
ايه التفرقه العنصريه دى يا جدعان
هو انا اه مش محموقه عشان مرشح معين
كنت هاموت ويكسب يعنى
لانهم كلهم فى البطيخ اساسا
بس ليه الحظ المنيل ده
لا والحركه الاجمد بقى
ان فى الاعاده الناس تنزل عادى جدا 

والمدارس تبقى موت وبالطوابير وهى اصلا ملغيه
احنا نفتخر بأننا ناس ماشيين عكس التيار :D
بالعند فيكم بردو يا مرشحين دايره الساحل
انا هانزل
ومش هاختار حد فيكم وهابطل صوتى واطلعلكم لسانى

بالنسبه للوزارء الجدد
هو الموضوع ليه قلب دار مسنين كده؟؟
وبالنسبه لفايزه ابو النجا
هى عامله لكرسى الوزاره عمل؟؟
وبالنسبه لمرارتنا الغلبانه
مش ناوين تراعو ظروفها والا ايه النظام؟؟

readmore »»

انتخبوا ابن الدايره...الجزء التانى

البوست ده كتبته يوم 14/11/2011

وكنت أجلته شويه

و بعد الاحداث اللى حصلت قولت مش هانزله

بس قررت انزله النهارده لانى وصلت لنتيجه اخيره فيه

هو لما وزاره التربيه والتعليم 

 يعملوا الامتحانات بتاعه نص السنه فى الخباثه كده
على انها امتحانات الشهر

يبقى ده معناه ايه؟

انهم مش متفائلين خالص بالانتخابات

وده بالتبيعيه يوصلنا احساس بعدم التفائل نهائى بتاتا مطلقاً

ايييييه بقى كميه المرشحين دىىىىى !!!

عشر الاف مرشح عن 8 محافظات بس!! ليه بقى نفسى افهم؟!؟

ده الواحد مش قادر يعرف اتنين والا تلاته من المرشحين فى الدايره بتاعته

يعنى عندنا الدايره بعد ما كانت دايره المعهد الفنى بس

بقت دلوقتى بتشمل شبرا والساحل وروض الفرج والزاويه والشرابيه

فى كل منطقه من دول فى مرشحين شكل 

وبتوع المناطق التانيه مايعرفوش عنهم حاجه

كل واحد من المرشحين بيعلن فى المكان اللى يعجبه 

ومش مهم الناس بتوع باقى المناطق يعرفوه والا لا

واللى المفروض يكونوا من ضمن نفس الدايره 

ومن حقنا نكون عارفين كل المرشحين

بس عادى نتفلق وهو يعلن مكان ما يحب

وهو هيتعب نفسه مثلاً

وكل ما اروح فى مكان جديد تابع للدايره بتاعتنا

الاقى مرشحين جداد اول مره اعرف عنهم حاجه والا اشوف صورهم حتى

هو انا هامشى الف وادور وراهم بقى والا ايه

فى بقى شويه مرشحات

حاجه اخر جمال

دول داخلين المجلس يتعاكسوا مش يشتغلوا

والا اغنيه حزب الوفد بقى

حد يفهمهم يا جدعان انهم داخلين مجلس الشعب

مش مهرجان الموسيقى العربيه

بعد الجزء الاول من البوست ده

قولت لما أسال اختى هترشح مين؟

لاقتها بترد عليا بسرعه من غير تفكير

وبتقولى على اسم واحد مترشح عن الدايره بتاعتنا 

لاول مره يترشح بس كنت بسمع اسمه الى حد ما قبل كده

قولتلها اشمعنا

قالتلى اصله بيخدم الناس من قبل ما يترشح

هى اختى نزل عليها الوحى على غير العاده  كده ليه 

ووصلت للى هترشحه بكل سهوله كده

اومال انا ليه مصعبه الموضوع بالمنظر ده يعنى

بس لما فكرت

 هو انا ليه اختار بالطريقه دى اصلا

انا مش عايزه اختار مرشح خدمات

انا عايزه اختار مرشح يبقى عنينا وسط الحكومه

وقت مايعملوا حاجه يسألهم ده ليه

مش مجرد ناس بتقدملنا رشوه مستخبيه فى كلمه خدمات

ولا واحد بيدور على حصانه عشان يستخبى هو نفسه وراها

اما حزب الحريه والعداله عاملين كُتيب كده

كاتبين فيه اهداف الحزب

حسيت انه دستور مُصغر

فكرنى اوووى بمواد الدستور

كلام مثالى اوى زياده عن اللزوم

لدرجه انه مايتصدقش

او بمعنى اصح احنا اتعودنا مش نصدقه

مفيش حاجات محدد بتتقال واللى بيقولوه بيعيدو ويزيدوا فيه

مفيش حاجه محدده بعينها قالوا هيعملوها

ولما مش يعملوها يتحاسبوا على كده

عاملين ناصحين يعنى

وده اكدلى انى بردو مش هارشحهم

اما بالنسبه للرموز الانتخابيه اللى مازالت لافته نظرى اوى

رمز الكمثرى ورمز الجزر ورمز الموز

تحس انهم مرشحين من سوق العبور تقريباً

والا بتوع رمز الرسيفر والتكييف واللاب توب

حاسه انى لو دورت شويه هلاقى رمز تويتر ورمز الفيس بوك

التطور التكنولوجى يصنع المعجزات

بعد اللى حصل فى الاسبوع اللى فات ده

وعدم وجود اى موقف واضح من جميع الاحزاب والمرشحين

ولا كأنهم مرشحين فى بلد تانيه 

مش نفس البلد اللى بيحصل فيها الاحداث دى كلها

قررت انى هانزل الانتخابات

وهابطل صوتى

عشان مفيش حد يستحق انى ارشحه

readmore »»

اتبرع ولو بجنيه .. !!

فى دول كتير اتدمرت

وقدرت ترجع تانى زى ما كانت واكبر بكتير كمان

زى اليابان والصين

اللى بقوا من اهم الدول على مستوى العالم كله وخصوصا تجارياً

دوله زى العراق مثلاً

امريكا دخلتها ودمرت كتير فيها

لما فكروا يقفوا تانى

عملوا اعلانات وحملات توعيه كتير
عشان شعب العراق يبطل كسل وكله يشتغل مع بعضه

عملوا اعلانات لـتنشيط مجالات مختلفه عندهم زى مثلاً الاتصالات

واهم مطرب عندهم اللى هو كاظم الساهر استخدموه كوجه اعلانى محبوب
ومطرب معروف جدا كدعايه للدوله اكتر من انها تكون دعايه 
لشركه الاتصالات نفسها

لمجرد انهم يوصلوا احساس للعالم كله

ان العراق لسه موجوده وهتفضل موجوده

وغيرها وغيرها من بلاد تانيه كتير

اما احنا

لما حصلت ثوره عندنا وادمرت حاجات كتير 
سواء مادياً او فكرياً او حتى معنوياً جوانا

مش فكرنا نعمل كده

مش فالحين غير فى اعلانات الشحاته وبس

معلش على اللفظ

بس لو بصينا على كل الاعلانات بعيداً طبعا عن الاعلانات التجاريه

هنلاقى اعلانات زى
اكفل طفل يتيم

اتبرع ولو بجنيه

ساهم فى اطعام مسكين

اتبرع لقريه صغيره

اتبرع .. ادفع ... ساهم

حاجات كتير اوى على نفس المنوال

انا طبعا مش بقلل ابداً من اى حمله من دول

ولا بقول انها حاجات مش مهمه

بالعكس المفروض كلنا فعلاً نكون حاسيين ان فى ناس غيرنا محتاجين

واحنا لازم نقف جنبهم

بس الفكره فى ان صعب اوووى كل الاعلانات تبقى بالمنظر ده

ليه اعلامنا يعيش دور الشحاته بالطريقه دى

ليه مفيش اعلانات وحملات توعيه كتير زى باقى الدول

اللهم الا يعنى حاجات قليله اووووى
وقليل مننا اللى شافها لانها فى جميع الاحوال مش بتبقى واخده حقها
ده غير كمان ان لما بتحصل عندنا حمله توعيه

بتبقى لغرض محدد فى فتره زمنيه معينه وبينتهى

زى مثلا الحمله اللى طلبت بـ"لا" فى الاستفتاء

واللى مش كانت حمله توعيه

دى كانت حمله اجبار على التصويت لجانب على حساب جانب اخر

لانها لو كانت حمله توعيه بجد

كانوا جابوا جزء من الفنانين والشخصيات المهمه 
يقولوا هيختاروا نعم ليه

ولا ليه

وكده يبقى عرضنا جميع الاتجاهات ونبعد عن التحيز لجهه معينه
ويسيبوا الناس تقرر وتختار براحتهم

لكن ده للاسف ماحصلش

ومش بيحصل فى اى حاجه

 ليه الاعلام عندنا او منتجين الاعلانات اللى خنقونا باعلانات تافهه

مش بيحاولوا يشجعونا ويدعمونا اننا نقف لبلدنا

ونوصل بيها لمستوى احسن
ويفتحولنا مجالات كتير نقدر نقدم فيها حاجه

ليه كل اللى بيقدروا عليه

انهم يجيبوا اتنين فى برنامج كل واحد فيهم بيتكلم فى اتجاه

واحنا اللى بنتوه معاهم فى النص

لا احنا استفادنا حاجه ولا هما استفادوا حاجه من لغبطتنا دى

زى ما بندور على ناس يتبرعوا للمحتاجين

ليه مش بندور على ناس تبنى البلد من جديد؟؟

readmore »»

ارجوك ماتستهبلنيش !!

فى شويه برامج فى التليفزيون

تجيب للواحد تخلف بجد

اد ايه بيستفزنى ان يبقى فى مذيعين او مذيعات عندهم استعداد يظهروا

لمجرد انهم بيستهبلوا الناس !!

فى قناه ماعرفش اسمها

بس واضح انها كانت مسابقات وبس

بعيداً عن المذيعه اللى اصلاً اتخضيت لما شوفتها

مش لانها كانت شكلها وحش ولا حاجه دى خلقه ربنا يعنى

بس لانها كانت بتتخانق اكتر من انها بتذيع

والله بقيت مزبهله من طريقتها

والاكتر لما شوفت السؤال اللى بتسأله والاجابات اللى الناس بتجاوبها

السؤال حاجه ليها رجل واحده و 3 عيون

واحنا بنشوفها فى الطريق وفيها 3 الوان وبتخافظ على سلامتنا

لا عروستى
صراحه السؤال صعب

واحد يتصل يقولها المفتاح والتانى يقولها الموبيل !!

الناس دى بتفهم منين انا عايزه اعرف؟؟؟؟

والغريبه ان صوت اللى بيتصلوا كله شبه بعضه

هى الناس دى فاكرينا مساطيل للدرجه دى والا ايه مش فاهمه !

والا يعنى ايه مثلا واحده تطلع فى برنامج  "ارجوك ماتفتيش" ده
تسأل الناس فى الشارع

ايه رأيهم فى ان خط الاستواء هيتمسح ؟؟

والا مثلا مين مخترع القطط السيامى!!

والا ان الاسدين  بتوع كوبرى قصر النيل 

 هيهربوا عن طريق النيل بسبب الحر والزهق من قعدتهم دى!!

 والسؤال الفظيع بقى
بعد وفاه عم دهب ومرض بطوط
ياترى هيقدروا سوسو ولولو وتوتو يمسكوا البلد مكانه والا لا؟!!؟

ياخراشى على الشلل

ويعنى ايه اصلا ناس ترد عليها ردود بثقه كده

وكأن السؤال عادى مثلا

مش فيه اى حاجه غلط !!

ما هو اللى انا متاكده منه

ان الناس لسه بعقلهم مش اتهطلوا للدرجه دى يعنى ولا حاجه

ازاى بقى بنى ادم طبيعى هيرد عليكى بطريقه طبيعيه فى السؤال ده؟؟؟

وتعليقها دايماً ان الناس بتفتى فى اللى تعرفه واللى ماتعرفوش

وهى كده الناس بتفتى ؟؟ ده الناس بتستغبى قصدك

لان استحاله واحد عاقل مهما كان مش عارف اجابه السؤال اللى بيتسأله

هيرد الردود اللى بالمنظر ده

لما فى اى دوله تانيه يشوفوا البرنامج ده

مش هيقدروا يربطوا ابداً ان البلد اللى بيظهر على شاشتها البرامج دى

والشعب اللى بيرد الردود دى

هو نفس الشعب اللى قدر يعمل ثوره

وقدر لاول مره فى التاريخ يخلى رئيسه السابق يتحاكم زيه زى اى حد

انا قولت مثلاً ان قبل الثوره الموضوع دى ليه علاقه بالحكومه

عشان يعرفونا احنا اد ايه هُبل

بس لما برنامج زى ده يفضل مستمر لحد دلوقتى

واتعمل جزء تانى كمان بأسم ارجوك ماتفتيش بعد الثوره

يبقى اكيد فى حاجه غلط

بطلوا تستخفوا بعقليه الناس كده

عايزين تعملوا اشتغالات

اعملوا حاجه تتصدق الى حد ما

بلاش قرف بقى

readmore »»

انتخبوا ابن الدايره :D

مش كنت ناويه اتكلم عن حاجه فى الموضوع ده 

لحد ما يخلص ونشوف هيحصل ايه
بس الهبل اللى بيحصل بيحكم بقى

عايزه اتكلم عن انتخابات مجلس الشعب
السنادى بخلاف ان جو الانتخابات مختلف والمفروض يكون فى امل
الا انى ملاحظه ان لا فى "امل" ولا "عُمر" حتى

بدايه من انى اصلاً لحد فتره قريبه جداااا
مش كنت قادره اعرف مين المرشخين فى الانتخابات عن الدائره بتاعتنا
لان ماحدش بيحاول يعلن عن نفسه

غير عن طريق اليفط والصور وبس
بس ادينى عرفت

اتفاجئت ان واحد من المرشحين السنادى
واللى كان مرشح لكل السنين اللى فاتت وبيخفى اى حد قصاده
لانه كان النص التانى وجزء لا يتجزأ من حمله يوسف بطرس غالى 

للانتخابات  عن الدائره بتاعتنا طول الكام سنه اللى فاتت
واللى كانوا هما الاتنين دايما بيكسبوها غصب واقتدار
او بمعنى اصح بشراء اصوات الناس
والخدمات اللى بيوزعوها فجأه فى فتره الانتخابات
وبعد ما يكسبوا ابقى قابلنى ان حد لاقاهم تانى
ولان ادام واحد فيهم كسب يبقى التانى تلقائى كسب
زى واحد وخياله كده
وبالرغم من ان المرشح ده اول ما حصلت الثوره
ولانه كان شريك يوسف بطرس غالى فى الانتخابات دايماً
طبعا اسمه جه فى التحقيقات
وقريت خبر فى جريده من الجرايد وقتها
انه مطلوب التحقيق معاه تحت بند من اين لك هذا
حتى لو كانت التحقيقات حصلت معاه او ماحصلتش
بس هو ازاى جاب الجرائه دى انه يرشح نفسه تانى
ومتوقع ان الناس تصدقه تانى
وتنتخبه تانى!!!
فى ناس بجحه اوى فى حكايه الانتخابات دى

فى مرشح تانى مش شفته ولا عمل حاجه عرفتها صراحه
غير انه دايماً بيخسر قدام يوسف بطرس غالى والمرشح السابق ذكره ده

اما تالت مرشح
بسم الله ما شاء الله لسه شايفاه مجمع كل متشردين المنطقه حواليه
وقاعدين قاعده مزاج عالى اوى
وريحه المخدرات منتشره فى جميع الاتجاهات
وحاجه اخر حلاوه يعنى

والرابع بقى
بالرغم من ان المقر بتاعه فى شارعنا
بس هاموت واشوف حاجه منه غير صورته !!

وفى حوالى 10 من الاخوان فى حزب الحريه والعداله
وانا مش ناويه اختار حد منهم

اما الباقيين

فا جارى البحث عنهم

لان واضح ان تحديد مبلغ الدعايه مأثر اوى على الكل

الاول كانوا بيعملوا دعايه بهبل

دلوقتى ناقص الواحد يروح يدور عليهم بنفسه

ده بقى كله كوم

والرموز الانتخابيه كوم تانى خالص

حاجه اخر عجب يعنى :D

المفروض الواحد يعمل ايه؟
نفكرهم ان فى ثوره حصلت مثلاً واننا محتاجين مرشحين 

يستحقوا بجد اننا نختارهم مش زى قبل كده
والا اعزل فى حته تانيه يمكن الاقى مرشحين عدلين !!

 *****

ده الموقع الرسمى للجنه القضائيه العليا للانتخابات

للى يحب يعرف حاجه يعنى

readmore »»

عريس تفصيل !!

قريت خبر فى جريده من الجرايد من قريب

عن واحده كانت مرشحه نفسها لمجلس النواب فى احدى الدول العربيه
(بدون ذكر اسم الدوله رغم انها مذكوره فى الخبر)
السيده دى طالبت من فتره باصدار قانون جديد

بينص على اعاده نظام الجوارى لمجتمعها
واستندت فى كده ان لازم يكونوا الجوارى دى 

من سبايا حروب لدول اسلاميه من دوله غير اسلاميه !!
على ان تكون الواحده ب 2500 دينار !!
وده عشان تقلل نسبه الزنا والعلاقات المحرمه

ياريتها جت على كده
التقيل جاى لسه اهو
دى كمان بتطالب بطلب اعجب واغرب
وهو السماح للسيدات من بلدها العربيه بشراء ازاواج !!!
اه والنبى شراء ازاواج
بشرط انهم يكونوا من دوله اسلاميه بردو ويكونوا "حلوين"
ولا كانها هتروح تجيبهم من سوبر ماركت مثلا
ادينى اتنين والنبى
واحد ابيض وعنيه زرقاء والتانى قمحاوى وشعره اسود!!

وكانت فكرتها الجهنميه دى بسبب زياده العنوسه فى بلدها
وارتفاع نسبه الطلاق
زيها زى كل الدول العربيه يعنى مش حاجه زياده عننا

لا وكمان طالباه بمواصفات محدده 

فى انه يسيب للى "هتشتريه" كل التصرف فيه وفى علاقتهم وجوازهم
ويكون مؤدب ولبق ومتواضع وشكله حلو وينفذ طلباتها من غير نقاش
ده طبعا غير الدلع اللى لازم وحتما يدلعهولها
والنبى ده مش اسمه استهبال؟
ماهو لو كده ماكنش حد غلب
اصله مش مصنع بيصنعلك عرسان بشكل واحد واسطمبه واحده
وبيعملهالك باشكال مثاليه
دى كده بتطلب انسان آلى مش بنى ادم ولا زوج يعيش معاها حياه طبيعيه
زى اى زواج بين اى اتنين

انا صراحه مستغربه من تفكير الست دى
دماغها رايحه منها اوى ومش راجعه خالص
ياما هى معقده نفسياً وناويه تخلى كل بنات بلدها معقدين زيها
ماهو لو كل واحده اطلقت وفكرت تشترى زوج ده لو فى ماكنش حد غلب
وكانت كل واحده تاخدها من قصيرها وتدورلها على عريس تفصيل 

يكون على مقاسها 

وكده مش كان هيبقى فى طلاق من اصله

مفيش حد فينا كامل
وبالتالى ماينفعش نطلب من اللى بنتعامل معاهم
يكونوا كاملين فى كل تعاملاتهم معانا
وخصوصا بقى فى حكايه الجواز دى
ما انتى اكيد مليانه عيوب
ليه المفروض العريس اللى قدامك ده يبقى كامل الاوصاف
على اساس ايه يعنى؟
ما انتى اصلا مش كامله الاوصاف قدامه
بقى فى ناس كتير دماغهم بتخرف على فكره !!

readmore »»

دنيا التكاتك !!!

موضوع التكاتك ده بقى ملفت للنظر جدا
وخصوصا فى الفتره اللى فاتت
لان قبل كده كان ظاهر بنسبه قليله اوى فى الارياف وبعض المحافظات
ومن فتره قريبه بدأ يظهر فى القاهره
وفى بعض المناطق اللى عملتله ترخيصات وبقى تبع مجلس المدينه كمان
زى شبرا الخيمه والوراق وامبابه
ومن فتره قريبه بدأت اشوفه عندنا
ازبهليت صراحه من سيطره التوكتوك  على الشوارع رغم صغر حجمه
يعنى تلاقى التوكتوك من دول ممكن وهو ماشى يدوس على رجل واحد

وعادى جدا يكمل طريقه ولا كأن فى حاجه
ممكن يكون هيلزق فى ميكروباص او اتوبيس 

وعادى بردو جدا يكمل ولا كأن فى حاجه حصلت
ممكن وانت راكبه كده لو الحمل زياده والا حاجه
تلاقيه راح حادف يمين
تنزل تعدله وتركب تانى ويكمل عادى بردو ولا كان فى حاجه

الغريبه فى التوكتوك  بالرغم انه صغير كده ولا يرى بالعين المجرده
الا انه بسم الله ما شاء الله
بياخدو اعداد غريبه جواه
تحس انه مفتوح والا موصل على ميكروباص من الناحيه التانيه مثلا
وهو شكله اصلا مياخدش غير فردين
بس ممكن تلاقى اسره كامله راكبه فيه ومعاهم عفش الشقه كمان لو يحبوا
تكاتك استريتش تقريبا

 

المشكله فى التكاتك دى
انهم بقوا يعملوا ازمه فى المرور غير طبيعيه
اصلا احنا عندنا ازمه فى المرور مالهاش اى حل ممكن
التكاتك  زودتها الضعف تقريبا
لانها كتير وحجمها صغير فا بتدخل فى اى حته 

ومش بتدى فرصه لاى مواصله تانيه
يعنى الازمه الاول كانت فى بتوع الميكروباصات واللى بيعملوه
دلوقتى بقت فى التكاتك وبتوع الميكروباصات بيواجهوا نفس الازمه معانا
 

محافظ القاهره اصدر قرار بمنع وجود التكاتك فى محافظه القاهره نهائياُ
واى توكتوك هيتمسك هيتصادر على طول
وبيطالبهم انهم يروحوا اى مكان فى الارياف افضل ليهم
القرار ده ليه عيوبه ومميزاته
مميزاته
انه هيساعدوا الى حد ما فى حل جزء من ازمه المرور اللى خنقتنا كلنا
عيوبه
ان الشباب اللى بيشتغلوا على التكاتك دى هيلاقوا شغل تانى فين؟؟
وخصوصا ان صعب بتوع التكاتك اللى فى الارياف 

يدخلوا عليهم اى حد غريب من محافظات تانيه
وياخدوا شغلهم
زى ما بيقولوا كل واحد بيشتغل فى منطقته ومش هيخلى حد غريب ياخد مكانه
وبعدين الاهم بقى
هو على اساس ايه كانوا بيرخصوا للتكاتك الاول وبياخدوا نمر 

وبيمشوا ولا كأنهم ملاكى
ودلوقتى فجأه مش عايزين يشوفوا ولا واحد منهم فى الشارع!!

readmore »»

ياريت عندنا كده !!

شوفت كده بالصدفه حلقه لاوبرا ونيفرى
كانت بتقابل راجل امريكى متجوز اربعه
انا لما شوفت اعلان الحلقه وقالوا انها هتتكلم عن تعدد الزوجات
افتكرت انها هتجيب واحد عربى
بما ان القانون فى امريكا او معظم البلاد الاوروبيه بيمنع ان الشخص يتجوز اكتر من واحده
يعنى لو ثبت لشخص واحد اكثر من زواج على طول بيتحبس

انما لاقتها فى الاخر جايبه واحد امريكى ومتجوز اربعه

وقادر يظهر فى البرنامج ومش خايف من حاجه
هما كلهم مستوعبين الموقف اللى هما فيه  اذا كان هو والا زوجاته الاربعه

وعندهم استعداد يخوضوا اى حاجه 

فى سبيل ان الاسره الكبيره اوى دى تفضل مع بعض
انا صراحه استغربت جدا جدا لما شوفت الراجل ده واللى متجوزهم
 

حسيت ان الراجل ده بيطبق بالظبط اللى الدين الاسلامى قال عليه 

من ناحيه تعدد الزوجات
من حيث العدل بينهم فى المعامله ومعامله اولاده

حتى زوجاته نفسهم
بيتعاملوا مع بعض باسلوب متحضر جدا بطريقه غير معقوله
وبيحطوا حدود لنفسهم  قدام بعض عشان يرعوا مشاعر بعض كويس جدا
الله اعلم هما كانوا بيجملوا نفسهم لانهم قدام التليفزيون والا ده الطبيعى
لكن هما كمان بيظهروا فى احدى برامج الحياه الواقعيه اسمه
sister wives
بيتابعهم فى كل لحظات حياتهم وليه كذا موسم كمان

من ضمن الحاجات اللى حبيتها اوى فى علاقتهم ببعض
سواء هو وزوجاته والا هما اصلا الاربعه مع بعض
اول واحده اتجوزها من 20 سنه وبعدها اتجوز التلاته الباقيين 

واخر واحده من سنه
مش عنده مشكله ان اللى يكون متجوزها دى معاها اطفال من زواج سابق

ويعيشوا مع اولاده
فى واحده من اللى متجوزها دول
سابت شغلها عشان تقعد فى البيت تشوف طلبات العدد الكبير ده
لان اولاده حوالى 16 او 17 ولد وبنت مختلفين الاعمار

لما كمان اتكلموا مع ولاده
ولاده اتكلموا بكل صراحه قالوا السلبيات والايجابيات فى وضعهم
وقالوا كمان ان والدهم فى الاول مش كان بيقضى وقت معاهم كتير
بس حاول يوظف وقته ومكانه عشان يقدر يقعد معاهم اكتر

حبيت فى طريقه الراجل ده 100 حاجه
ازاى قادر يخلى كل زوجه من دول قادره تحبه 

لدرجه انها تتحمل الحاله الخاصه دى

ماهى لازم تكون بتحبه عشان تتحمل ياما هتقتله هو والتلاته التانين
ازاى قادر يسيطر عليهم اصلاً
لان معروف ان المرأه الاوروبيه قويه الشخصيه 

ومش بسهوله الرجل يبقى متحكم فيها كده
ازاى هما قادرين يوصلوا لكده
وازاى اولادهم مبسوطين بيهم كده وعايشين حياه سويه جدا
واخدين بالهم من اختلافات حياتهم عن حياه اى حد غيرهم
ومع ذلك حابين اوووى الاختلافات دى وفخورين بيها

انا طول الحلقه منبهره صراحه ومعجبه جدا بطريقه كل واحد فيهم ومستغربه اكتر
لانى حاسه ان لو شخصيه عربيه اللى المفروض فى شريعتنا الاسلاميه نظام تعدد الزوجات
مش متخيله انه هيكون بالطريقه دى والا بالعدل ده
ياما سمعنا عن حالات تعدد زوجات
بس دايما كان فى حاجه بتفشل فى النص 

اللهم الا كام حاله يعنى من ضمن كذا حاله
 لان بيبقى فى طرف من الاطراف مش قادر يكمل فى المنظومه دى

وسمتها منظومه لان كل اللى فيها لازم يعرف دوره  كويس جدا

ويختار افضل طريقه للتعامل مع باقى الاطراف
اذا كان الزواج الطبيعى اللى هو زوج وزوجه واحده
بيبقى عايزين ياكلوا بعض
اومال لما يبقى فى كذا زوجه هيعملوا ايه !!

دى حلقه من برنامج

Sister Wives

readmore »»

بيقولوا النظافه من الايمان ...!!

فى حاجه لافته نظرى اوى اليومين دول
حاول كده تنزل اى شارع فى اى وقت
وشوف كميه الزباله اللى مرميه فى كل ركن فيه اد ايه !!!

المشكله مش بس فى اننا بنرمى الزباله
ولا اننا بنحاول من كام سنه فاتوا
نقنع الناس انك ماينفعش ترمى زباله حواليك
ولا ينفع انك تملى الشارع اللى انت ساكن فيه زباله
واللى يحدف من البلكونه
واللى يخرج شنط اد كده من البيت يرميها فى كل جنب شويه
الحكايه دى تقريباً بقت متأصله جوه ناس كتير من الشعب المصرى وبقى متعود عليها خلاص
ومحتاج ثورتين تلاته كده عشان يمكن يقتنع ويفهموا
ان فعلا النظافه من الايمان

المشكله دلوقتى ان المسئولين اللى بيشجعوا الناس انها ترمى الزباله
وتملى الشارع بالمنظر المستفز اللى ماحدش بيستحمله ده

هتقولى ازاى؟؟...اقولك ازاى
يعنى لما تلاقى ان يعدى يوم واتنين وتلاته
وعمال النظافه ماحدش فيهم بيجى يشوف شغله وينظف الشارع او ياخد الزباله من البيت عندك
انت هتعمل ايه؟؟
هترمى الزباله اللى فى البيت عندك فى الشارع
ماهو انت اكيد مش هتستحمل تسيب الزباله فى بيتك اللى انت عايش فيه
هيحصل ايه بعدها؟؟
هتزيد اكوام الزباله اللى فى الشارع بطريقه مستفزه جدا
فا هتروح انت تبلغ ان بتوع النظافه مش بيجوا
المفاجأه انك هتلاقى رد واحد بيتكرر
وهى ان عربيات الزباله بايظه
الغريبه ان حتى لو فى عمال نضافه بينزلوا
فا هما بياخدوا الزباله
يرموها فى مكان تانى فيه اكوام اكبر واكبر
او حتى بيحرقوها
والمنظر بيبقى بجد يقرف الواحد

طب ما الفلوس اللى انتوا بتاخدوها على قلبكم اد كده

من فلوس النظافه اللى على الكهربا

مش بتصلحوا بيها العربيات ليه وترحمونا من القرف ده؟؟

انا كنت فاكره الحكايه دى فى المنطقه بتاعتنا بس
لكن كل ما بخرج الاقى جميع المناطق اللى حوالينا كده
قولت يمكن المكان اللى انا ساكنه فيه بطلوا يتعاملوا معانا على اننا فى زباله بنرميها
فا لغوا حكايه عمال النظافه والعربيات بتاعتهم 

واحنا نعمل اكتفاء ذاتى بقى

ويمكن ننمى جوانا قدرتنا على اعاده التدوير والا حاجه!!

بس امبارح كنت بتفرج على التليفزيون
ولاقتهم بيقولوا ان الحكايه دى فى جميع مناطق القاهره
وكمان محافظات كتير زى الجيزه و اسماعيليه واسكندريه وغيرها

هو ده ستايل مثلا؟؟
وبعدين يعنى ايه اصلا العربيات كلها وعلى حين غره كده تبوظ 

ومفيش ولا عربيه شغاله؟
هيكونوا العربيات عملوا ثوره عليكم هما كمان يعنى؟؟

كان فى event

على الفيس بوك
بيطالب اننا نتفق كلنا نروح نرمى الزباله عند الحى
وساعتها هيخلوا فى وشهم وعند اهلهم دم
ويلموا الزباله دى بدل ما هى ماليه الشوارع كده
والحمله دى تقريباً هتبقى يوم 14/9
فكرك الحمله دى ممكن تجيب نتيجه؟؟
طب انت ممكن تعمل كده وترمى الزباله عند الحى والا هتقول وانا مالى؟؟

***اسفه على الصوره

بس الحقيقه اقذر من كده بكتير

انا حاولت اجيب صوره نضيفه شويه

readmore »»

28/6..... أيدك والريموت كنترول :D

كل حياتنا دلوقتى بقت عباره عن اعلانات

فى نوعين من الاعلانات

اعلانات احنا بنعملها

واعلانات ناس تانيه بتعملها فينا

الاعلانات اللى احنا بنعملها

اننا من اول ما بنصحى لحد ما بنام

بنعتمد على حاجات كتير بنقتبسها من الاعلانات

سواء جمل بتتقال فى اعلانات

وده لاننا بنتأثر بشكل كبير جدا بكل كلمه بتتقال فى الاعلانات تحديداً

من كتر ماهى بتتعاد قدامنا فى اليوم خمس تلاف مره

وسواء كانت الحاجات اللى احنا بنستخدمها المعلن عنها

والاعلانات اللى بتتعمل فينا دى بقى

يااااااااما بنشوف منها

جرب كده تقعد تتفرج على مسلسل على اى قناه 

من 3 العصر ومعاك لحد 11 بليل

فى الكام ساعه دول

القنوات كلها بترزع الواحد فى وشه بين كل فاصل وفاصل فى اى مسلسل

يجى نص ساعه اعلانات

تيجى بقى انت تحاول تشوف المسلسل لما الفاصل الاعلانى ينتهى

ابقى قابلنى ان افتكرت من اللى شوفته قبل الفاصل حاجه

الواحد بينسى اصلا هو كان بيتفرج عليه

الاعلانات اصلا بقت شاغله حيز كبير اوى من التليفزيون

زيها زى المسلسلات والافلام

يعنى لو حسبناها هنلاقيها واخده نفس المساحه تقريبا

وفى النهايه ده كله على حساب صاحب المحل اللى هو احنا يعنى

غير انهم بيقرفونا

الا انهم بيعملوا كمان غسيل مخ للى مش فاهم سياسيه الاعلانات

واولهم الاطفال الصغيرين

اللى متخيلين ان كل حاجه بتيجى فى التليفزيون دى صح ميه فى الميه

وخصوصا لو كانت حاجه موجهه للسن الصغير ده

بتبقى مصيبه لوحدها

بالنسبه بقى لسياسه الاعلانات

فى اعلانات لافته نظرى اليومين دول

لانها ليها علاقه باللى احنا فيه الفتره دى

فى منتجات معينه عملت اعلانات ان جزء من تمنها هيتوجه لأعمال خيريه

ده بما اننا فى فتره اصلاح بشكل عام دلوقتى

زى مثلا محو الأميه وغيرها من النشاطات اللى من النوع ده

طب فى سؤال بيطرح نفسه فى دماغى

هو احنا هنعرف منين ان فعلا تمنها بيروح فى الاتجاه اللى بيقولوا عليه؟؟

هنمشى ورا الراجل اللى بنديله حق المنتج ونشوف هيودى الفلوس فين؟

والا هما بردو هيصورلنا العمليه دى فى اعلانات؟؟

ممكن حد يقول المهم النيه 

واننا بنشترى الحاجه دى عشان نساهم فى العمل الخيرى ده

بس انا بردو هاقول ان لو احنا قولنا المهم النيه عندنا ومش مهم هما بيعملوا ايه

يبقى هما فى النهايه حققوا الغرض من سياسيتهم فى عرض الاعلان ده

الربح المضاعف على حساب الكلمه السحريه

"لصالح الأعمال الخيريه"

يعنى هما مش بس بيستهبلونا

لا دول كمان بيتأجروا بأسم الاعمال الخيريه

اللى هى أسمى بكتير من كده

هو احنا المفروض فعلا نشترى المنتج عشان نساهم فى العمل الخيرى ده وحسب نيتنا بقى؟

والا المفروض مثلا نتأكد الاول ان الشركه صاحبه المنتج ده ليها فعلا علاقه بالاعمال الخيريه اللى بتعلن عنها؟

readmore »»

26/6..... يارب مايطلبوش يغيرونا احنا كمان :D

هو المفروض ان كل حاجه حصلت قبل الثوره تتغير؟

سواء حلوه والا وحشه؟

اصل قريت من قريب

انهم عايزين يغيروا النشيد الوطنى

اشمعنا؟؟

هو حسنى مبارك اللى مألفه؟

والا هو اللى كان بيغنهولنا؟؟

والا يكونش النشيد طلع من فلول النظام؟!؟

هو اه النشيد فيه كلمات صعبه

والعيال الصغيره اللى بيحاولوا يحافظوه فى المدرسه

بيشلفطوه خالص وبيخلوا الكلمات فيه مالهاش اى معنى

بس مش متخيله الواحد هيحس بنشيد غيره ازاى

ده احنا بنفتكر طابور المدرسه بالنشيد مش بأى حاجه تانيه

هو كل حاجه قبل كده حصلت تبقى وحشه

ومش هينفع مصر تبقى احسن الا لما نغيريها؟

بردو قريت ان الاذاعه والتليفزيون كانوا عايزين يشيلوا لقطات كتير من افلام او مؤتمرات

موجود فيها حسنى مبارك وغيره من النظام السابق واللى محبوسين دلوقتى

بيتهيالى بالطريقه دى بيمحوا جزء من التاريخ 
حتى لو كان الجزء ده مش على مزاجنا

دلوقتى بقت على كل حدث بيحصل

بيطبق عليه فيلم او حتى اغنيه

بالزمن اللى احنا فيه ده

طريقتنا لتسجيل الاحداث من حوالينا بقت فى السينما والتلفزيون والاغانى

يعنى دول كلهم فيهم جزء من تاريخنا والظروف اللى بنمر بيها

ليه نشيل جزء من التاريخ لمجرد ان االحماسه دلوقتى واخدنا

ومش شايفين غير ان الناس دى نمحيهم من اى حاجه هما فيها

طب ما مصر عدى عليها حاجات كتير اوى ظهرت فى الافلام

ليه مافكروش يشيلوا حاجه منها؟

شايفه ان ده تاريخ

سواء كنا عايزينه دلوقتى والا مش عايزينه

بس ولادنا هيجوا بعد كام سنه يسالونا عن كل تفصيله فيه

واحنا مجبرين نرد عليهم سواء بالحلو او الوحش

عشان ماينفعش يشوفوا صوره مش كامله

readmore »»

25/6.... فيلم رعب !!!

الثانويه العامه تعتبر من اهم افلام الرعب اللى بتتعرض كل سنه 

فى التوقيت ده
فعلا فيلم رعب
اى بيت فيه طالب من طلاب الثانويه العامه
بيتعمل عليه حجر صحى وعقلى
لا حد يدخل ولا يخرج
وتبدأ الواصله
الواد والا البت الغلابه بتوع الثانويه العامه
قاعد ع الكتاب مش بيقوموا
واحتمال كبير جدا انهم يعاملوه معامله المخده ويناموا عليه ساعتين تلاته
عشان لما يصحوا يكملوا مذاكره على طول ومايضيعوش وقت
ده غير موقف الاهل من الموضوع ده
لو يطولوا يلزقوا وش العيال فى الكتاب هيعملوها
طول ما هما ماشيين قدامهم
ذاكر كويس
ذاكرى يا حبيبتى
اومال احنا بنعمل ايه؟ بلعب ماتش شطرنج انا والكتاب مثلا؟؟
والا اكونش بعمل قراطيس بورق الملازم؟؟

كله كوم
والدروس فى فتره الامتحانات كوم تانى خالص
فى فتره الامتحانات الدروس بيبقى ليها ميزانيه تعادل ميزانيه الدروس كلها طول السنه

المدرسين بيستغلوا الموضوع ده بطريقه رهيبه

من دروس لملازم لمحاضرات لحاجات كتير اوى

المهم انها تزود الفلوس وخلاص

نيجى لاهم جزء فى فيلم الرعب ده

واللى هو التنسيق

التنسيق ده كارثه لوحده

بيضيع اى امل عند الطالب فى انه يكون اللى هو عايزه

ماهى يا تصيب يا تخيب

يا تدخل الكليه اللى انت عايزها

ياما هتدخل كليه بتكرهها ومش هتقدر تحقق اللى بتتمناه

وهنا هتدخل فى دوامه طب انا ممكن اعمل ايه فى حياتى 

يفيدنى بدل الكليه ادام مش بحبها

من وقت ما خلصت ثانويه عامه
وكل قرايبى واخوات اى حد اعرفه خلصها
وانا مش بتابع اصلا اى اخبار عنها
عشان بس مش يجيلى احباط من منظر العيال الغلابه 

اللى بيخرجوا يقطعوا فى شعرهم من اللجان دول

دايما أسال نفسى
ليه لما كان بيجى امتحان وحش ماكنتش بخرج اعيط؟؟
كنت ممكن اول ما اشوف الورقه والامتحان

احس انه صعب والا فى سؤال مش عارفاه

تبدأ عينى كده تستعد لاستقبال الشلالات
واتراجع عن الفكره منعا لاحداث سيول داخل اللجان
انما لما اخرج واخلص امتحانات ماكنتش بعيط ابدا
كنت بتنح بس

كل ما يجى فى دماغى موضوع الثانويه العامه ده
افتكر موقف
مره قابلتنى صاحبه اختى اول ما دخلوا ثانوى وكنت انا لسه داخله كليه
بتسألنى انتى دخلتى كليه ايه
قولتلها حقوق
بتقولى ايه ده بجد؟؟ يابختك ياريت ادخل حقوق
(الكلام ده كان من اكتر من 5 سنين .!)
انا تنحتلها
انتى بجد شايفاها حاجه كويسه؟
دى يابنتى من كليات الفاشلين اللى زيى
اللى كانوا بيموتوا نفسهم فى الثانويه العامه وبردو مش بيجيبوا مجموع وماتسالنيش ازاى
رغم ان كل مؤشرات الامتحانات التمهيديه فى الدروس كانت بتقول عكس اللى حصل
بس البنت مش حاطه امل على الثانويه العامه ومجموعها من اصله
واقصى احلامها انها تدخل حقوق
والله لو كانت تقولى نبدل كنت بدلت معاها
تاخد هى حبيتشى المبجله حقوق
وانا اخد الموقره الثانويه العامه
يمكن اجيب مجموع وادخل الكليه اللى كنت عايزاها بقى

برغم الرعب اللى كنت عايشاه فى الثانويه العامه
احترماً للشئ المسمى المجموع والتنسيق
الا انى بحبها 

ولو قدرت ارجع اذاكرها تانى هذاكرها

readmore »»

24/6.... كائن ناقص !!

الحوار الاول

الام: يلا يا حبيبتى قومى البسى عشان العريس هيجي هو واهله يشفوكى كمان شويه
البنت: بس انا قولتلكم يا ماما انى مش عايزه اشوف اى عرسان دلوقتى
انا عايزه اخلص دراستى وبعدين اعمل ماجستير
الام: ماجستير؟ماجستير ايه يا ام ماجستير انتى؟
البنات مالهاش فى الكلام ده
انتى اخرك لبيتك وجوزك وولادك هتعملى ايه بالشهاده بتاعتك دى
ما احنا زمان لا اتعلمنا ولا بتاع وعرفنا نربيكم اهو
(الاب بيسمع الكلام من بعيد وبيجى على السيره)
الاب: ايه الكلام اللى انا سامعه دى
دراسه ايه اللى بتفكرى فيها
انا اتفقت مع الناس يجوا النهارده يعتى هيجوا
انتى عايزه تنزلى كلمتى الارض والا ايه؟؟
البنت: حاضر يابابا

:((

.

.
الحوار التانى

نظرات ام شارده فى وش بنتها
الام: سامعه صوت الزغاريط اللى فوقينا
البنت: اه سامعه يا ماما
الام: يعنى البت سهام تتجوز قبل منك وانتى اكبر منها ب 8 سنين
البنت: نصيب يا ماما هى لاقت انسان مناسب وانا مش لاقيت ايه المشكله
الام: ما انتى لو بتوافقى على حد من اللى بيتقدمولك 

كنتى زمانك متجوزه وعندك كام عيل كمان
البنت: بس انا ماشفتش حد مناسب لدلوقتى
الام: وكل اللى بيتقدمولك دول مفيش حد منهم مناسب
انتى بس اللى منشفه دماغك
والناس اللى عماله تتكلم وتقول انك كبرتى فى السن
وقطر الجواز فاتك وهتعنسى وتفضلى قاعده جنبى
انا نفسى افرحلك بعيل قبل ما اموت
البنت: ماتقوليش كده ياماما
الام: طيب يبقى تشوفى العريس اللى جاى بكره
والبنت عشان كلام امها قررت تتنازل عن فكره مناسب دى
لمجرد انها ترضى اهلها
وعشان تخلص من نظرات الشفقه اللى فى عيون الناس 

بما انها فى نظرهم عنست وفاتها قطر الجواز

دى نماذج بنشوفها كتير جداااا فى حياتنا
وفى مننا اللى مر بيها او يعرف حد مر بيها
تحكم الاهل فى البنت من ناحيه الجواز بالطريقه دى
بيخلى العواقب اكبر بكتير مما كانوا متخيلين
يعنى بدل ما البنت تتأخر فى الجواز شويه
تبقى اسمها طالق وفى ايديها عيلين
بدل البنت ما يبقى معاها ماجستير
تبقى من ضمن المطلقات تحت سن ال 25
الاهل بيفرحوا كده لما يلاقى بنتهم جت قعدت جنبهم؟؟
بعد ما اتجوزت جوازه فاشله لمجرد انها ترضيهم

نسبة الطلاق في مصر بتزيد يوم عن يوم
كانت 45% في سنه 2008
بمعدل وقوع 240 حالة طلاق فى اليوم الواحد
و باختلاف الاسباب

دلوقتى اكيد اكتر بكتير من كده 

والدليل منظر محاكم الاسره وعدد قضايا الخلع
الاسوء دلوقتى ظاهره الطلاق المبكر
يعنى البنت تتجوز وهى ماتزدش عن 20 سنه 
وبعدها بكام شهر والا سنه تتطلق
الفكره هنا اولا انها بقت مطلقه فى وقت المفروض لسه بتبدأ فيه حياتها
وثانيا نظره المجتمع ليها

المجتمع فى جميع مراحل حياه البنت 

بيعاملوها على انها دايما ناقصه عقل ودين
وده ان عبر فا بيعبر عن الجهل الدينى 

وعدم الاستيعاب الصح للجمله اصلا
وقبل ما البنت تتجوز بيشفوها على انها عانس واتاخرت فى الجواز
وبعد ما تتجوز جوازه مش راضيه بيها عشان تتخلص من اللقب العجيب ده
ولما تفشل جوازها بتحصل على لقب مطلقه
يعنى فى جميع الاحوال
المرأه فى نظر المجتمع
كائن غير كامل بالمره
كائن ناقص

البوست ده مشاركه منى فى حمله اتكلمى 

اللى اعلنت عنها ساره درويش على الفيس بوك

واللى عرفتها من مدونه شيرين سامى حدوته مصريه

readmore »»