أفرح بضمير :)

مع كل فرحة جديدة بتعدي في حياتنا
وعلي أد ما الفرحة دي بتكون كافية إننا نكون مبسوطين جدًا
إلا إننا دايمًا بنكون عايزين نحس بفرحتنا دي وسط لمة وناس بنحبهم
والأهم يكونوا بيحبونا

الغريب واللي بقيت أخد بالي منه أوي
إن مطالب مننا نخبي فرحتنا دي عن اللي حوالينا

سواء بقي خوفًا من الغيرة أو الحسد
أو عشان اراعي مشاعر الناس لأي سبب من الأسباب
ساعتها وفجأة هتلاقي نفسك حاجات كتير حلوة بتمر عليك
ومش بتديها حق فرحتها الصح

مثلًا..
في عيد الأم مش مطلوب مننا إننا نجاهر بحبنا لأمهاتنا لأن في ناس محرومة من الأم
في عيد الحب مش المفروض إننا نجاهر بحبنا لأن ده مش من طبيعة مجتمعنا.. بعيدًا عن الحرام والحلال
لو نجحت ماينفعش تعمل هيصة وفرحة عشان المفروض تراعي ناس تانين ربنا مش كرمهم زيك
وينطبق علي ده أمثال كتيييييير
بس لو فكرنا كدة..
ليه أنا ماديش أمي حقها من الحب قبل لا قدر الله ما اتحرم منها زي غيري؟!!؟
وساعتها هقول يارتني مافكرت في أى حد وحسيت بوجود أمي معايا
ليه مافرحش بالحاجة اللي ربنا رزقني بيها أيًا كان أيه الحاجة دي
لان لما يعدي وقتها هاقول أنا ماحستش بفرحتها زي ما كنت متوقعة!
ولا أستغليت إن ربنا كرمني بفرحة عشان قلبي يضحك!

مش عيب إننا نعمل حساب لمشاعر الناس حوالينا
بس مش المفروض إن ده يجي علي حساب احساسنا إحنا بالفرحة

لما ربنا يبعتلك حاجة تفرحك..
وقتها أفرح بضمير ومن قلبك وأنسى أي حاجة تانية لان الفرحة قليلة

readmore »»

الرزق مش بس فلوس

الصورة دي وقفت قدامها شوية وفكرت في حاجات كتير أوي

وفي نفس اليوم جات لي رسالة علي الموبيل فيها نفس المعني بالظبط

وعشان كدة قررت أكتب عن الموضوع ده أول ما الوقت يسمح لي

 

في ناس أوقات بتبص لحياتها من جوه أوي ومن منظور واحد بس

ووقتها بيشوفوا كل حاجة سطحية

أية المشكلة إن أهلي موجودين طيب ما أنا ماليش أصحاب مثلًا

أية المشكلة إن عندي أصحاب ما أنا ماليش أخوات مثلًا 

وحاجات كتير تانية علي نفس الشكل ده

بس اللي تشوفه من جوه كده فكر تبص عليه من فوق بقي

وتشوف حياتك من بره عاملة إزاي

عندك أهلك دول كفاية لأن غيرك أتحرم من أهله بأي شكل من الأشكال

عندك أصحاب أحمد ربنا إن في لسه أصحاب يستاهلوا..غيرك مش عنده

عندك أخوات دول كفاية لأن غيرك نفسه في أخ أو أخت

ولو مش عندك أى حاجة من دول كمثال

دور هتلاقي ربنا شال رزقك من هنا وحطه هنا

أصل كل واحد بياخد رزقه 24 قيراط

متقسمين في مختلف مجالات حياتنا

ما بين أشخاص وفلوس ونجاح وشغل وحب ووووو

لو ربنا أداك في حاجة 2 قيراط هيديك في غيرها 10

الأنسان بس اللي عينيه دايمًا بتيجي علي الحاجات الناقصة

عشان غاوي يظهر نفسه محبط ومظلوم وماخدش حقة من الدنيا

رغم إننا عارفين إن ربنا ماخلقش حد عشان يتظلم.. لأن ربنا هو "العدل" 

بص علي رزقك اللي ربنا قسمه في كل حاجة ليك

 بص علي إن زي ما في أشخاص بيخلوا حياتك أسوء بأقصي ما عندهم

في أشخاص بيحاولوا علي أد ما يقدروا ينوروا حياتك 

ويرسموا الأبتسامة علي ملامحك

وزي ما مريت بلحظات حزن كتير بص شوية هتلاقي الفرح زيه أو أكتر

وزي ما خسرت شخص كسبت قصادة أشخاص كتير

وزي ما في وقت أفتكرت إن الحياة وقفت عند موقف معين 

أنت قدرت بعدها تعدي وتكون أحسن

وزي ما ربنا رزق غيرك بحاجات أنت بتبص لها 

ربنا بردو رزقك بحاجات غيرك بيبص عليها

أحمد ربنا علي رزقك وأكتفي بيه

حياتك كل لحظاتها رزق الحلو منها والوحش

لأن مش بس الفلوس هي اللي رزق

readmore »»

عن وجع الفقد!!

في كل مرة بنفارق حد فيها بنضايق أوي وبنزعل

مش بس علي المرة دي من الفراق

لكن علي كل مرة قلبنا بيتوجع فيها لما حد بيخرج من حياتنا

خصوصًا لو كان خروجه ده بالموت مثلًا

لأن وقتها مش بنقدر نفتكر له إلا كل حاجة  كويسة حصلت

وساعتها مش بس بتتوجع عشان خاطر الشخص ده تحديدًا

لكن بتتوجع عشان أفتكرت تقريبًا كل الأشخاص اللي خسرتهم في حياتك

واللي وارد جدااا يكون الوقت والظروف وحتي أنت نفسك مش سمحتلك تودعهم.

وقتها غير إنك بتتوجع من الفراق

لكن كمان بتحس بالذنب

وبتفكر كتير.. ياتري ممكن حد يروح مني تاني من غير ما أقدر أودعه؟!

لو بكيت ساعتها مش بيكون عشان الموقف المحدد اللي أنت فيه

لكن عشان أحساسك إن وارد جدًا الزمن مش يسمحلك تودع ناس مهمة في حياتك

وفجاة تلاقيهم مابقوش موجودين

وقتها بس لا بكاك بيريح ولا وجعك بيروح!!

"العين أحيانًا بتتعود علي الفُراق.. وبالتالي بـ تبطل تبكي
لكن القلب لازم كل مرة فيه حته تتوجع!"

-كلام والسلام-

readmore »»

عيدكم سعيد :)

كل سنة وإنتم دايمًا بخير

وطيبين و مبسوطين

عيدكم سعيد

عيدكم ملون بلون قلوبكم الصافية ♥

readmore »»

عيدكم بيضحك ツ

كل سنة و إنتم طيبين

عيد سعيد علينا كلنا ياااارب

و ربنا يجعل أيامنا كلها عيد :)

readmore »»

♥ عن كرم ربنا علينا ♥

عارفين إن فى أيام الواحد بيصحى بيبقى حاسس إنها مش بتاعته خالص

بس ربنا لازم يبعتلك حاجة يقولك أنا معاك

لازم يبعتلك حاجة يخليك تقول الحمد لله

لازم يبعتلك حاجة تطبطب على قلبك وتحضن روحك

لما بتقع فى موقف مش عاجبك 

أو تحس إن فى حاجة فى حياتك ماشية غلط

أو تخسر حد كنت شايفة أنة من أهم الناس فى حياتك 
وحياتك مش هتمشى إلا بية

أو أنك ماتقدرش تحقق حلم بتتمناه فى وقت كنت مخطط إنة يتحقق فية

أو انك ماتقدرش توصل لوظيفة معينة أو نجاح معين 

أو أو أو .....

حاجات كتير اوى

لما بتحصل فى وقتها

أنت بتتفكر أن ربنا غضبان عليك

ما هو أكيد اللى يقابل كده فى حياتة

هيقول ربنا مش بيحبنى لأنى مقصر

لأن أكيد كلنا مقصيرين فى إتجاة معين

بس لما بيعدى الوقت وتعدى كل المواقف دى

وتبدأ تبص على حياتك من برة كأن مش أنت اللى عايشها

هتقول أية ده

ده أنا ربنا بيحبنى أوى

لما ربنا خلانى مش قدرت أوصل للحلم الفلانى 
عشان كان هيخلينى أوصل لحلم أكبر كنت بردو بتمناه

لما ربنا خلانى أخسر شخص معين فى حياتى 
عشان أكتشف بعد كده أد ايه حياتى أحسن من غير الشخص ده

لما تخسر وظيفة معينة عشان ربنا يوصلك للأحسن منها

لما بيعدى وقت على كل الحاجات اللى أنت "بتتخيل" أنك فقدتها أو خسرتها أو ربنا مش كتبها ليك

بتكتشف أن ربنا بيكافئك بعدها على صبرك

بيكافئك بعدها بحاجات أجمل بكتير 

أنت نفسك ممكن ماتقدرش تستوعبها

بيكافئك بأنك تأخد حاجات أجمل وأشخاص أفضل

وأجمل مكأفاة أنة بيخليك أنت نفسك من جواك أحسن 
ويمكن متصالح مع نفسك أكتر

ربنا لما بيختبرك ..بيختبرك عشان تشوف أنت مقدار تحملك أية

ولما تتحمل هتقدر تحس بقيمة كل الحاجات الجميلة اللى هتجيلك بعد كدة

اللى أصلا بيتحدد مدى جمالها ده من قوة تحملك وصبرك أنت

 لما بردو بتيجى تشوف مشوار حياتك كلة

هتلاقى إن كل عثراتك 

بيوازيها فى نفس التوقيت او بعدها حاجة تانية ربنا بيرتبهالك تعوضك

لو شوفت حياتك هتلاقى إن حاجات كتير أوى كان ربنا بيبعتهالك تطمنك

ممكن تأخد بالك منها لأنك بتكون مستنيها

وممكن مش تأخد بالك منها لأنك مش بتبقى مركز وقتها غير فى وجعك بس

ودة بردو اللى ممكن يحدد أنت هتقدر تلمسها وتوصلها لما تأخد بالك منها

وإلا هتضيع عليك لو مش خدت بالك منها

لكن الأكيد إنها فى جميع الأحوال هتوصلك لو فعلاً مكتوبالك

لما بتبص لحياتك بالشكل دة

بتطلع على لسانك وقتها كلمة ماينفعش تقول غيرها

 الحمدلله

 ....
الحمد لله الذي لا ينسى من ذكره
والحمد لله الذي لا يُخيب من رجاه
والحمد لله الذي هو ثقتنا حين تنقطع عنا الحيل
والحمد لله الذي هو رجاؤنا حين يسوء ظننا بأعمالنا
والحمد لله الذي يكشف ضُرنا عند كربنا
الحمد لله الذي يجزي بالإحسان إحساناً
الحمد لله الذي يجزي بالصبر نجاةً

....

على الهامش

البوست دة أنا مش عارفة أتكتب فية أية ومش ناوية اراجعة
والمفروض كنت أنزل بوست تانى خالص

بس هو أتكتب لأن فى حاجات كتير جميلة بتحصلى مش ليها كلمة غير الحمدلله

ولأنى قولت الحمدلله البوست اللى فات

حبيت البوست دة يبقى أزاى الحمدلله دى بتيجى جوانا من عند ربنا أصلاً

readmore »»

لعبه القدر !!

كم يشعر المرء بالسخريه والهزل
حين يبدأ غيره من حيث انتهى هو !
كم تود حينها لو أستطعت ان تصرخ بأعلى صوتك
أحذروا ..لقد انتهى بى المطاف حيث النهايه
لن تجدوا اكثر مما وجدته انا
ولكن دائمًا ما يُخبى القدر  ما تعلمته انت لكى يتعلمه غيرك
وبنفس الألم !!

readmore »»

فرحه العيد

من قبل نهايه رمضان باسبوع او اكتر

بتبدا الناس تعمل فى الكحك

بتبقى فى روح حلوه فى البيوت اللى اتعودا يعملوا كحك دايماً

ومش بيحبوا انهم يتخلوا عن الجو ده

وخصوصا لمه الاطفال واستمتاعهم بمشاركه اهلهم فى نقش الكحك

فى بيوت للاسف مش متعودين على العاده دى

ويمكن بيتنا  منهم

فـ مش بنقدر نحس بفرحه عمايل الكحك بالشكل اللى ناس تانيه بتحس بيه

الكحك الجاهز غطى الى حد كبير على الكحك اللى بيتعمل فى البيت

وفى ناس كتير بتشوفها من ناحيه ان كفايه تعب ودوشه

ونجيب الجاهز احسن واريح

وعشان كده

عاده عمايل الكحك فى العيد

من العادات اللى بتختفى مع الوقت

احنا نفسنا مابقناش نحس بفرحه العيد فى حد ذاتها زى قبل كده

زمان كنت فاكره انى بستنى العيد ده بفارغ الصبر

واصحى من بدرى والبس لبس العيد واخرج اقف فى الشارع

حتى لو مش هاخرج فى حته او مش معايا اصحابى

بس اخرج وخلاص

لان ده عيد وماينفعش اقعد فى البيت

بس دلوقتى الموضوع مش بقى كده

العيد زيه زى اى يوم تانى

ممكن اخرج وممكن مش اخرج

انا اه ببقى ساعتها بحقد على الناس اللى بتخرج وانا قاعده فى البيت

بس مش بتبقى مشكله بردو

هى المشكله فى الايام نفسها اللى اختلفت والزمن؟

والا المشكله ان كل ما الواحد يكبر الحاجات الصغيره اللى كانت بتفرحه

بيبقى احساسها عادى؟؟

الاهم من كل ده بقى
كل سنه وانتم طيبين
وان شاء الله يكون عيد سعيد علينا كلنا :)

♥

readmore »»

فكر بره الصندوق

فكر بره الصندوق
جُمله كتير بنسمعها
عشان نوسع تفكيرنا ومداركنا شويه
ونخرج بره صندوق عقلنا اللى بيحكمنا كتير فى تصرفاتنا
بس انا الحقيقه شايفه ان الجُمله دى مش صح فى احيان كتير
افكارنا دى هى صندوق من اختيارنا
لما بنفكر فى حاجه بتبقى عن اقتناع مننا
يعنى الصندوق ده بكل كراكيبه بيعبر عننا واحنا اللى عملناه
ممكن نطور فيه ونخلى اللى جواه افضل
وارد ندخل فيه حاجات جديده
ووارد جدا نخرج منه حاجات مش بقت مناسبه مع الوقت اللى احنا عايشينه
بس مش هينفع نخرج بره منه خالص
والا ساعتها مش هنبقى احنا اصلاً !!

readmore »»

يعنى ايه أمل فى بكره ؟

يعنى اصحى الصبح وفى ابتسامه جوه قلبى لانى عارفه انه يوم مختلف

يعنى اول حاجه افكر اشوفها هى اخبار الانتخابات عشان اعرف اهم الاحداث

يعنى يبقى كل واحد فى البيت هيختار مرشح مختلف عن التانى عن اقتناع داخلى منه

يعنى كل واحد فينا يقعد يتناقش مع اللى حواليه من غير ما يحاول يغير رأى اى حد فيهم

يعنى نبقى كلنا بندعى بحاجه واحده مش لمرشح معين لكن ان ربنا يولي الاصلح لينا

يعنى كل واحد فينا يبقى نازل رايح اللجنه بكل حماس

يعنى يبقى كل واحد ملتزم بمكانه بكل هدوء وحب برغم الحر والزحمه

يعنى نبقى لاخر لحظه قدام اللجنه محتارين وبنفكر عشان عايزين نختار انسب واحد ومقتنعين ان صوتنا ده امانه

يعنى لاول مره ابص لفرد جيش بنظره مع ابتسامه جوايا

يعنى الاقى طفل نازل مع مامته من اللجنه مبسوط وبيجرى عشان انتخب

يعنى اشوف ام شايله ابنها اللى مش اتعدى شهور لانها حريصه انها تدى صوتها فى الانتخابات

يعنى نكون لاخر لحظه وبرغم كل التكهنات مش قادرين نعرف مين اللى ممكن يكسب

يعنى نبقى قاعدين مستنين النتيجه ولا كأننا مستنين نتيجه الثانويه العامه

يعنى يبقى جوانا حلم والامل اللى فى قلوبنا يخلينا واثقين ان الحلم ده هيتحقق :)

23/5/2012

readmore »»

مقاسك ايه؟؟

اهو احنا كده

الدنيا دايماً مقاسها كبير علينا

واحنا بكل الكيان ده صغيرين اوى فيها

بنمشى فيها نتخبط هنا وهنا غصب عننا

قليل اوى لما نفكر او نقدر نمشى فيها على مقاسنا

وفى ناس بتعيش وتموت

وماتعرفش مقاسها فى الدنيا ايه اصلاً !!

readmore »»

انا ضد البرادعى !!

انا ضد البرادعى من زمان من قبل الثوره 

ومش حابه ظهوره المفاجئ ده

وكأنه هو المفجر للثوره مثلاً

بس ماكنتش ضد الناس اللى بيشجعوه او عندهم استعداد يختاروه

كل واحد ليه رأيه وتفكيره وهو حر فيه

كنت من انصار عمرو موسى صراحه

بما ان هو شخصيه سياسيه وفاهم فى العلاقات الخارجيه 

 وقادر يتعامل كويس داخلياً

بدليل ان ناس كتير بتحبه من زمان

بس شيلت فى نفسيتى اوى منك ياعمرو يا موسى

ساعه احداث نوفمبر

لما طلعت فى السى بى سى

وتقول الثوار المفروض يمشوا من التحرير 

ونكون مع الجيش ايد واحده عشان نعدى الفتره دى

طب وبالنسبه للشهداء اللى ماتوا ماخدتش بالك منهم والا ايه ظروفك؟؟

فا بقى ليا تحفظ عليه 

وعندى استعداد ابقى من انصار اى حد غيره 

وادخل فى دماغ حد اقتنع بيه اكتر

لما شوفت لقاء البرادعى مع مجدى الجلاد

مش كان عندى استعداد اسمعه او اقتنع بيه

هى دماغى كده بتبقى جزمه لما بتقفل

بس بصراحه الراجل كلامه مايتعيبش

اول حاجه كلامه بسيط اوووى

يعنى الناس اللى مش متعلمه تفهم كلامه

يعنى طريقته مش متصنعه ولا متكبره 

ولا حافظله كلمتين كبار كده جاى يتمنظر علينا بيهم

لو بقى رئيس هتبقى طريقته وكلامه قريب اوى من الناس البسيطه

ثانياُ بيتكلم بزوق جدا حتى لما بيوجهله سؤال من مشاهدين مستهبلين

بيرد بزوق واحترام

وثالثاً لما اتكلم على اللى المفروض يكون من اولويات اهتماماتنا 

وطريقنا لاصلاح البلد

كان كلامه منطقى جدا وممكن يتعمل مش شئ مستحيل

فا تفائلت بيه الحقيقه

وعندى استعداد افتح دماغى اللى قفلت من ناحيته دى

حاجه على الهامش بقى

كلام البرادعى فكرنى بيها

لانه اتكلم عن مساحه الحريه المفروضه لكل واحد فينا

واللى ماينفعش حد تانى يتعداها

هو ايه اللى يدى الحق لاى انسان انه تجبر حد يعمل حاجه مش عايز يعملها

ايه بقى اللى يخلى المرشح المبجل لحزب النور

 يجبر مذيعه القناه الرابعه انها تلبس الحجاب 

عشان يتكرم ويرضى يعمل معاها حوار؟!؟

لا ويقولها البسيه دلوقتى بمزاجك 

ما انتم هتلبسوه بعد كده غصب عنكم !!!

(ده حسب كلام المذيعه نفسها)

 لما هى مش لبسته عشان ربنا يبقى هتلبسه عشانك انت ازاى !!!

readmore »»

Forgive Or ... !!

من تعاليم اى دين سماوى
ان احنا لازم نتسامح ونعيش فى حب دايماً
ولو حد ضايقك فى حاجه عديها
وخليك انت الاحسن وأبدأ بالسلام
وأبدأ بالنيه الصافيه بالحب
من غير ما تبص بقى
اذا كان اللى قدامك هيتقبل اللى انت بتعمله ده
بنفس التسامح والحب والنيه الصافيه والا لا
ودى حاجه كويسه ديننا بيعودنا عليها
اننا نحاول نكون نيتنا صافيه دايماً
عايشين فى راحه وامان مع بعضنا
لان لو كل واحد شايل جواه حاجه وحشه لحد
مش هنقدر نعيش فى راحه بال
ده غير انك كمان بتاخد حسنات على بدأيتك بالسلام والتسامح

طب انا عايزه اعرف حاجه
بما انى يعنى من الناس اللى مش بتعرف تسامح
هو مش كتر التسامح ده
فى الزمن الجميل اللى احنا فيه ده
ممكن يخلى اللى حواليك يفتكروا انك ضعيف وماعندكش شخصيه؟؟

طب بلاش دى
مش ممكن بردو يفتكروا انك مفيش عندك كرامه
يعنى واحد بيغلط فيك وبيسئ ليك وبيظلمك دايماً
وانت بتسامحه

مره واتنين وتلاته
فين كرامتك اللى بتدافع بيها عن نفسك؟
ما انت لو كل مره تروح تبدأ انت بالسلام
اللى قدامك ممكن يقول فى مره ماعندكش كرامه!
وبعدين المؤمن لا يلدغ من جحر مرتين

هو ايه الصح فيهم بقى ؟!!؟

readmore »»

صوت الحريه

احساس الانتخابات النهارده مختلف بكتير حتى عن الاستفتاء

ان الناس كلها عايزه تنزل

واقفين فى الشارع بالساعات

مش عشان فى غرامه زى ما بيقولوا

بس عشان عايزين يعملوا ده

فى حماس كبير جوه كل الناس عشان فرحانين بالتغيير ده

ناس سنهم كبير وناس تعبانين 

واللى رجلها مكسوره واللى عامله عمليه

وكلهم عندهم نفس الروح انهم يعيشوا اللحظه دى

 اننا ننزل اصلا عشان ننتخب لاول مره فى حياتنا

من غير ما نكون مستنين بطاقه انتخابيه 

والا نكون عارفين ان صوتنا اصلاً مش هيفرق

مع ان وارد يكون فى شك جوه ناس مننا انه مش هيفرق اوى المره دى كمان

بس كخطوه اولى

تدعو للتفائل

حتى لو كنت بطلت صوتى

بس ايه اللى يجبرنى اختار ناس انا مش مقتنعه بيها

وانى ببطلان صوتى ده يبقى انا بضيع حق الشهداء او انى سلبيه

وهو انا لما انتخب حد مش يستحق مش يبقى كده بضيع حقهم بردو؟!؟؟

بس فكره انى انزل الانتخابات

وانا عمرى ما فكرت اعرف مين المرشحين فى الدايره بتاعتى اصلاً

دى لوحدها اختلاف كبير جوايا

ده مايمنعش بردو ان فى مخالفات كتير موجوده

منها الدعايه اللى ظهرت فجأه قدام اللجان

كنتوا فين قبل كده؟!؟

ده غير ان الكلام ده مخالف قانوناً اصلا

والحق يتقال

كانت الدعايه الاول للاخوان وده كان عامل تخفظ كبير عليهم

بس مع الوقت بقت للكل وكله بيوزع ورق

الحريه والعداله اللى كنت ملحظاه انهم معتمدين على الناس اللى مايعرفوش اى معلومه عن السياسه

او بمعنى اصح مش بيدورا فا بيدورلهم بنفسهم

زى ان كل واحد واخد لاب توبه وفلاشته وقاعد فى اى ركن كده

يجيب للناس ارقام اللجان ويقولهم انتخبوا الحزب بتاعنا

وفى واحد تانى مرشح فردى

اعتمد على ان الناس متقسمه كل واحد فى حته

وعامل اتوبيسات بتوصل الناس للجان بنفسهم بشرط انهم يتخبوهم

مطلع رحلات للجان يعنى وكل واحد يجى ومعاه ساندوتشاته !!

حتى مع كل التجاوزات دى

مبروك علينا خطوه جديده فى احساسنا بجد بالحريه

readmore »»

مصر تبكى أسفاً...!!

الواحد بجد دماغه واقفه ومش عارف يقول ايه بالظبط

المفروض كان فى يوم امتناع عن التدوين فى حمله التدوين اليومى

حداد على الشهداء وتضامناً مع الثوار فى التحرير

بس اليوم طول معانا شويه وبقوا كذا يوم

ايه القسوه دى

ايه كل اللى بيحصلنا ده

انا فعلا من الناس اللى عاشت الثوره فى الاعاده

لانى للاسف مالحقتهاش اول مره

فى العرض الاول

يوم 25 يناير

كان الوضع كله غريب ومتنحه وفى حاله اكتئاب مزمن بسبب اللى بيحصل

ولانه كان اول مره يحصل ماحدش كان فاهم مين الصح ومين الغلط

وكنت بتفرج اوقات على القناه الاولى زى ناس كتير اوى

بعد التنحى كنت حاسه بخوف من اللى جاى

وانه يمكن يكون اصعب

بس مع الايام احساسى بالخوف قل

فى الاعاده

يوم 19 نوفمبر

كان يوم مأساوى

ماينفعش نقول عليه غير كده

شايفه كل حاجه من اولها بعيداً بقى عن القناه الاولى خالص

الناس اللى بتموت عشان بس بتطلب حقها

الناس اللى عنيها بتروح عشان بيحلموا يشوفوا بلدهم احسن بلد فى الدنيا

شايفه الشباب اللى بتضرب ويترموا فى الزباله

شايفه الامن المركزى وهو قاصد انه ينشن فى عين الثوار

شايفه البنت اللى بيسحلوها من شعرها فى الشارع

انت لو اخوك او اختك بيتعمل فيهم كده هتعمل ايه

دايما بنقول على الامن المركزى اغبياء ومش بيفهموا حاجه

بس مش وصلت معاهم لعدم وجود الاحساس كمان

انهم يضربوا انسان زيه زيهم بالرصاص الحى والخراطيش

انهم يرشوهم بغاز من الاسلحه الكيميائيه

ده احنا لو فى حرب هتفكر قبل ما تستخدمه

انما شباب من بلدك وزيهم زيك تضربهم بالطريقه دى ليه

الاحداث نفسها بكل تفاصيلها بتكرر

شهداء بتموت عشان بيتظاهروا تظاهر سلمى وبيتقال عليهم بلطجيه

نفس البيانات بنفس تفاصيلها "مع اختلاف الاوضاع السياسيه "حتى بنفس بعض الكلمات فيها

يعنى مبارك قال لا انتوى الترشح

والمشير قال لم يكن يطمع فى مش عارف ايه

نفسي اشوف مين الغبى اللى بيكتبلهم الكلام الجزمه ده

مبارك قدر فى خطابه اللى قبل التنحى يكسب تعاطف الناس

والناس اختلفت جزء متعاطف معاه وبيقول نديله فرصته

وجزء بيقول لا ده بيستموت ويعيش الدور 

لحد ما يظبط فلوسه ويطفش ويسبها خربانه

انما المشير ابن الايه عمل حركه بنت لذينه صراحه وطلع انصح من مبارك

قال نعمل استفتاء

عشان بردو الشعب يختلف ما بين مؤيد ومعارض للاستفتاء ده

لو انت عارضت تبقى ضد الديمقراطيه

ولو وافقت ابقى قول للديمقراطيه خالتى بتسلم عليكى

لما انتوا مش قادرين تستحملوا ولا تسمعوا ولا تفهموا صوت الناس اللى فى التحرير

يبقى هتقدروا تسمعوا صوتنا فى الاستفتاء ازاى

وبعدين مين يثق اصلا فى استفتاء اللى هيقولوا نتيجته بيموتوا فى الشباب وبيرشوهم بغازات سامه !!

لو انا واحده من الناس اللى مش قادرين ينزلوا التحرير

يبقى كل اللى اقدر عليه واحاول اعمله

انى احاول افهم الناس اللى اعرفهم

اهلى اصحابى قرايبى جيرانى

اللى مش فاهمين الصح

ولسه مصدقين ان اللى فى التحرير دول بلطجيه وهدفهم يخربوا البلد

يشوفوا الفيديوهات والصور والناس اللى بتموت وتتسحل وتترمى فى الزباله

وبيضربوا ويشموا غاز بيدمرهم

عشان يصدقوا الحقيقه ويشوفوها بعنيهم

الناس اللى على النت قادره توصل لكل الكلام ده

بس اللى مش بيعرفوا فى النت حاجه

مش قدامهم غير التليفزيون يفهموا منه

وده مبقاش مضمون اليومين دول

فا من حقهم علينا اننا نفهمهم

readmore »»

الثوره راحت فين ؟!!؟

هو ايه اللى بيحصل بقى

ها؟

حد فاهم كده يفهمنى؟؟

تقريبا والله اعلم ان اللى بيحصل ده الطبعه التانيه من الثوره

اصل الطبعه الاولى نفذت

حاسه ان كل حاجه بتكرر بحذافيرها

كان بيتهيألى ان حسنى مبارك هيطلع يقولنا بيان 

ويأكد ان جمال مش هيرشح نفسه ولا هو هيترشح تانى

كأن ولا 11 شهر عدوا ولا اى نيله حصلت

الثوره اتعملت ليه؟

مش عشان حسنى مبارك يمشى

بس عشان زى ما الشعب كله كان بيطالب

انه يغير النظام

شخص واحد مشى

انما جذور تفكيره واسلوبه ونظامه لسه جوه كل سُلطه فى مصر

احنا زى ما احنا

لسه كله مختلف فى رأيه عن التانى شويه ضد الاعتصام وشويه معاه

لسه ناس بتموت فى التحرير عشان بتقول رأيها

لسه بردو اللى بيحصل ده اجندات خارجيه

لسه كل اللى فى التحرير بلطجيه وعملاء ومدربين بره

لسه فى مدنين بيتحاكموا محاكمه عسكريه غصب عن عين اهلنا

لسه بنضرب بالقنابل والغاز

لسه حياتنا ولا ليها اى 30 لازمه عندهم

لسه احنا مش حاسيين بالثوره

لسه للاسف مش عارفين ناخد حقنا

الا بالمناسبه بقى

حد يقولى هى الثوره راحت فين؟

كانت جايه زياره مثلا من 25 يناير لـ 11 فبراير وبعدين سافرت؟

والا كانت ترانزيت وبعدين رجعت مكان ما جت؟

بالمناسبه كمان بقى

هو فين عصام شرف؟

هو مش ده بردو اللى كان راجل من الميدان وبتاع الثوار واحنا عايزينه

بيعمل ايه بقى ده دلوقتى؟

بيتابع الاخبار على الفيس بوك وتويتر؟

يا فرحتى بيه

ياخوفى بعد كده اللى يترشح للرياسه يصدر قرارات عبر الفيس بوك 

ويعمل للوزراء تاج ويستنى يوافقوا عبر اللايك !!!

اهم كلمه سمعتها النهارده من ماما

يافرحه مبارك فينا وفى اللى بيحصل دلوقتى !!!

readmore »»

اتبرع ولو بجنيه .. !!

فى دول كتير اتدمرت

وقدرت ترجع تانى زى ما كانت واكبر بكتير كمان

زى اليابان والصين

اللى بقوا من اهم الدول على مستوى العالم كله وخصوصا تجارياً

دوله زى العراق مثلاً

امريكا دخلتها ودمرت كتير فيها

لما فكروا يقفوا تانى

عملوا اعلانات وحملات توعيه كتير
عشان شعب العراق يبطل كسل وكله يشتغل مع بعضه

عملوا اعلانات لـتنشيط مجالات مختلفه عندهم زى مثلاً الاتصالات

واهم مطرب عندهم اللى هو كاظم الساهر استخدموه كوجه اعلانى محبوب
ومطرب معروف جدا كدعايه للدوله اكتر من انها تكون دعايه 
لشركه الاتصالات نفسها

لمجرد انهم يوصلوا احساس للعالم كله

ان العراق لسه موجوده وهتفضل موجوده

وغيرها وغيرها من بلاد تانيه كتير

اما احنا

لما حصلت ثوره عندنا وادمرت حاجات كتير 
سواء مادياً او فكرياً او حتى معنوياً جوانا

مش فكرنا نعمل كده

مش فالحين غير فى اعلانات الشحاته وبس

معلش على اللفظ

بس لو بصينا على كل الاعلانات بعيداً طبعا عن الاعلانات التجاريه

هنلاقى اعلانات زى
اكفل طفل يتيم

اتبرع ولو بجنيه

ساهم فى اطعام مسكين

اتبرع لقريه صغيره

اتبرع .. ادفع ... ساهم

حاجات كتير اوى على نفس المنوال

انا طبعا مش بقلل ابداً من اى حمله من دول

ولا بقول انها حاجات مش مهمه

بالعكس المفروض كلنا فعلاً نكون حاسيين ان فى ناس غيرنا محتاجين

واحنا لازم نقف جنبهم

بس الفكره فى ان صعب اوووى كل الاعلانات تبقى بالمنظر ده

ليه اعلامنا يعيش دور الشحاته بالطريقه دى

ليه مفيش اعلانات وحملات توعيه كتير زى باقى الدول

اللهم الا يعنى حاجات قليله اووووى
وقليل مننا اللى شافها لانها فى جميع الاحوال مش بتبقى واخده حقها
ده غير كمان ان لما بتحصل عندنا حمله توعيه

بتبقى لغرض محدد فى فتره زمنيه معينه وبينتهى

زى مثلا الحمله اللى طلبت بـ"لا" فى الاستفتاء

واللى مش كانت حمله توعيه

دى كانت حمله اجبار على التصويت لجانب على حساب جانب اخر

لانها لو كانت حمله توعيه بجد

كانوا جابوا جزء من الفنانين والشخصيات المهمه 
يقولوا هيختاروا نعم ليه

ولا ليه

وكده يبقى عرضنا جميع الاتجاهات ونبعد عن التحيز لجهه معينه
ويسيبوا الناس تقرر وتختار براحتهم

لكن ده للاسف ماحصلش

ومش بيحصل فى اى حاجه

 ليه الاعلام عندنا او منتجين الاعلانات اللى خنقونا باعلانات تافهه

مش بيحاولوا يشجعونا ويدعمونا اننا نقف لبلدنا

ونوصل بيها لمستوى احسن
ويفتحولنا مجالات كتير نقدر نقدم فيها حاجه

ليه كل اللى بيقدروا عليه

انهم يجيبوا اتنين فى برنامج كل واحد فيهم بيتكلم فى اتجاه

واحنا اللى بنتوه معاهم فى النص

لا احنا استفادنا حاجه ولا هما استفادوا حاجه من لغبطتنا دى

زى ما بندور على ناس يتبرعوا للمحتاجين

ليه مش بندور على ناس تبنى البلد من جديد؟؟

readmore »»

27/6.... ChallengE ....

لما واحد بيدخل منافسه

مش بيدخل منافسه عشان يثبت لنفسه انه كويس اوى وشاطر

لكن بيدخلها عشان يثبت لنفسه وللى حواليه

انه افضل من اللى بينافسهم تحديداً

التنافس بيخلق روح التحدى جوه اى حد فينا

بس بحس انه تحدى مؤقت

عشان بتتنافس فا انت هتتحدى اللى بتنافسهم دول

بس بعد ما المنافسه دى تخلص

التحدى اللى جواك هيقل

واحتمال كبير يختفى

ادام اتولد مع المنافسه دى بالذات

الكلام ده بيفكرى بايام المدرسه

لما يفضل طالب يطلع الاول دايما

ومفيش معاه اى حد بينافسه

هيجى عليه وقت ويزهق ومش هيبقى عنده روح التحدى

فا انه دايما يذاكر عشان يطلع الاول

هيقول بينه وبين نفسه

ما انا دايما الاول

هتفرق ايه بقى

بالظبط ده فى حياتنا كلنا على اختلاف المستويات

فى الدراسه وفى الشغل وفى حياتنا عموما

المشكله ان المنافسه دى ممكن تقلب بشكل تانى

وهو الغيره

الغيره من اللى حواليك لانهم مثلا بيتخطوك فى اى منافسه

فى غيره كويسه هتوصلك للاحسن

وفى غيره هتوصلك للاسوء

غيره هترجعك لورا 

وانك مش قادر تبقى فى حجم اللى بتنافسهم

وهتبقى دايما حاططهم قدام عينيك

وعايز تبقى زيهم

مش تبقى نفسك

ولما ماتعرفش تبقى زيهم

ولا تبقى نفسك

هتبقى حد ماتعرفوش اصلا

ودى اكتر حاجه بتوجع

readmore »»