5/6... بــحــبــك ليه

لما اتمنى حاجه والاقيك بتحققهالى من قبل ما اقولها
ده بيخلينى احبك

لما تبصلى فجأه وتسرح واتكسف واقولك مش تبصلى كده وتقولى مش عارف
ده بيخلينى احبك

لما اعمل حاجه فجأه تفرحك والاقى عينيك نفسها بتضحك
ده بيخلينى احبك

حتى لما ترخم عليا وتقعد تقلدنى
ده بيخلينى احبك

لما اقولك حبيبى انا عايزه حاجه وانت من قبل ما تعرف تقولى أامرى يا عيون حبيبك
ده بيخلينى احبك اكتر

لما نبقى ماشيين فى الشارع بنهزر ونضحك ونخانق فى بعض وناسيين ان فى ناس حوالينا
ده بيخلينى احبك اكتر

لما نكون فى المترو وتعذبنى عشان تدينى التذكره لانك بتحب ترخم عليا .. بردو
ده بيخلينى احبك اكتر

لما الاقى ان اى حد يعرفنى ويتعرف عليك بيحبك اوووى من غير سبب
ده بيخلينى احبك اكتر

لما نكون فى وسط ناس وتبصلى وتهمس شفايفك "بحبك" من غير ما اى حد يشوفك
ده بيخلينى احبك اكتر

لما فجأه نقول نفس الكلمه فى نفس اللحظه ونضحك اوى
ده بيخلينى احبك اكتر

لما تكون عايز تبقى معايا فى كل واصغر تفصيله بعملها فى يومى
ده بيخلينى احبك اكتر

لما ابصلك واقولك بحبك واحس انها اقل من اللى جوايا ليك
ده بيخلينى احبك اكتر

لما قربك منى بينسينى الوقت والناس ومش بسمع غير صوت نفسك واشم ريحتك
ده بيخلينى احبك اكتر

لما قربك منى بيخلينى عايزه ابقى حته منك واتنفس من كل نفس بتتنفسه
ده بيخلينى احبك اكتر

لما الاقيك بتعمل حاجات مش متعود تعملها لكن بتعملها لاول مره بس عشان ترضينى
ده بيخلينى احبك اكتر

لما تتحمل وتستوعب جنانى وعصبيتى بكل هدوء وحنيه
ده بيخلينى احبك اكتر

لما الاقيك جاى تسمعنى اغنيه رومانسيه رغم انك اصلا مش متابع اغانى خالص
ده بيخلينى احبك اكتر

لما تتصل بيا فى عز ما انت عندك شغل عشان تقولى وحشتينى
ده بيخلينى احبك اكتر

لما ابص على ايدى واشوف دبلتك واعرف اد ايه حياتى اتغيرت ولسه هتتغير
ده بيخلينى احبك اكتر واكتر


بعد الكلام ده كله
لما اقولك بحبك
اوعى تقولى اشمعنا

readmore »»

4/6... مش هنتغير؟؟؟

الشعب عمل ثوره ده كان شئ متوقع بس مش بالطريقه دى
والحمدالله نجحت ووصلنا للى كنا عايزينه
بس فى نتيجه مهمه اووى لسه ماحصلتش
ان فى ناس كتير لسه نفسيتها زى ما هى
وشخصيتهم زى ما هى
مش هاقولك فلول النظام والكلام الكبير اللى انا مش فاهماه ده
بس اللى متلاحظ اوى
ان فى ناس زى ما هى
ماتغيرتش
لا التغير اثر فيها ولا الثوره جابت نتيجه
لسه فى ناس مش بتحافظ ع البلد
لسه فى ناس مش بتحافظ على نظافه الشوارع
لسه فى ناس مش بتكسر اشارات المرور
لسه فى موظفين مش بيشوفوا شغلهم كويس
لسه فى ناس بتاخد رشوه عشان تمشيلك امورك
لسه فى ناس عندها استعداد تدفع رشوه عشان تمشى امورها
لسه فى ظباط مش محترمين البدله اللى لابسنها
ومش قادرين يفهموا انها تكليف مهم مش شئ بسيط
لسه فى ناس بيعتقلوا ويتعذبوا
هو جزء من الشعب اصلا كده؟؟
والا مثلا النظام السابق كان بهت عليهم وخلاهم زيه؟؟
يعنى النظام اتعمل ضده ثوره وكله سقط
الناس دى بقى
يتعملهم ثوره ضدهم؟
والا يتقدملهم على هجره لكوالالمبور مثلا؟؟

readmore »»

3/6....جاتكم خيبه

هى الناس دى فاضيه؟؟
الواد وليام والبت كيت دول هيجيبوا للواحد شلل
يعنى بعد ما جابولنا ازبهلال بسبب فرحهم المتواضع اوى ده
وكميه الفلوس اللى اتصرفت فيه دى
والناس اللى اتشحططت ياعينى من كل حته شويه
عشان يشوفوا المنيلين دول وهما بيتجوزوا
فى الاخر يطلقوا؟؟
طب كان عليهم بأيه من الاول
وذنبنا احنا ايه معاهم
مش كانوا يتبرعولنا بفلوس الفرح دى كلها
دى احنا دوله لسه خارجه من ثوره وحالتها صعبه يعنى
مش كانت نفعتنا الفلوس دى احنا اولى منهم
بدل ما هما بيلعبوا كده
لما هما كانوا ناويين على شهر بس
ما كانوا ضربولهم ورقه عرفى بدل وجع الدماغ اللى عملوه ده :D
والا اصلا الناس دى مش بتحتاج ورق عرفى يعنى هى هتفرق معاهم :D

الموضوع ده بردو
خلانى افكر فى كذا موقف قدامى
ناس كتير بتتجوز وتتطلق بعد فتره قليله اوى
وممكن يكونوا الاتنين كانوا بيحبوا بعض من قبلها
الجواز مش حاجه سهله
والطلاق اصعب منه بكتير كمان
الخسائر بتبقى على الطرفين وان كانت على البنت اكتر
بس انا عايزه اعرف الاتنين اللى لسه بدأين حياتهم مع بعض
وبيحاولوا لسه يبنوها سوا
بيكون تفكيرهم ايه لما يقررو فجاه انهم يهدموا كل احلامهم دى فى لحظه
ده ان كان فى بدايه الجواز
فى الاول بيكونوا لسه فى بدايتهم مش حمل صدمه زى دى
والاهم لو هما بيحبوا بعض كمان
ولو بعد فتره عشره بينهم
لان بعد فتره بيكون بينهم حاجات كتير صعب انها تنتهى
ياترى دى بيكون بسبب ايه؟
اختلاف فى وجهات النظر مش بيبان الا بعد الجواز؟
والا قله خبره فى الحياه مثلا؟
والا بس نصيب؟؟

readmore »»

2/6

كنت دايما استغرب ان فى ناس يبقى فعلا معاهم كل حاجه ومضايقين
واقول انا لو مكانهم اكيد عمرى ما هابقى زعلانه
بس مع الوقت بدأت احس انى غلطانه
وبقيت احاول افهم هما ليه الناس دى كده
يعنى ايه الواحد يبقى عنده كل حاجه ممكن يكون بيبحبها
او عايزها او نفسه فيها
بس بردو فى حاجه لسه مش موجوده
فى حته لسه ناقصاه
مش شرط شئ مادى
بس ممكن اكتر يبقى شئ معنوى
هو ده طمع؟
والا ده عدم رضا؟
الواحد لسه عايز اكتر من اللى عنده
واللى عنده مش مكفيه ولا مالى عينه
هى دى طبيعه بشريه فى اى واحد فينا؟
كل ما يوصل لحاجه بيبقى عايز اللى بعدها؟
يعنى ده طمع فى الطبيعه البشريه نفسها
والا ده طمع من شخصيات معينه مش بيملى عينهم حاجه؟

احلى حاجه بجد
ان الواحد يبقى راضى بكل حاجه حواليه
راضى عن نفسه
راضى عن الشخصيات اللى بيقابلها فى حياته
راضى عن ظروف الحياه اللى بيمر بيها
وكمان يكون متصالح مع نفسه
بس ياترى هو كل واحد فينا ممكن يوصل للاحساس ده بسهوله؟؟؟

readmore »»

1/6...حمله التدوين اليومى

عاجبتنى فكره التدوين اليومى دى جدااا
رغم انى عارفاها متاخر
بس نويت والنيه لله كده انى اعملها
وربنا يستر بقى
رغم انى مش بقيت اكتب كتير ولا بشكل منتظم
بس انى اقدر اجى كل يوم هنا واكتب
حساها تحدى ليا
وكمان يمكن اقول حاجات مش فى دماغى اقولها
واتمنى انى اكمل فيها واكون قد التحدى ده

تحديث
انا مش مقرره ال 30 بوست هاكتب فيهم ايه
انا سايباها بظروفها
واللى بيجى فى دماغه هاكتبه
ولذلك مش شرط اختار اسماء للتدوينات
لان مش كل حاجه هاكتبها هيبقالها عنوان واضح

readmore »»