بداية الحوليات :)

كنت مستنية زى كل سنة إن حملة التدوين اليومي فى شهر 7 اللي كان 6 اول ما بدأنا إنها تبقي بداية عشان ارجع انتظم فى التدوين تاني
بس لما بقي الموضوع تدوين يومي لمدة سنة .. لا كدة حكاية تانية خالص
وكالعادة قبل ما اسمح لنفسي الضعيفة والحته السودة اللى جوايا 

تقولي مش هتقدري
قولت إني هشارك
بالرغم من إن الفكرة ممتعة لحد فى نفس الوقت مرعبة .. حقيقي مرعبة
أنا بخاف أصلا من فكرة كتابة المذكرات
اصل التدوين اليومي ده عامل زى المذكرات بالظبط
صعب نكون بندون كل يوم ولما تقابلنا حاجة فى يومنا مش هنكتب عنها
بالعكس ده التدوين اليومي ده بيخلينا ننتبة لكل و أقل حاجة بنقابلها سواء وإحنا برة و إحنا قاعدين في البيت وإحنا فى الشغل عشان نكتب عنها
فـ حكاية إني أحياناً هسجل حاجات من حياتي لمدة سنة سواء بقي بطريقة أدبية وا حتي بفضفضة زى ما بعمل.. أنا مش متخيلاها
بس فى الأخر أنا مع الركب وقررت أشترك
متاكدة إن في أيام هتقع مني لأي ظروف ممكن أمر بيها
ومتاكدة إن هيجى أيام مش هاعرف اكتب ايه
ودي قررت أحاول اتغلب عليها بكذا حاجة بقي
أني مثلا هتكلم عن اى فكرة صغيرة
ياما هافضفض وخلاص 

أو لو عاملة أكلة جديدة ممكن اجربها فيكم و أنزلها وبعد كده انا بعيد عن الموضوع أنا بقولكم اهو :D
على اد ما انا مرعوبة على اد ما انا متحمسة

من دلوقتي ولمدة سنة إن شاء الله هتلاقوني في مدونة حوليات بنت من الزمن ده

مش معني كده إني مش هاكتب هنا .. لا خالص

كل كام يوم هنزل بوست من بوستات الحوليات هنا بالمتزامن مع نزوله هناك

أصل في تدوينات بحب أحتفظ بيها هنا

هنا الأساس في كل حاجة حلوة :) 

كنت فكرت كمان أعمل زى فهرس شهري للتدوينات من هنا وانزلها علي المدونة الرئيسية للي يحب يتابع
أو إني انزل البوست بشكل يومي هناك زى هنا
لو حد شايف إي فكرة فيهم أفضل يرشحلي

readmore »»

عن كرم ربنا علينا :) .. لتانى مرة

بصراحة انا لما بيسيطر عليا احساس معين بيبقى كل حاجة بكتبها أو بقولها أو بحسها فى صمت مصبوغة بنفس الأحساس ده

واحساسى دلوقتى إن ربنا كريم أوى معايا ومعانا كلنا

يمكن أكون تناسيت الأحساس ده للحظات

بس بعد شوية وقت صغيرين رجعتلى فكرتى المعتادة
إن لما ربنا بيختارلك حاجة بالتأكيد بتكون هى الأحسن ليك

حتى لو أنت مش شايف ده

بس مع الوقت ومع الظروف اللى هتمر بيها بعد كده

هتعرف إن اللى ربنا اختاره ليك كان أحسن ووصلك لحاجات أفضل

لما خسرت حاجة مهمة أوى فى حياتى وربنا بعتلى رسالة قبلها فى حلم

ولأنى عارفة إن كالعادة كل أحلامى الوحشة للأسف بتتحقق

وحتى بعد ما كل اللى حكيتلة الحلم رفض يقولى تفسيرة

بس ماكنوش عارفين إن من نغّم ربنا عليا إنى بقدر أفهم احلامى
وعرفت الرسالة بس حبيت أفرح شوية :)

وبعدها لما اتوجعت بوجع صعب يتوصف بكلام
ودموع كتير ماكنش ليها وصف
واكتئاب كان على وشك يسيطر عليا ويوقعنى كتير

وقتها قولت الحمدالله بس بردو كان لسة فى حتة وجعانى
لكن ربنا خلانى احس بسرعة أوى إنى فيا حاجة غلط

وخلانى أفتكر إن طول حياتى لما كنت بخسر حاجة وأزعل عليها
كان بيعرفنى بعد كده إنى غلطانة وبيعوضنى كتيييير أوى

وبقى كل ما حد يسألنى هو اية اللى حصلك؟

ارد وفى ابتسامة جوه قلبى من كرم ربنا 

وابتسامة على وشى واقولهم ربنا مش اراد الحمدالله :)))

مانكرش إن محمد اكتر حد خلانى اكون احسن مع ابتسامتة وكلامة الحلو وكلمة الحمدالله اللى مش كانت بتفارقة 

واللى كان بيخلينى انا كمان اقولها

الفترة اللى فاتت حسيت إن ربنا بيبعتلى رسايل كتير اوووى
تعرفنى إنى لازم ابقى مبسوطة بكل حاجة بتحصلى

لازم ابقى سعيدة بكل حاجة وصلتلها
زى كلمة تخلينى مبسوطة من حد ماعرفوش
زى رسالة من بنوتة جميلة تقولى اد اية كلامى مأثر فيها
ونفسها أكتب عن احساسها فى كلام والسلام
زى إن كاتب كبير يشيد بكتابى
زى إن ناس مش عارفانى أصلا وتبقى بتحبنى
زى إن ربنا يخلينا كل يوم بتعرف على ناس جميلة أوى
كل ده حاجات لازم تخلينى مبسوطة حتى لو أنا اصلاً مش عايزة ابقى مبسوطة !

ولو حصلت حاجة وحشة عادى ما هو حاجة وحشة فى وسط كل الحاجات الحلوة دى هتوه ومش هتتحس

وإنى بالعند فى أى حد بيحاول يحبطنى بأى حاجة .. أنا قادرة أوصل وقادرة اكون مبسوطة (وش مطلع لسانة)

لما بتسيب كل حاجة على ربنا وتعمل اللى عليك وتبطل تجرى ورا كل حاجة كده

سبحان الله هتلاقى كل حاجة انت عايزها بتيجى لحد عندك حتى لو انت شايفها صعبة ومش ممكنة

طيب عارف انت بقى لما كل حاجة تضايق بتحصلك
او حاجة مهمة تضيع منك و تسيب كل ده ومش تفكر فيه

وتفكر فى الأحسن منه هتلاقى كل اللى مزعلك ده ولا حاجة

هتلاقى نفسك من غير ما تحس بتبتسم وبتقول الحمدالله

وأنك تحمد ربنا طول الوقت دى حاجة كبيرة اوى بيجازيك خير عشانها كتير
احمده وهو يجازيك واللى بيصبر حقيقى بينول :)))

*****

 
على الهامش

يوم الخميس اللى جاى اللى هو يوم 9 مايو الساعه 7 بليل
هيكون حفلة توقيع كتابي قصاصات أنثوية
بالمشاركة مع أ.محمد صلاح زكريا وكتابة سبحة وكأس
فى مكتبة ألف فرع الزمالك
العنوان اهو لو حد مش عارفة
ش طه حسين متفرع من ش شجرة الدر, امام اليمامة سنتر 

 دى مش عزومة على حفلة توقيع على فكرة
ده انا بستأذنكم تشاركونى فرحتى اللى طلعت اصلا من رحم المدونه

اللى انتوا اساساً كنتوا السبب فى وجودها 

وبالتالى انتوا السبب فى وجود كتابى نفسة
اتمنى تكونوا كلكم معايا فى اليوم ده :))

readmore »»

كلام والسلام .. كلاكيت 25 مرة

من ساعه ما اتجوزت مش بكتب كتير
مش قادر أتاقلم على جو الكتابة فى بيتى 

مع أنه أهدى بكتير ويساعد فعلا على الكتابة
بس لما يروح عند ماما أو بكون فى المواصلات بتبدأ الأفكار تجيلى
بقالى فتره بتدور على السبب اللى بيخلينى مش عارفه اكتب 

بس مش لاقيه غير ده !

*****

أنا بعمل حركة رخمة أوى لما بقرأ كتاب
لازم كل ما اجى عند أخر صفحة من القصه و ألا الرواية 

عينى تجرى على أخر سطر فيها بدون إرادة
وأوقات كل فكرة القصه بتبقى فى أخر كلمتين دول
بحس أنى بحرق على نفسى جزء مهم من القصه
بس فعلا عينى مش بتقدر تقاوم
 

***** 

 

كنت مبسوطة جدا يوم لقاء القناه التانية
لأنى قبل ما أظهر كانوا بيعرضوا اغنيه نص الدنيا لأنغام
ودى الأغنية الوحيدة اللى أنا حاسه أنها بتعبر عن كتابى جداً

*****

المفروض أنى كنت مشتركة فى مسابقه فى مكتبة إسكندرية 

بقصه قصيرة جداً من الكتاب

والحمدالله كسبت ورايحة بكرة إسكندرية أكتر مكان بحبه 

عشان أستلم الجايزة

فى جوايا حته مبسوطة أوى بالمسابقة دى 

لأنها معنوية بالنسبة ليا أكتر من إنها مادية

حاسة إنها رسالة مرافقه لأراء الناس فى الكتاب اللى بتقولى الكتاب فية حاجات جميلة ويستحق أنه يبقى موجود

*****

 

 كل رسالة جاتلى أو كومنت أو صورة من أصحابى 

عشان يطمنوا عليا ويقولولى ماتزعليش

أحب أقولكم كلامكم ووجودكم فرق معايا أوى على فكرة

 بحب وجودكم معايا دايماً ♥

 
*****

فى الأسبوع اللى أعرف فية إنى كسبت فى مسابقة إسكندرية 

وأبقى طايرة من الفرحة

هو بردو نفس الأسبوع اللى أخسر فيه أهم حاجه أى أنثى بتتمناها

مانكرش أنى فقدت أملى للحظات وحسيت بيأس مش طبيعى وصعب يتوصف

بس قدرت بردو أقول الحمدالله اللى بقيت حاسه إنها الكلمة اللى مش بقت تفارقنى أبداً الفترة دى من حياتى

إنما البكاء ده حاجه مش بأيدى

أنا خسرت حته منى...من حقى أزعل !!

readmore »»

ومضات...2

قررا أن يتقابلا فى ذات المكان وفى نفس الساعه

علها تكن تلك ساعه اللقاء لا الفراق

ولكن خابت توقعاتها به كما يفعل دائماً

فـ حين جاء كان يحمل بيديه زهره حبها الذابله

ويحمل داخل قلبه قرار بالرحيل عنها

فـ رد إليها زهرتها..وسرق منها حياتها ورحل

ليوليها ظهره ويواصل المسير..و تظل هى  واقفه تنظر إليه تريد منادتة

فـقد تناست ان تسأله: كيف تقتل زهره حبه التى تنغرس جذورها داخلها؟

كما اقتلع هو زهرتها من داخله؟!!؟

كان يحبها كثيراً يغزل قصائد الشعر فى ملامحها وشعرها

وحين قررت أن تغير من مظهرها لأجله

قامت بأقتصاص بعضاً من خصلاتها

فـ لم يكن منه إلا أن تركها ورحل

لم تكن تدرى أنه لم يحب بها سوي خصلات شعرها

وقفت أمام لوحاتها مجتمعه كلها لأول مرة 

محاطة بهم داخل جدران معرضها الفنى الأول

أرتسمت على وجهها علامات الأستغراب مع أبتسامة رقيقة

فـ فى كل لوحة من لوحاتها جزء رسمت به ملامحه دون أن تدرى !

فقررت أن تلغي المعرض وتحتفظ بملامحة لها وحدها

 

readmore »»

كلام والسلام .. كلاكيت 24 مرة

 

اوقات لما بنشوف ناس من بعيد
وناخد بالنا من حالهم وظروفهم
يمكن بتصحى فينا نقطه الغبط أو حتى الحسد
بس لما بنقرب أوى من تفاصيلهم
بنكتشف أن إحنا ربنا بيديلنا حاجات كتير أوى إحنا مش حاسين بيها
لكن للأسف مش بتشوفها إلا لما بتشوف مشاكل غيرك
كأن عيونك كانت محتاجه حاجه تحفذها عشان تقدر تاخد بالها
من كل النعم اللى عندك
حتى لو كانت النعم دى بسيطه
بس فى غيرك اصلا مش لاقيها

******

جرب تسأل  غيرك أو حتى نفسك

أى سؤال عن أى موضوع او موقف
وشوف الأفكار والأراء المثالية اللى هتطلع منك !
انما لو كنت انت نفسك فى نفس الموقف
وقتها تفكيرك بيختلف
ده مش تناقض مننا
لكن ده لأن إحنا وقتها بس بنشوف الموقف بقلبنا قبل عقلنا
وده بيفرق كتير
وساعتها قرارتنا بردو بتفرق كتير
 

******

 
مش مهم إن منافسك يكون سابقك خطوه
الأهم أنت بعد كده هتقدر تسبقه بكام خطوه ؟
 

******

 
لو كدبت فى مره وعشان تقنع اللى حواليك بالكدبه دى
هتضطر تكدب بعدها 100 كدبه تانية !!
 

******

 
فى ناس مش بتغير من اللى أحسن منها
لكن بيغيروا من اللى اتعودوا إنهم مش يكونوا أحسن منهم
 

******

 
خروج أشخاص مهمه من حياتك بيشبه بالظبط خروج المخدر من دمك
فى الأول الموضوع بيكون مميت
وبعدها بيكون مؤلم إلى حد ما
بس فى الأخر وبعد خروجه من جسمك نهائى
بيكون الموضوع عادى جداً
وبتبدأ تشوفه من وجهه نظر اكثر تعقل
وبيكون فى احساس جواك بأن مرحله جديده من حياتك بدأت
وبأيدك انت لوحدك اللى تخليها أفضل
 

******

السبب الوحيد اللى خلانى مش أكتبلك حاجة فى ذكراك السنادى

انى مش بحس بوجع بس فى اليوم ده

أنا حاسة بوجع فى كل لحظة بتعدى المفروض تشاركنى فيها

وانت بتكون مش موجود !!

readmore »»