كلام والسلام....كلاكيت تانى مره

اخيرااااااااااااا البوم فضل نزل
ايوه سامعه حد بيقول ايه المعلومه القديمه دى
يعنى اهو عقبال ما خدت فرصتى وانفردت بذات نفسى شويه واستوعبت الالبوم عن جداره
قولت اما انطلق بقى واقول احاسيسى ومشاعيرى .. بلاش يعنى ؟! الله !!
الراجل ده وهمى
غاب ورجع بالتقيل والله
حساه بجد بيقول حاجه من جوايا
نسيت انساك...بفكر بالساعات...افترقنا...بعدا ع البال...هاخلى بالى...جوا الروح
تؤ تؤ ماحدش يتكلم بقى مايتكررش الراجل ده حقيقى يعنى
انا مش مجنونه بيه بهبل يعنى عشان ماحدش يقول عليا تافهه
مش زى بنات اليومين دول اللى بيترموا على المطربين يعنى
اترمى ايه ده انا مليون مطرب يتمنانى اومال طبعا(وسعت دى منى صح)
انا بحب فضل عشان لما بيقول .. بيقول حاجه جوايا
ده بخلاف ان احساسه عالى وشخصيه محترمه
الواحده مننا هتحب ايه فى مطربها المفضل الا الحاجات دى يعنى
وبعدين المطرب من دول ايه غير شخصيه محترمه واحساس حلو وشويه حاجات فوق بعضها
اما حاجه غريبه والله

*****
اوقات كده ببص لنفسى فى المرايه
بحس بصراحه بأحساس غريب
(اللى بيخااااااف يروح)
بحس ان روحى طلعت بره جسمى وبتبص عليا
(قولت اللى بيخاف يروح ده كده فيلم رعب)
لا فعلا انا بحس بكده
يتقال عليا مجنونه يتقال عليا جالى استبحس فى الذاكره مش مهم
بس دى حقيقه
بحس انى حتى بشوف ملامحى مختلفه
بحس انى بشوف انسانه تانيه
وروحى بتقولى هى دى اللى انا عايشه جواها
وتسالنى انا مين
بقولها انا دينا
لا والنبى؟؟ يعنى تبقى ايه فى الدنيا دى بتهببى ايه على عينك
اسكت ومالقاش عندى رد
للدرجه دى بلاقى نفسى فاضيه اوى من جوه ومش لاقيه رد
لدرجه انى بحس فعلا ان روحى بتروح منى
وبمشى من قدام المرايه اللى انا قدامها
عشان ماحسش انى ضعيفه وتايهه اكتر من كده
انا عارفه وربنا ان اخرتى وحشه
وان الناس هتقول عليا اتجننت بس ايه الجديد ما انا عارفه انى مجنونه اصلا

*****

هو ليه مفهوم الاخلاق بقى عندنا مختلف ومقاسه واسع اوى كده
يعنى اللى اعرفه ان الاخلاق بتحدد بمدى تدين الشخص
او طريقه معاملته مع اهله ومع الناس واحترامه ليهم مثلا
انما اللى بقيت اشوفه دلوقتى ان كل واحد بيحدد الاخلاق على مزاجه وحسب ما هو شايف
انا شايفه وعارفه وواثقه ان البنت اللى بتشرب سجاير والا شيشه دى فيها حاجه غلط
ده من رأيى انااااااا تحديدا(ده مجرد مثال)
انما فى ناس شايفه ان ده شىء عادى وبييييس وقضيها
كل واحد حر فى اللى بيعمله
بس انا بتكلم عن مفهوم الاخلاق
ووارد جدا كمان ان البنت اللى بتشرب سجاير دى تكون اخلاقها كويسه
بس ليه تضيع ده بحاجه تافهه ومالهاش قيمه
فى ناس تقول عليا معقده وناس تقول عليا محبكاها
بس انا كده دماغى كده واتربيت كده

*****

سمعت ان فى يوم ممكن تحصل فيه معجزه غريبه اوى
انى اتجوز!!!!!!!!
اه ده بما انى داخله على ال 22 سنه دلوقتى بسم الله ما شاء الله يعنى
مش عارفه ليه دايما احس انى اخرى خطوبه
اه يا اختشى خطوبه ايه المشكله فى كده يعنى
اصل الصراحه فكره الجواز دى موترانى اوى
يلهوتى يعنى انا يجى عليا يوم من الايام وابقى وشى فى وش انسان طول حياتى
ايه الشلل اللى انا فيه ده
هاطيقه ازاى والاهم هو هيطقنى ازاى
اذا كنت انا نفسى مش طايقه نفسى
وعارفه ان دماغى جزمه قديمه وماحدش ينفع يعيش معايا
لا لا لا مش قادره اتخيل ولا اتصور ولا اعيش ولا اشعر ولا احس ولا انيل اى حاجه فى الفكره دى
يمكن انا بقول كده عشان مش بحب حد يعنى
ما اهو اكيد لو بحب حد هاكون قادره استحمله طول حياتى
وهيبقى المنيل على عينه اللى اسمه حب ده عاميه عن دماغى الجزمه دى
والله ممكن ليه لا
لا لا لا بس بردو مش قادره اتخيل وربنا اه وحياه خالى حسين مش قادره اتخيل
هو مين حسين ده؟

readmore »»

هتعيشى ملكه فى حياتى

مش عارفه ابدأ منين
ولا فى دماغى كلام يكفى اللى ينفع يتقالك
ولا حتى يوم فى السنه يكفى عشانك
مايكفيش حد بيعمل المستحيل عشان ابقى احسن انسانه فى الدنيا
مايكفيش حد عايز يجبلى حته من السماء عشان ابقى انسانه كويسه
لو كنت اوقات ضايقتك فا ده من غبائى
لو كنت اوقات قصرت معاكى فا ده بردو من غبائى
ومع ذلك بردو بتستحملى غبائى واستهبالى وعبطى احيانا
ان بقيت حاجه دلوقتى فا ده بسببك
ان هابقى حاجه فا ده هيكون عشانك
لانى من غيرك ولا حاجه
بحبك اوى

readmore »»

زمـــن قـــاســـى

زمن قاسى زمن خاين زمن غدار
لا حد لاقى ولا عارف فين الدار
كل واحد عايش بحزنه
كل واحد راضى بهمه
كل واحد بيداوى جرحه بصبر اكبر من صبره
ليه الزمان مفيهوش امان
ليه الانسان سهل يتخان
زمن انانى زمن غدار
زمن رامينا وسط النار

readmore »»

قرار....مستقبل

بيبقى صعب اوى على الواحد انه ياخد قرار مهم فى حياته
والاصعب اكتر ان يكون القرار اللى هيتاخد ده سلاح ذو حدين
لو قولت اه هيبقى ليه اضراره
ولو قولت لا بردو هيبقى ليه اضراره
والمشكله ان الواحد لازم ياخد القرار ده لوحده
من غير ما يشارك اى حد فيه ولو حتى اقرب الناس ليه
يااااااه احساس وحش اوى
لما يبقى جوايا مليون صوت بيتكلم وانا تايهه فى النص
ولما يبقى جوايا مليون قرار ورأى فى دماغى وانا بردو تايهه فى النص
ومش قادره اشارك حد فى ده كله
صعب اوى ان الانسان ياخد قرار ويندم
وبيبقى اصعب لما مياخدش نفس القرار وبردو يندم
لاول مره فى حياتى
اكون بتمنى من ربنا انى اشوف بكره مخبيلى ايه
دايما مقتنعه ان بكره هيجبلى الاحسن
دايما مقتنعه ان ربنا اكيد شايلى حاجه كويسه
رغم ان الحاجه الكويسه دى اتاخرت كتير اوى عليا
ومابشفش لحد دلوقتى غير الوحش
بس انا الحمد الله راضيه
لكن مش عارفه ليه دلوقتى بقى جوايا الاحساس ده
محتاجه فعلا اعرف مستقبلى
خوف
قلق
توتر
انتظار
مش قادره افضل شايله الاحاسيس دى جوايا اكتر من كده
خوفى من بكره قاتلنى
يارب لو شايلى خير قربهولى
ولو غير كده انا راضيه بيه وهونه عليا

readmore »»

فــتـره حــداد

كنت بحلم ان 2009 تكون احلى من اى سنه فاتت
بس ماكنتش متخيله انها هتكون شايله اسوء حاجه ممكن تحصلى
خدت منى اهم شخص فى حياتى
خدت الانسان الوحيد اللى كان بيحمينى
خدت الانسان الوحيد اللى كنت ممكن اتسند عليه فى اى حاجه فى حياتى
خدت منى بابا
جوايا دموع كتير اوى وكلام كتير اوى
والمشكله انى مش عارفه اطلع اى حاجه من دول
اد ايه بيقتل انك مش قادر تحزن على اعز شخص عندك
مش لانك قاسى اوى كده ومش عارف حتى تحزن
بس لانك ماينفعش تبكى عشان انت بتحاول تقوى ناس تانيه
انا كده
مش قادره ابكى حتى لانى بحاول اقوى ماما واختى
وكل واحده فينا بتحاول تقوى الباقى
قلبى بيصرخ اوى من جوايا بس مش قادر ينزل حتى الدموع

ناس كتير مستغربه انى حتى مش ببكى
ناس كتير مستغربه انى كنت قادره اروح امتحاناتى ودروسى
ناس كتير مستغربه ان وقت دفنه بابا انا كنت فى امتحانى
ازاى قدرت اسيبه فى اخر لحظه
ازاى قدرت اسيبه فى اخر نظره
بس انا سألت نفسى .... اشوفه لاخر مره؟ والا اكمل مشوارى اللى هو كان بيحلم انى اخلصه؟
اتنازلت عن نظرتى الاخيره ليه عشان احققله اخر حلم كان بيحلمه
لانى مش قادره انسا كلمته "اخر سنه يا دينا واخيرا هتخلصى"
ولانه حتى مالحقش يفرح بتخرجى اللى كان بيحلم بيه
مالحقش حتى يفرح بأى حاجه منى او من اختى
لو نجحت السنه دى هيبقى عشانه
ولو سقطت السنه دى هيبقى عشان انا اضعف واقل حتى من انى احققله اللى كان بيحلم بيه

الموقف اللى مريت بيه ده
خلانى اكتشف ناس كتير اوى على حقيقتها
خلانى اعرف ان الصديق اللى بجد بيبان فى المواقف اللى زى دى
الصديق مش كلام وبس
الصديق اهم واصدق واقرب من كده بكتير اوى
زى ما يكون قلبى كان حاسس كنت بتكلم اخر مره عن ناس مش حطاهم فى حساباتى بيكونوا قريبين منى اوى
وناس فاكراهم قريبين منى اوى بيكونوا ابعد مما اتخيل
الموقف ده ظهرلى معدن شخصيات كتير
خلانى احزن من جوايا على ناس ماتدهمش حقهم كويس فى حين انهم كانوا اقربلى من ناس كتير خدوا حقهم وزياده
خلانى احزن من جوايا على ناس توقعت منهم ولو اهتمام بسيط ومالقتهوش
خلانى اشطب ناس كتير من حياتى
ماعتقدش ان فى اصعب من المواقف دى عشان اصحابى اللى بجد يكونوا معايا فيها
لان مفيش حاجه هتقوينى الا هما
بس اللى مقوينى شويه
ان فى شخصيات اللى توقعته منهم لاقيته ومهما شكرتهم ووصفتلهم اد ايه هما كانوا بيقوونى ده مش هيكفيهم
ناس كتير كانوا واقفين جنبى ومعايا فى كل لحظه
من اول الشخصيات دول ساره
لو قولتلها مليون كلمه شكر مش هتكفيها
ومهما اقول من الكلام بردو مش هيكفيها
من الناس اللى بان معدنها وحبها ليا بجد فى الفتره دى
بحبك اوى و ربنا يخليكى ليا

رغم ان عدى حوالى 3 اسابيع على موت بابا
بس انا مش متخيله ان ده حصل
انا الحمد الله مؤمنه بقضاء ربنا وعارفه ان الموت بيجى لأى حد وفى اى وقت
بس لحد دلوقتى مش قادره استوعب
حساه لسه فى كل مكان فى البيت كأنى شايفاه بيتحرك قدامى
سامعه صوته فى ودنى
كل يوم بتمنى انى بكون بحلم
بابا فعلا وحشنى
وحشنى هزاره معايا
وحشنى سؤاله عليا
وحشنى اوى بجد
ربنا يرحمه ويغفرله
ويخليلى اختى وماما عشان مابقاش ليا حد الا هما

مش بتمنى اكتر من كده

readmore »»