(6) رمضان بين زمان ودلوقتى

انا بيتهيالى زمان لو سألت اى بيت مصرى

فى اول يوم فى رمضان

انتوا عاملين اكل ايه النهارده

هيردوا كلهم اجابه واحده

تحسوا ان كورس كده

حافظين مش فاهمين

احنا طلعنا لاقينا اهلنا بيعملوا الاكل ده يبقى احنا زيهم

تعود ان ده اللى المفروض يتعمل فى رمضان

ورمضان مميز باكلات فى موجوده فى اى وقت تانى

زى القطايف والكنافه 

اللى مفيش بيت مصرى مش بيعملهم اول يوم رمضان

لو مش كان النوعين يبقى على الاقل نوع واحد منهم

بالرغم من اننا اصلا مش بيكون فينا نفس ناكل اى حاجه بعد الفطار

بس اتعودنا على كده

وكمان الفول اللى شئ مقدس على السحور و مفيش غنى عنه

اما دلوقتى

الموضوع مابقاش فارق كتير

القطايف والكنافه موجودين طول شهور السنه

لو حبيت تاكلهم فى اى وقت هتجبهم وتعملهم

الموضوع مابقاش مرتبط برمضان خالص

حتى حكايه الاكل المحدد اللى كلنا اتعودنا نعمله ده

عادى بردو ممكن يتعمل او يتعمل غيره خالص

حتى السفره بكل اللى عليها بقى مختلف

اما السحور فا مابقاش شرط اساسى انه يكون فول

اصل احنا جيل معدته تعبانه اصلا

الناس مازالت متفقين فى حاجه واحده بس

انهم يشتروا كل اللى تطوله ايديهم

ولا كأننا داخلين على مجاعات

ويارتنا حتى بناكل نص الاكل ده

*********************************

دعاء النهارده

اللهم اجعل لى فيه نصيباً من رحمتك الواسعه

واهدنى فيه لتراهينك الساطعه

وخذ بناصيتى الى مرضاتك الجامعه

بمحبتك يا امل المشتاقين

*****

فيديو النهارده

فيديو النهارده هو حلقه من برنامج ثوره على النفس

البرنامج تقديم معز مسعود

بيتكلم فيه كل يوم عن صفه المفروض نتخلص منها

وزى ما كنا قادرين نعمل ثوره على احوال البلد اللى مش عاجبانا

نقدر نعمل ثوره على نفسنا ونغيرها للاحسن ان شاء الله

البرنامج رائع بجد

وفيه حوار مع ناس من الشارع وشخصيات مشهوره

وطريقه معز مسعود فيه بسيطه كعادته وتوصل للواحد بسلاسه

مواعيد عرض البرنامج

على القناه الثانيه المصريه

الساعه 6 وربع

وعلى قناه cbc

الساعه 6 وربع بردو  وبيتراجع مع ميعاد الفطار يومياَ

والاعاده فى 3 وربع الفجر

وده فيديو لأحدى حلقات البرنامج

ودى صفحه معز مسعود على الفيس بوك

بينزل عليها يومياً الحلقات لو حد يحب يتابع

Moez Masoud معز مسعود

readmore »»

(5) رمضان بين زمان ودلوقتى

التلفزيون فى كل حاجه بقى مختلف ايام زمان عن ايامنا الفحلقى دى
بس فى رمضان الوضع مختلف 

لان فى رمضان العرض من كل حاجه بيبقى مكثف
سواء برامج او اعلانات او مسلسلات
اما الافلام فا بيقل دورها فى الفتره دى
بيسيبوا بقى المسلسلات عشان تاخد فرصتها
انا يمكن مش فاكره مسلسلات زمان اللى كانت بتيجى فى رمضان
بس المهم بردو ان كان بيجى مسلسلات بجد الواحد بيستناها
وممثلين معينين مواعدهم معروفه والواحد بيبقى منتظرهم
وعمتا بتبقى المسلسلات معدوده ومواعيدها معروفه
بتدى الواحد فرصه انه يأدى فروضه
اللى المفروض تكون شئ اساسى فى شهر كريم زى ده
كمان كان فى حاجه جميله جداااا
والجيل بتاع دلوقتى ضاع منه كتير اوى انه ماشفهاش ولا عاش معاها زينا
وهى طبعا الفوازير
نيللى وشيريهان وسمير غانم
شئ لا يعوض بجد
كانت جميله اوى حتى لو شوفناها دلوقتى وحسينا انها كانت سهله وعبيطه
بس فيها شغل وموسيقى واسلوب واستعراض
مفيش حد بيقدمه دلوقتى

 

اما دلوقتى
المسلسلات فى رمضان تعتبر وباء
بمعدل 50 مسلسل بيتعرضوا كل يوم على مختلف القنوات
من المسلسلات المصريه للخليجيه للسوريه للبنانيه للتركيه للكوالالمبوريه
اهو كله ماشى واحنا ادينا بنتفرج
هو ليه المنتجين والا الممثلين دول مش بيرأفوا بحالنا ويراعوا مشاعرنا
ويعرضوا عدد كافى ان الواحد يتابع اللى بيقدموه
الواحد بطل اصلا يتفرج على حاجه خالص
لانه عارف ان كل ده هيتعاد تانى من اول وجديد بعد رمضان
واحنا فى الاخر اللى بيجيلنا هبل فى دماغنا من كتر اللى بنشوفه
وياسلام بقى على الفوازير
ياسلام كده لما الاقى الست ميريام فارس جايلنا تعملنا الفوازير
والنبى فيهم الخير
هو حد يلاقى ميريام فارس ترقصله كل يوم ويقول لا
هى بس لو تتعرض فى اى وقت غير رمضان
احتمال الواحد يشوفها
ولو انى اشك بردو

*******************************

دعاء النهارده

اللهم اجعلنى فيه من المستغفرين

واجعلنى فيه من عبادك القانتين

واجعلنى فيه من اوليائك المقربين

برأفتك يا ارحم الراحمين

******

حدث النهارده

حدث فى 6 رمضان

 
22 هجري

اتجهت سرية أرسلها عمرو بن العاص إلى بلاد النوبة في السودان بقادة عقبة بن نافع, واشتبك مع قبائلها, ثم عقد معها صلحا.‏

63 هجري‏

تم فتح بلاد السند بقيادة محمد بن القاسم الثقفي بعد انتصار الجيش العربي في اليوم الموافق 14 أيار 682 ميلادي, وكان ذلك في منتصف عهد الوليد بن عبد الملك باني الجامع الأموي, وفي أيام الوليد بلغ الجيش العربي القوقاز والمغرب والأندلس وصقلية وبخارى وسمرقند.‏

91 هجري‏

عبر طريف بن مالك المضيق الذي يفصل بين المغرب والأندلس على راس قوات استطلاع قوامها مائة فارس وأربعمائة من راجل (مشاة), ونزل في مكان أطلق عليه اسمه (تاريفا) حتى الآن, بينما أطلق على المضيق اسم طارق الذي قام بفتح الأندلس بعد انتصاره على لذريق (رودريكو) في رمضان عام 92 كما عبر موسى بن نصير المضيق ليتابع الفتح في رمضان 93 هجري.‏

210 هجري‏

بايع الناس الإمام علي الرضا بن موسى بن جعفر بن محمد بن علي بن الحسين بن علي بن أبي طالب رضي الله عنهم.‏

وقد وجه الخليفة العباسي المأمون الدعوة إلى الرضا للتوجه إلى مرو, وهناك استقبله استقبالا حارا, وعرض عليه أن يخلع نفسه من الخلافة ويسلمها للرضا, وظل على ذلك شهرين, لكن الرضا أبى ما عرضه المأمون ورضي بولاية العهد, وما حدث أن عليا توفي في خلافة المأمون ودفن في طوس شمال شرق إيران, وبوفاته بقيت الخلافة في الأسرة العباسية.‏

223 هجري‏

حاصر الخليفة العباسي المعتصم مدينة عمورية في مثل هذا اليوم المصادف الأول من آب 838 ميلادي, وكانت عمورية إحدى أزهى المدن في آسيا الصغرى, وتمكن من تحطيم أسوارها ودخولها, شن الحرب على عمورية معروفة في كتب التاريخ والأدب أنها استجابة لامرأة استنجدت به بقولها (وامعتصماه) فقال لها لبيك عندما نقلت إليه استغاثتها.‏

والواقعة كاملة أن المعتصم قاد جيشا كبيرا للرد على العدوان البيزنطي, فقد استغل الإمبراطور البيزنطي تيوفولوليس انشغال المعتصم بالقضاء على وثورة بابك الخرمي وأغار على مدينة زبرطة وأحرقها وأسر من فيها من المسلمين, فلما جاءت الأخبار إلى المعتصم سأل عن أكثر مدن الروم عزة وصعوبة فقيل له مدينة عمورية, وقد حاول المنجمون ثنيه عن مقصده لأنهم وجدوا في كتبهم أنه سيهزم في ذلك الوقت, لكن المعتصم لم يستمع إليهم ومضى في رد العدوان البيزنطي, وفي ذلك قصيدة البحتري ومطلعها: السيف أصدق أنباء من الكتب.‏

 

 364 هجرى

  أثناء ظهور الدولة الفاطمية في مصر والشام دخل الروم البيزنطيون بعلبك وأحرقوا ما حولها سلباً ونهباً ، ووصلت جيوشهم إلى البقاع وما حولها

 

387 هجرى

أصدر الخليفة الفاطمي الحاكم بأمر الله قراراً باعفاء الصيادين في البحر الأحمر من دفع ما عليهم من ضرائب .

395 هجري‏

وصل إلى مصر العالم الكبير حسن بن الهيثم, في اليوم المصادف للأول من شهر حزيران للعام الميلادي 1005 ملبيا دعوة خليفتها الحاكم بأمر الله الفاطمي لاستشارته في أمر استغلال مياه نهر النيل و التحكم في فيضانه, وقد قام ابن الهيثم بزيارة إلى أسوان في الجنوب للتعرف على فيضان النيل و استخدام أدواته و كان نواة للتفكير في السد العالي الذي تم إنشاؤه في العصر الحديث.‏

 

436 هجرى

 

وفاة الوزير الفاطمي المشهور أبو القاسم الجرجائي 

وحين توفي ترك في بيت المال 1.7 مليون دينار 

بالاضافة إلى 621 ديناراً ونصف دينار وثمن دينار

أي كان الحساب الفاطمي دقيقاً في تقييد الداخل والمنصرف ..!!

 

532 هجري‏

قام جماعة من المتأولين بقتل الخليفة العباسي الراشد أبو جعفر, حين توجه إلى همدان وقتلوه غدرا, وبلغ الخبر السلطان مسعود عندما كان متوجها من بغداد إلى الموصل, واستبق القتلة ذلك بفتوى تبيح خلع الحاكم الذي يثبت فسقه.‏

 

 

readmore »»

(4) رمضان بين زمان ودلوقتى

المسحراتى زمان كان سمه مميزه من سمات رمضان
ماكنش ينفع الناس تتسحر من غير ما تسمعه
من كتر ما كان حاجه اساسيه وقريب اوى من الناس
كان بيبقى المسحراتى عارف اسامى كل الناس اللى بيعدى فى منطقتهم
بحكم ان المنطقه صغيره
وانه بيجلهم كل يوم فى الشهر ده لسنين كتير
وكان بيقعد يقول اغانى او اناشيد دينيه خاصه برمضان
كانت بتشجع كل الاطفال انهم يسمعوه ويقعدوا يستنوه
او حتى لو نايمين يصحوا من النوم مخصوص عشانه
والاهل كمان كانوا بيهتموا بوجود المسحراتى جدا وبيعتمدوا عليه
فى انه يفكرهم دايما بان الوقت خلاص قرب
ولازم نقوم نتسحر قبل الفجر
ولما كان بيتاخر او مش يجى يوم والا اتنين
بيعرفوا انه فيه حاجه
ولازم يسألوا عليه
عشان رمضان ماكنش ينفع يبقى رمضان من غير مسحراتى

اما دلوقتى
المسحراتى بقى دوره مهمش جدا
يعنى مش من الاساسيات
انا فاكره وانا صغيره كان المسحراتى مهم اوى عندى
اختفى فتره
لدرجه انى اتعودت ان مش شرط المسحراتى يكون موجود
بس لسه من سنتين بس بدات اسمعه باستمرار
بس الزهوه نفسها بردو مش موجوده
اه لسه الاطفال بيسمعوه
وبيندهوا عليه عشان يقول اسمائهم
بس دوره مش زى الاول
يمكن الموقف نفسه متعه للاطفال 

لانهم بيكونوا حابين انهم يسمعوا اساميهم منه
وكمان لان كل ده مش مر عليهم قبل كده
فا بالنسبه ليهم ده شئ جديد

وبعدين اصلا المسحراتى بقى بيجى الساعه 1

فى عز ما الناس صاحيه والشباب بيلعبوا كوره فى الشارع

نفسى افهم هو جاى يصحى مين بالظبط؟؟

**********************************

دعاء النهارده

اللهم قونى فيه على اقامه امرك

واذقنى فيه حلاوه ذكرك

واوزعنى فيه لأداء شكرك بكرمك

واحفظنى فيه بحفظك وسترك

يا ابصر الناظرين

******

تفسير النهارده

بسم الله الرحمن الرحيم

{ شهر رمضان الذى اُنزل فيه القرآن هدى للناس وبينات من الهدى والفرقان فمن شهد منكم الشهر فليصمه ومن كام مريضاً او على سفر فعده من ايام اخر يريد الله بكم اليسر ولا يريد بكم العسر ولتكملو العده ولتكبروا الله على ما هداكم ولعلكم تشكرون } 

سوره البقره 185

التفسير الميسر

شهر رمضان الذي ابتدأ الله فيه إنزال القرآن في ليلة القدر; 

هداية للناس إلى الحق

فيه أوضح الدلائل على هدى الله, وعلى الفارق بين الحق والباطل. 

فمن حضر منكم الشهر وكان صحيحًا مقيمًا فليصم نهاره.
ويُرخَّص للمريض والمسافر في الفطر, ثم يقضيان عدد تلك الأيام , 

اى يتم صيام تلك الايام بعد شهر رمضان
يريد الله تعالى بكم اليسر والسهولة في شرائعه, 

ولا يريد بكم العسر والمشقة, 

ولتكملوا عدة الصيام شهرًا, ولتختموا الصيام بتكبير الله في عيد الفطر,
ولتعظموه على هدايته لكم, ولكي تشكروا له على ما أنعم به عليكم من الهداية والتوفيق والتيسير.


تفسير الجلالين

-  (شهر رمضان الذي أنزل فيه القرآن) فى شهر رمضان أنزل الله القرآن من اللوح المحفوظ إلى السماء الدنيا في ليلة القدر ،
منه (هدى) حال هاديا من الضلالة
(للناس وبينات) آيات واضحات
(من الهدى) مما يهدي إلى الحق من الأحكام
(و من الفرقان) بما يفرق بين الحق والباطل
(فمن شهد) أى حضر
(منكم الشهر فليصمه ومن كان مريضا أو على سفر فعدة من أيام أخر)
أى تقدم مثله وكرر لئلا يتوهم نسخه بتعميم من شهد
(يريد الله بكم اليسر ولا يريد بكم العسر) ولذا أباح لكم الفطر 

في المرض والسفر 

ولكون ذلك في معنى العلة أيضا للأمر بالصوم عطف عليه
(ولتكْمِلوا) بالتخفيف والتشديد
(العدة) أي عدة صوم رمضان
(ولتكبروا الله) عند إكمال مده الصوم فى شهر رمضان
(على ما هداكم) أرشدكم لمعالم دينه
(ولعلكم تشكرون) الله على ذلك .

readmore »»

(3) رمضان بين زمان ودلوقتى

الناس نفسهم بقوا حاجه تانيه خالص
وخصوصا فى رمضان
زمان كانوا الناس قرايبين اووى من بعضهم
والموضوع بيبقى اكتر كمان فى رمضان
يعنى مثلا لو اتنين جيران وقرايبين من بعض
تلاقى دى قبل الفطار بتبعت اكل للتانيه من اللى عملاه
والتانيه تردهالها مثلا بعد الفطار بالحلو
وهكذا
انا مثلا فاكره زمان كان جدى متعود كل سنه يعمل العرقسوس فى البيت
بكميه كبيره

ويبعتنى انا واختى نوزع على كل جيرانا اللى حوالينا
ولحد دلوقتى جيرانا لما يفتكروا جدى بيفتكروله الموضوع ده جدا
رغم انى كنت بتمرمط قبل الفطار عند كل جيرانا عشان ابعتلهم العرقسوس
الا انى بجد كنت حابه الروح دى جدااا
دلوقتى قليل لو حد عمل كده
فى ناس بتعمل وناس بتقف فى الشوارع توزع وقت الفطار
بس مش كتير زى قبل كده
حتى الناس فى الشارع وفى شغلهم كانوا بيبقوا متعاونين
فاهميين يعنى ايه عشان انت صايم 

المفروض تبقى اخلاقك احسن من اى وقت
عشان تتعود تبقى دى الاخلاق اللى تمشى عليها طول عمرك
فاهمين يعنى ايه المفروض مايتعصبوش
ولا يشتموا
ولا يتخانقوا مع بعض
ولا يجيبوا فى سيره بعض

اما دلوقتى
الناس وقت ما بتبقى صايمه بيعملوا حاجات غريبه
مبدأيا كده حكايه ان الناس تبعت لبعضها اكل دى
اه بتحصل
بس مش كل يوم
ومش فى كل الاحوال
ومش عند كل الناس

ممكن لان كل حاجه اسعارها زادت
حاجه تانيه
لو حد شاطر يجبلى يوم خرج فيه الشارع الصبح فى رمضان
ومش شاف مشكله بين اى اتنين فى الشارع

ممكن اصلا يكونوا اصحاب
والا خناقات الميكروباصات بقى
ياسلام عليهم
لو عملوا مسابقه لاحسن خناقه 

سواقين الميكروباصات هياخدوا الجايزه الاولى انا متاكده
مابيبقاش فى صبر
ولا الناس فاهمه يعنى ايه اخلاق الصيام 

وبيحاولوا يعدوا لبعض الغلطات اللى وارد تحصل فى اى موقف عادى
وبتبقى الحجه
انهم من الصيام او الحر او قله السجاير ده بيتعب اعصابهم
ردود مش منطقيه
بس ده اللى بيحصل دلوقتى فعلا

***************************************

دعاء النهارده

يارب كما شرفتنا بالايمان بك

وكرمتنا فى اركان الاسلام بالصيام لك

اعنا على طاعتك فيه

واجعل اللهم صفاء ارواحنا

فى استقباله وسيله لاجابه دعائنا

******

كتاب النهارده

كتاب رمضان يوم بيوم

 الكتاب بجد جميل اوى

فيه لكل يوم فى رمضان صفحه

متقسمه لكذا حاجه

قصه وحديث وآيه ودعاء وفكره وحكمه

حبيت اجيبه عشان اللى يحب يستفيد

حمل الكتاب من  >>>>  هنا

******

على الهامش

اللهم لا شماته

﴾ قل اللهم مالك الملك تؤتى الملك من تشاء وتنزع الملك ممن تشاء 

وتعز من تشاء وتذل من تشاء بيدك الخير انك على كل شئ قدير ﴿

readmore »»

(2) رمضان بين زمان ودلوقتى

كنا زمان من قبل ما نسمع الرؤيه بكذا يوم
كل الاطفال اللى فى الشارع يتجمعوا مع بعضهم
ويقعدوا قدام البيوت كل واحد يجيب شويه ورق زينه
من الملون ده
وكمان اكياس الشيبسى الفاضيه بنقعد نجمع فيها
عشان نيجى على رمضان وقت ما نحضر للزينه
و نقص فيها ونعملها اشكال كتيره
ويجى حد كبير من اهلنا او اكبر حد فينا فى السن

يساعدنا اننا نعمل من الورق ده
فانوس كبيييير
ويتعلق فى نص الشارع
ولما نحط لمبه جواه
بينور الشارع بضئ كل الوان الورق اللى معمول بيها
كنت ممكن اقف فى الشباك وابص للفانوس ده
من غير ما اعمل اى حاجه تانيه
وافضل متنحه عليه
كان بيبهرنى اوى
ومازال لحد دلوقتى لانى نفسى اعمله بأيدى
وعمرى ما جربت

 

انما دلوقتى
اقصى حاجه ممكن تتعمل
ان الشباب اللى فى الشارع يجمعوا فلوس من الجيران كلهم
عشان يعلقوا نور
هو فى الاخر ليهم اصلا
عشان بيقعدوا طول الليل يلعبوا كوره لحد السحور
لغايه ما حسيت انهم هيجبولى ارتجاج فى المخ
من كتر رزع الكوره وخبطها فى الشباك بتاعنا
حتى الاطفال اللى كان بيبقى عندهم حماس

انهم يشاركوا بعض فى الزينه وكل واحد يشجع التانى

الاطفال دلوقتى مش بقوا كده

ومش فارقه عندهم فى زينه والا لا

كفايه نور الشارع ليهم اللى بيكون اشاره ان هى دى زينه رمضان

يمكن لانهم اصلا من طلعوا شافوا ان دى من عادات رمضان

اللى اتعودنا نعملها

*****************************

دعاء النهارده

اللهم قربنى فيه الى مرضاتك

وجنبنى فيه من سخطك ونقماتك

ووفقنى فيه لقرائه اياتك

برحمتك يا أرحم الراحمين

 *****

حديث النهارده

وتفسيره

عن أبى هريره رضى الله عنه قال

قال رسول الله صلى الله عليه وسلم:

(من صام رمضان ايماناً واحتساباً غُفر له ما تقدم من ذنبه)

تفسير الحديث

قوله صلى الله عليه وسلم

(من صام رمضان)

صيغه من صيغ العموم تشمل كل من صام رمضان رجلاً كان او امرأه

معنى احتساباً...الاحتساب هو طلب الاجر ورجاء الثواب من الله تعالى

 اى اه يصومه على معنى الرغبه فى ثوابه طيبه نفسه بذلك غير مستثقل لصيامه ولا مستطيل لأيامه

قوله صلى الله عليه وسلم

(غفر له ما تقدم من ذنبه)

هذا هو جواب الشرط , فمن صام رمضان على الوجه المطلوب شرعاً مؤمناً بالله وبما فرضه الله عليه 

ومحتسباً للثواب والاجر فإن المرجو من الله ان يغفر له ما تقدم من ذنوبه

واستناداً الى ذلك

قوله صلى الله عليه وسلم فى حديث اخر

(الصلوات الخمس ,والجمعه الى الجمعه , ورمضان الى رمضان ,مكفرات لما بينهن ما اجتنبت الكبائر)

readmore »»