21 April 2009

انا مش بتاعه الكلام ده

.

بعد تفكير عميييييييييق
لحد ما غرقت
فكرت ان ... لا بقى كفايه كده
انا لازم اعبر عن رأيى .. الله !!
واقول ان ماينفعش الواحد يتنازل عن افكاره وأرائه ابدا ابدا
كنت قبل كده مقتنعه اقتناع تاااااااام انى مش بتاعه جواز صالونات وكلام فارغ من ده
لكن الاقيلك الناس كلها وكأنها اتفقت عليا وتقولى ان مابيكملش الا جواز الصالونات بلا حب بلا بتنجان
طب ماشى انا متفقه معاكوا فى الجزء الاخير من الجمله بلا حب بلا بتنجان
بس انا ايييييه ضمنى ان البنى ادم اللى هيجى يقعد فى صالون بتنا ده مايكنش ابن ستين فى سبعين
"مع الوقت هتعرفى"
والنبى؟؟؟ طب وانا ليه اضيع وقت من اصله مع واحد لسه هاكتشفه ومش انا اصلا اللى مختاراه
والاقى بقى طلعلى من تحت الارض قصص وروايات عن اتنين قعدوا يحبوا بعض عشرتاشر سنه مثلا
ولما اتجوزو اطلقوا بعد سنه

وان اللى اتجوزو جواز هباب قصدى صالونات عاشوا فى تبات ونبات وخلفوا صبيان وبنات
وفجاء سؤال تصحبه الخباثه والسهتنه والسوسه مجتمعين معا
"طب لو بتحبى حد قولى عشان مانفكرلكيش فى حد من بره"
وكالعاده انا واقفه زى البطيخه وعلى وشى وفى عيونى نظرات انكسار
وحياتكم يا جدعان ماعنديش بوى فريند للاسف...اجيبه منين طيب؟؟؟!!!
(اصل هاقول ايه بلا نيله خلينى كاتمه فى قلبى وساكته)

وفى النهايه جاءت الجمله القاتله
"طب ادام انتى مش بتحبى ولا ناويه تحبى ولا عايزه جواز صالونات اومال هتتنيلى تتجوزى ازاى"
وساد الصمت الرهيب (اتخرست طبعا + وش متنح)
واخيرا طلعت منى جمله جامده جدا >> "ان شاء الله ما عنى اتجوزت"

"ولحد امتا؟؟ هتفضلى ماشيه بدماغك لحد امتا؟؟"
الله ... يعنى عايزنى امشى من غير دماغى يعنى!!! اومال امشى بكوز دره مكانها مثلا؟؟!!
(شكلى هيبقى مسخره ساعتها اكيد)

نهايته
قولت يابت تعالى على نفسك عشان تسكتيهم وتعرفيهم ان اخرتهم سودا معاكى فى الحوار ده
وقررت اتنازل شويه صغنتتين واشوف اخرتها
(المشكله ان بدايه التنازل مش هيقف عند الشويه الصغنتتين دول)

طلع جواز الصالونات ده حواااااااار وربنا
ال ايه امه تيجى تشوفك .. لا وهو كمان يجى يشوفك
وحياه طنط؟؟؟؟ لييييييييييه فرجه انا والا اييييييييييه
ما تحطونى فى مزاد احسسسسسسن (وش هينفجر من الغيظ وقرب يعيط)
وجاءت محاولات الاقناع يابنتى ما انتى كمان هتشوفى وهتقولى رأيك هو مش اجبار
ابداااااااا بردو ... انا اشوف اه اتشاف لالالالالا
المهم اتنازلت شويه صغنتتين كمان (يا مهووووووون لما نشوف اخرتها)
طب وربنا طلع حوار بردو جواز الهباب ده
يا جدعان انا تنحه ومابهزرش مع حد من اول مره وماحبش حد ياخد عليا من اول مره
(وخصوصا لما اكون انا اصلا مش طايقاه)

وماحبش حد يقعد لوك لوك لوك كده وانا مطالب منى اسايره واشتغل لوك لوك انا كمان
(وخصوصا بردو لما اكون انا اصلا مش طايقاه)

ودول ناس بدأو معايا بدايه غلط فى يوم نحس زيهم
وشويه وخلاص هاقل ادبى وهاقوم اجرى وراهم بالجزمه
ويقولو البت اتجننت

و جاءت النهايه لصالحى واعلنت انتصارى وطلعتهم لسانى
هيييييييييه انا اللى اتفرجت وانتوا لا هيييييييييييه
هييييييييييه انا اللى قولت "لا" وانتوا لا هيييييييييه(وش مطلع لسانه)

فى النهايه
طلعت بحاجه مهمه اوى من هنا بقى
انا مش هتنازل عن دماغى تانى ابدا ابدا
انا دماغى جزمه قديمه وهتفضل جزمه قديمه
وبعدين انا مش فرجه لحد وماعنديش استعداد احس انى قللت من نفسى مره تانيه

واعلنتها بكامل قواى العقليه
لسسسسسست انا اللى اتجوز بالطريقه دى
انا مش بتاعه الكلام ده
انا مش بتاعه جواز صالونات وكلام فارغ
والمشكله انى لحد دلوقتى مش بتاعه حب بردو
نفسى افهم انا بتاعه ايه بالظبط

34 comments

Lady E said...

هييييييييييييه اول تعليق

هقرا واجي تاني

Lady E said...

خلاص خليها جواز انتريهات ههههههههههههههههه

والله انتي عسل البوست موتني من الضحك

ربنا يرزقني ويرزقك وبنات المسلمين بأزواج صالحين يحبونا ويقدرونا ويشيلونا في عنتينهم

Bent Men ElZman Da !! said...

ده ايه الهنا اللى انا فيه ده
ليدىىىى اول تعليق يا مرحبا يا مرحبا :D
هاديكى 75 قرش بحالهم عشان ماتقوليش انى حرماكى من حاجه :P
انا بقول نخليها جواز سفره احسن واهو يبقى عيش وملح ههههههههههههه
والله انتى اللى عسل يا قمر ومنورانى دايما
وربنا يرزقنا يارب بالزوج الصالح ويشلونا فى عنتينهم اللى انتى قولتى عليها دى :)

Bant EL7ag Dracula said...

ايوووووووووووووووووووووا ييحبو بعض


عشرين قرن ويتجوزه يوم ونص اتشل انا بقا من الناس

دى

عندك حق والله يا بنتى

لادا نافع ودا نافع

طب الواحد يعنس

ويرتاح

بس اكيد يا دينا ربنا هيرزق بواحد يعرف يمشى مع دماغك

ويفهمها

ووممكن يكون جواز صالونات
او حب

سعات النصيب محدش يقدر يقول


حاجه انتى ممكن تتجوزى واحد مش هو دا الا كنتى

بترسميه بس مجرد لما شوفتى واتعملتى معه


جالك احساس انه هو دا الا انت عاوزه حبيتى كدا فهمك وعارف دماغك وبرمج نفسه عليها

وكنتى هتتجوزى من ورايه

طب هنلعب دونكى مع مين

ومين

الا هياخد ال60 دونكى

هههههههههههههههههه

بوست جميل يا دود
تسلم ايدك يا باشا

MR-BOLICA said...

بصى يا دودو مهو لا كده يا كده مفيش حل تالت لازم حتتجوزى اجلا ام عاجلا
المهم انتى حكيتى حكيتى بس معرفناش النتيجه
شكل امه جابتلك بندق وطلعتى مش بتعرفى تكسريه

Bent Men ElZman Da !! said...

انا بقول يا ندى احنا نعنس عشان نخلص ويطلعونا من دماغهم :D
انا والله يابنتى ما فارقه معايا
ومعاكى حق فعلا وارد اووى انى بالطريقه دى اقابل الانسان اللى ربنا كاتبهولى
بس المشكله انى حسيت ان الحكايه دى بتقلل منى
لانى مش فرجه لحد
يابنتى مش من وراكى انتى اللى ماكنتيش هنا
بس انا حاسه انك كنتى هتمسكينى تريقه زى ما البت نيره كانت عامله loooool
وكل اللى همك يا ندى هتلعبوا دونكى من غيرى ازاى؟
ياستى هنزلك نيره على الساحه وتبقى خليفتى فى الملاعب وان شاء الله تدوها جنينه الحيوانات كلها مش دونكى بس :D

Bent Men ElZman Da !! said...

اقولك على كلمه فى السر يا احمد وماتقولش لحد :D
انا من انصار الجواز عن حب
بس اعمل ايه فى حظى المهبب بقى :D
وبعدين يعنى انت قريت اللى انا حكيييته ده كله ومافهمتش النهايه
طب تصدق مش هاقولك بقى :P
ومش اناااااا اللى امه تجبلى بندق واكسره
ده انا اكسره على دماغهاااا :@
مش كفايه انى سمحتلها تيجى تشاهد فى جمالى loooooool

MR-BOLICA said...

والله يا دودو ومين سمعك انا نفسى برده اتجوز عن حب زى اى حد لانوو حيسهل حاجات كتير اوى والاهم من ده اكون فعلا بحب وبتحب وانتى مش حظك مهبب ولا حاجه الحمد لله على كل شى بس هو كلوو فى وقته
لان انا متوقع النهايه بس عايز اسمعها منك
وبعدين امه اصلا لما حتشوفك حتصصمم من غير لا بندق ولا لب ابيض حتاا :n:

Bent Men ElZman Da !! said...

مش حكايه هيسهل حاجات كتير وبس يا احمد
ده بنى ادم هاصحى كل يوم الصبح الاقيه فى وشى يبقى على الاقل اكون بحبه عشان اقدر استحمله
واكيد الحمدالله وان عارفنى انا دايما راضيه بأى حاجه :D
المفروض تفهم النهايه وهى طايره يا احمد عيب عليك
بندق ولب وسودانى ايه يا احمد
حد قالك انى هاتجوز واحد عنده مقله :D

NaiRa said...

مفيش حاجه اسمها حب ولا جواز ولا قرف كله وهم احلى حاجه ان الانسان يعيش لوحده واللى اتجوزو خدو ايه عيش لنفسك نفسك هتعشلك
برب ونايس يا دودو

Anonymous said...

انا كمان مضرل عن الجواز لانى لسة مش لاقى البنت الى بحبم بيها مش عايزة ملكة جمال لا عايزها دمغها كبيرة ومرحة ومتدينة مش هابفة وطقة

Bent Men ElZman Da !! said...

نينو

لا يا نيره فى حاجه اسمها حب وفى حاجه اسمها جواز
ده شر لابد منه يا بنتى :D
مش معنى ان حصلت مشكله فى حياتنا يبقى خلاص كده الدنيا تتقلب
كله بيعدىىىىىىى على رأى فضل يا اختى :D

Bent Men ElZman Da !! said...

اولا ميرسى ليك يا باشا على الكومنت
وثانيا النصيب وقت ما بيجى مش هتقوله لا
وماينفعش تدور على نصيبك لان هو اللى هيجيلك
وان شاء الله تلاقى البنت اللى بتتمناها
نورت

اسماء عوني said...

البوست دمه خفيف بجد تحفه
فعلا جواز الصالونات ده مسخره اصلا
ال ايه يقولك ابقي حبيه بعد الجواز
طب افرضي بعد الجواز ماتنيلتش وحبيته
احب اتطلق
يقولك لا
عيب البنت تطلق ماعندناش بنات للطلاق
هيههيهيهي
لا لا لا
انا هاتجوز البوي فريند بقي احسن هع هع هععع
:d
تحياتي

Bent Men ElZman Da !! said...

صح يا اسماء
احنا نبقى من انصار جواز البوى فريند
ويحيا البوى فريند الى الابد :D
ميرسى ليكى و منوره يا قمر

Anonymous said...

يابنتي ما دا الطبيعي

وهتتجوزي ازاي بقى

تضمني منين انه الافندي الي لسه هتحبيه هيكون صادق ويجي يتجوزك

ومفيهاش حاجة يعني لما ام العريس واهله يشوفوكي مش طبعا لازم يختاروا عروسة ابنهم

انا اتجوزت بالطريقة دي وهي دي الطريقة المتعارفة عندنا

والحمد لله بقالي 6 سنين متجوزة وسعيدة جدا مع جوزي

افضل بكتير من الي اتجوزا عن حب واتطلقوا بعض كام شهر

صدقيني متكبريش دماغك واتوكلي على الله ومش هتاخدي الا نصيبك

ربنا يرزقك بالزوج الصالح الي يسعدك ويصونك يارب

Bent Men ElZman Da !! said...

الاول ميرسى اوى يا قمر على الكومنت ومنوره المدونه
ثانيا
انا يمكن معاكى فى ان مش دايما اللى بنرتبط بيهم بيكونوا اد المسئوليه او بيكون الاختيار صح
بس انا فى الاول والاخر بتحط فى موضع اختيار
لو هارتبط وهاحب مجبره اختار صح عشان ماينفعش اخد بقلبى بس
ولو هاتجوز جواز صالونات مجبره بردو اختار صح عشان ماينفعش اخد بعقلى بس
وانا مقتنعه بحاجه اهم من ده كله
نصيبى هايجيلى هايجيلى لا مفر يعنى :D
وربنا يهنيكى ويسعدك يا قمر وميرسى اوى ليكى ورنورتينى

عمك ياض said...

ماشاء الله طريقة الكتابه رهيبه جدا :d:
طب فعلا معرفناش في الاخر عايزه تتجوزي ازاي ؟ عايزه يعني لازم تحبي واحد معاكي في الكليه او الشغل (معرفش سنك) وتحبو بعض وبعدين تتجوزو ؟
ولا ايه النموذج المثالي لشكل الزواج من وجهة نظرك؟

Bent Men ElZman Da !! said...

ربنا يخليك يا باشا
واكيد طبعا عايزه اتجوز واحد بحبه
مش شرط بقى كليه والا شغل
المهم ان شخص اكون مستريحاله وفيه جزء على الاقل من المواصفات اللى بحلم بيها
بس اكون مستريحاله دى اهم حاجه لان الراحه دى هتوصل لحب مع الوقت
وانا مش بفكر فى النموذج المثالى لان طبيعى مفيش شخص مثالى
ميرسى اوى على الكومنت ونورتنى :)

Kimmo Alahlaoy said...

ههههههههههههههههههههههههه


كويس ان مامته مخدتكيش اعملك فيش وتشبيه


بس انتى كدا جدعه وانا مع ندى على فكره

اول زياره ومش الاخيره

Bent Men ElZman Da !! said...

وهى كانت تقدر تعمل فيا كده يا كيمو بردو؟؟
ده انا كنت خدتها عملتلها محضر تحرى ههههههههههه
ميرسى اوى يا باشا على الكومنت
ويارب مش تكون اخر زياره

blue-wave said...

هههههههههههههههههه
ماتستعجليش
ونصيبك هايجيلك لحد عندك
وهاتحبى وتتحبى
ربنا يوفقك
تحياتى فى اول زيارة

Bent Men ElZman Da !! said...

مش مستعجله خالص والله
ميرسى ليك اوى على الكومنت
ويارب مش تكون اخر زيارده

MǿиY El-Shreef said...

ههههههههه

معلش يابنتي

صدقيني هيزقوا بس انتي اوعي تتنازلي واوعي تشيلي دماغك وتحطي بدالها كوز دره

ههههههههه

اقولك ع حاجه سوفيلهم كل حاجه والله هيزهقوا ف الاخر

كل واحده بتاخد نصيبها مش اكتر ولا اقل

مممممممووواه

:l:

Bent Men ElZman Da !! said...

هههههههههههههههههههههههههههه
لا يا مونى ابدا مش انا اللى اتنازل عن دماغى مقابل كوز دره ههههههههههههههه
وانا وراهم لحد ما ازهقهم ويا انا يا هما بقىىى
ممممممووووووواه ليكى يا قمر
نورتينى

ابو على said...

واللهى يا بنتى انا من رأيى انه مش عيب جواز الصالونات واللى هو ف الاساس اسمه جواز القرايب بس عشان القرايب مبقوش يعرفو بعض فسموه صالونات
ولا انتى قرايبك خلصو ولا ايه

نعكشة said...

كح كح كح

اتفق ولا أتفق

يعني لو شخص إتم ( يعني إيه إتم بالمناسبة السعيدة دية)

المهم يعني
لو شخص مش كويس و مش عاجبك قولي لأ زي ما عملتي

و لو شخص كويس إديلة فرشة
قصدي فرصة

و اعمليله محضر و حركات
و هوه يعملك محضر و حركات

و اعملولوا فيش و تشيش
قصدي تشبية

و شوفوا لو عليه غرامات ولا تراخيص ولا حاجة

والله ما عشارفة صراحة

بصي
ساعة النصيب
هتيجي هتيجي

صالونات بقة
انتريهات
إنشالة سفرة

أو حتى تكون محطة اتوبيس

ربنا اللي عايزة هيحصل

و بعدين الصالونات بتديكي خبرة ( وش بيغمر مش عارفة ليه)

سلام عليكِ

نعكشة said...

اة صحيح نسيت ـقول ( ضحكتيني ربنا يكرمك)

سلام

Bent Men ElZman Da !! said...

ابو على

بيتهيالى ان جواز الصالونات يختلف تماما عن جواز القرايب
على الاقل جواز القرايب ده انا ببقى عارفه قريبى ايا كانت درجه قرابته
يعنى شوفته مره واتنين وتلاته فى مناسبات بتجمع العيله كلها
انما جواز الصالونات ده واحد ماعتقدش انى هاكون شوفته كتير ده اذا كنت شوفته اصلا
و الحمد الله قرايبى مش خلصوا دول يسدوا عين الشمس :D
بس انا مش من انصار جواز القرايب بردو
ميرسى ليك على الكومنت

Bent Men ElZman Da !! said...

نعكشه

بالمناسبه السعيده دى
انا حسيت من كلامك انى هاتجوز عربيه هههههههههههههههه
بس والله انتى زى العسل
وصالونات انتريهات والله ما هتفرق ان شاء الله يكون جواز مطابخ حتى نتقابل عند التلاجه و تتم الشبكه عند البوتجاز
المهم زى ما قولتى فعلا انه يكون حد مستريحاله
ولو مستريحاله اكيد هاديله فرشه قصدى فرصه
ومعاكى حق والله جواز الصالونات ده بيدى الواحد خبره
حتى الواحد يعرف يتعامل مع الاشكال دى ازاى :f:

كلمه اخيره بقى
انا كل ما ادخل المدونه بتاعتك هابقى ببوس البوست خلاص عشان يسمحلى اعمل تعليق
مش عارفه اعمل تعليق خالص ياترى ده غباء منى والا انتى قافله التعليقات؟

ومبسوطه اوى بالكومنت بتاعك والله
نورتينى يا قمر

احساس لسه حى said...

عزيزتى

لما القدر والمكتوب والميعاد يجى

هتعرفى انتى بتاعت ايه

ونصيبك ايه

تحياتى

سلام

Bent Men ElZman Da !! said...

اكيد طبعا انا مقتنعه ان الموضوع ده نصيب
وانا مستنياه وقت ما يجى
براحته يعنى
شكرا ليك على الكومنت ونورتنى

... amr said...

.مممممممم كلامك سليم ... المشكلة بقى ان الحب مبقاش كل حاجة زي الاول .. كمان بقى الحب لية تعريف مختلف .. تقدري تقولي ان كتير بيفكروا في الحب على انة - وجهة نظر - مش أسلوب حياة .. أنا موافقك طبعا في موضوع جواز الصالونات دة .. و رافضة .. ربنا يرزقك باللي يحببك فية و يبسطك فس حياتك

Bent Men ElZman Da !! said...

معاك حق يا عمرو
انت قولت حاجه مهمه اوى
ان الحب مش كل حاجه
ومش معنى انى هاتجوز واحد بحبه يبقى اكيد حياتنا كلها حب فى حب وهناكل حب ونشرب حب ونتنفس حب
اكيد هيبقى فى اختلافات بتبان مع الوقت زيه زى اى شخص غيره
بس انا قصدى ان الافضل يكون شخص باختيارى واقتناعى التام بيه عشان استحمل منه ومعاه اى حاجه
ميرسى اوى على زوقك ونورتنى

:a: :b: :c: :d: :e: :f: :g: :h: :i: :j: :k: :l: :m: :n:

Post a Comment