09 May 2009

هو اتوبيس كام بيروح فين ؟!!!!؟

.

الاسبوع اللى فات بعد الانتخه والنوم على طول الخط
قررت اخيرا انى ابدأ اذاكر واروح الكورس
قولت يابت تعالى على نفسك وفكك من ميه البطيخ اللى انتى عايشه فيها دى
وابدأى ذاكرى بقى والا هتاخدى صابونه فى اخر السنه ودى السنه الاخيره
والصابونه فيها بتبقى وصمه عار فى شهاده الليسانس مدى الحياه
(مش عيب لما يتكتبلى دور اكتوبر بردو .. وبعدين لست انا اللى يتكتبلى كده ابدا)

المهم من اول يوم انا قولت الكورس ده مالوش الوان اصلا
بالذمه حد يتوه فى العباسيه موطن جامعتى حبيبتى (سامحنى يارب على الكذبه دى - ال حبيبتى ال )
هو انا مش توهت بالظبط بس كنت هاعيط خلاص لما لاقيت الاتوبيس طلع على كوبرى اول مره اشوفه
بس لما نزل من على الكوبرى انشكحت اوى (مرادف فرحت اخر حاجه يعنى) اصلى طلعت عارفه المكان
ده اول يوم


تانى يوم بقى كان فى مكان تانى خااااااالص واول مره اروحه
(احنا كل ترم فى مكان شكل -اصل الدكتور بيحب يورينا معالم مصر المختلفه من خلال الكورس)
روحت علشان اشوف هاركب ايه وهانيل ايه وانا بتوه فى شارعنا اصلا
المهم لاقيت المواصله الوحيده اللى اعرفها قولت يا ما انت كريم يارب
واروح أسال السواق يقولى الاتوبيس بايظ وبنصلحه(يوم فحلقى من اوله )
قولت اقف يمكن الاقى حاجه تانيه واستنيت استنييييييت
وفى الاخر لاقيت اتوبيس جاى مكتوب عليه المكان اللى عايزه اروحه
من المفاجأه ماصدقتش وكنت خلاص هارمى نفسى قدامه عشان يقف
ركبت واول كرسى ولازقت فيه وانا هبله كده مش عارفه انا ركبت رقم كام
قولت لما أسال البنت اللى جنبى (وانا اصلا مابحبش اقعد جنب حد حتى لو بنت ادام الاتوبيس فاضى)
انا: لوسمحتى هو ده الاتوبيس ده رقم كام؟
البنت: ده رقم 131
انا: ايه ده .. مش ممكن .. منار !!!!!!
البنت: ديناااااا !!!!!
واكتشفت ان البنت دى كانت صاحبتى فى ثانوى (يا محاااسن الصدف - محاسن مين؟!!؟)
وانا ماكنتش شوفتها بقالى اكتر من سنتين
بجد دى كانت احلى حاجه حصلتلى فى اليوم ده
قعدت بقى تحكيلى عنها وعن اصحابنا و شغلها وانا كمان قعدت احكيلها بردو
كنت مبسوطه اوى انى شوفتها كل ما ابصلها اشوف فيها ايام وذكريات عمرها ما هتتكرر
كل ما بشوفها بفتكر ان فعلا كانت فى ايام حلوه فى حياتى وكنت مبسوطه فيها بجد
اتكلمنا كتير اوى لانها كانت نازله فى مكان قريب من المكان اللى انا نازله فيه
المهم افترقنا على وعد بلقاء اخر (حلوه حته الافلام العربى دى)
لما وصلت قعدت ادور على مكان الكورس
المشكله انى كنت جنبه وقعدت الف والف والف فى الاخر روحتله عن طريق كوالالمبور تقريبا
بس تعمل ايه فى الشعب المصرى بقى يحب يوريك معالم الجمهوريه بالوصف الجامد بتاعهم
العيال بتوع الكورس دول وربنا حبه تحف
رغم انى ماليش علاقه بأى حد فيهم بس لما بشوفهم بيضحكونى بحس انهم عيال منفضه كده
مهما كانت عندهم مشاكل بس بيضحكوا وبيهزروا وبيضحكونى معاهم
عدى الموضوع على خير بخلاف وانا راجعه وقفت نص ساعه عشان الاقى حاجه اركبها
وبخلاف انها كانت ماتوصلش للبيت على طول كمان

ولما وصلت وجيت اركب حاجه تانيه ببص جنبى لاقيت ميييييييين
لاقيت خالى (اليوم ده كان يوم الصدف العالمى)
قولت يلا اهو الاقى حد يونسنى وانا مروحه
وادى تانى يوم


تالت يوم بقى
روحت عادى جدا مع معاناه مع المواصلات كالعاده
ولما روحت توهت بردوووو فى نفس المكان وخدت نفس اللفه (انا مابسترش فى حته ابدا انا عارفه)
وانا راجعه بقى ركبت حته اتوبيس مسخره ويارتنى ماركبته بس مالقتش غيره
وانا قاعده بعد ما شاب محترم قام وقعدنى (لسه فى شباب زوق والله)
لاقيت بنت وقفت جنبى والبت ضاربه على وشها عشرتاشر بوز وفكرتنى بحمبوزو لاوى بوزو بتاع اونكل كرومبو
بس اكتشفت بقى الجريمه لما لاقيت موبيلها بيرن وهى بترد
البنت : لا مفيش حاجه كنت مصدعه فا قولت امشى
البنت تانى : لا يا تامر ماهو مش معقول كده انا قولتلك 100 مره مش بحب تعاكس بنات قدامى
البنت بردو(يعنى انا كنت هاسمع كلام تامر منين مثلا):وانا قاعده دورى ايه بقى طرطور والا ايه

ماكنتش بتصنت والله يا جدعان
هى اللى كانت مسمعه الاتوبيس كله ولا كأنها بتغظينا عشان عندها تامر واحنا لا
المهم ان فى النهايه البت رجعت لورا وخلاص ياحبيبى ماتزعلش ولما اروح هاكلمك
(يابنتى ماينفعش كده اثبتى على موقفك بنات اخر زمن صحيح)
وانا قاعده حطه ايدى على خدى
(ياعينى عليكى يا دودو وانتى مش لاقيه لا تامر ولا وائل ولا حتى توتو تقوليله الكلام ده)

اييييييييه دونييييييييا
بعد كده بقى
الاقيلك واحد مجنووووون ياما عامل مستهبل واقف جنبى
وكان بيغنى هندى او صينى حاجه من الاتنين يعنى
بس اللحن كان عاجبنى جدا والله
بيقول ربنا بيدى قوه للكافر فى الدنيا عشان يحاسبه كويس فى الاخره (والله معاك حق)
و رجع يقول الاغنيه الهندى تانى (ما كنا ماشيين كويس يا حج حصلك ايه بس )
وبعدين رجع قال اصل لما القصير يقع المفروض الطويل يمسكه
كان نفسى افهم يقع فين وايه اللى هيوقعه وهو مين القصير والطويل دول اصلا

فى حاجه مستغرباها فى ده كله بقى
انا ماكنتش بحب الاتوبيسات وكنت بحب المترو
و بالرغم من اللى بشوفه فى المواصلات ده بس بقيت احبها وبقيت اكره المترو !!
المواصلات دى والله بتحصل فيها مواقف عجيبه
بشوف حكايات ومواقف وحاجات كتير بتضحكنى وبتخلينى اقعد أتامل فى الناس

فى النهايه بقى
ياريت اللى يعرف اى مواصله بتروح فى اى حته يقولى
اصلى ناويه اعمل بيان بارقام الاتوبيسات للعلم بالشئ
واحتمال اعمل دراسات فى كيفيه البحث عن مواصله فى زمن استهبلت فيه المواصلات

18 comments

MǿиY El-Shreef said...

هههههههههههههههههههههه

ياعيني يابنتي

بتفكريني بايام شبابي

بردوا ماسترش ابدااااااا اتوه ف بلدنا ف شارعنا عادي يعني

اول يوم جيت فيه تبوك نزلت اشتري بيبسي من البقاله تحت البيت تهت وماعرفتش ارجع ههههههههههه

ربنا يعينك ع الموصلات والبنات ذوات التمورة والتنورة او البنطلون عادي ههههههههههه

ربنا معاكي يابنتي وتعدي المعركه دي ع خير

وترفعي راس اخوتك ف التدوين

سلاموز بقى

مووووووووواه

وسلمي ع ندى والنبي

MR-BOLICA said...

والله يا دودو صعبتى عليا
وحعيطنى من العياط
بكره تجيبى فولكس واجن كده ههههههههه
وتبقى اخر روقان

مش عارف ليه حته انك اتكلمتى انتى وصحبتك دى مش مستعوبااها
لانك اصلا مبتتكلميش فى الحاضر فمش حتتكلمى فى الذكريات
:f:
انا بس عايز اعرف
البت الواد لما عاكس بنات قدامهاا
عاكسهم ازاى ..افتكر الحكايه بينهم لارج يعنى والموضوع ايزى فاكيد اخد راحته فى المعاكسه

وصحيح خالك دفعلك الاجره ولا لالا
:P

Bent Men ElZaman Da !! said...

MǿиY El-Shreef

يعنى انتى دلوقتى يا مونى اتطورتى بقيتى الحمد الله بتسترى فى اى حته تروحيها؟
طب وحياتك تقوليلى عملتى ايه عشان تبقى كده بدل ما انا فضيحه فى كل حته بروحها بالمنظر ده ههههههه
تموره اوتنوره اهو كل اللى يجى حلو وحياتك ههههههههههه
انتى بس ادعيلى وانا ان شاء الله هارفع راسك للسماء :D
انا قولت لندى انك بتسلمى عليها وهى كمان بتسلم عليكى
مواااااااااه ليكى يا قمرايا

Bent Men ElZaman Da !! said...

MR-BOLICA

مش عارفه ليه يا احمد حاسه انك بتتريق :D
عرفت منين انى عايزه فولكس واااجن :g:
بس الجديده طبعا مش القديمه :P
وبعدين يابنى انت مش فاهم
انا احكى عن الذكريات زى ما انا عايزه انما عن الحاضر الاليم ده ابداااا هههههههههه
بص هو اللى فهمته من كلام البنت
انه كان عمال يكلم واحده ويقولها يعنى انا ماوحشتكيش طب قوليلى بحبك هههههههههههههههههه
البت حقها تتعصب الصراحه ايه قله الادب دى
هى دورها ايه فوتى علينا بكره مثلا يعنى والا ايه
لا طبعااا خالى مادفعليش الاجره
انا عملت سوسه و ماسلمتش عليه الا لما دفعت الاجره نياهاهاها
ايوه لست انا اللى خالى يزلنى عشان اجره بعد كده ههههههههههههههههههههههه

MR-BOLICA said...

هههههه
شكلك كنتى بتلمعى اوكر
مش ارتحتى الا لما قعدتى على الاساس

Bent Men ElZaman Da !! said...

وحياتك تنزل بالترجمه يا احمد
لانى مش فاهمه حاجه خالص والله :D

MR-BOLICA said...

بتلمعى اوكر كنايه على انك كنتى متابعه اوى ومركزه اوى معاهاا

Bent Men ElZaman Da !! said...

والله ابدا
هى اللى كانت واقفه جنبى ومسمعه الاتوبيس بحاله
مش ذنبى بقى :$

حقى اهرتل said...

بما انى من الزمن اللى فات ولسه خارج من الة الزمن قلت افوت على الزمنه سلام عشان الحق الفجوه الزمنيه

NeNo Bs MgaNeNo said...

ههههههههههههههه لول دنيا يا اختشى انتى طول عمرك بطيخه اصلا دى مش جديده

هههههههههههههه وهتفضلى عايشه فى حوض النعناع وفى ميه البطيخ وكل حاجه

لانك اصلا قوله هههههههههه واحسن حل يا دينا انك تعدى فى البيت بدل ما تفضحينا والاقى عيل عنده 7 سنين ولا حاجه جايبك من اول شارعنا بيقولنا دى تايهه هههههههههههههههههههه p:

Lady E said...

هههههههههههههههه وحياة ربنا انتي عسل وبحس انك بتتكلمي عليا بجد انا كمان بتوه في شارعنا نياهاهاهاها بس الحمد لله اني مش من القاهرة

وعجبتني اوي الحتة دي لما بتقولي

(ياعينى عليكى يا دودو وانتى مش لاقيه لا تامر ولا وائل ولا حتى توتو تقوليله الكلام ده)
اييييييييه دونييييييييا

هههههههههههههههههه كلنا بنقول نفس الكلام بس هنحقد عالبونية ليه ده تامر بيعاكس بنات قدامها ههههه ايه الناس دي

بجد بوست يجنن تسلم ايدك وربنا يوفقك في الليسانس يا قمرايا

mimi said...

والله يا مانورا ... أنتي دمك خفيف خالص وعسولة
وربنا يكرمك وتخلصي الليسانس وما يتكتبش في الشهادة دور ثان

أحسن بجد وحشة مووووت

تحياتي وشدي حيلك

Bent Men ElZaman Da !! said...

حقى اهرتل

كل ما الفجوه الزمنيه ترميك هنا
ابقى خدلك لفه.. مستنينك :D

Bent Men ElZaman Da !! said...

NeNo Bs MgaNeNo

تصدقى يابت مفيش بطيخه غيرك ههههههههههه
فضحانى فى كل حته كده
انا هامنع عنك الجهاز ده لمده خمس سنين قدام
ابقى شوفى هتعملى ايه بقى

Bent Men ElZaman Da !! said...

Lady E

وربنا انتى اللى عسل
يعنى اهو مش انا لوحدى يا جدعان الله بتووووووه يعنى فى امل الوضع يتحسن

بس بجد كويس انك مش من القاهره
القاهره دى مااااااااا ساه فى الزحمه والمواصلات والله

هههههههههههههههههههههه
انا مش بحقد على البنيه الغلبانه كفايه اللى هى فيه اصلا
لكن من حقى انا كمان يبقى عندى تامر هههههههههه

ميرسى ليكى يا جميله ومنورانى دايما
وربنا معاكى فى امتحاناتك انتى كمان يارب

Bent Men ElZaman Da !! said...

mimi

ادينى بشدددد لحد ما حيلى هيتقطع هههههههههههه
ميرسى ليكى يا قمرايا
وربنا يوفقك فى حياتك انتى كمان يارب

عمك ياض said...

ايه ده انا رديت هنا ردي راح فين

Bent Men ElZaman Da !! said...

هههههههههههههه
راح فى البوست اللى قبله

:a: :b: :c: :d: :e: :f: :g: :h: :i: :j: :k: :l: :m: :n:

Post a Comment

 

FaceBook Comments

wibiya widget