02 August 2011

(1) رمضان بين زمان ودلوقتى

.




الفانوس زمان حاجه
ودلوقتى حاجه تانيه خاااااااالص
مبدأيا كده المقارنه هتبقى ظالمه
انا عن نفسى شايفه انها ظالمه للفوانيس الجديده
وفى ناس ممكن تشوفها ظالمه للفوانيس القديمه
اصل انا صراحه مش مقتنعه بتاتا مطلقا بالفوانيس الصينى الجديده دى
انا مش مقتنعه غير بالفانوس ابو شمعه
ايوه هو ده الفانوس اللى يتسمى فانوس بجد
فاكره زمان لما كنت بجيب الفانوس ابو شمعه بقى والا الفوانيس الجديده
اللى كانت اخرها اوى تنور وتقول رمضان جانا اهلا رمضان
كنت بخرج العب بيه مع اصحابى وانا صغيره
وكنا بنبقى فرحانين اوى
ونقعد نلف حوالين بعض بيه كده
وحالو يا حالو رمضان كريم يا حالو
وحتى لو مش خرجت كفايه انى احط فيه الشمعه واقعد اتفرج عليه
بجد كانت متعه ماتجيش مكانها اى متعه تانيه

اما دلوقتى
الفوانيس بقت شكل البطه و الفيل و القطه
والادهى بقى كرومبو
ايه الميزه ان الواحد يمسك فانوس على شكل كرومبو؟؟
يعنى مثلا لو الفانوس اتسرق كرومبو اللى هيكشفلك مين اللى سرقه؟؟
والاحدث السنادى بمناسبه احوال البلد
وهو فانوس الثوره
يمكن ميزته الوحيده انه هيرجع الاطفال تانى يهتموا بشكل الفانوس العادى
ويهتموا بشكل العلم بتاعنا اكتر ويحبوه اكتر
 
بس حتى العيال الصغيرين دلوقتى مابقوش بيخرجوا ويلعبوا زى زمان
ومش بقوا يعملوا دوشه وهيصه زى زمان
وبقوا بيزهقوا بسرعه من اللعب بالفوانيس
هو العيب من الفانوس بتاع كرومبو ده انا متاكده
بس يمكن الموضوع ده يرجع لان كل حاجه حوالينا اتطورت
وبطلت تبقى على شكلها القديم
ولازم كل سنه التجار يخترعوا اشكال جديده عشان تجذب الاطفال للسلعه دى

*****************


دعاء النهارده

اللهم اجعل صيامى فيه صيام الصائمين وقيامى فيه قيام القائمين
ونبهنى فيه عن نومه الغافلين
وهب لى جُرمي فيه يا اله العالمين
واعف عنى يا عافياً عن المجُرمين

******

معلومه النهارده

مع اقتراب شهر رمضان المبارك، تكثر أسئلة الناس عن مسألة غسل الأسنان خلال وقت الصيام، 
 وهل يؤدي الى افساد الصيام خلال فترة الإمساك؟، 

 هناك العديد من الفتاوى بخصوص هذا الشان

•"لا بأس باستعمال معجون الأسنان أثناء الصيام ، ولكـن يجب لفظ ما تحلل منه في الفم ، وإن ذهب منه شيء إلى حلقه من غير تعمد لم يضره . وكذلك لا بأس باستعمال غسيل الفم المشتمل على الأدويـة بشرط أن يمجه ولا يذهـب إلى حلقه منه شيء متعمـدا . وهكذا ذوق الطعام لا حرج فيه بشرط أن يمجه ولا يبتلعه”.
فتوى رقم 18084

•."لا حرج في ذلك مع التحفظ عن ابتلاع شيء منه، كما يشرع استعمال السواك"
أشياء لا تـفسـد الصوم
لسماحة الإمام عبد العزيز بن عبد الله بن باز رحمه الله

•"استعمال المعجون للصائم لا بأس به إذا لم ينزل إلى معدته، ولكن الأولى عدم استعماله، لأن له نفوذاً قويًّا قد ينفذ إلى المعدة والإنسان لا يشعر به، ولهذا قال النبي صلى الله عليه وسلم للقيط بن صبرة: «بالغ في الاستنشاق إلا أن تكون صائماً» فالأولى ألا يستعمل الصائم المعجون، والأمر واسع، فإذا أخره حتى أفطر فيكون قد توقى ما يُخشى أن يكون به فساد الصوم”.
الفقيه العلامة محمد بن عثيمـين رحمه الله
 

إذا لم يصل معجون الأسنان إلى الحلق فإنّه لا يُفطّر ، والأفضل أن يُستخدم في الليل ويستعمل السواك بالنهار .

24 comments

Casper said...

ليس رمضان وحده الذي اختلف عن زمان وتلون بمحدثات العصر الحديث

كل شئ من حولنا نزعت منه الاصالة وتم استبدالها بهبل الحاضر ومجرياته

===========

جزاكي الله خيرا على المعلومات
وكل سنة وحضرتك طيبة

EL pRiNcEssA said...

والله هو فانوس كرومبو ده اللي ملوش لا طعم ولا ريحة مفيش احلي من الفانوس ابو شمعة بجد حلو اوي
اكيد الناس هترجع تاني تهتم بالفانوس ده وتسيبها من كرومبو وبطة والحاجات الغريبة دي
شكرا ليكي علي معلومة غسيل الاسنان
جزاك الله خيرا

Bent Men ElZaman Da !! said...

Casper

فعلا كل حاجه حلوه بتروح مع تغيير الزمن

شكرا ليك جدا
وكل سنه وانت طيب :)

Bent Men ElZaman Da !! said...

EL pRiNcEssA

اللى بيروح صعب الناس ترجعله تانى
دلوقتى مش بسهوله الاطفال تقتنع انها تلعب غير بالحاجات الحديثه ومش هيفكروا ابدا فى الحاجات القديمه بتاعتنا دى

ميرسى ليكى يا جميله نورتينى :)

reemaas said...

ياصباح الخير
انا بكره الفوانيس اللى واخده اشكال دى
كرومبو وغير دى يا جماعه مش فوانييييييييييس دى لعب

الفانوس شمعه بقى او غيره له شكل محدد ولا اقبل له بديل

سواح في ملك اللــــــــــــــــــه- said...

هايل يابنت

حقيقي فانوس زمانتحسي انه

كان ليه عبق وروح شهر رمضان

فوانيس دلوقتي تيك اواي

كريمة سندي said...

كل عصر وجيل له أوان .. وان اختلف عن القديم فللقديم نكهة لا تنسى لدينا دائما

شكرا لك على المعلومات وبارك الله فيك وفي وقتك

تشاك نولاند said...

كل سنة وانتي طيبة

^__^

ابراهيم رزق said...

الفانوس تقرير لواقع محاولة فقد الهوية
كل الدول بتحاول تعمل لها هوية حتى الدول التى ليس لها تاريخ لا يتعدى بضع سنوات
يجب ان يعود الفانوس ابو شمعة و يجب ان نشجع الصناعات اليدوية
يجب ان يصدر قرار بمنع استيراد الفانوس الصينى لعدة اسباب بعضها اقتصادى و بعضها ثقافى و بعضها وطنى
تحياتى

m.hallawa said...

السلام عليكم
رمضان كريم
كل وقت ولة أذان
دة جيل وخد وقتة
والجيل دة كمان ها يأخذ وقتة
وما دايم غير وجة الله الكريم
تحياتي

سبايدرمان said...

هو لازم غسل الاسنان في الصيام
ممكن بعد السحور على طول و بعد الفطار
بلاش في فتره الصيام افضل !!

Bent Men ElZaman Da !! said...

reemaas

ماهو الحكايه ان الشكل المحدد ده
مابقاش موجود بالقدر اللى المفروض يكون موجود بيه

Bent Men ElZaman Da !! said...

سواح في ملك اللــــــــــــــــــه-

صح كلامك
فوانيس دلوقتى تيك اواى
بدليل ان ماحدش بقى بيستمتع بيها رغم انها بتنور وبتغنى
اما زمان الفانوس كان بدائى الى حد ما
بس ممتع اكتر

Bent Men ElZaman Da !! said...

كريمة سندي

اكيد كل عصر وليه متغيراته

شكرا لحضرتك جدا على زوقك :)

Bent Men ElZaman Da !! said...

تشاك نولاند

وانت بالصحه والسلامه
ونورتنى بزيارتك :))

Bent Men ElZaman Da !! said...

ابراهيم رزق

انا عاجبنى والله الاقتراح ده
حتى نشجع الصناعه اليدويه فى بلدنا ونحى التراث من تانى

شكرا لحضرتك :)

Bent Men ElZaman Da !! said...

m.hallawa

ونعم بالله
كل وقت وليه شكلياته فعلا
شكرا لحضرتك نورتنى :)

Bent Men ElZaman Da !! said...

سبايدرمان

اكيد ده الافضل
بس فى ناس متعوده على غسيل الاسنان الصبح مثلا
وكذا بيقعد يسأل غلط والا لا
ودى كان فتاوى للحكم فى الموضوع ده

شكرا ليك يا محمود

heba atteya youssef said...

مـــشاعر بريئة رائعه

ليتنا نعود أطفالاً ..ليتنا
ولكنا نحب الماضي لأنه ذهب ولو عاد لكرهناه

لكل زمن مذاقه الخاص .. ولكل جيل متعته الخاصه

ولكن يظل رمضان له نكهة وسحر خاص

Bent Men ElZaman Da !! said...

heba atteya youssef

بس بردو فى حاجات فى الماضى
ليها متعه مفيش اى حاجه دلوقتى تتعوض مكانها للاسف

ميرسى ليكى يا جميله منورانى :))

ابراهيم رزق said...

امنى عارفه انا لما بضايق من لعب الكورة كنت بفتكر نفسى و انا صغير و قد ايه كنت بحب لعب الكورة اقول يا واد استحمل

ملاحظة ثانية ملهاش قيمة
رغم انى فيروزى و بحب كل اغانى فيروز و نغمة موبيلى فيروز و بالذات الاغنية دى بحبها الا انى احس انها بتفصلنى عن البوست الرمضانى ممكن نحط اغنية رمضانية او دعاء و ابتهالات للنقشبندى على ان نعود سريعا لفيروز بعد رمضان

Bent Men ElZaman Da !! said...

ابراهيم رزق

لازم الجيل الجديد ياخد فرصته بردو

حاضر يا استاذ ابراهيم هاغيرها حالاً :))
معلش ماجاش فى بالى اغيرها

كلمات من نبع احساسي said...

ينهاري انا غايبه بقالي كتير يا دودو بس انا كدة قريت اول سلسله زاكيد هكمل الباقي
بس فعلا ملوحظتك عن الفوانيس في محلها انا كنت عماله ادور علي فانوس تقليدى يبقي حلو حاسه الفوانيس التقليديه بقت زى الورقه تحسيها هتتكسر في ثــــانيه
وبعدين فانوس كرومبوا ايه دة اللي ميتحسش بيه ولا بكلامه اصلا تحي كاننك بتشتري فانوس بيفتش عن حاجه هههههههههههههههه

فعلا رمضان زمان كان لى مزاق وحلاوة تانيه زى العيد كدة انا بقالي فتره مبحسش بالاتنين مهما اعمل :):) حاجه محيره ومكئبه

Bent Men ElZaman Da !! said...

كلمات من نبع احساسي

هما اللى بيعملوا الفوانيس تقريبا مابقوش يهتموا بالفوانيس القديمه بيفكروا بس فى الجديده زى بتاعه كرومبو دول
انا بردو بحس كده فى جو العيد زيك
وقولت ان شاء الله ابقى اتكلم عنه فى وقتها

ميرسى ليكى يا قمر ومبسوطه انك متابعه السلسله :))

:a: :b: :c: :d: :e: :f: :g: :h: :i: :j: :k: :l: :m: :n:

Post a Comment

 

FaceBook Comments

wibiya widget