03 August 2011

(2) رمضان بين زمان ودلوقتى

.



كنا زمان من قبل ما نسمع الرؤيه بكذا يوم
كل الاطفال اللى فى الشارع يتجمعوا مع بعضهم
ويقعدوا قدام البيوت كل واحد يجيب شويه ورق زينه
من الملون ده
وكمان اكياس الشيبسى الفاضيه بنقعد نجمع فيها
عشان نيجى على رمضان وقت ما نحضر للزينه
و نقص فيها ونعملها اشكال كتيره
ويجى حد كبير من اهلنا او اكبر حد فينا فى السن
يساعدنا اننا نعمل من الورق ده
فانوس كبيييير
ويتعلق فى نص الشارع
ولما نحط لمبه جواه
بينور الشارع بضئ كل الوان الورق اللى معمول بيها
كنت ممكن اقف فى الشباك وابص للفانوس ده
من غير ما اعمل اى حاجه تانيه
وافضل متنحه عليه
كان بيبهرنى اوى
ومازال لحد دلوقتى لانى نفسى اعمله بأيدى
وعمرى ما جربت

 
انما دلوقتى
اقصى حاجه ممكن تتعمل
ان الشباب اللى فى الشارع يجمعوا فلوس من الجيران كلهم
عشان يعلقوا نور
هو فى الاخر ليهم اصلا
عشان بيقعدوا طول الليل يلعبوا كوره لحد السحور
لغايه ما حسيت انهم هيجبولى ارتجاج فى المخ
من كتر رزع الكوره وخبطها فى الشباك بتاعنا
حتى الاطفال اللى كان بيبقى عندهم حماس
انهم يشاركوا بعض فى الزينه وكل واحد يشجع التانى
الاطفال دلوقتى مش بقوا كده
ومش فارقه عندهم فى زينه والا لا
كفايه نور الشارع ليهم اللى بيكون اشاره ان هى دى زينه رمضان
يمكن لانهم اصلا من طلعوا شافوا ان دى من عادات رمضان
اللى اتعودنا نعملها

*****************************

دعاء النهارده

اللهم قربنى فيه الى مرضاتك
وجنبنى فيه من سخطك ونقماتك
ووفقنى فيه لقرائه اياتك
برحمتك يا أرحم الراحمين

 *****

حديث النهارده
وتفسيره

عن أبى هريره رضى الله عنه قال

قال رسول الله صلى الله عليه وسلم:
(من صام رمضان ايماناً واحتساباً غُفر له ما تقدم من ذنبه)

تفسير الحديث

قوله صلى الله عليه وسلم
(من صام رمضان)
صيغه من صيغ العموم تشمل كل من صام رمضان رجلاً كان او امرأه

معنى احتساباً...الاحتساب هو طلب الاجر ورجاء الثواب من الله تعالى
 اى اه يصومه على معنى الرغبه فى ثوابه طيبه نفسه بذلك غير مستثقل لصيامه ولا مستطيل لأيامه

قوله صلى الله عليه وسلم
(غفر له ما تقدم من ذنبه)
هذا هو جواب الشرط , فمن صام رمضان على الوجه المطلوب شرعاً مؤمناً بالله وبما فرضه الله عليه 
ومحتسباً للثواب والاجر فإن المرجو من الله ان يغفر له ما تقدم من ذنوبه
واستناداً الى ذلك
قوله صلى الله عليه وسلم فى حديث اخر
(الصلوات الخمس ,والجمعه الى الجمعه , ورمضان الى رمضان ,مكفرات لما بينهن ما اجتنبت الكبائر)


17 comments

سواح في ملك اللــــــــــــــــــه- said...

ههههه

موضوع الكورة ده اخوكي كاتب هذه السطور حلله

بغرقلهم الشارع مية

لدرجة انهم كرهوني ههههه م

جازاكي الله خيرا علي التذكرة

كريمة سندي said...

كل سنة بتمر الناس بتتغير

جعله الله في ميزان حسناتك اللهم آمين

شمس النهار said...

حديث جميل
ربنا يتقبل منا جميعا الصيام والقيام

شمس النهار said...

الكومنت مش راضي يتنشر ليه؟؟؟؟

Bent Men ElZaman Da !! said...

سواح في ملك اللــــــــــــــــــه-

لو عليا اعمل فيهم كده
بس بقول اهو شهر من نفسهم يقلبوا دماغنا فيه شويه بقى ههههههه

شكرا ليك جدا ومنورنى دايما :))

Bent Men ElZaman Da !! said...

كريمة سندي

اكيد بتتغير كل حاجه فى حياتنا يوم عن يوم

شكرا لحضرتك جدا ونورتينى :)

Bent Men ElZaman Da !! said...

شمس النهار

ربنا يتقبل مننا جميعاً
انا اسفه بس عامله اشراف على التعليقات :)

شكرا لحضرتك ومنورانى دايما :))

Radwa Ashraf said...

معاكى حق و الله , مع كل سنة رمضان بيبدأ يتغير
و الناس معادتش بتستقبله بنفس الفرحة بتاعت السنة اللى قبلها
بس ده ميمنعش ان رمضان هو أكتر شهر بجد الناس كلها بتستناه من السنة للسنة ..
..

sun of free dom said...

اضح انها كانت ايام حلوة مع انى معشتهاش

Bent Men ElZaman Da !! said...

Radwa Ashraf

معاكى حق يا رضوى
فى النهايه بردو رمضان هو رمضان مهما اختلفت تصرفاتنا فيه
بس روحه لسه موجوده

Bent Men ElZaman Da !! said...

sun of free dom

يارب تعيشى ايام احلى منها :))

شمس النهار said...

انا شكلي عندي عكووووسات في المدونة هنا
:)))))))

Bent Men ElZaman Da !! said...

شمس النهار

لا خالص والله ده المدونه منوره بوجودك
الحكايه كلها فى الاشراف على التعليقات عشان فى اوقات ناس بتستظرف :D
تعليقك اتنشر والله :))

كلمات من نبع احساسي said...

فعلا عندك حق يا قمر
بس موضوع الشارع موضوع خنقنى ياريت حتى يتلعب فيه كورة احس باي دوشه كدة دى هادى هدوء وكان الاطفال خلصوا من البلد ههههههههه

Bent Men ElZaman Da !! said...

كلمات من نبع احساسي

انا عايزه تقوليلى فين الهادى ده بس هههههههه

ميرسى ليكى يا جميله ونورتينى :))

كلمات من نبع احساسي said...

والله يابنتى هادى هدوء مريب ههههههههههههههههه

Bent Men ElZaman Da !! said...

كلمات من نبع احساسي

لا ربنا يكون فى عونك والله ههههههه

:a: :b: :c: :d: :e: :f: :g: :h: :i: :j: :k: :l: :m: :n:

Post a Comment

 

FaceBook Comments

wibiya widget