18 August 2011

(4) احلى ما فى رمضان

.




من الظواهر الرمضانيه اللى مش اختفت
بالعكس دى بتستمر وبتطور اكتر
الدورات الرمضانيه
الخاصه بالكوره

الدورات دى بتبدأ مع بدايه اول ليله فى رمضان
كل شباب الشارع بيلموا بعض ويتفقوا على مجموعه من الماتشات
ما بين اكتر من فريقين
تحس انه دورى مصغر
او ممكن نقول دورى مناطق

وبيجمعوا من بعض فلوس ويشتروا اى حاجه تلزمهم للماتشات دى
وفى كمان بيجمعوا فلوس كمبلغ معين
بياخده الفريق اللى بيكسب فى اخر الدوره الرمضانيه دى
ودى بتبقى روح حلوه اوى بينهم 
ان منهم فيهم بيدوا جايزه للى يكسب فى الاخر

حتى لو الشباب بيعملوا دورات فى اى وقت تانى
بس الدوره الرمضانيه ليها نظره تانيه خالص وشكل مختلف


اجمل حاجه
ان الشباب بيتعاملوا مع الدوره دى على انها شئ اساسى
صعب واحد فيهم يكسل عنها فى يوم
او يقول لا ماليش مزاج العب

والاجمل بقى
ان لو نفس الدورات دى لو اشتغلت فى اى وقت تانى
اهالى المنطقه مش هيقبلوا بالدوشه اللى بتحصل ابدا
بس فى رمضان الموضوع بيبقى مختلف تماما
بالعكس الاهالى بيعجبهم اوى الجو ده
وفى ناس كتير منهم
بتخرج فى الشبابيك والبلكونات يتفرجوا

الدوره الرمضانيه من الظواهر اللى مصر بالتحديد
بتتميز بيها عن باقى الدول العربيه

*****************************************

دعاء النهارده

اللهم ارزقنى فيه طاعه الخاشعين
واشرح فيه صدرى بانابه المخبتين
بأمانك يامان الخائفين

*****

حدث النهارده



وفاة سيف الله المسلول “خالد بن الوليد”:

في 18 من رمضان 21هـ الموافق 20 من أغسطس 642م: 
توفي سيف الله المسلول “خالد بن الوليد” 
صاحب العديد من الفتوحات والانتصارات على أعتى إمبراطوريتين 
هما “الفرس” و”الروم”، 
وقد قضى حياته كلها بين كرٍّ وفرٍّ وجهاد 
في سبيل إعلاء كلمة الحق ونصرة الدين.


اندلاع أعمال عنف بين الهندوس والمسلمين في مدينة كالكوتا الهندية:

في 18 من رمضان 1365 هـ الموافق 16 من أغسطس 1946م: 
اندلعت أعمال عنف بين الهندوس والمسلمين في مدينة كالكوتا الهندية 
وامتدادها إلى عدد من المدن الأخرى، 
واستمرت الاشتباكات 3 أيام، أسفرت عن سقوط 7 آلاف قتيل.
 
مبايعة الحسن بن علي بالخلافة

في 18 رمضان 40هـ الموافق 24 يناير 661 
بويع الحسن بن علي رضي الله عنهما بالخلافة بعد مقتل أبيه.


يوسف بن تاشفين يجمع شمل المسلمين في الأندلس

في 18 رمضان 484هـ الموافق 1091م 
استطاع القائد يوسف بن تاشفين أن يجمع شمل المسلمين في الأندلس، 
ويقضي على التفرقة بين ملوك الطوائف هناك.


نهاية دولة المرابطين في المغرب

في 18 رمضان عام 539هـ، 
كانت نهاية دولة المرابطين في المغرب العربي،
وقيام دولة الموحدين، 
فعندما اشتد الصراع بين (المرابطين) 
بقيادة تاشفين بن علي بن يوسف بن تاشفين والموحدين
- بقيادة عبد المؤمن بن علي- 
حصل قتال ومطاردة بين الجيشين، 
وقتل تاشفين بعد أن هوى من فوق الصخرة، 
فقطع الموحدون رأسه وحملوه إلى (تينمل) مركز الدعوة الموحدية، 
وكان هذا الحادث هو نهاية دولة المرابطين في المغرب، 
علمًا بأن المرابطين ولوا بعد تاشفين أخاه إسحاق 
الذي لم يكن له أي أثر في التاريخ فيما بعد.

18 comments

The illusionist said...

انا متأكد انى الاول اكيد

صباحك فل وخير وسعاده
ايوه الدورى ده من غيره مينفعش رمضان

انا دايما بتغلب ومخدتش الاول عمرى

بس مفيش مشاكل

بيتطور كل سنته واحتمال نشترى كاس العالمالسنه الجايه ونسميه كاس شارع الزناتيه

صباحك فلكيش استميشن جلوبليزاشن

Bent Men ElZaman Da !! said...

The illusionist

ههههههههههههههههه
حلوه فكره كاس العالم دى
اهم حاجه ان يكون فى امل
مصيرك هتكسب ما تقلقش :D :D

سواح في ملك اللــــــــــــــــــه- said...

الدورات الرمضانية

حاجة جميلة جدا كنا بنعملها في السنين اللي فاتت قبل الفطار
بس السنه دي واللي قبلها عشان حرارة الجو مش عارف بتتعمل امتي

الحقيقة بقالي فترة مش بشارك فيه او بتفرج

والسبب موجود في الرابط ده


http://sawahmasry.blogspot.com/2010/12/blog-post_27.html

Bent Men ElZaman Da !! said...

سواح في ملك اللــــــــــــــــــه-

شوفت التدوينه دى دلوقتى
الواحد بيفتكر ان التعليم هيديله مركز معين بيحط عينه عليه
بس بعد ما بنخلص دراسه
بنكتشف الحقيقه المره للاسف :(

شكرا لحضرتك ونورتنى :))

ريبال بيهس said...

صباحك ورد

لا الدورات هذي موجودة كمان في السعودية

وتضم كمان كرة الطائرة لأنها رياضة شعبية

زي كرة القدم وتستمر طوال ايام الشهر الفضيل

لكن بنختلف في جزئية المكافئة لأن الفريق الفايز

يسلم ميداليات وكاس وطبعاً نجيبه من أقرب وأرخص

محل مستلزمات رياضية لأننا في النهاية راح نرميها

وننسى الفوز ...

رائع ذكرك ظاهرة مهمة لنا لأني ظنيت أنها تضايق

الكثير من الأهالي بسبب تأخر مواعيد المباريات .

تحياتي

ابراهيم رزق said...

فكرتينى

بصى يا ستى الواحد كان بيلعب قبل الافطار و بعد الافطار و فى اكثر من مكان لدرجة ان الدورات دى كان ليها ميزانية لزوم الاشتراك كانت بتتعب الواحد و الواحد كان بيحوش ليها و ساعات فى ميدان كبير كنا بنستغل ان السيارات قليلة ليلا و مضاء نلعب به ماتشات بعد صلاة الفجر ثم ننام لنصحو على مباريات قبل المغرب
ايام


تحياتى

خالد ناجى said...

اكيد دى حاجه مميزه ف رمضان

نوت جميل

طالبة مقهورة ..درجة أولى said...

صباحك سكر نبات :)

انا عمري عمري ما شوفت الدورات الرمضانية ديه للاسف :(
بس مفاتنيش كتير لاني مش بحب الكورة عموما
واضح انك عاملة الموضوع ده سلسلة ..بس حلوة اوي على فكرة

الى اللقاء يا دودي

شمس النهار said...

عجبتني اوي فقرة حدث في مثل هذا اليوم
بجد جميلة

كلمات من نبع احساسي said...

احم انا تقريبا بسبب الموضوع بحقد علي الولاد انهم في اى سن بينزلوا ويلعبوا كدة ههههههههه

علي فكرة يا دودو حلوة السلسله دى اوى انك بتنهى بالحلو في الاخر وحلو الادعيه والاسلوب جدا مبتكره انتى فعلآآآآآآآآآ

Bent Men ElZaman Da !! said...

ريبال بيهس

اول مره اعرف ان كمان فى السعوديه فى كده
حاجه جميله بجد ونشاط مفيد

شكرا لحضرتك
ومنورنى بوجودك :))

Bent Men ElZaman Da !! said...

ابراهيم رزق

ذكريات جميله اوى يا استاذ ابراهيم
شكرا لحضرتك ومنورنى دايما :))

Bent Men ElZaman Da !! said...

خالد ناجى

شكرا لحضرتك
نورتنى :)

Bent Men ElZaman Da !! said...

طالبة مقهورة ..درجة أولى

ازاى ماشفتيهاش يارضوى
ده اى حته فى مصر بيعملوا كده
بس ادام مش بتحبى الكوره يبقى حقك :D

ميرسى اوى يا جميله على زوقك
ونورتينى :))

reemaas said...

ماعرفش ليه كنت حاسه ان الدورة الرمضانيه دى حاجة خاصة بشباب مدينتنا اتاريها حاجة قوميه

Bent Men ElZaman Da !! said...

شمس النهار

مبسوطه ان حدث النهارده عجبك

نورتينى بوجودك والله :))

Bent Men ElZaman Da !! said...

كلمات من نبع احساسي

احنا عايزين نحق على الولاد فى حاجات كتير تقريبا

ميرسى اووى يا قمر
ومبسوطه ان الموضوع عجبك
نورتينى :))

Bent Men ElZaman Da !! said...

reemaas

لا دى فى جميع محافظات مصر
ماتقلقيش يعنى :))

ميرسى ليكى يا قمر

:a: :b: :c: :d: :e: :f: :g: :h: :i: :j: :k: :l: :m: :n:

Post a Comment

 

FaceBook Comments

wibiya widget