19 August 2011

(5) احلى ما فى رمضان

.




من ضمن اجمل المظاهر اللى بنشوفها فى رمضان
موائد الرحمن
وتعتبر من اهم اعمال الخير اللى بتتعمل فى الشهر الكريم

بالرغم من ان فى اشكال مبسطه لفكره موائد الرحمن
من عصر الرسول عليه الصلاه والسلام
الا ان اول موائد الرحمن بشكلها المعتاد اللى احنا عارفينه
كانت فى عهد احمد ابن طولون
هو اول حد دعا لعمل مائده رحمن 
بس وقتها دعا ليها كل الاغنياء والحكام فى الوقت ده
وفوجئ وقتها الحكام بوجود فقراء ومحتاجين كتير
وقتها طلب منهم احمد ابن طولون 
انهم يكونوا بنفس السخاء طول شهر رمضان
والاستمرار فى اقامه موائد الرحمن
ودى كانت الفتره اللى استمرت منها عاده موائد الرحمن
الى الان



مش معنى ان حد بيفطر فى مائده رحمن يبقى محتاج
ممكن تكون ظروفه سمحتله انه يبقى فى الشارع فى وقت الفطار
فا بيكون الحل قدامه انه يروح مائده رحمن لو هى قدامه
وحتى وقتها هيحس بروح الناس اللى بتفطر مع بعضها
زى ما قولنا رمضان بيحب اللمه
تخيل بقى اللمه دى كلها بتبقى روحها عامله ازاى

وحتى بالرغم من سوء ظروف البلد
وسوء ظروف الاحوال الاقتصاديه
بس بردو الموائد دى لسه مستمره
والناس اللى بتتعود تعملها 
بيحسوا انهم ماينفعش يجى رمضان عليهم من غير ما تتعمل
فى روح فيها بتبقى حلوه
شوف الواحد بيكون ايه شعوره لما يحس انه هياخد ثواب افطار صائم
وده مش صائم واحد
انما بيوصلوا للالاف

ياريت الناس المقتدره 
تعمل الموائد دى طول السنه مش بس فى رمضان
عشان تبقى سبيل لكل المحتاجين والفقراء
بدل ما يمدوا ايديهم ويطلبوا حق أكلهم

*********************************

دعاء النهارده

اللهم ارزقنى فيه رحمه الايتام
واطعام الطعام
وافشاء السلام
وصحبه الكرام
بطولك يا ملجا الأملين

****

حديث النهارده


قال رسول الله صلى الله عليه وسلم:
" من فطر صائما كان له مثل أجره ـ غير أنه لا ينقص من أجر الصائم شيئا "
 (صحيح).

قال شيخ الاسلام 
والمراد بتفطيره ان يشبعه
وقد كان السلف الصالح يحرصون على اطعام الطعام ويرونه من افضل العبادات


بركة تفطير الصائم:
الملائكة تصلي عليك وجبريل يصافحك !
فقد قال: رسول الله صلى الله عليه وسلم:
" من فطر صائما في شهر رمضان من كسب حلال 
صلت عليه الملائكة ليالي رمضان كلها، وصافحه جبريل ليلة القدر، ومن صافحه جبريل عليه السلام يرق قلبه وتكثر دموعه" ..

فما أجمل هذا التقدير من جبريل لمن فطر صائماً
وكون المصافحة في ليلة القدر، إشارة بفوز هذه المسلم بثواب هذه الليلة

والجزاء بالمثل وأعظم 
وعن أبي سعيد الخدري أنه قال :

أيما مؤمن سقى مؤمنا شربع غلى ظمأ ,
سقاه الله يوم القيامه من الرحيق المختوم
وأيما مؤمن أطعم مؤمنا على جوع، أطعمه الله من ثمار الجنة ... "
(صحيح).

ولا ريب ان تفطير الصائمين من خصال الخير
لما يترتب عليه من المصالح العظيمه
وعلى رأسها زياده التألف والحب بين المسلمين

10 comments

سواح في ملك اللــــــــــــــــــه- said...

موائد الرحمن

انا اجدها اصبحت وسيلة للدعاية

والاعلان عن فضل فلان

وتقواه وافطاره لصائمين

وقد يكون المال مشبوه

كأن تقيم المائدة راقصة مشهورة

او احد المشتبه في اموالهم

فالرحمن طيب لايقبل غير الطيب

ويجب ان تكون المائدة التي اقيمت باسمه تعالي

طيبة المال

وانا اري انه لابد ان تكون لغير القادرين فقط

اما من يستطيع ان يشتري لو حتي ساندوتش يفطر بيه

فاراه لايجب ان يقبل علي نفسه ان يطعم منه

تحيتي لك ي

Bent Men ElZaman Da !! said...

انا معاك طبعا فى نقطه ان لازم يكون فلوس الموائد حلال
لان ربنا مش هيقبل فلوس حرام فى عمل خير
ووسيله للدعايه دى
هتدخل فى نطاق بردو ربنا اعلم بالنوايا
كل واحد ونيته بقى وربنا عارف

شكرا ليك على تعليقك :))

EL pRiNcEssA said...

حلوة اوي
فعلا موائد الرحمن مبيبقاش فيها ناس محتاجين بس لا دي بتلم كل الاطراف

مبسوطة انك رجعتي تكتبي تاني عن رمضان

Bent Men ElZaman Da !! said...

EL pRiNcEssA

ميرسى ليكى يا جميله
انا اللى مبسوطه اكتر بوجودك
نورتينى :)

Anonymous said...

تعرفي كل مؤائد الرحمن لوحده بيبقى ساحر بجد مصر من أكتر الدول اللي فيها تكافل إجتماعي و ده يمكن سبب إن ملايين الفقرا و البسطاء بيتعايشوا.
ربنا يجازيكي خير عن الدعاء و الحديث و يجعله في ميزان حسناتك
أرق تحية لكي

شيرين سامي

reemaas said...

بس تعرفى
احمد ادم فى بنى ادم شو اللى مش بحبه ده حسسنى انها فى تركيا احسن ماعرفش ليه رغم انى بحس ان جمال موائد الرحمن فى بساطتها اللى عندنا

Bent Men ElZaman Da !! said...

Anonymous

كلامك صح يا شيرين
شكرا ليكى على زوقك
نورتينى :))

Bent Men ElZaman Da !! said...

reemaas

لا فى البرنامج ده بيحسسك ان كل حاجه هنا فى احسن منها بره للاسف

منورانى يا نور :)

خالد ناجى said...

اللهم ارزقنى فيه رحمه الايتام
واطعام الطعام
وافشاء السلام
وصحبه الكرام
بطولك يا ملجا الأملين


تدوينه جميله
وان كان ف ناس بتشتغل فكره الموائد لحاجات شخصيه

بس عموما وجودها ف حد ذاته بيغنى ناس كتير عن السؤال

او كمان بردو ساعات الناس بتبقى ع الطريق او متاخره فيبفطروا فيها

Bent Men ElZaman Da !! said...

خالد ناجى

فعلا يا استاذ خالد
بس فى النهايه ربنا اعلم بالنوايا وعارف كل واحد بيعمل اى حاجه ليه
كلامك صح جدا

نورتنى بوجودك :))

:a: :b: :c: :d: :e: :f: :g: :h: :i: :j: :k: :l: :m: :n:

Post a Comment

 

FaceBook Comments

wibiya widget