06 September 2011

بيقولوا النظافه من الايمان ...!!

.



فى حاجه لافته نظرى اوى اليومين دول
حاول كده تنزل اى شارع فى اى وقت
وشوف كميه الزباله اللى مرميه فى كل ركن فيه اد ايه !!!


المشكله مش بس فى اننا بنرمى الزباله
ولا اننا بنحاول من كام سنه فاتوا
نقنع الناس انك ماينفعش ترمى زباله حواليك
ولا ينفع انك تملى الشارع اللى انت ساكن فيه زباله
واللى يحدف من البلكونه
واللى يخرج شنط اد كده من البيت يرميها فى كل جنب شويه
الحكايه دى تقريباً بقت متأصله جوه ناس كتير من الشعب المصرى وبقى متعود عليها خلاص
ومحتاج ثورتين تلاته كده عشان يمكن يقتنع ويفهموا
ان فعلا النظافه من الايمان

المشكله دلوقتى ان المسئولين اللى بيشجعوا الناس انها ترمى الزباله
وتملى الشارع بالمنظر المستفز اللى ماحدش بيستحمله ده
هتقولى ازاى؟؟...اقولك ازاى
يعنى لما تلاقى ان يعدى يوم واتنين وتلاته
وعمال النظافه ماحدش فيهم بيجى يشوف شغله وينظف الشارع او ياخد الزباله من البيت عندك
انت هتعمل ايه؟؟
هترمى الزباله اللى فى البيت عندك فى الشارع
ماهو انت اكيد مش هتستحمل تسيب الزباله فى بيتك اللى انت عايش فيه
هيحصل ايه بعدها؟؟
هتزيد اكوام الزباله اللى فى الشارع بطريقه مستفزه جدا
فا هتروح انت تبلغ ان بتوع النظافه مش بيجوا
المفاجأه انك هتلاقى رد واحد بيتكرر
وهى ان عربيات الزباله بايظه
الغريبه ان حتى لو فى عمال نضافه بينزلوا
فا هما بياخدوا الزباله
يرموها فى مكان تانى فيه اكوام اكبر واكبر
او حتى بيحرقوها
والمنظر بيبقى بجد يقرف الواحد

طب ما الفلوس اللى انتوا بتاخدوها على قلبكم اد كده
من فلوس النظافه اللى على الكهربا
مش بتصلحوا بيها العربيات ليه وترحمونا من القرف ده؟؟

انا كنت فاكره الحكايه دى فى المنطقه بتاعتنا بس
لكن كل ما بخرج الاقى جميع المناطق اللى حوالينا كده
قولت يمكن المكان اللى انا ساكنه فيه بطلوا يتعاملوا معانا على اننا فى زباله بنرميها
فا لغوا حكايه عمال النظافه والعربيات بتاعتهم 
واحنا نعمل اكتفاء ذاتى بقى
ويمكن ننمى جوانا قدرتنا على اعاده التدوير والا حاجه!!

بس امبارح كنت بتفرج على التليفزيون
ولاقتهم بيقولوا ان الحكايه دى فى جميع مناطق القاهره
وكمان محافظات كتير زى الجيزه و اسماعيليه واسكندريه وغيرها

هو ده ستايل مثلا؟؟
وبعدين يعنى ايه اصلا العربيات كلها وعلى حين غره كده تبوظ 
ومفيش ولا عربيه شغاله؟
هيكونوا العربيات عملوا ثوره عليكم هما كمان يعنى؟؟

كان فى event
على الفيس بوك
بيطالب اننا نتفق كلنا نروح نرمى الزباله عند الحى
وساعتها هيخلوا فى وشهم وعند اهلهم دم
ويلموا الزباله دى بدل ما هى ماليه الشوارع كده
والحمله دى تقريباً هتبقى يوم 14/9
فكرك الحمله دى ممكن تجيب نتيجه؟؟
طب انت ممكن تعمل كده وترمى الزباله عند الحى والا هتقول وانا مالى؟؟


***اسفه على الصوره
بس الحقيقه اقذر من كده بكتير
انا حاولت اجيب صوره نضيفه شويه

35 comments

m.hallawa said...

السلام عليكم دينا
بيفعلوا أقصي ما عندهم من قذارة !!!
علشان يخلوا الشعب يقول ان عصر الحرامي المخلوع وحشيتة
كانوا نعمة علينا ههههه بس احخنا رفصنها !!!
لا
وليسة
ربنا يستر وتعدي مصر المحنة بسلام
تحياتي

Anonymous said...

مساء الغاردينيا بنت من الزمن دا
بجد صورة تضايق اي انسان يشوفها ومش شرط مصري بس بجد ضايقتني لكن فعلاً الظاهره دي حتفضل طول مافيه إهمال لأن كل إنسان للأسف هيرمي زي غيره بجد اتمنى تتحل المشكلة دي لأنها أكيد لو فضلت كدا وزادت بتكون نتيجتها أوبئة وأمراض واكثر الي حيتضرر هما الأطفال ..
لو بس الناس تفهم النظافة من الإيمان "
؛؛
؛
لروحك عبق الغاردينيا
reemaas

kmhmhgfd said...

والله يا دودو العيب من المواطنين والمسئولين
دى بتكون عربية الزبالة معدية ومحدش بيخرج الاكياس اللى عندو ولما تعدى يرموها فى اى مكان لام من جواهعم يبقوا عارفين عاقبة ده وتنمى جواهم احساس النضافه عارفة زى ايه فى بيوت تلاقيها مش نضيفه خااااااالص ده لان الناس مش نضاف اصلا وعشان تعرفيهم يعيشوا فى نضافة بيبقا صعب عليهم لانهم اتعودوا فحس النضافه واخلاقها لازم بيكون موجود من البداية ف البنى ادم
والعيب من المسئولين كمان انهم مش دايما بيوفرو مكان لمقالب البالة اللى بيضطر الواطنين انهم يعملو مقلب بمعرفتهم جنب اى بيت مهجور او كده واللى بيبوظ ف الاخر شكل البلد

بس دووونت ووورى ان شاء الله بكرة احلى :)

سواح في ملك اللــــــــــــــــــه- said...

موضوع مهم جدا

كنت لسة بحكي فيه انا وواحد صاحبي

بصي

حكومات مبارك السابقة خربت الدنيا

لما تعاقدوا مع شركات الزبالة الاجنبية

كان عندنا من سنوات قليلة سابقة

الزبالين العاديين بالعربية الكاروا بتاعتهم

كان بيمر علي كل شقة يوماتي ياخد زبالتها

وياخد تلاتة جنيه في الشهر

قاموا ايه

جابوا الشركات الاجنبية

وعملوا رسوم الزبالة اجباري

وقطعوا عيش ال زبالين


بالاضافة الي القرار

الاهوج بتاع اعدام الخنازير

اللي كانت بتاكل تلات تربع

زبالة الناس

فخربها من جميع الجهات

Bent Men ElZman Da !! said...

m.hallawa

وعليكم السلام :))

فعلا انا بقيت حاسه ان مصر عامله زى الفستان اللى بيقطعوا كل شويه حته منه
عشان يورونا اد ايه الفستان كان جميل لما ترزيه النظام السابق كانوا موجودين!!

سيبوا الفستان فى حاله بقى

Bent Men ElZman Da !! said...

ريــــمــــاس

تخيلى الصوره تضايق
اومال لما تفتحى شباك اوضتك مثلا وتلاقى المنظر ده واكتر قدامك
بتبقى حاجه تخنق اووى بجد
ربنا يسهل وكل المشاكل اللى بتطلع من تحت الارض دى تتحل
ميرسى ليكى يا جميله

Bent Men ElZman Da !! said...

zay maTigy

بصى هو العيب على الاتنين
المواطنين والمسئولين
ماينفعش نرمى المسئوليه على طرف واحد
بس فى طرف دايماً بتبقى المسئوليه بتاعته اكبر من التانى

ان شاء الله احلى انا دايماً متفائله :)

ميرسى ليكى يا جميله

Bent Men ElZman Da !! said...

سواح في ملك اللــــــــــــــــــه-

انت اتكلمت بجد فى اهم نقطتين
دلوقتى احنا اللى بنتأثر بعواقب اللى بيعملوه للاسف

شكرا ليك جدا

εïз زهرة εïз said...

موضوع مزعج جدااا
ومنظر بيتعب العين اصلا
انا اتصدمت من الموضوع دا لما جيت مصر
بتمنى يكون في خطوة فعلية لحل الموضوع دا

Bent Men ElZman Da !! said...

εïз Semsema εïз

والله كلنا بنتمنى يا سمسمه
ميرسى ليكى

FAW said...

فيه معلومة أحب أضيفهالك من محافظة الشرقية

صاحب شركة النضافة أعرفه شخصيا بيقول إن المحافظة متعاقدة معاه إنها تتحمل تكلفة الصيانة الدورية وفرق زيادة سعر الوقود السنوية . . آخر محافظ قبل الثورة كان منفض تماما لغاية ما الأجهزة إنهارت من غير صيانة , فالأداء قل جدا , بعد الثورة بقي , كل صناديق الزبالة إتسرقت , وفعلا مدينة الزقازيق دلوقتي مفيهاش ولا صندوق , وجالنا محافظ جديد بدل ما يعوض الشركة راح حاجز علي معداتها ومسرح العمال وكل اللي بيحصل دلوقتي , جرار بمقطورة من أيام الهكسوس بيعيد توزيع الزبالة عالشوارع , مشي ده كمان وجالنا محافظ تالت , ولا أي جديد برضو :(

آرثـر رامبـو said...

مرحبا

والله مو في مصر بس .. في كل مكان
والشقيري بـح صوته وهو يوعي الناس في خواطر ومافي فايده

تحية

Bent Men ElZman Da !! said...

FAW

طب انا عايزه افهم
اللى بيسرقوا صناديق الزباله دى بيودوها فين؟؟؟
والمحافظ يسرح العمال ليه؟؟
الناس دى اتهبلت على فكره !!!

شكرا ليك بجد على المعلومه دى

Bent Men ElZman Da !! said...

آرثـر رامبـو

للاسف بجد الناس التوعيه مش بقت تأثر فيهم
ادام اتعودوا على حاجه خلاص
سواء اللى بيرموا الزباله
او اللى مش بيشوفوا شغلهم ويشلوها

شكرا ليك

شهرزاد المصرية said...

رمى الزبالة فى الشارع فعلا بقى style
يا عزيزتى حاجة تكسف
طبعا ما هو عمال النظافة إتفرغوا للشحاتة أة تأجير اليونيفورم للى بيشحتوا بيه
أعتقد إننا نستحق عن جدارة لقب أقذر شوارع فى العالم
و لا حول و لا قوة إلا بالله

Bent Men ElZman Da !! said...

شهرزاد المصرية

للاسف نستحق كده
رغم اننا المفروض نبقى فى مرحله بنتخلى فيها عن اى حاجه تسئ لشكلنا وشكل بلدنا
بس للاسف مابيحصلش

شكرا لحضرتك

reemaas said...

انا عملت مرة حاجة زى حمله كده كل واحد فيها يوعى اهل بيته بس مش اكت انهم يرموا الزباله حتى فى الصندوق الخاص بيها لكن وربنا بيكسلوا وبيحطوا جنبه حسيت ان الموضوع ذاد بعد الحمله وربنا انا مافيش حاجة جيبالى اكتئاب اد الزباله

شمس النهار said...

موضوع الزبالة ده من السنة اللي قبل اللي فاتت وكنت كتبت عنه بوست ساعتها
مضحك حبتين
بس دلوقتي خد شكل تاني
الاول كانت حرب بين الحي والزبالين التقليديين
وبعدين حرب بين الحي والزبالين التقليديين وشركات النظافة المستوردة
دلقوتي بين الحي والشعب
عايزين يبينوا قد ايه احنا شعب همجي بيعيش في الزبالة

شمس النهار said...

عيزة اعرف انا ليه بعاني اني اعلق هنا
:)))))

Bent Men ElZman Da !! said...

reemaas

حلوه فكره الحمله دى يا نور
الواحد ليه مش عارف يعمل حاجه من الحاجات دى دلوقتى ليه؟
الناس مكبره
زى ما الحى مكبر بالظبط

ميرسى ليكى ونورتينى

Bent Men ElZman Da !! said...

شمس النهار

موضوع الزباله ده على طول
بس دلوقتى تقريبا الحى عايز يعرفنا ان مش الثوره اللى هتنضفلكم بلدكم
واشربوا بقى

انا مش عارفه بردو التعليقات مالها :(

catroz said...

متتاسفيش على الصورة .. الواقع فعلا اقذر
انا مع انهم رموا الزباله عند الحى
حسوا شويه باللى الناس بتشوفوا
المفروض اصلا يبقى فى رقابه على الكلام ده كلوا
بي هتقولى لمين بقى !!!

Unknown said...

شكرا لقلم يعرّي الواقع بكل جرأة


مدونة الزمن الجميل يسعدها دعوتك إلى جديدها !





...

Bent Men ElZman Da !! said...

catroz

ماهى فعلا لما تبقى عند الحى
هيشلوها هما بنفسهم ومش هيكسلوا

ميرسى ليكى نورتينى

Bent Men ElZman Da !! said...

منجي باكير

شكرا لحضرتك

Emtiaz Zourob said...

احنا محتاجين ثورة من الداخل ، تغير أخلاقنا وطباعنا بالاول .. كنت اتمنى ان تغير الثورة مابداخلنا ولكننا نحتاج لثورة دينية وأخلاقية
"""
اتمنى ان تحقق هذه الحملة نتائج جيدة على الصعيد العام وهذه هي مهمة الشباب شباب المستقبل

Bent Men ElZman Da !! said...

وجع البنفسج

للاسف معنى الثوره مش وصل لناس كتير مننا
ومحتاجين نفهمها صح عشان نقدر نغير من اخلاقنا وعادات كتير غلط اتعودنا عليها

شكرا لحضرتك

Sara said...

صدقيني الزبالة مالية المنصورة بطريقة مستفزة جدًا !!!!
تعرفي جمب سور مدرستي ...فيه جبل زبالة لطيف أوي لدرجة إننا مش بنعرف نقف في حوش المدرسة بسبب الريحة !!
ناهيكي بقه عن كمية الحشرات العجيبة الغريبة اللي بتطلع لك منها
و لا لما يجوا يحرقوا الزبالة و يطلع علينا القرف!!
بجد بجد بجد مفيش دم و مفيش أخلاق
أنا معرفش الدولة ليه مش بتطبق مشروع قومي للزبالة و لا المواطن المصري بقه بيحترم نفسه و بيرمي الزبالة في مكانها الصح !!
للأسف الدنيا بايظة
و كمان الكناسين بيجوا بس عشان ياخدوا منك فلوس لكن مش بيشيلوا حاجة !!
بجد بجد
حاجة مقرفة
أنا لسه راجعة من المدرسة و مش قادرة هموت من ريحة الزبالة :(

Bent Men ElZman Da !! said...

Sara

ربنا يكون فى عونك صراحه يا ساره
كلنا فى جميع الاماكن والمحافظات بنعانى من نفس المشكله وبنفس القدر
مش عارفه اخرتها ايه
بس فى حاجات كتير فى بلدنا لسه محتاجه واقفه

eng_semsem said...

لسه البلد عشان تقوم من زمن المخلوع متاجه فترات طويله من تصحيح كمية الخراب اللي كانت بسببه هو وشيلته بس ان شاء الله بكره احسن لمصر والمصريين

فشكووول said...

السلام عليكم
ما هو ما حدش يعرف ان المخلوع وعصابته المفتريه خربوا البلد وماسابوش فيها حاجه خالص غير الشوية الفلوس اللى فى البنك المركزىودول يا دوب يأكلونا 6 شهور كمان وخلاص وعشانا بعد كدا عليك يا رب
تحياتى

Bent Men ElZman Da !! said...

eng_semsem

ان شاء الله
احنا كلنا مستنين بكره اللى يكون احلى

شكرا ليك ونورتنى

Bent Men ElZman Da !! said...

فشكووول

وهما عشان كده بيقولولنا اشربوا بقى
وللاسف احنا الوضع يوم عن يوم بيكون اسوء
بس لازم نتفائل عشان مش نكتئب

شكرا لحضرتك وسعيده جدا بزيارتك

Radwa Ashraf said...

العيب من الاتنين
و معاكى حق الموضوع بقى متأصل
اللى هو الناس حتى و هى ماشية مش بتفكر تدور على سلة ترمى ففيها حاجة معاها
بقى اسهل حاجة انك ترميها ى الشارع
و أهو بيقولوا ان النظافة من الايمان

Bent Men ElZman Da !! said...

Radwa Ashraf

عشان ناس كتير اتعودت للاسف
ومش عندهم استعداد يغيروا ده فيهم

نورتينى يا رضوى بجد :))

:a: :b: :c: :d: :e: :f: :g: :h: :i: :j: :k: :l: :m: :n:

Post a Comment