14 November 2011

كلام والسلام....كلاكيت عاشر مره

.


مش معنى انى بكتب هنا عن حاجه معينه بنتقدها 
يبقى انا مش بعملها
لا بالعكس
ممكن اكون بنتقد نفسى اصلا

********************
 
لما بكتب هنا فى المدونه
بكتب عشان فى حاجه جوايا عايزه اقولها
فى حاجه لافته نظرى عايزه اتكلم فيها
مدونتى شبهى اووى
عشان كده كل حاجه بكتبها بتبقى شبهى
لان انا مش عملاها عشان اوصل بيها لحاجه
عملاها عشان اوصل بيها لنفسى لما ابقى تايهه

********************

بحب اوى اكتب الالغاز
يعنى اكتب حروف او علامات او كلمات مالهاش علاقه ببعض
عشان انا بس اللى افهم اللى مكتوب
وماحدش غيرى يقدر يفهمه

********************

كتير اوووى بيتقالى انى غامضه
عشان مش بتكلم كتير
مش بحكى عنى وعن حياتى بطريقه مباشره كتير
مش ليا اصحاب كتير
مش بعبر عن اللى جوايا كويس
مش بقول بسهوله لحد انا جوايا ايه
يمكن كل ده فعلاً يخلينى غامضه
بس انا اوقات كتير ببقى مبسوطه بكده !

********************

مابحبش ابداً حد يلعب فى حاجتى
ولا يلغبط الترتيب اللى انا بكون مرتباه لكل حاجه
حاجاتى مكتوب عليها ممنوع الاقتراب او التصوير والا هتتكهرب :D
احب احافظ عليهم لدرجه انى ممكن احتفظ بحاجه عندى من سنين طويله
وتفضل بنفس حالتها وشكلها
اوقات بحس ان ده شئ كويس
 واوقات بحس ان دى انانيه منى !

********************

نفسى ابطل ابقى انانيه فى اوقات كتير !!!

********************

من صغرى وانا بحب القرايه
بدأت قرايه بشكل مستمر بعيداً عن قصص الاطفال
مع رجل المستحيل وبعدين بقى صرخه الرعب وملف المستقبل
وماوراء الطبيعه اللى مازالت مسيطره عليا وممكن تسرقنى من اى كتاب
مروراً بأى كتاب يقع فى ايدى واحس انه هيعجبنى فا بقرأه
القرأه كانت صديقتى الوحيده فى وقت من الاوقات
قعدت فتره طويله مش أقرا زى زمان
بس من قريب رجعلى النشاط فى القرايه تانى
بس المشكله ان دلوقتى القرايه اكتر حاجه بتساعدنى على النوم
مهما كنت فايقه !!
نفسى ارجع أقرا بحُب و كتيييير زى زمان

*********************

المطر النهارده كان جميل اوووى
حسسنى بأحساس حلو

*********************

بحب الشتاء جداً
وجود الشتاء والبرد والسهر مع كوبايه النسكافيه واحشنى
الشتاء بيجيلى بحاله من الاتنين
يااما اقصى حالات الاكتئاب
ياما اقصى حالات التصالح النفسى والهدوء الداخلى
بتمنى الشتاء ده يجى معاه بأجمل حالاتى

34 comments

سواح في ملك اللــــــــــــــــــه- said...

(من شدة وضوحها يظنها الناس لغزا )

هذه احدي تاملاتي

فكل مالانسان كان غامض

يزداد وضوحا عند من يهتم بقراءته

شخصيتك جميلة

تكره الكذب

وتحن دائما للماضي

وانطوائك ده معناه ان فيه حاجات كتير مش بتعجبك

وبتستفزك

فبتطبقي قاعدة

الوحدة خير من جليس السوء

حظي حلو اني ببقي موجود

وقت نشر البوست اليومي بتاعك

تحيتي

mena said...

جميل اوى كل اللى قولتيه جميل انك تكونى صريحه مع نفسك وصريحه مع الناس ربنا يسعد انتى حد جميل اوى وانا بحبك دى بقى مش معاكسه دى أبداء أعجاب عاتى يعنى مفهاش حاجه ههههههه^_^


المطر النهارده كان جميل اوووى
حسسنى بأحساس حلو
والله وانا كمان فضلت اتفرج عليه لحد الاخر بس خوفت اوى لما سمعت صوت البرد والرعد لدرجة انى سرخت

Bent Men ElZman Da !! said...

سواح في ملك اللــــــــــــــــــه-

عجبتنى اوى الجُمله دى
كلامك صح على فكره
فعلا حاجات كتير بتستفزنى ممكن اكون انا بستفز نفسى اصلا :)
ميرسى ليك اوى على رأيك فيا من زوقك
ومدونتى اللى حظها حلو انك بتنورها دايماً بأول تعليق :)

rona ali said...

النعكشات دى حلوة اوى


معرفش مش حاسيتم غامضه حاسيتك صادقه بيجد :)

دندن انتى اول حد اتعرف عليه هنا

ودة لي معزة كبيره اوى جدآ

يارب الشتا دة يبقي حلو عليكى

انتى بنت فعلا بس نادره في الزمن دة

تحيتى

Bent Men ElZman Da !! said...

mena

انتى اجمل بكتييييير يا منه
على فكره انتى بعد كده المفروض تيجى تتقدميلى بقى ههههههههههههه

المطر فعلا بيبقى حلو بس لما بيلقب على رعد وكده بيبقى جو افلام رعب اوى :D

نورتينى يا قمر :))

Bent Men ElZman Da !! said...

rona ali

ما انا للاسف مش بعرف ابقى غامضه فى مدونتى حبيبتى ههههههههههه

انا كمان بجد مبسوطه انى اول حد تعرفيه على بلوجر دى حاجه مشرفانى حقيقى

يارب انتى ايامك الجايه كلها تبقى جميله خالص
ميرسى يا حبيبتى على زوقك ده :))

Nada Emam ㋡ said...

^_^انتي لو كدا تبقي كوبي وباست مني
:)) بجد انا وانا بقرألك كأني بوصف نفسي
حلوة جدا واسلوبك جذبني
سلمت يمناك يا دينا

Reem said...

أنت كتاب مفتوح لكن وحدهم الحمقي يظنون أنك لغز...صدقيني سيأتي ذلك اليوم الذي يفهمك فيه أحدهم..و ستقولين.."كنت علي صواب يا ريم!"

ريبال بيهس said...

صباح الورد

مدونتك مرآة تعكسك على الورق وطبيعي جداً أن تكون شبهك ..

لا أحب أن يعبث أحد بأشيائي الخاصة ليست أنانية ولكنها سلوك حياة ...

قرأت صرخة رعب أيام المرهقة ومن قبلها الرجل المستحيل والخارق أدهم صبري ولكنني توقفت عن قراءتها بعد أن تزوج سونيا فقد جرح من يحب بهذا السلوك أما ماوراء الطبيعة فأنني مازلت أحتفظ في درجي الخاص بكل الأعداء وأمنع أي شخص من الإقتراب منها لأنها من أروع المجموعات التي أقتنيتها في حياتي ..

تحياتي وإحترامي

ديارا المصرى said...

عجبنى اووووووووووووووى البوست ده حسسنى بنفسى ^ـــــ^

تاكاشى said...

كويس جدا انك تبقى شايفه نفسك كويس
عارفه عيوبك ومميزاتك
مش سهل ادا ان الواحد يعرف نفسه
فى ناس بتقضى عمرها دور على نفسها ومش تلاقها فى الآخر

ابراهيم رزق said...

خواطر صادقة

لا تعبر الا عن مكنونك

اتفق معكى فى الشتاء و الاكتئاب

تحياتى

Bent Men ElZman Da !! said...

Nada Emam ㋡

مبسوطه بجد يا ندى انك حسيتى بكده
واننا شبه بعض اوى للدرجه دى :))
ميرسى ليكى اوى يا قمر
ونورتينى

Bent Men ElZman Da !! said...

Reem

فعلا يا ريم فى النهايه كل واحد مننا ليه انسان شبهه ويقدر يفهمه
ميرسى ليكى يا قمر ونورتينى :))

Bent Men ElZman Da !! said...

ريبال بيهس

صباح النور

مش ترتيب حاجاتى يعتبر اسلوب حياه
كمان بنبقى متعودين ان كل حاجه تخصنا نرتبها زى ما احنا عايزين وماحدش يتحكم فى حاجه بتاعتنا احنا

انا على ما اتذكر ان ادهم اتجوز سونيا لما فقد الذاكره ومش كان يعرف انها الد اعداءه
ولما عرف سابها ورجع لمنى تانى بس كان بيربطه بيها ابنه اللى مش قادر يوصله
وتظل ما وراء الطبيعه ليها طابع وروح خاصه بيها جدا مش بتكرر فى اى قصص تانيه

شكرا لحضرتك جدا
ونورتنى بوجودك :)

Bent Men ElZman Da !! said...

ديارا المصرى

مبسوطه ان البوست عجبك كده
ومبسوطه اكتر بجد انك نورتينى بزيارتك
اللى اتمنى انها تتكرر :)

Bent Men ElZman Da !! said...

تاكاشى

كلامك صح
وكتير من الناس مش بتتقبل حد يقولهم العيب ده فيكم
رغم ان وارد جدا يكونوا شايفين دى عيوبهم فعلا على فكره

ميرسى ليك على رأيك ونورتنى :)

Bent Men ElZman Da !! said...

ابراهيم رزق

شكرا لحضرتك استاذ ابراهيم على رأيك
نورتنى :)

Miss LoZa said...

ايون اصلا ساعات كتير بنوك قصدنا نقض نفسنا
هههههههههههه انا بعمل الحركة بتاعت الالغاز دى اصلا
انا محدش قالى انى غامضة ابدا اصلا غير حد واحد بس .. "نفسى"
مش بحب برده حد يلمس حاجاتى ابدا اصلا
وانا نفسى اقرا اكتر :)
وانا بموت فالمطر والشتا اصلا :)

Anonymous said...

http://storyuae.blogspot.com/

اشاركك بحب القراءه

وعشق قطرات المطر :)

Radwa Ashraf said...

بحب الحاجات اللى بتكتبيها دى أووى يا دينا
و بتحسسنى أنك شبهى أووى
فى حب المطر و القراية الترتيب المعين و الأنانية ساعات :)
يا رب يكون شتا حلووو عليكى ..
تسلم إيدكٍ يا جميلة <3

nona elsha3nona said...

انا كمان بحب الشتا والمطر فهنيئا لنا ايامنا جايه

EMA said...

كلماتك جميلة و توصل للقلب بسرعة

المطر كان مخلى الشوراع شكلها حلو اوى النهاردة

تحياتي يا قمر

موناليزا said...

أنا كمان مابحبش حد يلعب فى حاجتى
وبحب الشتا جداً

خالد ناجى said...

مع رجل المستحيل وبعدين بقى صرخه الرعب وملف المستقبل
وماوراء الطبيعه اللى مازالت مسيطره عليا وممكن تسرقنى من اى كتاب
مروراً بأى كتاب يقع فى ايدى واحس انه هيعجبنى فا بقرأه


كلنا فعلا كنا بنحب المجموعات ا دى ..

وفعلا المطر حاجه زى الفل :)

Bent Men ElZman Da !! said...

Miss LoZa

تقريبا كل البنات كده والا ايه
مبسوطه ان البوست ده فيه حاجات كتير زيك وبتعمليها
نورتينى يا قمررر :))

Bent Men ElZman Da !! said...

Anonymous

وانا بحب جدا الريفيوهات اللى بتعمليها للكتب
بستفاد منها
ميرسى ليكى يا قمر ونورتينى بزيارتك :)

Bent Men ElZman Da !! said...

Radwa Ashraf

انا كمان كتيييير يا رضوى بحس انك شبهى فى حاجات بتكتبيها
دى حاجه تشرفنى بجد والله
عشان انتى من الناس اللى بحبهم وبحب اقرالهم اوى

يارب يكون شتاء جميل عليكى انتى كمان
ميرسى يا حبيبتى :)

Bent Men ElZman Da !! said...

nona elsha3nona

فعلا ايامنا هى الجايه
ميرسى يا قمر نورتينى :)

Bent Men ElZman Da !! said...

EMA

انتى اجمل :)
فعلا المطر كان جميل اوووى
والنهارده كمان كان احلى بكتير
ميرسى ليكى ونورتينى يا قمر :)

Bent Men ElZman Da !! said...

موناليزا

اطمنت ان مش انا بس يعنى
ميرسى ليكى يا جميله
نورتينى :)

Bent Men ElZman Da !! said...

خالد ناجى

تقريبا القصص دى كانت رفيقه اى حد بيبدا قرايه
ميرسى ليك على متابعتك ونورتنى :)

EL pRiNcEssA said...

بحب الشتاء جداً
وجود الشتاء والبرد والسهر مع كوبايه النسكافيه واحشنى
الشتاء بيجيلى بحاله من الاتنين
يااما اقصى حالات الاكتئاب
ياما اقصى حالات التصالح النفسى والهدوء الداخلى
بتمنى الشتاء ده يجى معاه بأجمل حالاتى



وانا كمان والله وانا كمان

Bent Men ElZman Da !! said...

EL pRiNcEssA

:))
مبسوطه اننا زى بعض كده
ميرسى يا جميله ونورتينى :)

:a: :b: :c: :d: :e: :f: :g: :h: :i: :j: :k: :l: :m: :n:

Post a Comment

 

FaceBook Comments

wibiya widget