جداريّة أدوّنُ وطني

تحت شعار أدوّنُ وطني

دعوه عامه للمدونين وغير المدونين 

للمشاركه يوم 5 ديسمبر للتدوين عن الوطن و من اجل الوطن

شارك بنص او صوره او فيديو من تصويرك

 لمعرفه باقى التفاصيل وطريقه المشاركه 

من >>> هـــنـــا

readmore »»

صوت الحريه

احساس الانتخابات النهارده مختلف بكتير حتى عن الاستفتاء

ان الناس كلها عايزه تنزل

واقفين فى الشارع بالساعات

مش عشان فى غرامه زى ما بيقولوا

بس عشان عايزين يعملوا ده

فى حماس كبير جوه كل الناس عشان فرحانين بالتغيير ده

ناس سنهم كبير وناس تعبانين 

واللى رجلها مكسوره واللى عامله عمليه

وكلهم عندهم نفس الروح انهم يعيشوا اللحظه دى

 اننا ننزل اصلا عشان ننتخب لاول مره فى حياتنا

من غير ما نكون مستنين بطاقه انتخابيه 

والا نكون عارفين ان صوتنا اصلاً مش هيفرق

مع ان وارد يكون فى شك جوه ناس مننا انه مش هيفرق اوى المره دى كمان

بس كخطوه اولى

تدعو للتفائل

حتى لو كنت بطلت صوتى

بس ايه اللى يجبرنى اختار ناس انا مش مقتنعه بيها

وانى ببطلان صوتى ده يبقى انا بضيع حق الشهداء او انى سلبيه

وهو انا لما انتخب حد مش يستحق مش يبقى كده بضيع حقهم بردو؟!؟؟

بس فكره انى انزل الانتخابات

وانا عمرى ما فكرت اعرف مين المرشحين فى الدايره بتاعتى اصلاً

دى لوحدها اختلاف كبير جوايا

ده مايمنعش بردو ان فى مخالفات كتير موجوده

منها الدعايه اللى ظهرت فجأه قدام اللجان

كنتوا فين قبل كده؟!؟

ده غير ان الكلام ده مخالف قانوناً اصلا

والحق يتقال

كانت الدعايه الاول للاخوان وده كان عامل تخفظ كبير عليهم

بس مع الوقت بقت للكل وكله بيوزع ورق

الحريه والعداله اللى كنت ملحظاه انهم معتمدين على الناس اللى مايعرفوش اى معلومه عن السياسه

او بمعنى اصح مش بيدورا فا بيدورلهم بنفسهم

زى ان كل واحد واخد لاب توبه وفلاشته وقاعد فى اى ركن كده

يجيب للناس ارقام اللجان ويقولهم انتخبوا الحزب بتاعنا

وفى واحد تانى مرشح فردى

اعتمد على ان الناس متقسمه كل واحد فى حته

وعامل اتوبيسات بتوصل الناس للجان بنفسهم بشرط انهم يتخبوهم

مطلع رحلات للجان يعنى وكل واحد يجى ومعاه ساندوتشاته !!

حتى مع كل التجاوزات دى

مبروك علينا خطوه جديده فى احساسنا بجد بالحريه

readmore »»

انتخبوا ابن الدايره...الجزء التانى

البوست ده كتبته يوم 14/11/2011

وكنت أجلته شويه

و بعد الاحداث اللى حصلت قولت مش هانزله

بس قررت انزله النهارده لانى وصلت لنتيجه اخيره فيه

هو لما وزاره التربيه والتعليم 

 يعملوا الامتحانات بتاعه نص السنه فى الخباثه كده
على انها امتحانات الشهر

يبقى ده معناه ايه؟

انهم مش متفائلين خالص بالانتخابات

وده بالتبيعيه يوصلنا احساس بعدم التفائل نهائى بتاتا مطلقاً

ايييييه بقى كميه المرشحين دىىىىى !!!

عشر الاف مرشح عن 8 محافظات بس!! ليه بقى نفسى افهم؟!؟

ده الواحد مش قادر يعرف اتنين والا تلاته من المرشحين فى الدايره بتاعته

يعنى عندنا الدايره بعد ما كانت دايره المعهد الفنى بس

بقت دلوقتى بتشمل شبرا والساحل وروض الفرج والزاويه والشرابيه

فى كل منطقه من دول فى مرشحين شكل 

وبتوع المناطق التانيه مايعرفوش عنهم حاجه

كل واحد من المرشحين بيعلن فى المكان اللى يعجبه 

ومش مهم الناس بتوع باقى المناطق يعرفوه والا لا

واللى المفروض يكونوا من ضمن نفس الدايره 

ومن حقنا نكون عارفين كل المرشحين

بس عادى نتفلق وهو يعلن مكان ما يحب

وهو هيتعب نفسه مثلاً

وكل ما اروح فى مكان جديد تابع للدايره بتاعتنا

الاقى مرشحين جداد اول مره اعرف عنهم حاجه والا اشوف صورهم حتى

هو انا هامشى الف وادور وراهم بقى والا ايه

فى بقى شويه مرشحات

حاجه اخر جمال

دول داخلين المجلس يتعاكسوا مش يشتغلوا

والا اغنيه حزب الوفد بقى

حد يفهمهم يا جدعان انهم داخلين مجلس الشعب

مش مهرجان الموسيقى العربيه

بعد الجزء الاول من البوست ده

قولت لما أسال اختى هترشح مين؟

لاقتها بترد عليا بسرعه من غير تفكير

وبتقولى على اسم واحد مترشح عن الدايره بتاعتنا 

لاول مره يترشح بس كنت بسمع اسمه الى حد ما قبل كده

قولتلها اشمعنا

قالتلى اصله بيخدم الناس من قبل ما يترشح

هى اختى نزل عليها الوحى على غير العاده  كده ليه 

ووصلت للى هترشحه بكل سهوله كده

اومال انا ليه مصعبه الموضوع بالمنظر ده يعنى

بس لما فكرت

 هو انا ليه اختار بالطريقه دى اصلا

انا مش عايزه اختار مرشح خدمات

انا عايزه اختار مرشح يبقى عنينا وسط الحكومه

وقت مايعملوا حاجه يسألهم ده ليه

مش مجرد ناس بتقدملنا رشوه مستخبيه فى كلمه خدمات

ولا واحد بيدور على حصانه عشان يستخبى هو نفسه وراها

اما حزب الحريه والعداله عاملين كُتيب كده

كاتبين فيه اهداف الحزب

حسيت انه دستور مُصغر

فكرنى اوووى بمواد الدستور

كلام مثالى اوى زياده عن اللزوم

لدرجه انه مايتصدقش

او بمعنى اصح احنا اتعودنا مش نصدقه

مفيش حاجات محدد بتتقال واللى بيقولوه بيعيدو ويزيدوا فيه

مفيش حاجه محدده بعينها قالوا هيعملوها

ولما مش يعملوها يتحاسبوا على كده

عاملين ناصحين يعنى

وده اكدلى انى بردو مش هارشحهم

اما بالنسبه للرموز الانتخابيه اللى مازالت لافته نظرى اوى

رمز الكمثرى ورمز الجزر ورمز الموز

تحس انهم مرشحين من سوق العبور تقريباً

والا بتوع رمز الرسيفر والتكييف واللاب توب

حاسه انى لو دورت شويه هلاقى رمز تويتر ورمز الفيس بوك

التطور التكنولوجى يصنع المعجزات

بعد اللى حصل فى الاسبوع اللى فات ده

وعدم وجود اى موقف واضح من جميع الاحزاب والمرشحين

ولا كأنهم مرشحين فى بلد تانيه 

مش نفس البلد اللى بيحصل فيها الاحداث دى كلها

قررت انى هانزل الانتخابات

وهابطل صوتى

عشان مفيش حد يستحق انى ارشحه

readmore »»

مصر تبكى أسفاً...!!

الواحد بجد دماغه واقفه ومش عارف يقول ايه بالظبط

المفروض كان فى يوم امتناع عن التدوين فى حمله التدوين اليومى

حداد على الشهداء وتضامناً مع الثوار فى التحرير

بس اليوم طول معانا شويه وبقوا كذا يوم

ايه القسوه دى

ايه كل اللى بيحصلنا ده

انا فعلا من الناس اللى عاشت الثوره فى الاعاده

لانى للاسف مالحقتهاش اول مره

فى العرض الاول

يوم 25 يناير

كان الوضع كله غريب ومتنحه وفى حاله اكتئاب مزمن بسبب اللى بيحصل

ولانه كان اول مره يحصل ماحدش كان فاهم مين الصح ومين الغلط

وكنت بتفرج اوقات على القناه الاولى زى ناس كتير اوى

بعد التنحى كنت حاسه بخوف من اللى جاى

وانه يمكن يكون اصعب

بس مع الايام احساسى بالخوف قل

فى الاعاده

يوم 19 نوفمبر

كان يوم مأساوى

ماينفعش نقول عليه غير كده

شايفه كل حاجه من اولها بعيداً بقى عن القناه الاولى خالص

الناس اللى بتموت عشان بس بتطلب حقها

الناس اللى عنيها بتروح عشان بيحلموا يشوفوا بلدهم احسن بلد فى الدنيا

شايفه الشباب اللى بتضرب ويترموا فى الزباله

شايفه الامن المركزى وهو قاصد انه ينشن فى عين الثوار

شايفه البنت اللى بيسحلوها من شعرها فى الشارع

انت لو اخوك او اختك بيتعمل فيهم كده هتعمل ايه

دايما بنقول على الامن المركزى اغبياء ومش بيفهموا حاجه

بس مش وصلت معاهم لعدم وجود الاحساس كمان

انهم يضربوا انسان زيه زيهم بالرصاص الحى والخراطيش

انهم يرشوهم بغاز من الاسلحه الكيميائيه

ده احنا لو فى حرب هتفكر قبل ما تستخدمه

انما شباب من بلدك وزيهم زيك تضربهم بالطريقه دى ليه

الاحداث نفسها بكل تفاصيلها بتكرر

شهداء بتموت عشان بيتظاهروا تظاهر سلمى وبيتقال عليهم بلطجيه

نفس البيانات بنفس تفاصيلها "مع اختلاف الاوضاع السياسيه "حتى بنفس بعض الكلمات فيها

يعنى مبارك قال لا انتوى الترشح

والمشير قال لم يكن يطمع فى مش عارف ايه

نفسي اشوف مين الغبى اللى بيكتبلهم الكلام الجزمه ده

مبارك قدر فى خطابه اللى قبل التنحى يكسب تعاطف الناس

والناس اختلفت جزء متعاطف معاه وبيقول نديله فرصته

وجزء بيقول لا ده بيستموت ويعيش الدور 

لحد ما يظبط فلوسه ويطفش ويسبها خربانه

انما المشير ابن الايه عمل حركه بنت لذينه صراحه وطلع انصح من مبارك

قال نعمل استفتاء

عشان بردو الشعب يختلف ما بين مؤيد ومعارض للاستفتاء ده

لو انت عارضت تبقى ضد الديمقراطيه

ولو وافقت ابقى قول للديمقراطيه خالتى بتسلم عليكى

لما انتوا مش قادرين تستحملوا ولا تسمعوا ولا تفهموا صوت الناس اللى فى التحرير

يبقى هتقدروا تسمعوا صوتنا فى الاستفتاء ازاى

وبعدين مين يثق اصلا فى استفتاء اللى هيقولوا نتيجته بيموتوا فى الشباب وبيرشوهم بغازات سامه !!

لو انا واحده من الناس اللى مش قادرين ينزلوا التحرير

يبقى كل اللى اقدر عليه واحاول اعمله

انى احاول افهم الناس اللى اعرفهم

اهلى اصحابى قرايبى جيرانى

اللى مش فاهمين الصح

ولسه مصدقين ان اللى فى التحرير دول بلطجيه وهدفهم يخربوا البلد

يشوفوا الفيديوهات والصور والناس اللى بتموت وتتسحل وتترمى فى الزباله

وبيضربوا ويشموا غاز بيدمرهم

عشان يصدقوا الحقيقه ويشوفوها بعنيهم

الناس اللى على النت قادره توصل لكل الكلام ده

بس اللى مش بيعرفوا فى النت حاجه

مش قدامهم غير التليفزيون يفهموا منه

وده مبقاش مضمون اليومين دول

فا من حقهم علينا اننا نفهمهم

readmore »»

الثوره راحت فين ؟!!؟

هو ايه اللى بيحصل بقى

ها؟

حد فاهم كده يفهمنى؟؟

تقريبا والله اعلم ان اللى بيحصل ده الطبعه التانيه من الثوره

اصل الطبعه الاولى نفذت

حاسه ان كل حاجه بتكرر بحذافيرها

كان بيتهيألى ان حسنى مبارك هيطلع يقولنا بيان 

ويأكد ان جمال مش هيرشح نفسه ولا هو هيترشح تانى

كأن ولا 11 شهر عدوا ولا اى نيله حصلت

الثوره اتعملت ليه؟

مش عشان حسنى مبارك يمشى

بس عشان زى ما الشعب كله كان بيطالب

انه يغير النظام

شخص واحد مشى

انما جذور تفكيره واسلوبه ونظامه لسه جوه كل سُلطه فى مصر

احنا زى ما احنا

لسه كله مختلف فى رأيه عن التانى شويه ضد الاعتصام وشويه معاه

لسه ناس بتموت فى التحرير عشان بتقول رأيها

لسه بردو اللى بيحصل ده اجندات خارجيه

لسه كل اللى فى التحرير بلطجيه وعملاء ومدربين بره

لسه فى مدنين بيتحاكموا محاكمه عسكريه غصب عن عين اهلنا

لسه بنضرب بالقنابل والغاز

لسه حياتنا ولا ليها اى 30 لازمه عندهم

لسه احنا مش حاسيين بالثوره

لسه للاسف مش عارفين ناخد حقنا

الا بالمناسبه بقى

حد يقولى هى الثوره راحت فين؟

كانت جايه زياره مثلا من 25 يناير لـ 11 فبراير وبعدين سافرت؟

والا كانت ترانزيت وبعدين رجعت مكان ما جت؟

بالمناسبه كمان بقى

هو فين عصام شرف؟

هو مش ده بردو اللى كان راجل من الميدان وبتاع الثوار واحنا عايزينه

بيعمل ايه بقى ده دلوقتى؟

بيتابع الاخبار على الفيس بوك وتويتر؟

يا فرحتى بيه

ياخوفى بعد كده اللى يترشح للرياسه يصدر قرارات عبر الفيس بوك 

ويعمل للوزراء تاج ويستنى يوافقوا عبر اللايك !!!

اهم كلمه سمعتها النهارده من ماما

يافرحه مبارك فينا وفى اللى بيحصل دلوقتى !!!

readmore »»

اتبرع ولو بجنيه .. !!

فى دول كتير اتدمرت

وقدرت ترجع تانى زى ما كانت واكبر بكتير كمان

زى اليابان والصين

اللى بقوا من اهم الدول على مستوى العالم كله وخصوصا تجارياً

دوله زى العراق مثلاً

امريكا دخلتها ودمرت كتير فيها

لما فكروا يقفوا تانى

عملوا اعلانات وحملات توعيه كتير
عشان شعب العراق يبطل كسل وكله يشتغل مع بعضه

عملوا اعلانات لـتنشيط مجالات مختلفه عندهم زى مثلاً الاتصالات

واهم مطرب عندهم اللى هو كاظم الساهر استخدموه كوجه اعلانى محبوب
ومطرب معروف جدا كدعايه للدوله اكتر من انها تكون دعايه 
لشركه الاتصالات نفسها

لمجرد انهم يوصلوا احساس للعالم كله

ان العراق لسه موجوده وهتفضل موجوده

وغيرها وغيرها من بلاد تانيه كتير

اما احنا

لما حصلت ثوره عندنا وادمرت حاجات كتير 
سواء مادياً او فكرياً او حتى معنوياً جوانا

مش فكرنا نعمل كده

مش فالحين غير فى اعلانات الشحاته وبس

معلش على اللفظ

بس لو بصينا على كل الاعلانات بعيداً طبعا عن الاعلانات التجاريه

هنلاقى اعلانات زى
اكفل طفل يتيم

اتبرع ولو بجنيه

ساهم فى اطعام مسكين

اتبرع لقريه صغيره

اتبرع .. ادفع ... ساهم

حاجات كتير اوى على نفس المنوال

انا طبعا مش بقلل ابداً من اى حمله من دول

ولا بقول انها حاجات مش مهمه

بالعكس المفروض كلنا فعلاً نكون حاسيين ان فى ناس غيرنا محتاجين

واحنا لازم نقف جنبهم

بس الفكره فى ان صعب اوووى كل الاعلانات تبقى بالمنظر ده

ليه اعلامنا يعيش دور الشحاته بالطريقه دى

ليه مفيش اعلانات وحملات توعيه كتير زى باقى الدول

اللهم الا يعنى حاجات قليله اووووى
وقليل مننا اللى شافها لانها فى جميع الاحوال مش بتبقى واخده حقها
ده غير كمان ان لما بتحصل عندنا حمله توعيه

بتبقى لغرض محدد فى فتره زمنيه معينه وبينتهى

زى مثلا الحمله اللى طلبت بـ"لا" فى الاستفتاء

واللى مش كانت حمله توعيه

دى كانت حمله اجبار على التصويت لجانب على حساب جانب اخر

لانها لو كانت حمله توعيه بجد

كانوا جابوا جزء من الفنانين والشخصيات المهمه 
يقولوا هيختاروا نعم ليه

ولا ليه

وكده يبقى عرضنا جميع الاتجاهات ونبعد عن التحيز لجهه معينه
ويسيبوا الناس تقرر وتختار براحتهم

لكن ده للاسف ماحصلش

ومش بيحصل فى اى حاجه

 ليه الاعلام عندنا او منتجين الاعلانات اللى خنقونا باعلانات تافهه

مش بيحاولوا يشجعونا ويدعمونا اننا نقف لبلدنا

ونوصل بيها لمستوى احسن
ويفتحولنا مجالات كتير نقدر نقدم فيها حاجه

ليه كل اللى بيقدروا عليه

انهم يجيبوا اتنين فى برنامج كل واحد فيهم بيتكلم فى اتجاه

واحنا اللى بنتوه معاهم فى النص

لا احنا استفادنا حاجه ولا هما استفادوا حاجه من لغبطتنا دى

زى ما بندور على ناس يتبرعوا للمحتاجين

ليه مش بندور على ناس تبنى البلد من جديد؟؟

readmore »»

حــلــم ... !

بحلم بروح جديده
وحياه جديده
بس خايفه بردو مابقاش سعيده !!

readmore »»

♥...♥

ها قد حل شتائى
يُصاحبه دفء قلبك وحبك
ليجعله شتاء يكسوه زهو الربيع

readmore »»

ارجوك ماتستهبلنيش !!

فى شويه برامج فى التليفزيون

تجيب للواحد تخلف بجد

اد ايه بيستفزنى ان يبقى فى مذيعين او مذيعات عندهم استعداد يظهروا

لمجرد انهم بيستهبلوا الناس !!

فى قناه ماعرفش اسمها

بس واضح انها كانت مسابقات وبس

بعيداً عن المذيعه اللى اصلاً اتخضيت لما شوفتها

مش لانها كانت شكلها وحش ولا حاجه دى خلقه ربنا يعنى

بس لانها كانت بتتخانق اكتر من انها بتذيع

والله بقيت مزبهله من طريقتها

والاكتر لما شوفت السؤال اللى بتسأله والاجابات اللى الناس بتجاوبها

السؤال حاجه ليها رجل واحده و 3 عيون

واحنا بنشوفها فى الطريق وفيها 3 الوان وبتخافظ على سلامتنا

لا عروستى
صراحه السؤال صعب

واحد يتصل يقولها المفتاح والتانى يقولها الموبيل !!

الناس دى بتفهم منين انا عايزه اعرف؟؟؟؟

والغريبه ان صوت اللى بيتصلوا كله شبه بعضه

هى الناس دى فاكرينا مساطيل للدرجه دى والا ايه مش فاهمه !

والا يعنى ايه مثلا واحده تطلع فى برنامج  "ارجوك ماتفتيش" ده
تسأل الناس فى الشارع

ايه رأيهم فى ان خط الاستواء هيتمسح ؟؟

والا مثلا مين مخترع القطط السيامى!!

والا ان الاسدين  بتوع كوبرى قصر النيل 

 هيهربوا عن طريق النيل بسبب الحر والزهق من قعدتهم دى!!

 والسؤال الفظيع بقى
بعد وفاه عم دهب ومرض بطوط
ياترى هيقدروا سوسو ولولو وتوتو يمسكوا البلد مكانه والا لا؟!!؟

ياخراشى على الشلل

ويعنى ايه اصلا ناس ترد عليها ردود بثقه كده

وكأن السؤال عادى مثلا

مش فيه اى حاجه غلط !!

ما هو اللى انا متاكده منه

ان الناس لسه بعقلهم مش اتهطلوا للدرجه دى يعنى ولا حاجه

ازاى بقى بنى ادم طبيعى هيرد عليكى بطريقه طبيعيه فى السؤال ده؟؟؟

وتعليقها دايماً ان الناس بتفتى فى اللى تعرفه واللى ماتعرفوش

وهى كده الناس بتفتى ؟؟ ده الناس بتستغبى قصدك

لان استحاله واحد عاقل مهما كان مش عارف اجابه السؤال اللى بيتسأله

هيرد الردود اللى بالمنظر ده

لما فى اى دوله تانيه يشوفوا البرنامج ده

مش هيقدروا يربطوا ابداً ان البلد اللى بيظهر على شاشتها البرامج دى

والشعب اللى بيرد الردود دى

هو نفس الشعب اللى قدر يعمل ثوره

وقدر لاول مره فى التاريخ يخلى رئيسه السابق يتحاكم زيه زى اى حد

انا قولت مثلاً ان قبل الثوره الموضوع دى ليه علاقه بالحكومه

عشان يعرفونا احنا اد ايه هُبل

بس لما برنامج زى ده يفضل مستمر لحد دلوقتى

واتعمل جزء تانى كمان بأسم ارجوك ماتفتيش بعد الثوره

يبقى اكيد فى حاجه غلط

بطلوا تستخفوا بعقليه الناس كده

عايزين تعملوا اشتغالات

اعملوا حاجه تتصدق الى حد ما

بلاش قرف بقى

readmore »»

كلام والسلام....كلاكيت عاشر مره

مش معنى انى بكتب هنا عن حاجه معينه بنتقدها 

يبقى انا مش بعملها
لا بالعكس
ممكن اكون بنتقد نفسى اصلا

********************
 

لما بكتب هنا فى المدونه
بكتب عشان فى حاجه جوايا عايزه اقولها
فى حاجه لافته نظرى عايزه اتكلم فيها
مدونتى شبهى اووى
عشان كده كل حاجه بكتبها بتبقى شبهى
لان انا مش عملاها عشان اوصل بيها لحاجه
عملاها عشان اوصل بيها لنفسى لما ابقى تايهه

********************

بحب اوى اكتب الالغاز
يعنى اكتب حروف او علامات او كلمات مالهاش علاقه ببعض
عشان انا بس اللى افهم اللى مكتوب
وماحدش غيرى يقدر يفهمه

********************

كتير اوووى بيتقالى انى غامضه

عشان مش بتكلم كتير
مش بحكى عنى وعن حياتى بطريقه مباشره كتير
مش ليا اصحاب كتير
مش بعبر عن اللى جوايا كويس

مش بقول بسهوله لحد انا جوايا ايه

يمكن كل ده فعلاً يخلينى غامضه

بس انا اوقات كتير ببقى مبسوطه بكده !

********************

مابحبش ابداً حد يلعب فى حاجتى
ولا يلغبط الترتيب اللى انا بكون مرتباه لكل حاجه
حاجاتى مكتوب عليها ممنوع الاقتراب او التصوير والا هتتكهرب :D
احب احافظ عليهم لدرجه انى ممكن احتفظ بحاجه عندى من سنين طويله
وتفضل بنفس حالتها وشكلها
اوقات بحس ان ده شئ كويس
 واوقات بحس ان دى انانيه منى !

********************

نفسى ابطل ابقى انانيه فى اوقات كتير !!!

********************

من صغرى وانا بحب القرايه
بدأت قرايه بشكل مستمر بعيداً عن قصص الاطفال
مع رجل المستحيل وبعدين بقى صرخه الرعب وملف المستقبل
وماوراء الطبيعه اللى مازالت مسيطره عليا وممكن تسرقنى من اى كتاب
مروراً بأى كتاب يقع فى ايدى واحس انه هيعجبنى فا بقرأه
القرأه كانت صديقتى الوحيده فى وقت من الاوقات
قعدت فتره طويله مش أقرا زى زمان
بس من قريب رجعلى النشاط فى القرايه تانى
بس المشكله ان دلوقتى القرايه اكتر حاجه بتساعدنى على النوم
مهما كنت فايقه !!
نفسى ارجع أقرا بحُب و كتيييير زى زمان

*********************

المطر النهارده كان جميل اوووى
حسسنى بأحساس حلو

*********************

بحب الشتاء جداً
وجود الشتاء والبرد والسهر مع كوبايه النسكافيه واحشنى
الشتاء بيجيلى بحاله من الاتنين
يااما اقصى حالات الاكتئاب
ياما اقصى حالات التصالح النفسى والهدوء الداخلى
بتمنى الشتاء ده يجى معاه بأجمل حالاتى

readmore »»

خـطـك !!

لم اكن اعلم انى سأشتاق هكذا
لشهاداتى الدراسيه التى كنت امقتها بشده
لمجرد ان أرى امضائك على درجاتى
كم اشتاق ان أرى خطك
مجرد خطك فقط !!

readmore »»

انتخبوا ابن الدايره :D

مش كنت ناويه اتكلم عن حاجه فى الموضوع ده 

لحد ما يخلص ونشوف هيحصل ايه
بس الهبل اللى بيحصل بيحكم بقى

عايزه اتكلم عن انتخابات مجلس الشعب
السنادى بخلاف ان جو الانتخابات مختلف والمفروض يكون فى امل
الا انى ملاحظه ان لا فى "امل" ولا "عُمر" حتى

بدايه من انى اصلاً لحد فتره قريبه جداااا
مش كنت قادره اعرف مين المرشخين فى الانتخابات عن الدائره بتاعتنا
لان ماحدش بيحاول يعلن عن نفسه

غير عن طريق اليفط والصور وبس
بس ادينى عرفت

اتفاجئت ان واحد من المرشحين السنادى
واللى كان مرشح لكل السنين اللى فاتت وبيخفى اى حد قصاده
لانه كان النص التانى وجزء لا يتجزأ من حمله يوسف بطرس غالى 

للانتخابات  عن الدائره بتاعتنا طول الكام سنه اللى فاتت
واللى كانوا هما الاتنين دايما بيكسبوها غصب واقتدار
او بمعنى اصح بشراء اصوات الناس
والخدمات اللى بيوزعوها فجأه فى فتره الانتخابات
وبعد ما يكسبوا ابقى قابلنى ان حد لاقاهم تانى
ولان ادام واحد فيهم كسب يبقى التانى تلقائى كسب
زى واحد وخياله كده
وبالرغم من ان المرشح ده اول ما حصلت الثوره
ولانه كان شريك يوسف بطرس غالى فى الانتخابات دايماً
طبعا اسمه جه فى التحقيقات
وقريت خبر فى جريده من الجرايد وقتها
انه مطلوب التحقيق معاه تحت بند من اين لك هذا
حتى لو كانت التحقيقات حصلت معاه او ماحصلتش
بس هو ازاى جاب الجرائه دى انه يرشح نفسه تانى
ومتوقع ان الناس تصدقه تانى
وتنتخبه تانى!!!
فى ناس بجحه اوى فى حكايه الانتخابات دى

فى مرشح تانى مش شفته ولا عمل حاجه عرفتها صراحه
غير انه دايماً بيخسر قدام يوسف بطرس غالى والمرشح السابق ذكره ده

اما تالت مرشح
بسم الله ما شاء الله لسه شايفاه مجمع كل متشردين المنطقه حواليه
وقاعدين قاعده مزاج عالى اوى
وريحه المخدرات منتشره فى جميع الاتجاهات
وحاجه اخر حلاوه يعنى

والرابع بقى
بالرغم من ان المقر بتاعه فى شارعنا
بس هاموت واشوف حاجه منه غير صورته !!

وفى حوالى 10 من الاخوان فى حزب الحريه والعداله
وانا مش ناويه اختار حد منهم

اما الباقيين

فا جارى البحث عنهم

لان واضح ان تحديد مبلغ الدعايه مأثر اوى على الكل

الاول كانوا بيعملوا دعايه بهبل

دلوقتى ناقص الواحد يروح يدور عليهم بنفسه

ده بقى كله كوم

والرموز الانتخابيه كوم تانى خالص

حاجه اخر عجب يعنى :D

المفروض الواحد يعمل ايه؟
نفكرهم ان فى ثوره حصلت مثلاً واننا محتاجين مرشحين 

يستحقوا بجد اننا نختارهم مش زى قبل كده
والا اعزل فى حته تانيه يمكن الاقى مرشحين عدلين !!

 *****

ده الموقع الرسمى للجنه القضائيه العليا للانتخابات

للى يحب يعرف حاجه يعنى

readmore »»

حمله تدوين يومى :)

فى حمله للتدوين اليومى
تم الدعوه ليها على الفيس بوك هــنــا
من يوم 11/11 لحد 12/12
التاريخ عاجبنى صراحه
ومدونين كتير بحب اقرالهم مشتركين فيها وده شجعنى اكتر
مش متاكده انى هادون كل يوم
بس اكيد انى هحاول ازود نشاطى عن الفتره اللى فاتت

الحمله تحت شعار
فيد واستفيد
وده فعلا اللى احنا بنعمله لبعض
كل ما بنكتب اكتر
وكل ما بنقرأ لبعض اكتر واكتر

readmore »»

كل سنه وانتم طيبين :)

كل سنه وكل الامه الاسلاميه بخير يااارب

وعيد سعيد

وينعاد بالخير علينا يارب

ويجعل ايامنا كلها عيد ان شاء الله

كل سنه وانتم بخير :)

readmore »»