10 January 2012

مطلوب عروسه ... مطلوب عريس

.



فى ظاهره فى جتمعنا العربى كله
ظهرت بشده اوووى من كام سنه
مصر تقريبا من اول الدول اللى فيهم الظاهره دى
و فى جميع الدول العربيه
وهى مكاتب الزواج




فى سؤال دايماً وابداً فيه اختلافات على اجابته
وهو .. تتجوز عن حب والا جواز صالونات؟
ناس تقول لا الحب طبعاً
لازم يبقى حد اعرفه او انسانه بحبها
ومتفاهمين ونقدر نعيش فى سعاده مع بعض
وناس تقول جواز صالونات طبعاً
على الاقل يبقى حد محترم وداخل البيت من بابه
او تكون بنت محترمه ومؤدبه وقطه مغمضه

وكان ومايزال السؤال ده فيه اعتراضات اواتفاقات من ناس كتير
لاختلاف وجهات النظر ما بين اللى موافق على حاجه ومعترض ع التانيه
بس فى النهايه كله بيصب فى حاجه واحده
ان كل شاب او بنت عايزين نصهم التانى يبقوا واثقين فيه
ويقدروا يعيشوا حياه سعيده من غير اى مشاكل
يعنى كلهم بيدورو على حاجه واحده
باختلاف الاراء والاتجاهات

لما يظهر قدامهم فكره مكاتب الزواج ده بقى
الموضوع غريب جدا الحقيقه
وانا مش قادره استوعبه
طول ما احنا ماشيين بنلاقى اعلانات على الحيطه فى الشارع بكده
او حتى ورق بيتوزع بنفس الاعلانات



السؤال المهم
ايه اللى يخلى بنت يوصل بيها الحال انها تفكر تروح مكتب زى ده
معقول فى بنات ملهوفه على الجواز بالطريقه اللى توصلها لكده
طب ازاى فى بنت تأمن على نفسها انها تروح مكتب من دول؟
وايه اللى يضمنلها ان المكاتب دى تبقى محترمه زى ما بيقولوا
لو فى شاب فكر يروح مكتب من دول على امل انه يلاقى بنت يحبها
هو فعلا الشاب هيقتنع ببنت رايحه تدور على عريس فى مكتب زى ده؟
يعنى هو هيبقى واثق فيها؟

وبعدين ايه اللى يثبت اصلا ان المكاتب دى محترمه
فى نوع من المكاتب دى بياخد الشكل الاسلامى
اللى يكون الرجاله اللى فيه كلهم بدقن
والبنات محجبات ان ماكنوش منقبات
وده عشان يدى شكل من اشكال الطمأنينه للى رايحين المكتب ده
بس وارد ان ده بيكون مجرد ستار لحاجات كتير ورا كل ده

ايه فايده المكاتب دى وهو اصلا ماحدش سمع ابدا
عن اى اتنين اتجوزا عن طريق اى مكتب من المكاتب دى
ومفيش اى مكتب من دول بيتعامل بطريقه معلنه تماماً قدام كل الناس
كل اعلاناته بتبقى فى الخباثه كده على حيطه فى اى شارع
والا فى ورق بيتوزع
وبسهوله اوى اماكن المكاتب دى بتتغير

فى صحفى قبل كده فى اليوم السابع
عمل موضوع عن حكايه المكاتب دى لما لفت نظره اعلان من دول
ولما مشى ورا الموضوع هو وصحفيه تانيه
اكتشفوا ان الحكايه كلها نصب فى نصب رغم انهم مش كملوا للاخر
يعنى الموضوع فى الاخر بيصب فى اتجاهين
ياما نصب
ياما شئ معيب اخلاقياً
يعنى فى الاخر الولد والا البنت مش بيكسبوا حاجه
بالعكس هما اللى بيخسروا

اللى نفسى اعرفه
ليه مفيش رقابه على الموضوع ده؟
ليه اى مكتب بيعمل اعلانات زى دى
مش يتحقق معاهم ويشوفوا طبيعه عملهم ايه
وهل ياترى هما اصلا بيشتغلوا بتصريحات والا لا
ولو بتصريحات بتبقى التصريحات دى فى مجال ايه اصلا؟

24 comments

سواح في ملك اللــــــــــــــــــه- said...

انا رايي

ان الرقبة لازم تكون اخلاقية من الاشخاص نفسهم

اعلان اللي هو مكتب ام فتحي ده

انا شفته كتير في اكتر من مكان

وانا رايي ان هو مش جواز

ده ......مقننة

طبعا النقط دي مكانها كلمة مش كويسة

في زمان اهتزت فيه الثقة بين البشر

لايصح ان يكون الزواج بهذه الطريقة

والا لفقد الزواج هدفه

وهو الترابط والسكينة

وتكوين اسرة محترمة

كما اراد رب العزة عز وجل

مصطفى سيف الدين said...

احساس ان القطر بيمشي و يفوتك يخليها تخاف و تروح جري على مكتب زي ده
الظروف المعيشية الصعبة
زيادة مصاريف الزواج
المغالاة في المهور
كل ده بيؤدي لقلة نسب الشباب اللي يقدروا يتجوزوا و المحصلة
مكتب ام فتحي

rona ali said...

موضوع صالونات ولا حب معرفه قضيه
بنختلف فيها مع حتى اقرب الناس لينا
خلينا في الاساسي

احنا للاسف دلوقتى مش المكاتب بس المنتشرة بشكل خنيق والمواقع
كمان علي النت واعرف شريكه حياتك واتعرفي علي ولاد مش عارفه ايه

انا شايفه يا دينا الموضوع ممكن يتاخد من كذا زاويه اولا لازم يكون في رقابه من الحكومه لمكاتب المشبوه دى
علشان تتقفل خالص مالص

ثانيآ ان البنت والولد قدام كلام الاهل والاقارب والاصدقاء ومعايرتهم كأن الجواز دة في ايديهم ممكن يدفعهم للحل دة
رغم معرفتهم من الداخل انه حل مهين بس مع الضغط بيحصل اخطاء اكييد

من هنا لازم البنت والولد هما نفسهم تكون جواهم الرقابه
لازم يعرفوا انه كله نصيب وقدر
لازم يكونوا ايمانينى من جواهم

ومن ناحيه الاهل لازم يعرفوا ان مافيش في ايد البنت اللى بتفضل مش متجوزة لثلاثينات حاجه
فبلاش كلام خليكى قاعده كدة مانتيش فالحه في حاجه
دى اهانات وضغوط ليها ولكرامتها والموضوع كله مش في ايديها هى

ومن ناحيه المجتمع
لازم يبطلوا الفكر العتيق بتاع عانس و كلمه ربنا يرزقك يابنتى بواحد( مع صوت يخنقك كدة) وكانك بتشحتى عريس مثلا ولا مستنيه حد يجى يعيلك ولا حاجه

وبس ياستى ولايك للموضوع المهم دة ^_^

Nelly Adel said...

ههههه انا كنت عايزة اكتب عن الحوار دة
بس ماشلء الله تناولتيه ولا احسن من كدة :k:

ابراهيم رزق said...

بصى بقى
صلى على النبى
زيدى النبى صلاه

المكاتب دى بتكسب بتكسب
المكاتب دى بتنصب بتنصب
المكاتب دى شىء غير اخلاقى غير اخلاقى

زمان الخاطبة كانت بيبقى عندها اعتبارات اخلاقية و كانت البنات لا تخرج للعمل و الدراسة و الشباب لا يتعامل مع البنات مطلقا و هذا العصر تقريبا يريدون ان يعدوه لنا طيور الظلام المتخفين فى طيور النور
قبل ان نلوم البنت يجب ان نلوم المجتمع و نظراتهم و سياطهم و جلدهم للفتاة بمجرد تخطيها سن الخامسة و العشرين
هذه هى المشكلة الحقيقية

تحياتى

faroukfahmy58 said...

آخر الموضات الجواز يبقى باعلان
والأكل باعلان
والشرب باعلان
والبيع باعلان
والشراء باعلان
واللبس باعلان
اصبح الاعلان يلعب دورا كبيرا فى حياتنا
واصبح بريقه يخدعنا
ومرة تصيب ومعظم المرات تخيب
ربنا يسنر من قلة الذمم واتعدام الضمير فى وقت اصبح لا دين رادع ولا قانون شافع

safa7_karmooz said...

اصل كلهم او معظم الشعب عاوز ناس تفصيل

البنت عاوزة فارس الاحلام الرومانسى حاجه زى المسلسلات التركية والاجنبية ...والراجل متوقع انه متجوز انجلينا جولى فهيعيش الجنة ...كل واحد واهم نفسه بحاجه مش بيلاقيعا بيعمل مصدوم ..

بالنسبالى بقى انا هعمل اعلان مطلوب شقة وعربية :D

نهر الحب said...

ده موضوع كبير وخطييييييييير جدااا
لا طبعا مش جواز

بصي هو الشمكلة كلها مش في متب الجواز ولا الثقة ولا حاجة
المشكلة كلها هي فكرة الجواز اللي عند الشباب والبنات دلوقتي

الشملكة ان الجواز يبقي مجرد جواز تأدية واجب
ومش عارفين ان الجواز ده حاجة طول العمر وحياة ومشاركة مش مجرد حاجة زي الاكل والشرب وشر لابد منه زي ما بيقولوا ويقولك اصلي حكمل نص ديني

لازم فكر الشباب الاول يتغير ساعتها الحاجات دي حتختفي

حضرة الظابط said...

احم احم
سلامو عليكو

بصي يا دينا
انا مش مقتنع بالموضوع من البداية اصلا عشان نتكلم في ان يكون علياه رقابة او لا
انا مثلا عايز اخطب ومحصلش اني قابلت بنت الحلال بنفسي يعني
فبيبقي فيه طرق تانية
زي مثلا واحد صاحبك وقريبك او ست الحبايب اللي مبتتعبش من التدوير والزن تقولك علي واحدة
متهيالي ده الحل المثالي لاي علاقة طبيعية وشرعية
اللي يخليني بقي اروح مكتب زي ده حاجة من اتنين
اما انا عايز سوري يعني واحدة كده يعني نقضي يومين وبالسلامة وبقرشين وشرعي
او انا بقي فقدت الامل اني الاقيها بنفسي فوسعت نطاق البحث شويه
والاتنين معايا انا شخصيا يعني صعب

ده رأيي كشاب
رأي البنات بقي معرفوش

شكرا

Bent Men ElZman Da !! said...

سواح في ملك اللــــــــــــــــــه-

بالظبط
الزواج كده بيتهيألى مش بياخد شكله الطبيعى اللى المفروض يكون عليه

شكرا ليك يا خالد على رأيك
ومشرفنى دايماً بوجودك :)

Bent Men ElZman Da !! said...

مصطفى سيف الدين

هى ظروف مجتمع بحاله
بتأدى فى النهايه لظواهر كتير اوى
منها مكاتب الزواج دى

شكرا لرأيك يا دكتور نورتنى :)

Bent Men ElZman Da !! said...

rona ali

ايوه موضوع المواقع ده بقى من زمااان
بس احب اقولك المفاجأه
ان خطيبى النهارده لسه كان بيقولى انه يعرف واحد اتعرف على بنت من مواقع الزواج دى واتخطبوا دلوقتى :D
شكل الموضوع فيه امل واحنا مش واخدين بالنا تقريبا

الموضوع فعلا محتاج رقابه ده شئ لا مفر منه
وضغط الاهل وارد جدا يكون هو اللى بيوصل البنات لكده
وكمان خوف البنات من انها تتأخر فى الزواج ده كمان عليه عامل كبير

لايك ليكى انتى يا رونى على تعليقك اللى أثرى الموضوع ده :*

Bent Men ElZman Da !! said...

Nelly Adel

لا يا نيللى بقى انا مستنيه موضوعك انتى
كفايه انه هيكون بطريقتك :))

Bent Men ElZman Da !! said...

faroukfahmy58

الاعلانات دلوقتى بقت المُسير الاول لرغباتنا
وللاسف بيكون المسيطر عليها انعدام الضمير واحنا الضحايا

Bent Men ElZman Da !! said...

safa7_karmooz

ده الناس اللى بتدور على احلام او بمعنى اصح اوهام
زى الاعلان اللى بيقولك تسير الزواج بالعرب والخلجيين
حلم فلوس بقى

طب ابقى شوفلى جنب اعلانك مكان اطلب عربيه انا كمان بقى :D

Bent Men ElZman Da !! said...

نهر الحب

معاكى حق
كلمه هاكمل نص دينى دى مش عاديه والا بتتقال كده وخلاص
ربنا قال ان الزواج معناه السكينه و تكوين اسره وبناء اطفال للمستقبل
مش مجرد اتنين اتعرفوا على بعض فا يلا يتجوزو وخلاص

ميرسى ليكى يا قمر على تعليقك :)

Bent Men ElZman Da !! said...

حضرة الظابط

ورأيك صح فعلا
بالنسبه للبنات فى كتير كمان رافضين الموضوع ده
ورافضين الفكره اساسا
زى بالظبط الخاطبه
فى كتير من البنات رافضنها دلوقتى
بس فى بنات مش عندهم سبيل تانى للزواج الا عن طريقه
بحكم ان عيلتهم محافظه او او او
فا اختلاف الرأى موجود بردو

نورتنى

reemaas said...

هديكى مثال كده لاعلان فى التى فى وادينى رائيك

الشيخة اسراء لفك المربوط والحالات المستعصية ,تقرب الحبيب ولجلب النصيب,النتيجة مضمونة خلال ايام والاتصال للنساء فقط!!


ادينى عقلك انتى بقى

Bent Men ElZman Da !! said...

reemaas

هههههههههههه
بقى اديكى عقلى واقعد انا من غيره كده يا نور
وبعدين هو انا لاقياه اصلا ×_×
اهو من ضمن الاعلانات اللى تجيب للواحد الضغط
ده احنا غلابه اوى وربنا

Zawag alnaddy زواج النادى said...

السلام عليكم ورحمة الله وبركاته
جزاكم الله خيرا على هذا الموضوع الجميل وانتهز الفرصه واحب ان اوضح ان الزوجه هيا كل الحنان والعطف والأشواق لزوجها والزوج هوا كل الدنيا التى تفرح بها الزوجه للقأ زوجها يجب التعارف بينهم والله موضوع جميل ومشوق بارك الله فيكم ياشباب

نيللى said...

اولاً وحشتني جدا جدا جدا زحلانه مش بتسألى على ابدا عااااااا
ثانيا انا ضد المكاتب دى شكلاً وموضوعا لأن الزواج مش سلعة تباع وتشترى

ثالثا بالنسبة للرقابة , فى أشياء كثيرة فى بلدنا محتاجه رقابة للوقوف امام مثل هؤلاء النصابين

Bent Men ElZman Da !! said...

Zawag alnaddy زواج النادى

وعليكم السلام ورحمه الله وبركاته
كلام حضرتك صحيح
بس ليا سؤال
موقع حضرتك كمان فيه نفس الفكره
الزواج عن طريق مواقع الزواج على الانترنت
زيها زى المكاتب اللى اتكلمت عنها
هو فى زيجات نجحت فعلا عبر موقع حضرتك والا ايه؟
ممكن تفيدنا اكتر

Bent Men ElZman Da !! said...

نيللى

وانتى كمان واحشانى خالص والله مش تزعلى بقى :(

معاكى حق الزواج مش سلعه
لان اكيد اصحاب المكاتب دول الموضوع بيعود عليهم بفايده ماديه
ميرسى يا حبيبتى على رأيك منورانى :)))

Bent Men ElZman Da !! said...

ابراهيم رزق

عليه افضل الصلاه والسلام

ما انا فعلا قولت ان المجتمع بالتخلف اللى بيحصل لافكار معينه جوه ناس كتير اوى
بيوصلنا لحاجات اسوء يوم عن يوم منها المكاتب دى بكل عيوبها
مش هيبقى داخل مجتمع سَوىِ افكار زى العنوسه وقطر الزواج وغيره كتير

شكرا استاذى على وجودك ورأيك
واسفه لحضرتك لان كان فى مشكله فى الكومنت ومش ظهر الا دلوقتى:))

:a: :b: :c: :d: :e: :f: :g: :h: :i: :j: :k: :l: :m: :n:

Post a Comment

 

FaceBook Comments

wibiya widget