10 May 2012

كلام والسلام ... كلاكيت 15 مره

.






اوقات بحس انى غبيه
عشان كتير حواليا شافو انك وحشه
وانا الوحيده اللى دايماً كنت شايفه العكس !

*******

اللى بيخلينى متأكده من غبائى ده
لما اكون بحسب اصحابى اللى هاعزمهم فى فرحى
وبردو احسبك معاهم !!!

*******

انا مقتنعه جدا ان مفيش حد كامل
كلنا فينا عيوب زى ما فينا مميزات
مهما كترت المميزات دى بردو بيبقى لينا عيوبنا
وعشان كده انا بشوف اوى بعينى عيوبى

*******

بتخنق اوى لما حد يقول على حاجه غلط او مش بيحب يعملها
ويعملها !!
انا لو مكان الناس دى
هاتكسف على دمى واللى شايفه انى بعمله غلط هاقول انا بعمله وهو غلط
ياما اسكت خالص واخلينى بخيبتى

*******

بيبقى احساس بايخ اوى
لما تقابل شخص مش شوفته من سنين طويله
وبتبقى ذكرياته الوحيده اللى بتربطه بيك
هى ذكريات انت نفسك بتحاول بأقصى ما عندك
انك تنساها !

*******

احمد العسيلى فى الكتاب التانى
كان بيقول انه وهو بيكتب الكتاب وكان خلص اكتر من تلته 
حصلت حاجه فى الكومبيوتر
والفايل كله اتمسح
حاول يرجعه بمساعده اصحابه مش قدر
طبعا مش محتاجه اوصف الخنقه والضيق اللى ممكن يحصل لاى حد فى نفس الموقف
بس فى واحد صاحبه رجعهوله لكن كان فى مشكله
ان الفايل بيفتح بس كل اللى فيه بالمشقلب
الكلام والجمل وحروف الكلمات نفسها اتشقلبت ودى ماكنش ليها حل
بس هو صلحه بحركه بسيطه اوى عملها بنفسه
الغريبه انه وقتها ماكنش مضايق زى اول مره اتمسح فيها الفايل
بالرغم من ان هى هى نفس الحاجه اللى ضاعت فى المرتين
بس زعله هو اللى مش كان نفس الزعل فى المرتين
وده لانه حط امل جواه وانه هيحاول ويحاول لحد ما يقدر يعمل اللى هو عايزه
الموقف ده بالظبط بنفس الفكره مع اختلاف التفاصيل
حصلى الاسبوع اللى فات
كنت حاطه امل على حاجه ومن فتره عرفت انى مش هاقدر اوصلها
زعلت واضايقت وكنت شويه وهاكتئب
بس قولت احاول تانى وايه المانع!
بس من قريب عرفت نفس الحاجه اللى زعلتنى وضايقتنى
ومع ذلك لا اضايقت ولا اكتئبت ولا زعلى كان زى الاول 
ويكاد يكون مش موجود اصلا
وده لان بقى عندى امل
ولان الحاجات الجميله بتيجى مع بعض
انا مستنيه بكره بحاجه جميله جايه
ان شاء الله

30 comments

Tamer Lithey said...

بجد كلامك كله جميل وفي الصميم..
أما الناس اللي بنعرفهم وساعات بنخدع فيهم..واحنا مش بنكون مصدقين إنهم وحشين لأننا بنكون مبسوطين بيهم في حياتنا بالرغم إن قلبنا بيكون متأكد إنهم مش مقدرين لاصدقتنا ولا حبنا ليهم وفي النهاية لو فكرة مقولتي دايماً المكسب بيجي بعد خسارة..

أما الناس اللي بتقعد تعمل نفسها ملاك وتقعد تنصح وهي مليان بلوي..نفسها أقولهم خليكم في حالكم وريحون من نصيحكم اللي مش فرقكم معكم ..

أما المحاولة بجد بالرغم إنها متعبة لكن أحسن من إن الواحد يعيش يصحي وينام ويكل وملوش حلم وله هدف وله حتي محاولة..


رائع يادندون بجد وحشتني من كل قلبي:)

Nour said...

اوقات بحس انى غبيه
عشان كتير حواليا شافو انك وحشه
وانا الوحيده اللى دايماً كنت شايفه العكس
كتير اوي اوي بيحصل كده

بيبقى احساس بايخ اوى
لما تقابل شخص مش شوفته من سنين طويله
وبتبقى ذكرياته الوحيده اللى بتربطه بيك
هى ذكريات انت نفسك بتحاول بأقصى ما عندك
انك تنساها !
احساس مؤلم جدا جدا مش بايخ بس

البوست حلو اوي اوي بجد :D

zeze said...

يارب يا حبيبتي تجيلك الحاجة الحلوة اللي انتي مستناياهاان شاء الله
بوست جميل بارك الله فيكي

سواح في ملك اللــــــــــــــــــه- said...

كلام جميل ويستحق التامل

من منا من لم تخدعه مشاعره ولو لمرة واجدة

نتمني لكي غدا جميلا

تحيتي

شمس النهار said...

عايزة اقولك ان كتاب العسيلي ده مسروق من هنا من بلوجر من مدون اسم مدونته من غير عنوان وتاريخ النشر قبل العسيلي بسنين

شمس النهار said...

http://menghair3enwan.blogspot.com/

ده لينك المدونة والكتاب الاصلي اللي لطشه العسيلي وطبعه بأسمه
روحي واتاكدي بنفسك وامسكي كلمة كلمة
انا فجعت الصراحة

Bent Men ElZman Da !! said...

Tamer Lithey

نيللى اللى عامله حاله تنكر ووقعت قلبى دى :))

احنا اوقات كتير بنرضى تحمل الغباء ده عشان مش قادرين نخلى قلبنا يتحمل الوجع او الخساره
بس فى النهايه بردو بيتحمله

ايوه انا عايزه اقول للناس دول كده بردو

اصلا حياتنا ماينفعش تتعاش الا بالمحاوله
دى اجمل ما فيها :))

وحشتينى ونفسى اشوفك تانى :)

Bent Men ElZman Da !! said...

Nour

انا مبسوطه بوجودك يا نور
ومبسوطه كمان ان البوست عجبك :))

Bent Men ElZman Da !! said...

zeze

يارب يا جميله انا وانتى
وربنا يبارك فيكى انتى كمان يارب :))

Bent Men ElZman Da !! said...

سواح في ملك اللــــــــــــــــــه-

احنا اصلا بنتعلم من مشاعرنا اللى بتتخدع كل يوم دى :)

شكرا لوجودك يا خالد
ويارب غدك يكن افضل من امسك :)

Bent Men ElZman Da !! said...

شمس النهار

انا دخلت المدونه وقريت كل البوستات اللى فيها
مش عارفه ايه وجه الشبهه بينه وبين كتاب العسيلى بصراحه !
صاحب المدونه بيقول نصايح او مواقف معينه فى حياتنا دى اللى المفروض نمشى عليها
وارد حضرتك يكون قصدك ان فى فكره او اتنين متشابهه مثلا مع انى مش حسيت كده
بس الكتاب كله من المدونه؟ حسب ما شوفت وحسب الكتاب اللى قريته مرتين ده مش صح

مصطفى سيف الدين said...

شوقتيني لكتاب العسيلي
بوست جميل اوي تسلمي

كريمة سندي said...

ما أجمل العيش في تناقض .. فحياتنا مليئة بالمتناقضات!!!!

mena moon said...

البوست حلو اوى والأحلى اللى كتبه كلامك لما بيكون خارج من قلبك بيوصل لقلوبنا بسرعه وحشاني جدا

شمس النهار said...

بتتكلمي عن اي كتاب للعسيلي
انا بتكلم عن كتابه اللي هو ((مالوش اسم ))ده متشابه مع المدونة

ريـــمـــاس said...

مساء الغاردينيا دينا
دايما بحس بقربك وصدقك هنا اولاً ياما اتخدعنا في صحاب لدرجة حسينا اننا بجد اغبياء بس برضو بقول كفاية انه انا كنت وفيه لاخر لحظة بالنسبة للأمل لولاه يادينا ماكنش لسى عايشين :)
ربنا يوفقك ويبقى بكرة أجمل وأجمل "
؛؛
؛
لروحك عبق الغاردينيا
كانت هنا
reemaas

heba atteya youssef said...

اكيد ان شاء الله
هيكون بكره اجمل ..

كالعاده باستمتع جداً بتدويناتك

دمت مبدعه
دمت صديقتي :)

rona ali said...

انا مش لاقيه حاجه بعينها انسخها كدهو واقول في الجون

كل كلامك اوت هههههه اقصد في الجون يا معلم

وحشتينى يا دندن اعتقد انى سافرت نفس رحلتك بس المرة دى رحلتى كانت مقفله اوى :))

فاكرة قصه العسيلي عن الملف التانى تعرفي وكنت حاسه وانا بقرأ بنفس شلله بس في نفس الوقت بتلذذ لانه مش بحبه كشخصيه اوى ودى كانت متعتى من الشر هههههههه
بقالي مده مخاصمه القرأة بعد الفترة اللي كنا بننسف فيها الكتاب في يومين
ودى نتيجه القر البشري

بوست رائع خاصه بدايته انك بتحسبيها من المعازيم معنى كدة في مكان فاضي اجى بقي :))))

هتلاقي كلامى مش ماشي مع بعضه بس انا كتبت اللى جيه علي بالي كله ^____*
بحبك يا رقيقه انتى <3

آخر العنقــــــود said...

إحساس (غتت) أوي لما الواحد يكتب حاجة طويلة عريضة ع الجهاز وفي الاخر تروح منه.. ربنا ما يوريها لحد
ويارب وقع في طريقنا ولاد الحلال!
تحياتي

رحيق الورد said...

مساء الخير ...
كيفك ان شاء الله تمام
سعيدة وسرنى التواجد هنا
سورى على التقصير بسبب الدراسة
تحياتى
ياسمين

Bent Men ElZman Da !! said...

مصطفى سيف الدين

دوشت دماغكم بكتاب العسيلى ده انا عارفه ههههههه
هو مش افضل الكتب اللى قريتها
بس حسيته بيتكلم عن حاجات انا اصلا بفكر فيها
فـ معلق معايا بقى من ساعتها
نورتنى يا مصطفى :))

Bent Men ElZman Da !! said...

كريمة سندي

فعلا دى حقيقه
حياتنا اصلا هى متناقضاتنا
سعيده بوجودك :)

Bent Men ElZman Da !! said...

mena moon

الاحلى بقى انك موجوده يا منه
بجد مش تغيبى كتير
عشان انا اصلا بيوحشنى كلامك اوى :)

m.hallawa said...

مساء الخير دينا الزميلة العزيزة

الله يبارك فيكي ويكرمك أن شاء الله

طب شوفي الصفحة دي وقوليلي رأيك لانة يهمني
مع خالص احترامي وتقديري

https://www.facebook.com/pages/%D8%A7%D9%84%D8%B7%D9%8A%D8%B1-%D8%A7%D9%84%D9%85%D9%87%D8%A7%D8%AC%D8%B1-hallawa/349695018413787

Bent Men ElZman Da !! said...

شمس النهار

ايوه انا بردو قولت ان احنا الاتنين بنتكلم عن كتابين مختلفين :)
لا انا قصدى على كتاب اسمه "الكتاب التانى" هو الكتاب اللى بعد مالوش اسم
مش قريته لسه بس هاقراه واتاكد

Bent Men ElZman Da !! said...

ريـــمـــاس

المشكله فى حكايه الصداقه دى انك بتفضلى توهمى نفسك ان الشخص اللى قدامك يستحق وبردو مع الوقت بيظهر العكس اللى دايما بتكونى خايفه منه

يارب حياتك كلها تبقى امل يا ريماس
مبسوطه بوجودك اووى نورتينى :))

Bent Men ElZman Da !! said...

heba atteya youssef

يارب يا هبه انتى كمان ايامك كلها تبقى امل
واللى جاى يبقى اجمل من كل اللى فات

مبسوطه بوجودك وتعليقاتك اللى وحشتنى

نورتينى يا حبيبتى :)

Bent Men ElZman Da !! said...

rona ali

انا قولتلك انى من قبل ما افتح الكومنت وكنت عارفه انك موجوده

ده انا كل كلامى أن خالص اهو هههههه

يارب مش يبقى فى حالات مقفله تانى عشان المره الجايه هيبقى فى ضرب انا قولتلك اهو

انتى شريره على فكره
هو صحيح العسيلى ماحدش يحبه
بس فى الموقف ده انا اضايقت له سلف اساسا

لا انتى مش من المعازيم
انتى جايه اجبارى اصلاً :P

وانا بحبك يااللى منغلقه على نفسك انتى <3

Bent Men ElZman Da !! said...

آخر العنقــــــود

ده لو الواضح ضاعت من عنده صوره من على الجهاز وهو محتاجها بيبقى هيتخنق اساسا
فما بالك بكتاب مكتوب بتفكير ومجهود شخصى
صعبه اوى

نورتينى يا جميله :)

Bent Men ElZman Da !! said...

رحيق الورد

ربنا معاكى يا قمر فى دراستك وتخلصى على خير
مبسوطه بمرورك اوى
نورتينى :))

:a: :b: :c: :d: :e: :f: :g: :h: :i: :j: :k: :l: :m: :n:

Post a Comment

 

FaceBook Comments

wibiya widget