25 June 2012

عن الاحلام وعمايلها

.

اوعوا تكونوا فاكرين من العنوان انا قصدى الاحلام اللى هى واحنا نايمين دى
لالالا ابسلوتلى
انا قصدى احلام الطفوله البريئه المتعلقه بالمستقبل المجهول
الحمدلله يعنى انا متعوده من صغيرى على حاجه واحده
احلم زى ما انا عايزه
المهم ان فى النهايه الاحلام دى عمرها ما بتتحقق الحمدلله
اول احلامى دى مثلا او السؤال المعتاد من وانا صغيره
نفسك تطلعى ايه يا حلوه؟ انا مش نفسى اطلع حاجه محدده
ولا مٌدرسه زى ما الاطفال الطبيعين بيقولوا
بس لسه ماكنتش شايفه نفسى فى مكان محدد لانى ماكنتش اعرف قدراتى
اه عمليه انا من صغرى

المهم يعنى ان الناس دايماً كانوا شايفين انى شكله بيدى على دكتور
مش عارفه شكل الدكاتره مميز بأيه بالظبط عشان يقولوا كده
بس واضح ان نضارتى حبيبتى كانت عامله شغل عالى اوى

لما وصلت لـ اخر ابتدائى كده كنت خلاص انا قررت عايزه اطلع ايه
بس ياريت ماحدش يضحك
احم احم
كان نفسى اطلع ظابط
انا قولت ماحدش يضحك
قصص رجل المستحيل كانت عامله شغلها معايا انا ذنبى ايه يعنى
يمين شمال كله يقنع فيا انه ماينفعش يا حبيبتى ماينفعش يا ماما
وانا ابداً على نغمه واحده شرطه يعنى شرطه
 
المهم وصلت لاعدادى
كان بدأ بقى ملف المستقبل وتخيلاته تعمل شغلها معايا
واتحولت اتجاهاتى الى كليه العلوم قسم ميكروبيلوجى
لا ومحدده القسم كمان
والله انا بنت مميزه ومختلفه من يومى :D
وفعلا كان ده اهم احلامى الواقعيه 
اللى ممكن بشويه مجهود زياده اقدر احققها
لحد ما دخلت اوله ثانوى واتفاجئت بالصدمه
اللى هى الفيزياء واللى عرفت من اول طله ليها كده
اننا عمرنا ما هنعرف نتفق مع بعض ولا يجمعنا كتاب واحد ابداً
فـ كان قرارى بتحويل اتجاهاتى مره اخرى
وده ظهر مع اول مقابله ليا مع كتاب الفلسفه الجميل ده
و كان حلمى التالى .. كليه الاداب قسم فلسفه
وده كمان كان حلم واقعى تماماً
الا ان اللى ما يتسمى التنسيق خلاه من التخيلات الغير محققه
فكانت نهايتى كليه الحقوق
وحسبى الله ونعم الوكيل فى اللى كان السبب
انا مش عارفه مين السبب
بس انا قولتها من قلبى اهو وربنا شاهد

السؤال اللى بيطرح نفسه بقى جوايا بقاله كتير
هو ياترى انا لو كنت دخلت اداب قسم فلسفه فعلا زى ما انا بحلم
كان ياترى حياتى و واقعى دلوقتى هيختلف فى ايه؟؟


50 comments

Śђąžล ฬąђ٤єĐ ♥ said...

للأسف يا دينا التعليم في مصر مش بيكون مؤثر للدرجه دي

يعني مجرد الدراسه معتقدش انها كانت هتفرق معاكي كتير غير في انها كان ممكن تفتح ليكي مجالات اوسع وتقربك من اهتماماتك

بس دي حاجه ممكن تعمليها لوحدك بانك تقري في الحاجه اللي بتحبيها وتعرفي عنها ومفيش حاجه تمنع انك تدرسيها دراسه مختلفه بطريقتك وبرغبتك
ساعتها بس دراستها هتفرق معاكي ويكون ليها تأثير عليكي وعلى شخصيتك

واخيرا الحلم حياه
ولو بطلنا نحلم نموت

Bent Men ElZman Da !! said...

Śђąžล ฬąђ٤єĐ ♥

مقتنعه جدا يا شذى برأيك ده
وده تأثيره للاسف مجتمعنا اللى التعليم فيه من اخر الاهتمامات
رغم انه بيصنع مستقبل كامل للاشخاص وللبلد نفسها
يعنى تعليمى مش هيفرق فى حاجه
زى ما تعليم شباب فى كليات عليا مثلا بينتهى بيهم الحال فى شغل اكل بكتير من امكانيتهم
وده بسبب وضع المجتمع ككل

نورتينى بوجودك وتعليقك الجميل زيك ده :))

Tamer Nabil Moussa said...

من حق كل انسان يحلم وحتى لو مقدرشى يحقق حلمة من حقة يحلم ويحلم الحلم بداية لتحقيق من نريد فى الحياة الواقع ان يكون لنا

مع خالص تحياتى

Nada Emam ㋡ said...

هوا مكتب التنسيق اللي ضيع نص مصر :)

انا كان نفسي اتجوز ظابط مش ابقى ظابط يا دينا / بس حاليا اقلعت عن الفكرة دي بلاها الشرطة كلها :D

أنا كاتبة تدوينة عن حياتي فالثانوية العامة / شبهك كدا :))

بعتقد بقا ان واقعك ماكانش هايختلف لأننا للأسف في بلد لسه لحد اللحظة دي مابتفرقش بين أي مجال / و خاصة ان مستوى التعليم زفت .. بس عامة الفلسفة مابتحتاجش دراسة / كلنا بنتفلسف و الله الموفق

سندباد said...

اول حاجة جميل اننا طلعنا زمايل في القانون
صدفة جميلة
ثانياهي دي آفة التعليم في مصر اننا مش ممكن ندرس اللي بنحبه وحتي لو بالصدفة درسناه هانكرهه من طريقة التعليم
علي العموم دراسة القانون شئ مميز برضه وبالتوفيق ان شاء الله

ابراهيم رزق said...

لو بطلنا نحلم نموت

و الله العظيم ما هتفرق

انا لما نجحت فى ثانوى قلتلهم لو دفعتو ليا فلوس معلش عشان ادخل حقوق مش هدخلها
احنا كنا مسمينها اسم كده مش و لابد
انا دخلت كلية و اشتغلت حاجة ليست لها علاقة بها ثم رجعت لشهادتى
فمفيش حاجة بتفرق

تحياتى

Radwa Ashraf said...

أنتى عارفة أنا دلوقتى أهو خلصت جامعة و كنت فاكرة أنى لو دخلت إعلام هبقى مبسوطة
بس إكتشفت بعد ما دخلتها أنى كنت أفضل أداب قسم أدب إنجليزى و حاجات من كده

بس برضة معتقدش لو رجع بيا الزمن مكنتش هغير الكلية اللى دخلتها .. عشان انا دلوقتى عاجبانى

و انتى كمان أكيد فيكى حاجات دلوقتى كتيرة حلوة جاتلك لما دخلتى الكلية اللى مش فى بالك خالص .. ممكن مكنتش تحصل لو دخلتى أداب :)

Amira Ahmed said...

منه لله التنسيق اللى ودى مصر كلها فى داهية والله اعظم حاجة هيقدموها للبشرية انهم يلغوه
بس عجبنى اوى تطلعاتك كده من وانتى صغننة
عبقرية من يومك:)))

βent Pasha said...

أولا بالنسبة للتنسيق ده البا شكله كان بيبقى حظ مش عارفة ليه .. غالبا بتلاقي كل واحد بيحلم بحاجة بيدخل عكسها تماما . فالحمد لله
ثانيا : أن الفيزياء دي طول عمرها طلاسم رخمة وتحسي كده انها شفرة ومحدش عارف يحلها أو يفهم لغزها
ثالثا : أنكك لو كنتي هتدخلي فلسفة كان هيبقى أحسن ولا لأ ؟!
بصراحة أنا رأيي أن الخيرة فيما اختاره الله

:-))
استمتعت بطريقة سردك للموضوع
تحياتي لكِ

تقبلي مروري

مصطفى سيف الدين said...

احنا هنفضل نحلم و نسعى لتحقيق الاحلام و و بعدين منسألش كان هيحصل ايه لو
لأن خلاص اتغيرت اتجاهاتنا و اتغيرت احلامنا
تحياتي

ريـــمـــاس said...

صباح الغاردينيا دينا
عارفة انا مش بحس دراسة الشخص بتفرق كتير في شخصيته هيا ممكن تفرق في مستقبله المادي وعمله بس على فكرة انا مثلا بدرس ادارة اعمال عارفة الي يشوفني يقولي انتي تنفعي حاجة تانية على فكرة انتي كنتي بنوتة طعمة هههه فكرتيني بنفسي كانوا يقولولي عاوزة تطلعي ايه وانا صغيرة كنت اقولها اطلع السما ههههههههه يخرب بيت كدا خيال شاطح اووي :) "
؛؛
؛
لروحك عبق الغاردينيا
كانت هنا
Reemaas

MEROOooOOoo said...

جميل جدا البوست
بس أهم حاجة يا دينا انك مدخلتيش كلية علوم والله يابنتى اترحمتى

هبة فاروق said...

مش عارفه يمكن مكنتش حاجه حتتغير بس كان حيكفيكى انك حققتى حلم كنتى عايزاه وبتتمنيه
سلامى لاجمل بنوته

momken said...

.....

والله احلام مشروعه جداً

بس قوليلى الاول هى التعليقات عندك مختفيه ليه كده وايه الى طلعها فوق راس البوست
برغم ان كل التعليقات بتكون بعد منخلص قرايه
الا لو انتى بقى عاوزانا نعلق قبل ما نقرا

بالنسبه للاحلام ياستى انا عرفت من زمان اوى انها مبتتحققش فقررت
اتقلب وانا نايم
ومضيعش وقت فى الاحلام

البوست دمه خفيف وجميل
مع انه مأساه بس يفصس من الضحك


تحياتى

Menna said...

انا بقى مشكلتي ان حلمي اتحقق و مركزتش فيه لو كنت ركزت كنت زماني دخلت اعلام و صحافة ولا اداب ولا حتى فنون حاجة تناسب ميولي
لكن اني مكنتش مركزة في الحلم و محلمتش صح بقيت مهندسة :(

habiba said...

السلام عليكم
كل واحد بياخد نصيبه فى الدنيا دى..وإن شــاء الله يكون خير ليكى
بطموحك وأحلامك ممكن تحقق مســتقبل جميل..وتفرضى نفسك فى المجتمع بدراستك وعلمك..بشوية إصرار وتفوق
ربنا يكتب ليكى كل خير..استمتعت بطريقتك فى الكتابة جدًا
دمت بخير حال

زينة زيدان said...

أحلام متنقلة ومتغيرة بتغير الفكر وأشكال الحياة
ولكن في النهاية لنا حياة واحدة نعيشها ونحياها
و هي التي اختارها لنا الله

بوست جميل
تحيتي دينا

نهر الحب said...

يعني حلمتي حلم واتحقق اهو
:)))))))))
عقبال باقي الاحلام


علي فكرة
بحب اوي اسمع شايف البحر هنا بتفكرني بحاجات حلوة اووووي

إيمي said...

ههههههههه حلوة حتة ضابط دي

مع إنك قلتي محدش يضحك ههههه

أنا كان نفسي ابقى محامية بس في الاخر درست ميكروبيو في تاني سنة طب

الاحلام بتتغير كل يوم ، و محدش بيبقى عارف هيطلع ايه
بس احلى حاجة الاحلام

سلامي

richardCatheart said...

هههههههههههههههههههههههههههههههههههه جميييييييل انا كمان كان نفسى ادخل شرطة وبابا قلى ماينفعش بس لما كبرت شويه كان نفسى ادخل معهد سيما ابقى مخرجه او ممثله ممممتع الفن اووووووووى بس بردو بابا قالى نوووو لالالالالالا ماينفعش ههههههههههه جميله هى احلام الطفوله :)

maioya said...

كل واحد فينا في كل فتره من فترات حياته
بيتمني انه يبقي حاجه معينه
لحد الحلم الكبير اللي بيبقي قبل التنسيق
وده يابيحصل
يااما مبيحصلش ويبقي قطمه ضهر فيها
ويسلم امره بقي لمجموعه وزي مايوديه
وفي الاخر بياخد شهادته وبيقعد
مبتفرقش معاه
بس الغريبه ان في ناس مبتقفش عند
حد معين وبتمشي ورا الحلم للاخر
معرفش ليه احنا مش منهم :D

rona ali said...

اموت واعرف ايه الاسم اللى مش ولابد اللي قال عليه الخال ابراهيم :))

بصي كلنا لها باختصار انا اشترك في احلامك في موضوع كتاب الفلسفه دة واداب قسم فلسفه كمان بس تنسيقي كان يجبها بس لاقتنى مش هستفاد منها في في حاجه فروحت لحقوق :)
ربنا يكملك احلامك كلها الباقيه

شيرين سامي said...

هي حياتك أكيد كانت هتختلف..
تعرفي ساعات بسقل نفسي لو كنت دخلت إعلام مش...
بس أرجع أقول إن لو بتفتح عمل الشيطان و إننا لازم نرضى بحياتنا و نتقبلها و نخليها أجمل..
قد يكون كلام نظري بس هو ده المفيد

و بعدين حقوق أداب إعلام...مش مهم
المهم إنك معانا
و بالفعل بدأتي تحققي أحلامك الأجمل

:)

تحياتي يا دندونه

Bent Men ElZman Da !! said...

Tamer Nabil Moussa

والله كفايه اننا بنحلم
ده لوحده بيدينا امل

نورتينى بوجودك :)

Bent Men ElZman Da !! said...

Nada Emam ㋡

مكتب التنسيق ده ضيع مستقبل البشريه :D

حلم معظمنا تقريبا الظابط ده
بس لما بنكتشف الحقيقه بنتغير خالص

طيب انا عايزه التدوينه دى بقى

دراسه الفلسفه بتبقى دراسه اجيال مختلفه بنعرف ازاى فكروا وازاى كانوا شايفين الدنيا
ده اجمل بيتهيألى من اننا نتفلسف اصلا
على رأيك كلنا بنتفلسف دلوقتى :)

نورتينى بوجودك يا قمر :))

Bent Men ElZman Da !! said...

سندباد

مبسوطه اننا زمايل قانون :)

هى الفكره بقى فى حته اننا اللى بنحبه ده لما ندرسه هنفضل نحبه والا لا !

هى دراسه القانون مش وحشه ومميزه دى حقيقه
بس لما يكون بمزاجى مش غصب عنى
وكمان مش يكون مذاكره لمجرد الدش مالهاش اى علاقه بالمجال ده لما انزل اشتغل فيه على ارض الواقع نفسه

اسعدنى وجودك وتعليقك :)

Bent Men ElZman Da !! said...

ابراهيم رزق

نحن نحيا بالحلم :)

ايوه انا عايزه اعرف ايه الاسم بتاع حقوق ده
عشان اكرهها اكتر ما انا بكرهها اصلا بقى

فعلا والله مفيش حاجه بتفرق :)

اسعدنى وجودك وتعليقك

Bent Men ElZman Da !! said...

Radwa Ashraf

لان المشكله هنا يا رضوى فى التعليم نفسه
انه بيكره الواحد فى الحاجه اللى بيحبها

ده احلى حاجه حصلتلى من الكليه دى اومال انا قررت احبها ليه :))

نورتينى بوجودك يا حبيبتى :)))

Bent Men ElZman Da !! said...

Amira Ahmed

التنسيق ضيع مستقبل مصر ههههههههه
هما هيلغوه؟ يعنى فى امل احاول ادخل اداب فلسفه؟
اه شوفتينى وانا متألقه من صغرى كده هههههههههههه

نورتينى بوجودك يا جميله :))

Bent Men ElZman Da !! said...

βent Pasha

اكيد الحمدالله على كل شئ فى النهايه

ايوه انا كانت بتستفزنى اوووى بجد
وخصوصا بتاعه اثبت ان ج ع = خ ظ
انا مالى انا يساوا بعض والا لا
وبعدين الحروف دى تتساوى ازاى اصلا ؟!!؟

اكيد ربنا ليه حكمه دايما فى اى اختيار بيختاره لينا

استمتعت جدااا بوجودك وتعليقك الجميل ده
نورتينى يا قمر :))

Bent Men ElZman Da !! said...

مصطفى سيف الدين

معاك حق جداااا يا مصطفى

اسعدنى تعليقك
ونورتنى بوجودك :)

Bent Men ElZman Da !! said...

ريـــمـــاس


هى فعلا مش بتفرق اد ما احساس الشخص نفسه بالدراسه بيفرق

شوفتى وانا مستهبله فيها وعايزه ابقى ظابط هههههههههه

طب ما هو مش انا لوحدى اللى احلامى خياليه اهو يا ريمو هههههه

نورتينى يا حبيبتى بوجودك

Bent Men ElZman Da !! said...

MEROOooOOoo

اه يا ميرو ما انا بعد كده اكتشفت مأساه علوم
قولت الحمدالله ربنا نجدنى

نورتينى يا جميله :)

Bent Men ElZman Da !! said...

هبة فاروق

صح
كان هيبقى احساس مختلف ان الواحد حلم بحاجه وقدر يحققها
الاحساس ده بيبقى جميل وبيفرق اوى

سعيده جدا بوجودك وتعليقك
نورتنى :))

Bent Men ElZman Da !! said...

momken said...

مشروعه بس الواقع يجعلها دائماً تخيلات :D

قصدك على كلمه التعليقات نفسها؟
انا مش عملت حاجه والله ده هى فى الثيم بتاع البلوج اصلا
انا كفايه عليا وجودك :))

هو بصراحه انا كان فى دماغى انى عاملاه بوست خفيف كده زى فاصل بين باقى البوستات
بس المشكله يمكن كانت واضحه فيه اكتر من الضحك نفسه

اسعدنى وجودك ورجوعك للتدوين من تانى :))

Bent Men ElZman Da !! said...

Menna

هههههههههههههههههه
بتهزرى يا منه
فى حد مايركزش فى الحلم يبقى مهندس
طب يارتنى ماكنت ركزت يمكن كنت طلعت دكتوره والا حاجه
والله يامنه دايماً الواحد بيقول يارتنى كنت دخلت كذا كنت عملت كذا
بس اكيد ربنا ليه حكمه فى الاختيار ده مش هنعرفها الا بعدين

سعيده بوجودك وتعليقك :))

كريمة سندي said...

مازلت في الأربعين وأنا بأحلم

تدوينة شيقة .. فحياتنا قد تتغير بين ليلة وضحاها ومنذ الصغر ونحن نحلم ونتمنى من الله أن يحقق حلمنا

Bent Men ElZman Da !! said...

habiba

وعليكم السلام ورحمه الله وبركاته

اكيد طبعا كل حاجه نصيب
ربنا يخليكى يا جميله ويوفقك يارب دايماً انا كمان استمتعت جدا بتعليقك

اسعدنى وجودك :)

Bent Men ElZman Da !! said...

زينة زيدان

احلام بتتغير مع كل فتره وكل سن معين
وفى النهايه ده كله قدر

وجودك هو الجميل نورتينى :))

Bent Men ElZman Da !! said...

نهر الحب

ايوه انهى حلم بقى؟؟

على فكره
انا مبسوطه ان الاغنيه عجباكى كده بقى ^_^

نورتينى يا جميله :))

Bent Men ElZman Da !! said...

إيمي

انا قولت ماحدش يضحك عشان كده بقى هههههههههه
طب تيجى نبدل؟؟
احنا نحلم والباقى على ربنا

نورتينى بوجودك يا قمر :))

Bent Men ElZman Da !! said...

richardCatheart

ايه ده بجد؟؟؟
كنتى عايزه شرطه؟ الحمدالله ياربى ماكنتش لوحدى اهوووو

وهو فى احلى من احلام الطفوله البريئه دى ^_^

نورتينى يا جميله :))

Bent Men ElZman Da !! said...

maioya

بصى يامى هو انا مش حاسه ان التنسيق قطمه ظهر بالمعنى الصعب ده الا فى حالات معينه
بس هى بتفرق الى حد كبير
لان فى النهايه حكايه الكليه دى بتمر والواحد بيدخل بعدها اثبات نفسه بالكليه اللى دخله دى
ياما هيقدر يحقق نفسه فى مجاله ايا كان
ياما مش هيقدر
واحنا ادينا بنحاول
ايه المشكله اننا نحلم ونسيب الباقى على ربنا بقى :D

نورتينى يا ميويا ومبسوطه بتعليقك اوى :))

Bent Men ElZman Da !! said...

rona ali

ايوه انا كمان نفسى اعرف يا رنا

الاستفاده فى المعرفه من الدراسه
انما فى المستقبل ماعتقدش
ولا حقوق ادينا استفدنا منها وحياتك هههههههههه
ربنا يخليكى ليا يا حبيبتى
ويارب يحققلك احلامك انتى كمان دايماً :)))

Bent Men ElZman Da !! said...

شيرين سامي

والله معاكى حق يا شيرين
كلمه لو بتفتح جوانا حاجات كتير وتفكير كتير وارد جدا يكون غلط
ودايماً اللى مقتنعه بيه ان ربنا ليه حكمه فى كل حاجه بتحصلنا
المهم زى ما قولتى ان الواحد بيحاول يحقق احلامه حتى لو بعيد عن مجال الدراسه

نورتينى يا اجمل حدوته :))

Bent Men ElZman Da !! said...

كريمة سندي

الحلم مش بيربطه ابدا السن ولا الوقت ولا القدرات
المهم ان الواحد طول عمره بيحلم
فى احلام هتتحقق وفى احلام هتساعدنا نحقق غيرها

اسعدنى وجودك جدا :))

أسماء علي said...

عادي كنت عايزة اعلام ودخلوني طب
ادايقت؟ نووووو ابسلوتلي ماادايقتش
خدي الحياة على محمل الهزار
:))
عاجبني البوست و دمه خفيف

Bent Men ElZman Da !! said...

أسماء علي

لو مش هاخدها على محمل الهزار عمرى ماكنت كتبت البوست ده ههههههههههه

مبسوطه ان البوست ده عجبك
نورتينى يا جميله بزيارتك :))

NoNa AnGeL said...

:f: الظاهر يادينا ان ميولنا متشابهة اوي ..

انا من قصص رجل المستحيل دى كان نفسي ابقى فى مجال المخبرين والمحققين وكونان بقى والشغل ده :f:
ولحد دلوقتي بحب الحاجات دى اوي .. وبردو لما جيت ادخل كلية .. كان نفسي جدا" ادخل اداب علم نفس .. لكن اللى مايتسمى التنسيق دخلنى حقوق بردو :f:

Bent Men ElZman Da !! said...

NoNa AnGeL

بجد؟؟
يعنى عادى حكايه الجو البوليسى بتاع رجل المستحيل ده
مش انا اللى اتجننت مع نفسى يعنى
ايوه هو اللى مايتسمى التنسيق ده
تحسى انه متفق مع حقوق ياخد نسبه من الارباح فى مقابل الاعداد المهوله اللى بتترمى فيه
:D

:a: :b: :c: :d: :e: :f: :g: :h: :i: :j: :k: :l: :m: :n:

Post a Comment

 

FaceBook Comments

wibiya widget