17 February 2013

♥ عن كرم ربنا علينا ♥

.



عارفين إن فى أيام الواحد بيصحى بيبقى حاسس إنها مش بتاعته خالص
بس ربنا لازم يبعتلك حاجة يقولك أنا معاك
لازم يبعتلك حاجة يخليك تقول الحمد لله
لازم يبعتلك حاجة تطبطب على قلبك وتحضن روحك

لما بتقع فى موقف مش عاجبك 
أو تحس إن فى حاجة فى حياتك ماشية غلط
أو تخسر حد كنت شايفة أنة من أهم الناس فى حياتك 
وحياتك مش هتمشى إلا بية
أو أنك ماتقدرش تحقق حلم بتتمناه فى وقت كنت مخطط إنة يتحقق فية
أو انك ماتقدرش توصل لوظيفة معينة أو نجاح معين 
أو أو أو .....

حاجات كتير اوى
لما بتحصل فى وقتها
أنت بتتفكر أن ربنا غضبان عليك
ما هو أكيد اللى يقابل كده فى حياتة
هيقول ربنا مش بيحبنى لأنى مقصر
لأن أكيد كلنا مقصيرين فى إتجاة معين
بس لما بيعدى الوقت وتعدى كل المواقف دى
وتبدأ تبص على حياتك من برة كأن مش أنت اللى عايشها
هتقول أية ده
ده أنا ربنا بيحبنى أوى
لما ربنا خلانى مش قدرت أوصل للحلم الفلانى 
عشان كان هيخلينى أوصل لحلم أكبر كنت بردو بتمناه
لما ربنا خلانى أخسر شخص معين فى حياتى 
عشان أكتشف بعد كده أد ايه حياتى أحسن من غير الشخص ده
لما تخسر وظيفة معينة عشان ربنا يوصلك للأحسن منها

لما بيعدى وقت على كل الحاجات اللى أنت "بتتخيل" أنك فقدتها أو خسرتها أو ربنا مش كتبها ليك
بتكتشف أن ربنا بيكافئك بعدها على صبرك
بيكافئك بعدها بحاجات أجمل بكتير 
أنت نفسك ممكن ماتقدرش تستوعبها
بيكافئك بأنك تأخد حاجات أجمل وأشخاص أفضل
وأجمل مكأفاة أنة بيخليك أنت نفسك من جواك أحسن 
ويمكن متصالح مع نفسك أكتر

ربنا لما بيختبرك ..بيختبرك عشان تشوف أنت مقدار تحملك أية
ولما تتحمل هتقدر تحس بقيمة كل الحاجات الجميلة اللى هتجيلك بعد كدة
اللى أصلا بيتحدد مدى جمالها ده من قوة تحملك وصبرك أنت

 لما بردو بتيجى تشوف مشوار حياتك كلة
هتلاقى إن كل عثراتك 
بيوازيها فى نفس التوقيت او بعدها حاجة تانية ربنا بيرتبهالك تعوضك
لو شوفت حياتك هتلاقى إن حاجات كتير أوى كان ربنا بيبعتهالك تطمنك
ممكن تأخد بالك منها لأنك بتكون مستنيها
وممكن مش تأخد بالك منها لأنك مش بتبقى مركز وقتها غير فى وجعك بس
ودة بردو اللى ممكن يحدد أنت هتقدر تلمسها وتوصلها لما تأخد بالك منها
وإلا هتضيع عليك لو مش خدت بالك منها
لكن الأكيد إنها فى جميع الأحوال هتوصلك لو فعلاً مكتوبالك

لما بتبص لحياتك بالشكل دة
بتطلع على لسانك وقتها كلمة ماينفعش تقول غيرها
 الحمدلله


 ....
الحمد لله الذي لا ينسى من ذكره
والحمد لله الذي لا يُخيب من رجاه
والحمد لله الذي هو ثقتنا حين تنقطع عنا الحيل
والحمد لله الذي هو رجاؤنا حين يسوء ظننا بأعمالنا
والحمد لله الذي يكشف ضُرنا عند كربنا
الحمد لله الذي يجزي بالإحسان إحساناً
الحمد لله الذي يجزي بالصبر نجاةً
....


على الهامش
البوست دة أنا مش عارفة أتكتب فية أية ومش ناوية اراجعة
والمفروض كنت أنزل بوست تانى خالص
بس هو أتكتب لأن فى حاجات كتير جميلة بتحصلى مش ليها كلمة غير الحمدلله
ولأنى قولت الحمدلله البوست اللى فات
حبيت البوست دة يبقى أزاى الحمدلله دى بتيجى جوانا من عند ربنا أصلاً


27 comments

افكار مبعثرة said...

الحمدلله الحمدلله الحمدلله
تصدقي بقا ان البوست ده جه ف وقته اوي و كان ربنا سبحانه جعله سبب اني افكر و ابتسم و احمده و اشكره على فضله ونعمته ف تدبير امورنا
ربنا يكرمك و يجازيكي خير
تحياتي:)

حنين محمد said...

مساء الغاردينيا دينا
الحمدلله كلمة بتطلع من جوا القلب في الضيق والفرح ونعمة جميلة نتعلم نقولها رغم كل شي "
؛؛
؛
وحشتيني
لروحك عبق الغاردينيا
كانت هنا
Reemaas❤

maioya said...

احنا لو تدبرنا قوله "وعسي ان تكرهو شيئا ويجعل الله لكم فيه خيرا كثيرا "
هنصدق من جوه ان كل حاجه وحشه بتحصلنا
مخبيه وراها حاجات اجمل
المساله مساله يقين ليس الا

الحمدلله علي كل نعمه :)

Bent Men ElZman Da !! said...

افكار مبعثرة

عايزة أقولك بقى إن الكومنت بتاعك ده هو اللى خلانى أبتسم واكون مبسوطة اوى إن البوست فرق معاكى كده

نورتينى يا جميلة وربنا يسعدك :)

Bent Men ElZman Da !! said...

ريـــمـــاس

مساءك ندى يا ريمو ^_^
الحمدالله بنقولها فى كل الأوقات
بس لما بتطلع فى وقت ربنا كارمنا فية اوى
بتبقى ليها طعم مختلف مش عارفة أوصفة كده

انتِ كمان وحشتينى جداااا <3

Bent Men ElZman Da !! said...

maioya

كلامك صح اوووووى يا ميويا
الحمدالله على كل شئ :)))

ابراهيم رزق said...

الحمد لله و نعم بالله

ده يكفى ان ننظر للسماء باعيننا فقط

بوست جميل

تحياتى

أسماء فتحي said...

الحمـــــــــــــــــد لله
معاكي حق
المشكلة اننا لما بيكون نفسنا في حاجة اوووي وتضيع

كل اللي بيهمنا وقتها انها راحت وبنزعل اوووي

مش بنعرف ان بعدها عننا خير لينا غير بعدها بفترة

جميل البوست وبسيط

تحيــــــــــاتي
كانت هنا ورحلت
Asmaa Fathy

موناليزا said...

الله يا دينا
البوست تحفة بجد

الحمدلله دائما وأبدا

شمس النهار said...

الحمد لله

التدوينه دي جميله ومريحه جداااا

Unknown said...

الحمد لله
إنتي جميله أوي يا دينا
:)

Unknown said...

الحمد لله
إنتي جميله أوي يا دينا :)

رؤى عليوة said...

كلنا بنمر بلحظات ضيق ويمكن بنكون على حافة اليأس
لكن اللى متعود يكون مع ربنا بيلاقى ربنا معاه فى ضيقته
وبيحميه حتى من نفسه

اما عن تحمل المصائب فربنا سبحانه لا يكلف نفسا الا وسعها ولما بيبتلى حد فيها بيكون عارف ان النفس دى تقدر تتحمل ولو الشيطان والهوى بعدوا فعلا هنتحمل اى قدر

والابتلاءات هى اللى بتحدد درجات اهل الجنة

دمت بخير دينا

faroukfahmy said...

اذا تم كل شئ كما نريد يمكن يمكن ننسى اللى مكننا من تدبيره!! ولذلك سمى الانسان انسان لدوام نسيانه حمد صاحب الحمد ولكن اذا لم يتحقق ما نبغى نعيد ونكرر السؤال لمن فى يده تدبير ما نريد

Bent Men ElZman Da !! said...

ابراهيم رزق

ويكفى اننا ننظر لكل حاجة حوالينا بقلبنا
وجود حضرتك أجمل
نورتنى :))

Bent Men ElZman Da !! said...

asmaa fathy

عشان وقتها بنبص بس تحت رجلنا مش بنشوف اللى أبعد من كدة

نورتينى يا جميلة وكنت مبسوطة بوجودك :)

Bent Men ElZman Da !! said...

موناليزا

تسلميلى يا منى
نورتينى يا جميلة انتى :))

Bent Men ElZman Da !! said...

شمس النهار

حبيت جدا تعبير "مريحة" عن التدوينة :)
دايماً بيسعدنى وجودك :))

Bent Men ElZman Da !! said...

شيرين سامي

انتى أجمل يا شيرى بجد <3

Bent Men ElZman Da !! said...

رؤى عليوة

كلامك صح اوووى يا رؤى
ربنا لما بيحطنا فى ظروف بيبقى عارف احنا هنقدر نتحمل لفين
وعلى الأساس ده بتحدد مكافئتنا أصلاً

دمتِ بخير يا رورو :))

Bent Men ElZman Da !! said...

faroukfahmy58

فعلاً لازم ربنا دايماً يفكرننا اننا واجب علينا نشكرة ونحمدة

اللهم دبّر لنا إنه لا يحسن التدبير إلا أنت

أسعدتنى بوجودك :))

reemaas said...

بصراحة جاى فى وقته ولولا انى عارفة انك مش عارفة كنت قلت انك كتباه علشانى
:)

انا نفسى فى لحظة الطبطبة دى..يااااااااااااارب

eng_semsem said...

الحمدلله على كل شئ
تحياتي

محمد جمال said...

طبعا الحمد لله يا دينا
وعسى ان تحبوا شيئا وهو شر لكم وعسى ان تكرهوا شيئا وهو خير لكم
كلامك جسد كل الكلمات التى تدور بداخلنا وافضى الى نتيجة واحدة وهى الحمد لله

تحياتى واحترامى

Bent Men ElZman Da !! said...

reemaas

يارب يبعتلك لحظات طبطبة كتيييييييير
ومبسوطة أن البوست جاى معاكى اوووى كده رغم انى مش عارفة :)

نورتينى يا جميلة :))

Bent Men ElZman Da !! said...

eng_semsem

الحمدالله أكيد

نورتنى بوجودك :)

Bent Men ElZman Da !! said...

محمد جمال

ونعم بالله
الحمدالله بتجاوب على حاجات كتير اوى بنقابلها فى حياتنا
نورتنى بوجودك يا محمد :)

:a: :b: :c: :d: :e: :f: :g: :h: :i: :j: :k: :l: :m: :n:

Post a Comment