05 May 2013

عن كرم ربنا علينا :) .. لتانى مرة

.





بصراحة انا لما بيسيطر عليا احساس معين بيبقى كل حاجة بكتبها أو بقولها أو بحسها فى صمت مصبوغة بنفس الأحساس ده
واحساسى دلوقتى إن ربنا كريم أوى معايا ومعانا كلنا
يمكن أكون تناسيت الأحساس ده للحظات
بس بعد شوية وقت صغيرين رجعتلى فكرتى المعتادة
إن لما ربنا بيختارلك حاجة بالتأكيد بتكون هى الأحسن ليك
حتى لو أنت مش شايف ده
بس مع الوقت ومع الظروف اللى هتمر بيها بعد كده
هتعرف إن اللى ربنا اختاره ليك كان أحسن ووصلك لحاجات أفضل

لما خسرت حاجة مهمة أوى فى حياتى وربنا بعتلى رسالة قبلها فى حلم
ولأنى عارفة إن كالعادة كل أحلامى الوحشة للأسف بتتحقق
وحتى بعد ما كل اللى حكيتلة الحلم رفض يقولى تفسيرة
بس ماكنوش عارفين إن من نغّم ربنا عليا إنى بقدر أفهم احلامى
وعرفت الرسالة بس حبيت أفرح شوية :)
وبعدها لما اتوجعت بوجع صعب يتوصف بكلام
ودموع كتير ماكنش ليها وصف
واكتئاب كان على وشك يسيطر عليا ويوقعنى كتير
وقتها قولت الحمدالله بس بردو كان لسة فى حتة وجعانى
لكن ربنا خلانى احس بسرعة أوى إنى فيا حاجة غلط
وخلانى أفتكر إن طول حياتى لما كنت بخسر حاجة وأزعل عليها
كان بيعرفنى بعد كده إنى غلطانة وبيعوضنى كتيييير أوى
وبقى كل ما حد يسألنى هو اية اللى حصلك؟
ارد وفى ابتسامة جوه قلبى من كرم ربنا 
وابتسامة على وشى واقولهم ربنا مش اراد الحمدالله :)))
مانكرش إن محمد اكتر حد خلانى اكون احسن مع ابتسامتة وكلامة الحلو وكلمة الحمدالله اللى مش كانت بتفارقة 
واللى كان بيخلينى انا كمان اقولها



الفترة اللى فاتت حسيت إن ربنا بيبعتلى رسايل كتير اوووى
تعرفنى إنى لازم ابقى مبسوطة بكل حاجة بتحصلى
لازم ابقى سعيدة بكل حاجة وصلتلها
زى كلمة تخلينى مبسوطة من حد ماعرفوش
زى رسالة من بنوتة جميلة تقولى اد اية كلامى مأثر فيها

ونفسها أكتب عن احساسها فى كلام والسلام
زى إن كاتب كبير يشيد بكتابى
زى إن ناس مش عارفانى أصلا وتبقى بتحبنى
زى إن ربنا يخلينا كل يوم بتعرف على ناس جميلة أوى
كل ده حاجات لازم تخلينى مبسوطة حتى لو أنا اصلاً مش عايزة ابقى مبسوطة !
ولو حصلت حاجة وحشة عادى ما هو حاجة وحشة فى وسط كل الحاجات الحلوة دى هتوه ومش هتتحس
وإنى بالعند فى أى حد بيحاول يحبطنى بأى حاجة .. أنا قادرة أوصل وقادرة اكون مبسوطة (وش مطلع لسانة)

لما بتسيب كل حاجة على ربنا وتعمل اللى عليك وتبطل تجرى ورا كل حاجة كده
سبحان الله هتلاقى كل حاجة انت عايزها بتيجى لحد عندك حتى لو انت شايفها صعبة ومش ممكنة

طيب عارف انت بقى لما كل حاجة تضايق بتحصلك
او حاجة مهمة تضيع منك و تسيب كل ده ومش تفكر فيه
وتفكر فى الأحسن منه هتلاقى كل اللى مزعلك ده ولا حاجة
هتلاقى نفسك من غير ما تحس بتبتسم وبتقول الحمدالله
وأنك تحمد ربنا طول الوقت دى حاجة كبيرة اوى بيجازيك خير عشانها كتير
احمده وهو يجازيك واللى بيصبر حقيقى بينول :)))


*****
 
على الهامش

يوم الخميس اللى جاى اللى هو يوم 9 مايو الساعه 7 بليل
هيكون حفلة توقيع كتابي قصاصات أنثوية
بالمشاركة مع أ.محمد صلاح زكريا وكتابة سبحة وكأس
فى مكتبة ألف فرع الزمالك
العنوان اهو لو حد مش عارفة

ش طه حسين متفرع من ش شجرة الدر, امام اليمامة سنتر 
 دى مش عزومة على حفلة توقيع على فكرة
ده انا بستأذنكم تشاركونى فرحتى اللى طلعت اصلا من رحم المدونه
اللى انتوا اساساً كنتوا السبب فى وجودها 
وبالتالى انتوا السبب فى وجود كتابى نفسة
اتمنى تكونوا كلكم معايا فى اليوم ده :))

16 comments

مصطفى سيف الدين said...

ربنا يفرح قلبك دايما
ان شاء الله ربنا هيبعد عنك الحزن و يبدله فرحة و سعادة
فعلا ربنا لما بياخد حاجة بياخدها علشان يزرع جواكي حاجة و بعدين يعوضك بحاجة اكبر من الكل
رحمة ربنا كبيرة اوي و وسعت كل شيء
اوعي تخلي للحزن طريق لقلبك
و افرحي دايما

Unknown said...

الحمد لله على كل حال
الحمد لله حتى يرضى وعندمت يرضى و بعد الرضى

و الف مبروك توقيع الكتاب و يارب يكون وش السعد

Bent Men ElZman Da !! said...

مصطفى سيف الدين

ربنا يخليك يا مصطفى ويفرحك يارب دالماً أنت كمان :))
لما بنتوجع بسبب أى حاجة ربنا بيرجع ويبعتلنا حاجة تطبطب علينا
ما هو كريم :)
ربنا يبعد الحزن عن قلوبنا يااااااارب :)))

شمس النهار said...

الحمد لله
ربنا بيعمل لنا كل شئ جميل
وتلاقي لما ربنا بيريد شئ كل الاشياء بتذهب تجاه

ربنا يكرمك ويكون يوم الخميس يوم جميل:)

Bent Men ElZman Da !! said...

catching ownse

الحمدالله أكيد :))

الله يبارك فيك يااارب وسعيدة جداً بزيارتك للمدونة ويارب مش تكون اخر مرة :)

الازهرى said...

لا شىء يحدث فى ملكه إلا بعلمه

افرحى
بكرة دايما أحلى :)

تحياتى دوما
وكل سنة والكل بخير

m.hallawa said...

يا ليتني في مصر الحبيبة دينا كنت شاركتك فرحتك للاسف
أن شاء الله المرة القادة

الف الف الف مبروك وبالتوفيق

تحياتي وأحترامي

Bent Men ElZman Da !! said...

شمس النهار

شمس التدوين :)
اللى ربنا دايماً بيختارة لينا بيوجهنا ليه من غير ما نحس

ربنا يخليكي يارب وأتمنى وجودك يومها :)

Bent Men ElZman Da !! said...

الازهرى

ونعم بالله :)

مفيش احلى من الضحكه اللى من القلب

شكراً ليك وسعيدة جداااا بزيارتك الجميلة دى
وكل سنة وانت بألف خير :)

Bent Men ElZman Da !! said...

m.hallawa

كنت أتمنى وجود حضرتك وأتعرف عليك أكتر
بس إن شاء الله لما ترجع بالسلامة :)
ربنا يبارك فيك يارب

نيللي علي said...

الحمد الله..وبعد ده مستغرب أني أقولك بخد طاقتي منك:)

Bent Men ElZman Da !! said...

nelly aly

أنا بحمد ربنا بقى إنك من الأشخاص اللى فى حياتى عشان بتدينى طاقة معنوية تخلينى أبقى أقوى ♥

faroukfahmy said...

انا اقدم خالص اسفى واعتذارى لعدم التعليق فى ثوانيه قبل دقائقه فانت صاحبة واجب وفضل على الجميع
والسبب من جوجل ربنا يسامحه على ظهورى بهذا التقصير البايخ
وتلافى ما يحدث فى عدم ظهور بوستك فى لوحة تحكمى فقد اعدت اشتراكى مع متابعينك
اولا مبروك على مناسبتين اسعدتنى كثيرا توقسع الكتاب وقرانك السعيد
اما بالنسبة لموضوع العبارة التى لاغنى عنها ولا تساوى ثقلها فى الوجود
( الحمد لله )
كم ازاح عنى وعلى يقين كلامك الكثير من الهم والغم وةالكرب العظيم من نفوسنا التى فى حاجة ماسة الى كلماتك الروحانية الملائكية (لازم ربنا يبعتلك حاجه نخليك نقول الخمد للله .......... قل
تطبطب على قلبك حسيت بلمسة كلامك تطبطب على قلبى )
الله يخليكى تزيدى وتعيدى من هذا الكلام الذى يهدى الى حسن الرجاء والسبيل دينا

Bent Men ElZman Da !! said...

faroukfahmy

مفيش اسف ولا حاجة حضرتك وجودك بيسعدنى حتى لو من غير تعليقات ده كفاية أنك تنورنى كده
أما كلامك الجميل اللى انا مش عارفة اقول علية اية فـ بجد بيفرق معايا اوووى

الله يبارك فى عمرك ياااارب :)

الحمدالله فعلاً بتريح كتير
ربنا يبعد عن حضرتك أى هم وكرب ويسعد قلبك ويفرحك دايماً :)))

ربنا يخليلى وجودك يارب :)

ضياء عزت said...

ونعم بالله يا دينا
الحمد لله على كل ما أعطى وكل ما أخذ

وألف مبرووووووووووووك.. وإن شاء الله لازم هاحضرلك حفلة توقيع.. وباعتذر إني ماقدرتش آجي الحفلة دي

بالتوفيق دايما

rona ali said...

انا عارفه انا مقصره في حقك قد ايه وخاصه مع كتابك مقصره جداااااااااااا جدااااااااااااااااا

وعارفه كمان مقصره في متابعه تدويناتك

بس بيجد بفرح لما بقرأ ليكى حاجه البوست دة سعدنى كتير وادانى امل كبير اوى

ربما يسعدك دايما ويعوضك خييير يا دندن

وهبقي خالتوا يعنى هبقي خالتوا ان شاء الله :)

:a: :b: :c: :d: :e: :f: :g: :h: :i: :j: :k: :l: :m: :n:

Post a Comment