20 September 2013

عن شيرين سامي :)

.



كنت دايماً بقولك إنك أثرتي فيا بطريقة إنتِ نفسك مش تعرفيها
ولذلك وجب إن يكون ليكِ تدوينة خاصة أقولك إنتِ أثرتي فيا إزاى :)

لما عرفت مدونتك في حملة التدوين من سنتين تقريباً
كان في حاجة في كلامك دايماً بتخطفني
كنت بحس إنك بتحطي كل احساسك وتفكيرك في كل تدوينة بتكتبيها
لما عرفت إنك هتنزلي كتاب كنت مبسوطة عشانك جدااااا
واول ما روحت معرض الكتاب كان كتابك هو أول حاجة راحت إيدي عليها
وبقيت ببص ليه وانا مبسوطة إنك قدرتي تحققي حلمك 
وإني ماسكه كتاب عليه اسمك
وبقيت أقول لصاحبتي علي فاكرة أنا أعرفها ^^

قرأت الكتاب واللي كنت مستمتعه بيه جداً
عشان لاقيت جواه روحك وأسلوبك اللي دايماً كنت بحسه في تدويناتك
بيتهيألي كتابك كان السبب 
في إني أرجع احط كتاب جنبي و أنا نايمة علي المخدة
عشان أقراه قبل ما أنام ولو قلقت بليل

كنت لما بمسك كتابك 
بتخيل إنتِ فضلتي إزاي ورا حلمك ده عشان تحققية
وده كان البداية اللي خلت حلمي أنا كمان يتكون 
عشان يدخل في حيز التحقيق

أحب أعترفلك أعتراف مهم جداً كمان
حفله توقيع كتابك كانت هي أول حفلة توقيع لكتاب أحضرها في حياتي
ماكنش عندي القدرة إني اروح لكاتب 
واحضرله حفلة وادخل وسط الزحمة وكل ده
يمكن الخجل كان كتير بيمنعني 
وهو نفس الخجل اللي خلاني يوم حفلة التوقيع بتاعتك
اسلم عليكِ واخد توقيعك وأهرب :)
بس كنت مستمتعه بالزحمة اللي حواليكِ وابتسامتك وفرحتك
وفرحتك دي اللي كانت بتشجعني أكتر
ومن وقتها وانا عرفت منك يعني أيه أحط إيدي علي حلمي وأفضل وراه
أياً كان الحلم ده أيه و أياً كانت الظروف اللي بتواجهه أيه

عشان كده لما بيكون عندك إحباط من حاجة في مجال الكتابة
بحس إن الأحباط ده بيجيلي أنا كمان
وكأني بستمد طاقة منك في الموضوع ده تحديداً


كان لازم أكتبلك البوست ده من أول ما فكرت في كتابي اللي إنتِ سبب فيه
بس كنت دايماً مش بقدر اوصفلك إزاي إنتِ أثرتِ في حياتي


شيرين... لازم أقولك شكراً بحجم الكون :)

5 comments

ابراهيم رزق said...

جميلة تدوينتك عن شرين
و وصفك لشرين كـأنك بترسمى بورتريه لشرين
فعلا حفلات توقيع شرين سامى تشعرى بوجود شرين فيها
بحلمها و سعادتها و توترها و فلقها و انفاعلها و توترها

و هاقولك على حاجة تانية
حفلة توقيع كتابك من الحفلات اللى نش ممكن انساها
البساطة و السعادة و التلقائية و الفرح و الحب و الورد و حاجة مهمة جدا مش ممكن انساها الشيكولاتة

تحياتى

Shereen Samy said...

http://hadutamasreya.blogspot.com/2013/09/blog-post_20.html

رديت عليكي هناك :)
مش عرفه أقولك إيه يا دينا
إنتي جميلة بالمعنى الحقيقي للكلمة

Bent Men ElZman Da !! said...

ابراهيم رزق

أنا حاولت أرسم شيرين زي ما أنا شايفاها وحساها
وده فعلاً اللي شوفته فيها في المرتين تلاته اللي اتقابلنا فيهم :)

حفلة توقيع كتابي أنا لحد دلوقتي مش مستوعباها اصلاً والله
ولا ناسيه أنا كمان ساليناز وهي واقفة جنبي طول الحفلة بإبتسامتها العسل دي ^^
وبالنسبة للشيكولاتة فـ كده هاجيب المرات الجاية شيكولاته كتير بقي :)

Bent Men ElZman Da !! said...

shereen samy

أنا اللي مش عارفة أقولك اية يا شيرين :)
البوست عجرني عن الرد :))

asmaa fathy said...

جميلة تدوينك يادينا عن شرين بتعكس روحك الجميلة
وتأثير شرين على اللى بيعرفها
عموما أنتوا الأتنين مكسب كبير لبلوجر والتدوين
ومن أجمل وأرق الكتاب الشباب الموجودين
ربنا يوفقكم ونشوفلكم بدل الكتاب 1000 كتاب يحمل روحكم وبساطتكم وعطركم

تحياتي

:a: :b: :c: :d: :e: :f: :g: :h: :i: :j: :k: :l: :m: :n:

Post a Comment

 

FaceBook Comments

wibiya widget