بقيت احس بحاجات كتير
بس مش باكتب عنها هنا
مش عارفه ليه
بس بطلت اقدر اطلع كل حاجه فى الكتابه
بقيت حاسه ان اللى جوايا ده هيفضل يلف ويدور جوايا
ومش عارفه ارتبه عشان اكتبه او حتى عشان اقوله بينى وبين نفسى
مش لانى تايهه
والا لان اللى جوايا وحش او واجعنى فا مش عايزه اكتبه
بس يمكن لانى حاسه انه كتير ومتلغبط
فا بسيب اللى جوايا يعيش جوايا زى ما هو من غير ترتيب
***********
بقى بيجيلى حساسيه من موضوع السياسه ده خلاص :D
***********
انتى بالذات
ماكنتش متخيله ان وقت حاجه مهمه زى دى فى حياتى
هتبقى اكتر حد بعيد عنى
او زيك زى اى حد
مش ناسيالك اى حاجه حلوه عملتيها معايا ولا كل موقف وقفتى جنبى فيه
بس دلوقتى بالذات مش شايفه منك كل ده
مش عارفه يمكن لانك زى ما قولتى بطلنا نلاقى اعذار لبعض
والا لان احساسى اللى انا حساه من ناحيتك حقيقه
باختلاف الاسباب
مش ده اللى كنت مستنياه منك !!!
***********
اكتشفت وانا قاعده مع نفسى كده
انى بطلت اعمل كذا حاجه
بطلت اخرج كتير زى ما كنت بخرج
بطلت اتصور مع العيال المتشردين اصحابى كتير
بطلت اروح الاماكن اللى بحبها وكنت بحب اقعد فيها
بطلت ادخل سينما كتير واشوف كل الافلام اللى نازله جديد
بطلت ابقى ماشيه بنظام على الدايت
بطلت اغير نغمه الموبيل كتير
بطلت اشوف افلام اجنبى كتير
بطلت أقرا كتب كتير زى الاول
يمكن لان دول كانوا بيشغلوا فراغ مش موجود دلوقتى
يمكن !!
***********
ناس كتير اووووى من اصحابى وحشونى
نفسى اشوفهم واتكلم معاهم
ومع ذلك
مش بسأل على حد بردو
مش فاهمه دى نداله
والا توهان
***********
مفتقده حاجه
بس مش عارفه ايه هى !!!!!!
***********
انا مابحبش اتكلم فى التليفون كتير
ايه المشكله فى كده !!
حاسه انى عندى فوبيا من اى جرس :D
ليه الناس كلها مستغربه من كده يعنى؟
ليه الاقى دايما حد يطلعلى من تحت الارض يحب يقعد يرغى
ومايعرفش ان ربنا وقعه فى واحده اصلا مش بطيق التليفونات ولا الرغى
انا وللأسف مش اجتماعيه
هو ده حاجه عيب والا وباء ؟؟
:D :D
***********
بقالى كتير بتمنى احلم بأشخاص معينه
ومش بحلم بيهم
وده ماكنش بيحصل !!
***********
انا مش حاسه الاحساس اللى المفروض احسه !!!
***********
بترعبنى فكره المسئوليه بشكل عام
انى ابقى مسئوله عن حاجه بكل تفاصيلها
حساها شئ مش سهل
***********
مش بستريح لو قعدت مع ناس غريبه عنى
او مش متعوده عليهم
نفسى اغير الموضوع ده بس مش عارفه
.jfif)
12 comments
اختصار لكل ده يا دينا احساسك بانك بقيتى مسؤله من حد وحد مسؤل عنك والحياه الجديده اللى هتدخلى عليها ده بشكل عام اما بشكل خاص لموضوع البنادمه اللى بتتكلمى عنها فا ده شيئ طبيعى لانها عندها مرض الجواز والخطوبه فا ازاى انتو الاتنين كده وانتى كده دلوقتى وهى كده واظن انتى فاهمه ده شيئ طبيعى فاعادى ارمى ورا ضهرك واتعلمى لانك مش هتعلمى ببلاش
انا مابحبش اتكلم فى التليفون كتير
ايه المشكله فى كده !!
حاسه انى عندى فوبيا من اى جرس :D
ليه الناس كلها مستغربه من كده يعنى؟
ليه الاقى دايما حد يطلعلى من تحت الارض يحب يقعد يرغى
ومايعرفش ان ربنا وقعه فى واحده اصلا مش بطيق التليفونات ولا الرغى
انا وللأسف مش اجتماعيه
هو ده حاجه عيب والا وباء ؟؟
:D :D
ياااه اخيرا لقيت حد زيى انا بعانى فعلا من نفس الموضوع وكل اللى اعرفهم بيستغربوا من انى بكره كلام التليفونات
اتمنى تخرجى من الحالة دى قريب وترجعى تانى لكل حاجة كنتى بتحبى تعمليها
دع القلق وابدأي الحياة
فكرة التفكير المستمر الي مسيطرة عليكي هتشلك عن القيام بكل حاجة كنتي بتعمليها
وهتكتشفي انك برضو مش بتعملي حاجة ! مش عشان مشغولة لا خالص
خليكي دايما اقوى من أي موقف بتتعرضيله واي احساس بتحسيه وأي حاجة هتقف في طريقك وتجبرك تغيري من نفسك
ابحثي عن راحتك دلوقتي كأولوية
لو هيريحك انك تواجهي حد روحيله فورا وواجهيه
لو هيريحك انك تسيبي شغلك او كليتك يومين .. اعمليها
لو تعرفي حد مش عايزة تعرفيه ... اقطعي تماما
الحياة مابتجبرناش أبدا على وضع ما
احنا بجد بنخلق الحالة الي بنعيش فيها
(:
هاجي تاني وهستنى بوست أكثر تفاؤلا
عشان اتصالات بتقول
الحياة لسه فيها أكتر
NaiRa
فعلا احساس المسئوليه الكامله ده يرعب
غير ان الحريه فى حاجات معينه مش بتبقى زى الاول
ودى اكتر حاجه تضايق
ماتقلقيش انا برمى ورا ضهرى ;)
عادى يعنى مش هتيجى اكتر من اللى راح :D :D
ღ أحاسيس آيـــوشـاღ
احمدك يارب
انتى كمان زيى اهو
يعنى انا مش مخلوقه خرافيه
طب ايه رأيك نكلم بعض احنا فى التليفون ههههههههههه
يمكن نعلم بعض نرغى مثلا والا حاجه :D :D
ميرسى ليكى اوى يا آيوشا ومبسوطه بوجودك هنا دايما :)))
ميرام
اولا اسمك جميل عاجبنى جدا
ثانيا حقيقى كلامك تحفه
فعلا الحياه مش بتجبرنا على حاجه
كل شئ بنعمله فى حياتنا بيكون باختيارنا
واحنا اللى بنتحمل نتيجه اختيارتنا دى
احنا فعلا اللى بنخلق الحاله اللى نعيش فيها
انا مش متشائمه والله بالعكس انا متفائله اهو خالص :D
المشكله انى مش اتصالات
انا فودافون
وفودافون بتقولنا
القوه مش اننا بقينا رقم واحد
لكن فى قوه كل واحد :D :D :D
نورتنى يا قمر والله وان شاء الله البوست الجاى هتلاقى الحياه فيه بمبى خالص هههههه
ههههههههههههههههه
اسمي :h
طبعا بكل تواضع هقولك ان كل الناس بتقولي كدا
اتفضليه هههههه
اانا كمان فودافون :) :)
بس مش مقتنعه بشعارهم
بقول اننا أحسن ناس ...هههههههه
او الدنيا لسه فيها أكتر
ولو فودافون مانزلتش بشعار جامد غير أنا فودافوون دااا أنا هتخلى عن الشركة وهتخسر خسارة رهيبة
(:
لسه برضه مستنية البوست المفعم بالحياة ... :)
ربنا يخليكى يا قمر هو لاقيك عليكى اكتر ;)
انا بردو مش عارفه يعنى ايه انا فودافون
بس لن اتنازل عن فودافون هما اللى يغيروا شعارهم انما انا ماغيرش خطى ابدا :D
ماتقلقش ياقمر التفائل موجوده بمناسبه اننا فى الربيع والحياه بقى لونها بمبى :))
السلام عليكم ورحمه الله وبركاته
كلفنى الاستاذ بيرم المصرى بارسال هذه التحيه لجميع الاصدقاء وذلك لتعذر قيامه بها بشخصه
(اجمل التهانى واطيب الامانى للجميع بمناسبه عيد القيامه المجيد وشم النسيم)
ورد الغصون...
نيابه عن بيرم المصرى
صاحب مدونه كرباج سودانى
كلامك في حاجات كتير قريبة مني يا دودو
وكلامك عبر عن حاجات جوايا من غير ما اقولها ما عدا موضوع التليفون ده :) برغي كتير أو قليل حسب المود بس انا لسه بقرأ وبشوف أفلام غيرت بس نظام القراءة والأفلام من عربي لأجنبي
Anonymous
شكرا ليك اوى :)
Lady E
وحشانى جداااااا والله
الحمدالله انك مش زيى فى موضوع التليفون ده والا كانت تبقى مشكله صدقينى :D
التغيير بردو بيفرق على فكره
زى ما تغيرى من نوع كتب معينه لنوع تانى
نورتينى يا قمر ويارب مش تغيبى تانى كده :))
Post a Comment