اهــلا رمــضـــان

رمضان شهر لكل سنه

بس شهر بالسنه كلها

كل يوم فيه بيكون مميز

كل حاجه فينا بتبقى مختلفه

احساسنا بكل حاجه حوالينا

قربنا من ربنا

صله الرحم بتزيد

بنحس اننا متصالحين مع نفسنا اكتر

متصالحين مع كل اللى حوالينا اكتر

صعب رمضان يجى واحنا متخاصمين مع حد

بنبقى مبسوطين ان كل حاجه من جوانا وحوالينا حلوه

وبيبقى نفسنا السنه كلها تبقى رمضان عشان نفضل بنفس الحاله دى

من اكتر الحاجات المميزه لرمضان

واللى بتعبر عن جو رمضان على مدار السنين

اغانى رمضان اللى ماتغيرتش من زماااان

والواحد صعب يحس بطعم وريحه رمضان فى اغانى غيرها

زى رمضان جانا ومرحب شهر الصوم وغيرها كتير

وعرض الفوانيس فى جميع المحلات

واقبال الناس على شراء الاكلات اللى بيتميز بيها الشهر ده

برغم من انها ممكن تكون متواجده طول السنه

بس ليها طابع مميز جدا فى رمضان

رمضان فى كل بلد من البلاد العربيه ليه طابع خاص

وكل بلد ليها عاداتها وتقاليدها اللى مميزه بيها فى شهر رمضان

يمكن مع السنين العادات دى بتقل او بتختلف الى حد ما

بس الروح نفسها الخاصه بالشهر ده

دايما باقيه

رغم انى دايما بتمنى السنه تجرى بسرعه عشان الشهر ده يجى
بس فى حاجات ببقى مفتقداها دايما
بحس كتير جدا ان رمضان مختلف دلوقتى عن زمان
انا اه سنى مش كبير
بس انا اللى شوفته دايما فى شهر رمضان 

بيقل احساسه ووجوده مع الوقت

 

بمناسبه ان فى حمله للتدوين الشهر ده
ولانها جايه فى شهر رمضان بالذات
فا انا نويت ان شاء الله
انى هبدأ الشهر ده بموضوع كان فى دماغى

هاتكلم فيه عن عادات او تقاليد اتعودنا واتربينا عليها فى رمضان

يمكن تكون اختلفت مع الايام

وفى الايام الجايه

هاعمل سلسله اسمها رمضان بين زمان ودلوقتى
هقول كل يوم حاجه انا شايفاها بقت مختلفه فى شهر رمضان عن زمان
هقول اللى انا شايفاه من وجهه نظرى الشخصيه فقط لا غير

وبعد السلسله دى هاتكلم عن ظواهر اجتماعيه بنلاحظها اوى فى الشهر ده

سواء كانت محببه لينا او غير محببه

يعنى التدوين الشهر ده

هيكون خاص بشهر رمضان الكريم بس

سواء دينياً او اجتماعياً