نساء فى حياتى

البوست ده لـ 3 نساء أثروا فى حياتى بشكل كبير جداً

وحقهم عليا أنى اكتبلهم البوست ده

أولهن .. جدتى أم ماما

أرتباطى بيها من صغرى كان غريب

كان كل اللى يشوفنا يفتكر أن هى أمى مش جدتى

والشبه فى الشكل بينا جدًا كان مساعد على ده

فاكره لحد دلوقتى أول يوم مدرسه 

لما أصريت أبات معاها عشان هى اللى تلبسنى وتخرجنى للباص

فاكره أوى لما قعدت هى على الارض عشان تلبسنى شوز المدرسه الجديد

اللى هى أصلاً جايبهولى واللى لحد دلوقتى فاكره شكله بالظبط

فاكره كل ما كانت بتسافر وانا اعيط

مش عشان حاجه

بس لانى لما كنت بخاف كانت هى اللى بتطمنى

وساعتها كانت مكالماتها ليا كأنها الأكسجين اللى بيرجعنى للحياه

بتحس بيا من صوتى ومهما حاولت اخبى عليها فيا ايه مش بعرف

بحب اسمع تفاصيل حياتها اللى تعبت فيها أوى وخبرتها فى الحياه

بحب قوتها اللى بتبان حتى فى عز بكاها

طلباتى بالنسبه ليها مفيش فيها نقاش لازم تتحقق

حاسه انى بعد ما اتجوز هافتقد وجودها اوى معايا فى نفس الاوضه

واسرارها اللى كانت مش بتقولها لحد غيرى

ثانيهن .. ماما

هو بعيداً يعنى عن ان اى حد بيشوفك مش بيقتنع ابداً انك ماما

لانك بالكتير تبقى اختى

بس انا ببقى مبسوطه بـ ده

فرق السن اللى بينا اللى مش كبير

بيحسسنى انك فهمانى ومستوعبه مشاكلى فى كل مرحله من حياتى

كل ما بكتشف صفه جديده فيا

بلاقيها بالظبط فيكى وبتأكد يوم عن يوم أنى شبهك اوى فى كل صفاتك

بقف قدامك عاجزه عن اى كلام لما بحس انك عايزه تجبيلى حته من السماء

عشان تحققيلى كل اللى بتمناه وابقى احسن حد فى الدنيا

برغم قوتك اللى بحبها الا انك قدامى انا واختى بتبقى اضعف حد فى الدنيا

وخصوصا لانك عايزه تسعدينا

من صغرنا وانتى شايله همنا وبتحاولى تكونى لينا الأم والأب

وده زاد بعد وفاه بابا اكتر كمان

لما حجزت بالصدفه فرحى يوم عيد ميلادك

حسيت ان ربنا خلى ده يحصل عشان تكون دى هديتى ليكى

انى اريحك من همى شويه

مش اوى يعنى لانى كام يوم واجيلك انا وهو ما انا مش هسيبك لوحدك :)

كل ما بتخيل فى يوم من الايام حياتى تبقى من غيرك

بحس انى هضيع اوى وابقى ضعيفه اوى وبنكسر اوى اوى

أما ثالثهن .. خالتى الكبيرة

بالرغم من بعد المسافات الدايم بينا

وبالرغم من ان المده اللى بشوفك فيها كل سنه مش بتتعدى شهرين تلاته

ألا ان روحك دايما لمسانى وبتحسى بيا من غير حتى ما اتكلم

بسببك عرفت يعنى ايه حد يبقى بعيد اوى عنك

لكن قلبه قريب اوى منك

معاكى عرفت يعنى ايه الحب والاهتمام مش بالقرب الجسدى

لكن بقرب الارواح لبعضها

بحس بـ دة اكتر

لما ابقى فى وسط مشكله و مش عارفه احلها

وانتى بمكالمه منك بتحلى حاجات كتير

بحس بـ ده لما ابقى مضايقه وحابسه دموعى وبعمل نفسى قوية

واول ما انتى تكلمينى وتقوليلى مال صوتك

ماعرفش امسك دموعى اكتر من كده

دايماً بحس ان فى حاجه قويه اوى جوايا بتربطنى بيكى

وعارفه ان نفس الحاجه دى جواكى

نفسى اوى ابقى فى قوتك وقدرتك الجباره على التسامح والعطاء

ولانى مستخسره بصراحه ان وجودك فى حياتى يبقى تحت مسمى انك خالتى وبس

فـ انا بعتبرك دايما امى التالته

عارفه ان البوست دى مدى اوى على جو عيد الأم وده مش وقته خالص

بس كان لازم اقولكم الكلام ده دلوقتى
عشان عارفه انى بعدى حاجات كتير فى حياتى بسببكم

و لانى خلاص المفروض هابطل ابقى البنوته  بتاعتكم

وهابقى كبيرة واعتمد على نفسى بعيد عنكم

ده المفروض يعنى  :D
 ولان كمان من حقكم عليا انى أشكركم اوى على كل حاجه عملتوها عشانى ♥