حفل توقيع "قصاصات أنثوية" بمعرض الكتاب

الكتاب ده من أول ما مسكتة كنت فرحانة بية
لأنة فية حاجات كتير حصلتلة ما تتصدقش
فكرة أنى اتشجع وأقدر أثق فى نفسى أنى فعلا هاخلصة
حلمى اللى حاولت احققة فى وقت كنت مستبعدة فية انه يتحقق نهائى
واللى اتحقق أصلاً فى وقت قياسى جداً
ولحد ما مسكتة بين أيدى كنت لسة بردو مش مستوعبة أنه بقى حقيقى
ولما كذا حد قراه وقالى الكتاب جميل وانا لاقيت نفسى فية 

وده اللى انا كنت عايزة أوصلة
ولما حد أصلا مش يعرفنى والاقية بيقولى كلامك حلو
ولما البيدج بتاعه الكتاب الاقيها يوم عن يوم بتزيد من ناس اصلا مش اعرفهم
ولما عدد اللى عايزين يقرأو الكتاب على موقع الجودريدز قرب لـ 240 تقريباً
ولما الكتاب نفسة يبقى فى الترتيب الـ 19 لقائمة أفضل الكتب 

والتصويت معظمة بردو من ناس مش اعرفهم
كل ده بيخلينى مصدقة أنه فعلاً كتابى أنا وانى بحبة :)

بس اللى هيخلينى مبسوطة بية أكتر وجودكم :)
حفلة توقيع الكتاب هيكون فى معرض الكتاب إن شاء الله
يوم الأحد 3 فبراير الساعه 4 العصر
فى جناح دار ليلى اللى موجود فى خيمة 2




اليوم ده هيكون أجمل كمان
لان الساعه 3 فى كمان حفلة توقيع كتاب صندوق ورق
اللى بيجمعنى بمؤلفين انا بحبهم على المستوى الشخصى أد ما بحب كتابتهم

الكتاب موجود من دلوقتى فى معرض الكتاب ومستنيكم
 
وهستناكم انا يوم 3 فبراير
لان وجودكم هيفرق اوى اوى معايا
هستنى تحتفلوا معايا بكتابى وكتابكم
تحتفلوا معايا بالكتاب اللى انتم كنتوا سبب فى بدايتة

سبب انة يكون كيان جوايا قبل ما يكون حبر على ورق
هستنا كمان تقرأوا الكتاب وتقوليلى رأيكم
اللى محتاجة فعلاً ومهتمة أوى أوى أنى اعرفة  :)

readmore »»

ومضات....

وضعت ملعقة من القهوة السريعة داخل الكوب وفوقها ملعقتين من السكر

وصبت قليل من الماء الساخن فوقهما

وظلت تنظر لـ الماء وهو يتسرب إلى حبيبات السكر واحدة تلو الأخرى ..

فيحولها من اللون الأبيض الناصع إلى الرمادى الباهت

كما حياتها بالضبط .. !

جلست أمام المرأه لا تعرف ماذا تفعل بشعرها الناعم الطويل

والذى أصبحت تعانى منة كثيراً منذ نضجت

فأحذت تصنع جدائل كالتى كانت تصنعها لها جدتها

وتتوسطها بشريط من الستان الوردى

متمنية إن تعود إليها طفولتها كما عادت إلى الطفولة خصلات شعرها

ظلت ممسكة بها لدقائق قبل إن تقرر ما هو اللون التالى والأخير

الذى ستستخدمة لتلون أخر جزء شفاف بها

فـ لم تجد سوى اللون الأبيض لتكتمل بة جمال لوحتها

وأعادت أرتداء نظارتها بعد تلوين زجاجها بألوانها المفضلة

لترى الحياة كما تتمناها دوماً

readmore »»

كلام والسلام .. كلاكيت 23 مرة

 

لما بنبدأ اى فكره جديده فى دماغنا
فكره خاصه بمستقبلنا او طموحنا او حاجه بنحلم بيها
بنبدأها بحماس اوى
بس اول ما بناخد خطوات ملموسه فى تحقيق الحلم ده
بيبطل حماسنا يبقى زى الاول
او على اقل تقدير بيقل
يمكن وقتها بنكون اطمنا ان حلمنا ده ممكن يكون فى ايدينا
ومش مستحيل اوى زى ما كنا حاسين فى الاول

*****

فى كل مشكله بمر بيها بكتشف حاجه جديده فى نفسى
اهم حاجه عارفاها فيا انى مابعرفش اسامح
وغير وارد استمالتى بأى شكل من الاشكال
لا بكلام ولا بذكريات ولا حتى بهديه
لما بقرر انى مش اسامح ده معناه انى فعلا من جوايا مفيش مجال للتسامح ابداً
يمكن يكون قلبى اسود او شريره
بس للاسف مابعرفش انسا القسوه
ولا اى حاجه وحشه اى حد بيسمح لنفسه انه يعملها فيا

*****

 
لما بتتوقف عن ممارسه اى عمل وبترجعله بعد فتره تانى
بتكون فى حاله من اتنين
ياما بتكون فى حاله فقدان لبريقك فى العمل ده
او فى حاله لمعانك وازدهارك فيه
حاول دايما تكون فى الحاله التانيه
او على أقل تقدير تكون فى نفس بريقك الاولانى

*****

 
كل ما بشوف اسمك قلبى بيتخطف
مش عشان هو اسمك وبس
لكن عشان كان نفسى احبه فى وجودك اكتر من كده

*****

 
بعض ردود افعالنا مش بتكون فعلاً من جوانا
بس اوقات بتكون عشان اللى حوالينا منتظرين مننا رد فعل معين
وعشان الموقف اللى بتتحط فيه بيحتم عليك يكون ليك رد فعل
فـ بالتالى عقلك بيترجم أنك لازم تعمل حاجه
حتى لو أنت فعلاً مش عايز

*****

 
كان نفسى اوى اوى تكون معايا الفتره دى
كان نفسى تشوفنى بفستان فرحى وانت اللى تدينى بأيدك لمحمد
اللى انا واثقه انك كنت هتحبه جدا لانكم شبه بعض
كان نفسى اوى تشوف كتابى اللى اسمك جنب اسمى عليه
واللى بردو متاكده انك كنت هتحبه حتى لو كان اسوء كتاب فى الدنيا

*****
 
اسوء احساس انك تكون مجبر تتعامل مع حد
انت مش حابب تتعامل معاه
القدر والزمن اوقات بيجبرنا نعمل حاجات بايخه اوى

readmore »»